ጋቻ ፌዜዝፅኹ ሙሪ

ዘውዴ በካሉ

ፍትሬቱስታ አቓ ግብሪ ቱሪስቱ ጉስፂ ስፍሪስታ ኽታዊኒ ታሪክስታ አሻሪ ይቶፒያ አሌምዳ ቱሪስቶ ጉሳንኩ አጌርካ ክቻዴስ እምፕላ ታኻታ ፄዋ::  ይቶፒያዳ ቱሪስቱ ዜርፍስ አይማኖትኩስታ ባይልኩ ቱሪስትኩ ጉስፅካ ስፍርካ ሚንቺትስ አግስታንኩ ዙራሙርካዴስኪላ አማኻሪ ክልል እምፕሊያኽ:: አማኻሪ ክልልዳ አዊ ብሄረሰቡ ቺፅጝፂዳስታ ዙራሙሪዳኪላ ሚንችካ ቱሪስትኩ ጉስፅካ ስፍርካ አግስታና:: ሊጊሲሚ ታሪክ ዝኩክ ጌዳምካ፣ ዋሽካ፣ ብሽታንካ፣ ብራኒኩ ፁፍካ እሎ ጉሳንኩ ካዌንካ፣ ካዌንኩ እንሴስካ ቻኽካስታ ጉዋኽካ አግስታና:: አዊ ብሄረሰቡ ቺፅጝፂዳ አግስታንኩ ቱሪስትኩ ጉስፅካ ስፍርካ ክቻዴስ ዚንጊኒ አይክ እምፕሊያኽ:: ዚንጊኒ አይክ ብሄረሰቡ ቺፅጝፂ ባንጂ ወረዳ ቺውሲ ኬቤሊዳ አግስቴ:: አዲስ አበባዴስ 445 ኪሎ ሜትር፣ ባርዳርዴስ ዴሜካ 130 ኪሎሜትር እንቲታኪ ዴሜካ እንጃቢሪ ኬቴምዴስ ዋልታ ኪሎ ሜትር፣ እቺትዳ ደቡብ ምሰራኩ ዳብዚዳ አግስቴ:: እንጃቢሪዴስ  ዚንጊኒ አይክሾ ልኩስ ካስጝስ ፋዩኒኪላ ፅንኩቶ አይሮ አግፄካማጊስታ ፍትኽ ንካማጊ ካስጝስ ካሊስቴ:: ዚንጊኒ አይክ እንኩላሉ ማሊፊ ዝኩኽያኽ:: አይኩ ኬሌም ዴሜካ አምሉስታ ድቡ ያኹኽ ዙሪዳ ዝኩንኩ ቴክልካው ምክንያቲስ   አኽጝ ዙሚስቴ:: አይክ ሊሊትጙንኩ ካናኻፅካስ ኬቤብስትኹ፣ ሊሊትጙንኩ ካዌንኩ እንሴስካስታ ቻኽካ፣ ግዲትኹ ቱሪስቱ ጉስፂ ሲፍሪያኽ:: እኒጛኪላ ቾቻ፣ ውግሊ፣ እኹዊ፣ ግርሚ፣ ጋኽሪስታ ፄጌርጙንኩ አግስታንኩ አኽⶓ ባንጂ ወረዳው ኮሙኒኬሽኑ ማቤራዊ ፍንዳ ፉኽ ንባር ቶኬሜ:: እን ፍትሬትኩ አብትካስ አድርትኹ ስፍሪ ናካ ዴሜካ ሰላሙ ችግርስ ጐቤናንትካ ስፍሪሾ ካስካማ አንኩሌ ፍትኽፃቲንታስታ ዙራሙሪኩ ዝኩዋንትካ እንፅኺውሳ ድሎ ፌቴርካማ ዝኩዊኔ ጉሳቲንታ ፄውስታ::

እን ሰላሙ ችግር ቱሪስቱ ዜርፍዳ ታምፅኹሳ ቻኒስቶስታ ናካ ዚንጊኒ አይክ ዝኩኽሳ አኺኔ ካንትኹስ እኖጂኪላ ስልኪስ እጂጜ ፄውና:: ዚንጊኒ አይኩስታ ዙራሙሪው ጐቤንፃንቲ ዎታት ዩናሰ መኩሪያው ዚንጊኒ አይክ ቱሪስቱ ጉስፃ ያኻማ እንፅኼ ጄሜሩኒዴስ 15 አሜትዴስ ጃላ አኽⶓ ድኹዋ:: አዊ ብሄረሰቡ ቺፅጝፂዳ ዚንጊኒ አይክ ይቢቺ ያኻውላስ ሚንችካ ታሪካውካ ስፍርካ አግስታንኩ አኽⶓ ጉሽኹ ዎታት ጐቤንፅጙ እንፅኺዳ ሚንችካ ዎታትካ አሴሜርጜካማ እሺንኩ አኽⶓ ዙማ:: 2007 ም/አሜትዴስ ጄሜራማ ዚንጊኔስታ ዙራሙሬ ጐቤንፅጙ እንፅኺዳ አሴሜርጛማ እንፃኽስታማጊ አኽⶓ ድኹኻ:: ዎታት አባላምቲዳ 11 ዎታትካ አቺትጜካማ ናካዳ አንኩዋ ይቪቺካ እንፃኽስታንኩ አኽⶓኪላ እንክርፃ::

ሰላሙ ወክትዳ እንጃቢሪ ውላስጊ ክችስታ ውላ ፋራኑ ስፍሪ አኽጝስ ጌርክስ 50ዴስ ጃላ ጐቤናንትካ ዚንጊኒ አይክሾ ይንታኒስ እሺⶓኪላ ዎታት ድኹዋ:: ፋዝጋውስታ ትር አርፊ ኻሱ ቴርት ካስጛው አኽጝስ ፂኻፂኻ ዚንጊኔ ካስካማ ፎቶ ጁጝስስታ አንኩሌ ፍትኽፅጝስ ቴኬምስታሺኑ ስፍሪ ናካ ሰላሙ ችግርስ አቒ ሲፍሪሾ ካሳቲው አኽⶓስታ ጐቤንፅጙ እንፅኺ ቲሪትⶓ ድኹዋ:: ጐቤንፃንትካ ይቢችካ ያኻኑላስ ዚንጊኒዳ ሻየስታ ቡኖ እንፃኽስትጝስ፣ አጌሩሳ ባይሎስታ ታሪኮ ካንትፃንኩሳ ዋንቼ፣ ችሬ፣ አኒኒውሳ ምርቶ፣ ስዮስታ ግዳግዴ ዋይጝስ እንፅኺውሳ ድሎ አግፃሺንኩ ዙራሙሪኩ ዝኩዋንትካኪላ እንፅኺዴስ ሴጋ አኽⶓ ቶኬማ::

አዊ ብሄረሰቡ ቺፅጝፂዳ ሚንችካ ጐቤንስትካያስኩ ስፍርካ ዝኩⶓ ድኹኽ ዎታት ጐቤናንትካ ጉቢንጚው ወክትዳ ሊጊሲሜ ጊዞ እጄንታ ዋኽትጙኽ ሊንጊዴ ቻቤልጝስ ያኻው ፉሪፂ ዚንጊኒዳ እላቲው አኽጝ እምፕል ችግር አኽⶓ ዙማ::

አጌሩ ሰላም ቼሜትጛኒ ቱሪስቱ ዜርፍ ሌጌሳታስታ ጐቤናንትካ ሊጊሲሜ ጊዞ እጄንታ ዚንጊኒዳ ሆቴል፣ ሪዞርት፣ ሎጂስታ አዊውሳ ባይሎ ካንትፃንኩ እንፅኽካ እንፃኽስቱኒጊ ቱሪስቶ  ጉስጝዴስ ድምክና ሚንችካ አቕስ እንፅኺው ድል ፌቴርስታው አኽⶓ ዙማ:: ባርዳርዴስ አዲስ አበባሾ፣ ማርኮስሾ ናማኪ ቻግኒሾስታ ሚቲኪሊሾ ካሳው ዳድቲኒ እንጃቢሪዳ ፉራማ ዚንጊኒውሳ አይኮኪ ያኻ እሊኩሳጊ ብሄረሰቡ ቺፅጝፂዳ አግስታንኩሳ ቱሪስትኩ ጉስፅካ ስፍሪካዋ ጐቤናንታ ዎታት ዮናስ እንፅኼንቶ ፌያፌይጝፃ::

ባንጂ ወረዳ ባይልስታ ቱሪዝም ፅፌት ጝናሱ አላፊ አለሚቱ ቢተው ኑኑውስታጊ አዊ ብሄረሰቡ ቺፅጝፂዳ ሚንችካ ቱሪስትኩ ጉስፅካ ያኹንኩ አይክካ፣ ፉዋፉዋትካ፣ ታሪካውካ ስፍርካ፣ ጌዳምካ፣ ብሽታንካስታ ካዌንኩ እንሴስካ አግስታና :: ዚንጊኒ አይክ እኒጛ ቱሪስቱ ጉስፅካ ስፍርካዴስ እምፕል አኽⶓ ጉሹንኩ ፅፌት ጝናሱ አላፋ ዚንጊኒ አይማኖትኩሰታ ባይልኩ ቴርትካ አኮሜችስታኑ ስፍሪ አኽጝስ ሊሊታ ፄዋው አኽⶓኪላ እርዳትፅካ::

እን ሊሊትጙንኩ ስፍርካዴስ ጐቤናንትካ ይንቴካማ አንኩሌ ፍትኽፃኑ ስፍሪ ሰላሙ ችግርስ ጐቤናንትካው ቼፍ ኔኬትⶓ ጌሌፁንኩ ፅፌት ጝናሱ አላፋ ቱሪስቱ ዜርፍ ዋሺኒዴስኪ ጃላ ሰላሞ ፋያው አኽጝስ ዙራሙሪኩ ዝኩዋንትካ እንፅኺውሳ ድሎ አግፃቲንታ ፄውⶓኪላ እንክርፄካ:: ሰላሙ ችግርስ ዙራሙሪዳ ሆቴልስታ ሪዞርት ጊቢትሰታታ እንፅኺ ጄሜርስታማ ቲሪጝ ቱሪስቱ ዜርፍ እሳንጛቲታ ፄውⶓኪላኽ አላፋ ጌሌፁኑ:: ጐቤናንትካኪ ያኻ ዙራሙሪኩ አቕ ሊጊሲሚ ጊዙሳ እጂጜ ዚንጊኒ አይክዳ ፄዋንታ ስፍሪዳ ሎጅ፣ ሪዞርት፣ ሆቴል፣ አዊውሳ ባይሎ ካንትፃንኩ ፊሪሲ፣ አዊው ስይስታ ሚቲ እንቲታኪ ጀልባስታ ሊሊትጙንኩ አክኽካ ቴርትካማ ቱሪስቱ ጉስፅካ ያኻንታ እንፃኽስትጝስ እክድ እምስትⶓ ፅፌት ጝናሱ አላፋ ጌሌፅካ::

ናካዳ ካንትስታማጊ ዝኩኽ ሰላሙ አኺኒ ሲፋታጊ ቱሪስቱ እንፅኺ ሲፋው አኽⶓ ጉሹንኩ ፅፌት ጝናሱ አላፋ ዋሺኒኪ ስፍሪዴስ እንጃቢሪሾ ይንታንታ አቕ ፉሪፄ እንጃቢሪዳ ፄዌካማ ብሄረሰቡ ቺፅጝፂ ሚንችካ ፍትሬትኩኪ ያኻ አቓ ግብርካ ቱሪስትኩ ጉስፅካ ስፍርካ አግስታኑ አኽጝስ ጐቤናንታስታ አንኩሌ ፍትኽፃንታ እንፅኼንቶ ፌያፌይጝፄካ:: ብሄረሰቡ ቺፅጝፂዳ አግስታንኩ እሊኩ ባንጂ ወረዳዳ አግስታንኩሳ ቱሪስትኩሳ ስፍርካዋ ቴሌግራምስኪ ያኻ ማቤራዊ ፍንዳ አቕትጝፅጙሳ እንፅኼ እንፃኽስቴካማጊ አኽⶓ ጌሌፁንኩ አላፋ ውላጊ አላፍትስ እንፃኽስታንታ እንፅኼንቶኪላ ፌያፌይጝፄካ::