አዊ ብሄረሰቡ ቺፅጝፂዳ ዝኩኽ ሰላሙ አኺኒ ኬሽጛማጊያኽ ኩስጚ ጝናስኩ አባልካ

ዘውዴ በካሉ

አዊ ብሄረሰቡ ቺፅጝፂው ኩስጚ ጝና 4ንቲ ዙሪ 13ንቲ ሚዲቢኒ ጉባኤ ካስጝፃ:: ጉባይዳኪላ ብሄረሰቡ ቺፅጝፂውሳ ሰላሙሳስታ ዴክቱሳ ሲስቲ አርፋሱሳ እንፅኼኪላ ጋማጋማ:: ኩስጚ ጝናስኩ አባልካ ብሃረሰቡ ቺፅጝፂዳ አግስታንኩ ሚንችካ ዙራሙርካ ናካዳ ሰላም ዙራማጊ ያኹኒኪላ ዶንጌትኹ አይል ልቕልቓኩሳ ዙራሙርካዋ ኔፃ ፄውጝስ እንፃኽስትጝ ቱስታው አኽⶓ ጉሽካ::

ጉስጚ ጝናሱ አባል አቶ አለበል ገዛኸኝ ዲጊ ጊዝዴስ ናቴ ፌቴርስትኹ ሰላሙ ችግርስ ሜንችካ ዙራሙርካስታ ኬቤልካ ዶንጌታንትካ አይልካ ቼፍጛሺኑ ዙራሙሪ ብሄረሰቡ ቺፅጝፂው ሰላምስታ ዴክት እንፃኽስትኹ እንፅኺስ ዶንጌቱንኩ አይልካው ስርዳ እሺንኩ ዙራሙርካ ናካዳ ምንግስቱ ቼፍጝጚው ስርዳ አኽⶓ ጌሌፅካ:: ናካዳ ዝኩኹ ሰላሙ አኺኒ ጉድ ያኹኒኪላ ዚጋሚ ወረዳ ሶሪትዳስታ እሊኩ ዙራሙርካዳ ፌይካ ፌይካማ ካንትስታንኩ ዶንጌታንትካ አይልካው ልቕልቕቲ ኔፃ ያኻታ እንፃኽስትጝ ቱስታው አኽⶓኪላ ጉሽካ::

አቶ ወለሊ ጌቴ ብሄረሰቡ ቺፅጝፂዳ አግስታው ሰላሙስታ ዴክቱ ሜዋክር ሚንቾ ኬቤሌ ኔፃ ፄውⶓ ጌሌፅካ:: ኦፕሬሽንስ እንፃኽስትኹ እንፅኺስኪላ ሚንቾ ዋይሜ ሜዜጌብፅⶓ ድኹዌካ:: ካዌናኻዳ እሺንኩ ዶንጌቱንኩ አይልካ ናካዳ ሰላሙሳ እቑዌ ቻቤልካማ ምንግስትሾ ዙርⶓ ጌሌፁንኩ አቶ ወለሊ ናካዳ ዙርካያስኩ ዶንጌቱንኩ አይልካ ምንግስቱሳ ሰላሙሳ እቑዌ ቻቤልካማ እምፕልታቕሊ አኽጝስ ሰላምስ ዜቦ ቲሪጝ ፋይፃው አኽⶓ ጉሽካ:: ችግራኻዳ ዝኩንኩሳ ዙራሙርካዋ እምቢትናማ ችግርዴስ ፍሽጝስ ሰላሞ ቼሜትጝፃንታኪላ አቶ ወለሊ ካሲካ::

አዊ ብሄረሰቡ ቺፅጝፂው ሰላሙስታ ዴክቱ ሜምሪው አላፊ አቶ ጌታቸው ቢሻው ኑኑውስታ ብሄረሰቡ ቺፅጝፂው ፃምርትኹ አይል እቺትጝጚስ፣ ሼው ፅንታውስታ አካላዊ ግንባቲስ ጛጛርጛሳ ቴርስካማ ዙራሙሪውሳ ሰላሞ ማንዲጝስ ቴርትⶓ ጌሌፅካ::

አቶ ጌታቸው እምትጝፄካማ ብሄረሰቡሳ ሰላሞ ቼሜትጝፅጝስስታ ፄትቲውሳ ችግሮ ኽይጝስ ብሄረሰቡ ቺፅጝፂው ፖለቲካው አመራር፣ ፄትቲው ሜዋክርስታ እዝብ እምፕልትስ አኽጝስ ሰላሞ ቼሜትጝፃማጊ አኽⶓ ጌሌፅካ:: እንዴስ ፍና ዶንጌትኹ አይልስ እምስታሺንኩ ሚንችካ ኬቤልካስታ ዙራሙርካ ናካዳ 150ዴስ ጃላ ያኻንኩ ኬቤልካ ምንግስቱ ቼፍጝጚው ስርዳ አግስታንኩ አኽⶓ ሜምሪው አላፊ ጌሌፅካ:: ላጛ አርፍዴስ ናቴ ማንዚስታ ጉንቤት አርፍካዳኪላ 23 ኬቤልካ ዶንጌትኹ አይል እሜማ ልቕልቕናሺኩሳ  ኔፃ ፄውⶓኪላ ጌሌፅካ::

እዝብ ሰላሙስታ ዴክቱ ስር አኽⶓ ጉሹንኩ ሜምሪው አላፊ ምንግስቱ ሜዋክር፣ አመራር፣ ፄትቲው አይል  እዝብሊ ያኻማ ይሳማ እንፃኽስትጝስ ሰላሞ ቼሜትጝፅጝስ ካሊስታው አኽⶓ ጌሌፅካ:: ሜምሪው አላፊ ፍንሾስኪላ ሰላም ቼሜትጛታ እምፕልትስ እንፃኽስትጝ ፋይፃው አኽⶓ ጉሽካ::

ኩስጚ ጝናስኩ አባልካዴስ ጁንኩ ካስካስ ጊሊፄ እዩንኩ አዊ ብሄረሰቡ ቺፅጝፂው ቹዋ ቺፅጝፃንቲ አቶ ቴዎድሮስ እንዳለው ፌዩንኩ አሜትካዳ ዶንጌትኹ አይል እዝብዳ ዜሬፍⶓስታ ክርⶓ ታምፅⶓ ጌሌፅካ:: ናካዳ ብሄረሰቡ ቺፅጝፂታጊ ክልሉ አክምስ፣ አድሜ ካላካልጚውስታ ሰላሞ ኬቤርፃንቲው አይልስ እንቲታኪ ሰላምስታ ዴክት እንፃኽስትኹ እንፅኺስ ፅላትኩ ካምፕካ ፌሬስⶓ ጌሌፅካ:: ብሄረሰቡሳ ቺፅጝፄ ዴዴጝ ጊዝስ ኔፃ ፍሽጝስ ጁትጙኽ አንኩሊ ፅንታው ቴርትጚ አመራርካዳ፣ ሴራዊቲዳስታ እዝብዳ ሌጌሳማጊስታ ኩርፄንት ጊዴስ ጊዞ ዴሜካማጊ ይንትⶓ ቹዋ ቺፅጝፃንቲ ጌሌፅካ:: እምፕልታቕስ ኮራኮርስታው ዋሺኒኪ አባል እምፕልታቕስ ኬሽኹ ጉላሌ ዲግስጝ፣ አምፕልታቕሊ እምፕልትስ እንፃኽስትጝጃጊ እምፕልታቑሳ ሰላሞስታ ልማቶ አዌካንኩሳ እንፅኽካዋ እንፃኽሰትጝ ቱስታቲው አኽⶓ ቹዋ ቺፅጝፃንቲ ጉሽካ::