ክንቲ አጌራው ውላቱዊ ዜርፍዳ ዝኩኽ ፍሺ እንዙራ እስታው ጋቲዊያኽ:: እን ያኻው ኩፅኒ ክንቲው ዜርፍ ፃንኩት ማንዲስትኹስታ ዋይሚስታ ያኻኒያኽ::
ቤዴር ኑንኩ አሜትካዳ አጌር አቩቑ አችስ 12ንቲ ቤኑ ፍታኒዳ ቹዋስ ጌቴማው ፍታኒ ችምቢትጝጙስታ ፍታኒ ዳዴኽስትጙ ችግር ምክንያታስ አግልግሎቲ አጌርታጊ ፍታኔ ሴሬዝጙ፣ ካብስ ፌቴንጙስታ ፌቴንፅካ ስፍርካዋ ኪስጙ አኺኒ ካስጙስ እጂጝ ታክስስቴ:: 2016 ም/አ ክንቲው ዝቤንዳ 12ንቲ ቤንካው ፍታኔ እይጙ ቴርትኪላ ወሬኬትስስታ በየነ ሜሬብሊ ኬምፕስ ኬምፖ እይስትⶓ ጄሜርጝስ ፍታኔ እይጙ ዙሪዳ ጌቴማንኩ ችግርካዋ ዊዳፊስ ኽያው አኽጝ አምንስታማ እንፃኽስስታማጊ አኽⶓኪላ አዲስ ዘመን ጋዚቲው ንባር ቶኬሜ::
2017 ም/አሜቱ 12ንቲ ቤንካው አጌር አቩቑ ፍታኒስኪላ ፍታኒውሳ ዳዴኽስትⶓስታ ችምቢⶓ ኔኬታው አኺኒስ ወሬኬትስስታ በየነ ሜሬብስ እይስታው አኽጝ ጌሌፅስታ:: እምስትኹ አሜትስኪላ 608 ሻይዴስ ጃላ ክንትንትካ አጌር አቩቑሳ ፍታኔ ፌቴንስትጝስ ሜዜጌብስትጝ ቶኬምስታ:: ወሬኬትስ ፌቴንስታንኩ ስርኩ ልማትካ ዋኽትጜካያስኩ፤ ኮምፒውተርስታ ኢንተርኔት ኮኔክሽን ዳላዊ አኺኒስ እላቲኩ ዙራሙርካዳ አግስታንኩ ፌቴንስታንትካ አኽⶓኪላ ክንቲው ሚኒስትርዴስ ፉኽ ንባር ቶኬሜ:: ካሌቕትስ ፍታኔ ፌቴንስትጝስኪላ ሊሊትጙንኩ ፅናትኩ ሴልካዋ ቴኬምስትካማ ቴርቴካማጊ አግስታና::
ክንቲ ጝንካኪላ ክንታንትካ ፍታኒስ ያኻውሳ ቴርቶ ፄውጝስ ካላንታ ክዳማድጉዌጊ ሜፃፍ ጝና ብስስታማ ፂኒሳንታ ፄውጝስስታ ቼካማጊ ክንታኑሳ አኺኔ አሜችጝፅጝስ ካሊስታውሳጊ እርዳቴ ፄዌካማጊያኽ:: እን ይቢቺ ኩፅኒ ዋይሚስታ ያኻንታ ፄዋቲው አኽጝስ ቹዋ ታብልኪላ ጛጂዴስ ማንዲስታውሳጊ ድጋፎ ፄውጝስስታ ክንታንትካ ሼውፅንታዳ ቻኒስት ፌቴርስታውላ ፌቴንስታንታ ፄውጝ ቱስቴ:: ሴኒ 23ዴስ አምሊ 8ዋኺስታ እጄውሳ አጌር አቩቑሳ ፍታኔ ፌቴንስትጝስኪላ ዙራሙሪ ሴላማ አኽጝ ቲኪስታንቲ እላቲው አኽጝስ ውላጊ ሴላሞ ማንዲፅጝስ ሼውዴስ እንፃኽስትጝ ፋይፄ::