ፍታኒው ቤዴራ ቴርት

ዘውዴ በካሉ

ክንቲውሳ ፃንኩቶ ማንዲፅጝስ ፍታኒው ምዛኒው ቴርት ትኩት እይስታማ እንፃኽስታው ቴግባሪያኽ:: ክንቲው ሚኒስቴርኪላ ፍታኒ ኽሳንትካ ኾትካዳ እይስታታስታ ፍታኒው ችምቢትጚ ዝኩዋቲታ ትኩቶ እዩኒዴስ ሹኻንቴ አሜቶ እሜ:: ክንታንትካ 12 አሜቶ ክንቴካማ ድርትኒ ኩፔ አፌራማ ዩንቨርስቲሾ ቱጝስ ፍታኒዴስ ቤዴርካማ ፄዋኑ ቤዴራ ቴርት ኽሳንቲ ፍሺ ዝኩኽያኽ::

2015 ም/አሜታዴስ ጄሜራማ 12ንቲ ቤንካው ፍታኒ ኦንላይንስ እይስትⶓ ጄሜራ:: ክንቲው ሚኒስቴርዴስስታ ክንቲው ምዛኒስታ ፍታኒው አግልግሎቲዴስ አግፅንኹ ንባር ቶኬማውስታጊ 2017 ምሬት አሜትዴስ 12 ቤንኩ ክንታንትካ ሴኒ 23 ጌርክዴስ አምሊ 8 ጌርኮ ኺስታ ፌቴንስታና:: ፍታኔ ፌቴንስታንኩ ክንታንትካኪላ 6 ሊኻ ሱኺቲ ሻይ ያኻኒስ ፍታኒኪላ ወሬኬትስስታ ኦን ላይንስ እይስቴ:: ወሬኬትስ ፌቴንስታንኩ ፍትሬት ሳይንስኩ ክንታንትካ ሴኒ 23 ዴስ ሴኒ 25 ጌርኮ ኺስታ ፌቴንስታንኩ ያኹስ ማይቤራዊ ሳይንስኩ ከንታንትካ ዴሜካ አምሊ 1 ዴስ 3 ጌርኮ ኺስታ እይስታው አኽጝ ጌሌፅስታ:: አዊ ብሄረሰቡ ቺፅጝፂ አንኪሺ ጉዋጉሲ ወረዳ ሚሲሊ ትክላሊ ላጛንቲ አች ክንቲ ጝናስኩ ክንታንትካሊስታ ክንትፃንትካሊ እንቲታኪ ትኩታኩ አካልካሊ ፍታኒውሳ ቤዴራ ቴርቶ ካንትኹስ ስልኪስ እጂጜ ፄውና::

ክንታንቲ የኔሰው አስፋው ሚሲሊ ትክላሊ ላጛንቲ አች ክንቲ ጝናዳ 12ንቲ ቤኑ ክንታንቲያኽ:: ክንታንቲ አዳሪ አኹኪ ክንቲ ጝናዳ ቻማጊ ክንታው ክንታንቲ አኽⶓ ድኹዋ:: አጌር አቡቑሳ ፍታኔ ፌቴንስትጝስ ቤዴራ ቴርቶ አሌዳማጊ አኽⶓ ዙሙኽ ክንታንቲ ክንቲ ጝና ቴርስኹሳ አዳሪ ክንቲውሳ ድሎ ቴኬምስታማ ዳላውሳ ቤዴራ ቴርቶ ፄዋማጊ አኽⶓ ዙማ:: 12ንቲ ቤኑሳ ክንቲውሳ ጛሬ አኹኪ ፋንቲቴ አሌድካማ ሴስታዴስ ጄሜራማ ዝኩንኩሳ ፍታኒስ እርዳታንኩሳ ጛርካዋ ጋምቤካማጊ አኽⶓኪላ ክንታንቲ ድኹዋ:: ሚሲሊ ክንቲ ጝናዳ አዳሪ ክንቲ ጝና ብስስትጝ አኹኪ ጄሜርጝ ክንታንትካ ቤናኻዳ ክንቱኒዴስ ድምክና ፍታኒስ እርዳታውሳ አቕቶ አግፃንታ ፄዋው አኽⶓ ዲብሳ::

ሚሲሊ ትክላሊ ላጛንቲ አች ክንቲ ጝና 15 ክንታንትካስ አዳሬ አኹኪ ቼካማጊ ክንታኑሳ ክንቴ እያማጊ ፋይፃውሳ ዲቦጊ ንጝኪ ኹርፄ፣ አንቤብጝስ ካሊፃውሳ ታፉሳ ሶላሮ፣ ሻይስ ያኻውሳ ሽኩዋሮስታ እሊኩሳጊ ዋኽትጝፃማ ዲግስⶓ እንክርፃ::

ክንታንቲ የኔሰው ክርፄ ዋይሜ ሜዜጌብፃማ ጝን አቖኪ ያኻ ክንቲ ጝናሳ እቑፅጝስ አኬድⶓ ድኹዋ:: ክርፄ ዋይሜ ሜዜጌብፅጝስ ፄዋው ፅሬትዳ ጝንአቕ፣ ክንትፃንትካስታ አፄብካ እርዳትካማጊ አኽⶓኪላ ዲብሳ::

ፍታኒ ዩኒቨርስቲዳ እይስትጝ ፍታኔ እንዳርማኪ ስጋታ ጋቲታ ፌቴንስትጝስ እርዳታው አኽⶓ ዙማ:: ክንታንቲ ክንታንትካ ሼውፅንታስ ቴርታንታስታ ዩኒቨርስቲዳ ፌቴንስትጝ  አንቤብኹ ልክስ ፌቴንስታታ ፄዋው አኽⶓ ሼውፅንታው ውማይቴንካስ ሼውቲ እይሰታማጊ አኽⶓኪላ ድኹዋ::

እሊው ሚሴሊ ላጛንቲ አች ክንቲ ጝናሱ ክንታንቲ አለምነህ ካሳሁን 12ንቲ ቤኑ ፍትሬት ሳይንሱ ክንታንቲያኽ:: አጌር አቩቑ ፍታኒስ ቴርትጝስ ካላንታ ጛጂ ፄዋኑ ፅሬትዴስ  ድምክና ክንትፃንትካ ፊቲ ጊዝስስታ ክዳማ አድጉዊዳ ክንትፄካማጊ አኽⶓ እንክርፃ:: ፍታኒው ጌርክ ታንባማጊ አኽጝስ ክንቲው ፋንቲቲ አሌድስታማ ክንትፃንትካ ካሴ ቴርሴካማስታ ፌይኹ አሜትዳ ፌቴንስቱኑሳ ሽቶ እንፃኽስቴካማጊ አኽⶓ ክንታንቲ እንክርፃ:: ክንቲ ጝና ክንታንትካ ፍታኒስ ዳላውሳ ቴርቶ ፄዋንታ ሜፃፍ ጝና ክዳማ አድጉዌጊ ብስስታማ ፍታኒስ እርዳታንኩ ጋይድካስታ ታክስፅካ ቴርትካማ ዋኽ ቤዴራ ቴርት አሌድስትⶓ ድኹዋ:: ሚሲሊ ትክላሊ ላጛንቲ አች ክንቲ ጝና አዳሪ /ክንታንትካ ቼካማጊ ክንታኑሳ/ ክንቲ ጝናስ ጄሜሩኒዴስ ላጛንቲ አሜት አኽⶓ ቶኬሙኽ ክንታንቲ ክንቲ ጝና ጌፄር አኽጝስ አዳሪ ክንታንትካስ ዋኽትጙኽ ዲግስጝጚ እላ አኽጝ እምፕል ችግር ያኹኒኪላ ክንቲ ጝና ካላው አክምስ ክንታንትካስ ዲግሳማ ቴኬምስትካማጊ አኽⶓ እንክርፃ::

ክንፃንቲ አየነው አስማረ ሚሲሊ ላጛንቲ አች ክንቲ ጝናዳ ክንትፃንቲያኽ:: 12ንቲ ቤንኩ ከንታንትካ ፍታኒስ ቴርታንታ ውላጊ ክንትፃንትካ እርዳትካማጊ አኽⶓ ዙሜካ:: 12ንቱ ቤንኩ ክንታንትካ ፌይኹ አሜትዳ 11ንቲ ቤኑሳ ባይሎጂስታ ኬሚስትሪ ክንቲውሳ አይኔቶ ላጛዴስ ጃላ ፋንቲቴ ክንታኑላስ ይጉኑሳ ፊቴ ጊዞስታ ክዳማ አድጉዌ ቴኬምስትካማ ክንትⶓኪላ ድኹዌካ:: 12ንቲ ቤንኩ ክንታንትካስ ፍታኒስ ቴርታንታ ቤኑ ክንቲዴስ ድምክና ክንታንትካኪ ያኻ ክንቲጝና ጐሌሉክ ክንትፃንትካ ፍታኒስ ቴርሳንኩ ክንቲኩሳ ጛርካዋ ጋምባና:: 2016 ምሬት አሜትዴስ ፍና ፌቴንስቱንኩሳ ፍታኒኩሳ ኾትካዋ እንፃኽስትጝስስታ ክንታንትካ ፂኒሳኒስ ግልፃ ያኻያሱሳ ክንቲውሳ ጛሬ ጋምቢጝስ እርዳትካማጊ አኽⶓ ክንትፃንቲ አየነው ዲብስካ::

ክንታንትካ ክርፄ ዋይሜ ሜዜጌብፃንታ ክንታንትካ ዋኾ ሳቶ ፍታኒስ ቴርታንታ ወመህሊ አኽጝስ ኩስጜካማ ቹዋ ታብል ክንታንትካስ ፂኒሳኑሳ ጊዞስታ ፋይፃውሳጊ ዋኽትጝፃንታ፣ ክንቲ ጝና ዴሜካ ክንታንትካሰ ፍታኒስ እርዳታውሳ ግብአቶ ዋኽትጝፃታ ኩስጜካማ እንፅኺሾ ቱⶓኪላ ክንትፃንቲ እንክርፄካ:: ክንታንትካ ፍታኔ ፌቴንስታኑ ዩኒቨርስቲዳ አኽⶓ ጉሹንኩ ክንትፃንቲ ጌፄሩ ዙራሙሪዳ ክንቱንኩ ክንታንትካ ኬቴምሾ ካስካማ አንኩሌ አሬቤሽስታቲንታስታ ፍታኒ ዩኒቨርሰቲዳ እይስታኒ ይዝኩስካማ ካንታቲንታ ሼው ፅንታስ አድርታንታ ሼው ፅንታኩ ውማይቴንካ ሼውቴ ፌቴርካማጊ አኽⶓ ድኹዌካ::

ሚሲሊ ትክላሊ ላጛንቲ አች ክንቲ ጝናሱ አላፊ አበራ ቢሻው ኑኑውስታጊ ክንቲ ጝናዳ 136 ክንታንትካ አጌር አቡቑሳ ፍታኔ ፌቴንስትጝስ ቴርቴካ:: ሚሲሊ ትክላሊ ላጛንቲ አች ክንቲ ጝና ሚዲቢኒ ክንቲዴስ ድምክና አዳሪ /ክንታንትካ ቼካማጊ ክንታኑሳ/ ክንቴ ጄሜርⶓ ጌሌፅካ:: ፌይኹ አሜትዳ አምቢቒ ክንቲ ጝናዴስ ሙካሬ ካፅካማ ላጜታ ክንታንትካዋ አዳሪስ ክንትፄካማ አንኩዋ ዩኒቨርስታ ሚፅፄ ዋይሜ ሜዜጌብፁንኩ ያኻኒስ ላጛ ዴሜካ ሪሚዲያሎ ቱⶓ እርዳትፅካ:: 2017 ምሬት አሜትዳኪላ ክንታንትካ ክርፄ ዋይሜ ሜዜጌብፃንታ 17 ክንታንትካስ አዳሪ /ቼካማጊ ክንታኑ/ ክንቲ እይስታማጊ ያኹስ 15 ጝርጃ ክንታንትካ ክንቲ ጝናዳ ቼካማጊ ክንታንኩ ያኻኒስ ላጛ ኹን ክንታንትካ ዴሜካ ጛው ዶርምዳ ያኼካማ ክንቲ ጝና ፋይፃውሳጊ ዋኽትጝፅጝስ ክንቴካማጊ አኽⶓ ጌሌፅካ::

አዳሪው ክንታንትካስ ኹርፂ፣ ሻይቡን፣ አንቤባኑ ጛርቱ ታፋ ሶላር፣ እንቲታኪ ሶላር ዋኾ ኻሮ አንቤብጝስ ብብርጙ አይል ኔኬታው አኽጝስ ክምዴስ 1 ሳትዴስ 4 ሳቶኺስታ ጄኔሬተር ቴርታማ ክንታንትካ አንቤብካማጊ አኽⶓ እርዳትፅካ:: እሊኩ አዳሬ /ቼካማጊ ክንታኑሳ/ ክንቴ ሲፍጛቲንኩ ክንታንትካኪላ ፍታኒስ ዳላውሳ ቴርቶ ፄዋንታ ክንትፃንትካ ሚዲቢኒ ክንቲው ጊዝዴስ ድምክና ክዳማ አድጉዌስታ ፊቴ ጊዞ ቴኬምስትካማ ክንትፄካማጊ አኽⶓ ክንቲ ጝናሱ አላፊ ጌሌፅካ::

ክንታንትካ ፍታኒስ ቴርታንታ ጝን አቕ ጄርካዋ  እርዳታንታ ብሽታንዳኪ ያኻ ሊሊትጙንኩ ሜንድሬኽካዳ ሼውቴ ፌቴርካማጊ አኽⶓ ጌሌፁንኩ ክንቲ ጝናሱ አላፊ አዳሪ ክንቲ ውላጊ ክንታንትካ  ክንታንታ ፋይስታኒ ጝን አቑላዳ ዝኩኽ ካንት ዜርቕቲኒ አኽጝስ ጌፄሩ ዙራሙሪ አኽጝስ አኬዱኑሳ ላካ ክንታንቲ አዳሪ ክንቴ አግፃማጊ ጋቲው አኽⶓ እርዳትፅካ:: አዳሪ ክንታንትካስ ፋይፃው ግብአት ዋኽትጛማ ፂንስካማጊ ያኹኒኪላ ጄኔሬተር ሊጊሲሜ ሳቶ ቴኬምስትጝስ ብብራንቲው ችግር ዝኩኽ አኽጝስ እርዳቲ ፋይፃው አኽⶓኪላ ጉሽካ:: ፍንሾስኪላ እን ቴርት ሲፋታ ሚስሊ ክንቲ ጝናዳ ሜብራት ፋይፃው አኽጝስ ትኩታኩ አካልካ እንሳ ችግሮ ኽያንታኪላ እንፅኼንቶ ፌያፌይጝፅካ::

አንኪሺ ጉዋጉሲ ወረዳ ክንቲ ፅፌት ጝናሱ አላፊ አቶ ደሳለው በዜ አንኪሺ ወረዳታጊ 2017 ምሬት አሜታዳ ክልላዌስታ አጌር አቡቑሳ ፍታኔ ፌቴንስታንኩ ክንታንትካ ቤዴራ ቴርቶ አሌድካማጊ አኽⶓ ጌሌፅካ:: 2017 ምሬት አሜትዳ አጌር አቡቑሳ ፍታኔ ፌቴንስትጝስ ቴርቱንኩ 12ንቲ ቤንኩ ክንታንትካው ቼፍ 823 አኽⶓ እርዳትፅካ::

ወረዳታጊ ክልል አቡቑሳ ፍታኔ ፌቴንስታንኩ ትክላሊስ 823 ዋልታንቲ ቤንኩ ክንታንትካ ትክላሊስ 1135 ክንታንትካ ያኻኒስ 8ንቲ ቤንኩ ክንታንትካ ዴሜካ 1193 ክንታንትካ ክልሉ አችስ ፍታኔ ፌቴንስትጝስ ቴርትⶓ ጌሌፅካ::

ሚሲሊ ክንቲ ጝናዳ አዳሪ  /ቼካማጊ ክንታኑ/ ክንቲ እይስታማጊ አኽⶓ ጌሌፁንኩ ፅፌት ጝናሱ አላፊ ክንታንትካስ ኻራ አንቤብጝስ ጄኔሬተሮ ቴኬምስታኑ አኽጝስ ብብራንቲው ችግር ዝኩⶓ ጉሽካ:: እንሳ ችግሮ ኽይጝስስታ ክንታንትካ ዳርኪ ችግራ ጋቲታ አንቤባንታ ወረዳ ካላውስጊ አክምስ እርዳታው አኽⶓ ጌሌፅካ:: ምንግስትኩኪ ያኻ ምንግስታዋ ያኼካያስኩ አችትካ እንቲታኪ ጛርት አቕኪላ ዋይሚስታ ያኹኽሳ ክምንቶ አፌርጝስ ካሊስታታ ካላኑሳጊ እርዳቴ ፄዋንታኪላ እንፅኼንቶ ፌያፌይጝፅካ::