ዋውርስታንቲ ሌጌሳታንቢ

አለሚቱ የኔት

ሀይለስላሴ አበራ እሰቴ:: ድሚስ ፅሊ ያኼስጉ አሳብስ ኩፅኒ ኽሳንቲያኽ:: ናካዳ ያኻማ ቻሳ ካያማ ካንትጝስ ካላ:: ካሜንስታማ ሌጌሱኽ ማይኬላዊ ይቶፒያው ክልል ከምባታ ዞን ከጨበራ ወረዳዳኽ:: ጌና ሶኼታንቲ ቤኑ ክንታንቲያኽ:: ክንቲስኪላ ጐቤዝካ ክቻዴስ ቶኬምስቴ::

ፋይ ዝኩኒዴስ ካሊስታቲው ዲብ እላኽ ናው ሜርህ ዝኩኼኽ:: ፋይስታ እንፅኺ አይሊኒያኽ:: ፍንሾሱ ፋይ ይቶፒያ ጚራሱ ታፍስ ግቢትስቲት አጉሮ ወንቼፍስታንቴ /ዋውርስታንቴ/ ወሬሙ ሜሳሪ ዝኩዋታኽ:: ፋይኪላ ቓሊታ ያኻማ ይጉዋያላኪ፤ ሊጊ ድሚስ ዋውርስታንቴ ወሬሙሳ ሜሳሬ ግቢትጝስ ካሊስቴ ናውሳ ቴግባርስ ካንትፃ::

ኢንተር ኮንቲኔንታል ባልስቲክ ሜሳኤሎ አኹኪ አጉሮ ክውጝፃንቲ ዋውርስታንቴ ወሬሙሳ ሜሳሬ ግቢትጝስ 4ንቲ አጌር አቩቑ ካሊጝቱ ልኺትጚውስታ አውደርይዳ ካንቲስ ዲጋ::

ሚሳኤሎ ግቢትጝስ ጉሽፃ ፄውኽ ሰሜን ኮሪያ ህዋሶንግ 19 ሞዴል አኽⶓ ዲብሳማ፤ ጛጂ ግቢታኑ ሚሳኤል ዳግዳግካ ኬምፕካዋ ሺሻታ እየስ ኬሽጝፃታ ግቢታኪላ” ና::

እቺፃማ ታክሳው ሌጌሳታንቢ ሀይለስላሴ ኬሌብስ እይስታው ጌንዜብዴስ ክብስጝስ ፌቴሪው እንፅኺስ ግባቶ ጄዋው ያኹኒኪላ እንስኪላ ዳላው አክም እላቲው አኽጝስ ሳሴርስ ዙራሙሪዳ አግፃኩሳ አክኽካዋ ቴኬምስትጝስ ሜሌ ቴርሳ::

ይቶፒያ ፕሬስ አችት ዜጌብኹስታጊ ሚሳኤሎ ግቢትጝስ እንፃው ሜሳሪ፣ ኤሌክትሮኒክሱ ፅጋኒ ጝንካዴስኒ፣ ሞተሩ ጋራዥዴስ፣ ፈርኔቸር ጝንካዴስስታ ሙሪዳ ችክችኩንኩ አክኽካዴስ ቴኬምስትⶓኪላ ሌጌሳታንቢ ዲብሳ:: እንቲታኪላ አብራ ክንታንኩ አፄብካዴስ ጌንዜቦ ኩፕፅጝስ እንፅኺስ ግባታ ያኻውሳ ኬሚካሎ ጄዋማ ቴኬምስታ::

ካሊስቴኹሱ እንኮኽስት ቻሱ ቴስፊስ ላማ ያኹኽ ዎታት ሀይለስላሴ፤ አውኪ እርዳታ ጋቲታ እስጜ ፌቴሪውሳ እንፅኼ ግቢትጝስ አንኩዋ አርፋሳ ካፅⶓኪላ ቶኬማ::

ሚሳኤሎ ጛርቱ ፅሬትስ ግቢታታ እንዳ ታምፃ:: ሲፋንቲስኪላ ትኩታኩ ታንብዌንካ እርዳቴ ፄውኑኒ አጌራስ ኽሳንቴ አብቶ ቤሬኬትፅጝስ ካሊስታው አኽⶓኪላ ሌጌሳታንቢ ዲብሳ::

ሌጌሳታንብካ ፋዮስታ ቲኹዋ ሲፍካማ እንዜጝጝ ቱስቴ:: ፌቴሪው እንፅኺስ ፋይ ዝኩክ ሌጌሳታንብካ ክንትፃንትካዋ ማንዲጝዴስ ኬቻ ጛርትስ ማራማርጝጝ ፋይፃው አኽⶓኪላ ሌጌሳታንቢ እንክርፃ::