ትኩት ግብርኒው ቴክኖሎጂስ

እንአጌራ አሌምዳ እርሺስታ ክምካ ሩብፅጛሳ ቤዴርካማ ጄሜሩንኩስታ እሊኩስ ክንፅፁንኩ አጌርካ ክቻዴስ ፍንዳኽ እቑስቴው፡፡ ካናኻፄስታ ኩፓኩፔ ዴስጝፄታ ኹጝስ ያኻንታ ፄውታታ ክምንትዴስ ክምንቶ ፌያፌይጛማ ናካዳ ታምባታ ፄውታ፡፡ ያኻችኽስጉ እንግርዴስ ጁንኩ አሜትዴስ አሜቶ እስጜ እርሺውሳ አኹኪ ግብርኒውሳ እንፅኼ ዝቤንስካማጊ ዴሜካማጊ ካሳው እዝብ ሚንቺታሊ ጛጛርትጛሳ ኬሌብጝዴስ ፌካማ እሊኩስ ፊታኒስ ካንትስታ፡፡ ዝቤንሊ ጊጜካማጊ ሊሊትጝኹሳ ቶክኖሎጄ ቴኬምስትካማጊ ፍንዳ ጉሳውሻና፡፡ እን አጌራ ኩፅኒ ኽታዊኒ ቢሪው እርሺሊስታ ግርባዊዲ እንፅኺሊ ኩራርጝቱታኽ፡፡

ናካ ናካ ፅሊስኪላ ያኹኒ ቴክኖሎጄ ቴኬምስታማጊ ምርቶ ሌጌፅጙ እንዝጚ ጃሜርስታ፡፡ እኒጛ ክቻዴስ ብቲውሳ አሉሞ ዴሜክጝስ ካሊፃው ማዳባሪ እምፕሊያኽ፡፡ አቓ ግብሪ ማዳባሪ ትክምዳ እሺⶓ ጄሜርኹ ንጉሱው ክምዳ ያኹኒውላ ላምቡሳ እሳንስ አራሽስ ታምባማጊ ጋቲዊያኽ፡፡ ያኻ ያኻማ ልቡስ ልቡ ሚንችካ አሬሳቻንትካ ትክሞ ያቔካማጊ እሳንስ ጛው ብቲዳ ቴኬምስትጝዳ አግስታና፡፡ ያኻማ ኩፅኒ ቴኬምስትጚው ችግር ዝኩⶓ ውማይቴን ድኹዋና፡፡ ቴኬምስትጚ ኽብፂው አይኔትታስታ ዜርስታው አሪታ ሲሊትጝኹ አኽጝዴስ ጃላ ፄውስታው ጌርክስታ አይር አኺኒ ትኩትዳ ቱጝ ዝኮ፡፡ አኽጝስኪላ ማዳባሬ ጄዋማ ካፅጝ ይቢቺ ያኻውላስ ግብርኒው ውማይቴኑ ኩስጚስታ ሲፍጝጚ ፋይፄ፡፡ ማዳባሪው ቴክኖሎጂዴስ ድምክና አሪሜ ድፅጝስ ትክምዳ እሼውሻው ኬሚካል ዴስስታማጊ ይንታ፡፡ እንሳ ኬሚካሎኪላ አራሽ አግፃዋ ጌቤልዳ ጄዋ ካፃማጊ ቴኬምስትጝ ካንትስቴ፡፡ እንጚዳኪላ ውማይቴኑው ኩስጛ ጋቲታ ፄውስታው አኽጝስ እሊኩ ቴኬማንኩ ፅኻራዋ ኮንኩሳ ድኽስጝዴስ ድምክና አቕዳስታ ክምካውዳ ቲንዳ ታምፃውሳ ጉዳቶ ሼውንጝስታ ውማይቴን ኩስጛሳ ቴግባርዳ እሽፅጝ ፋይፄ፡፡ ቴክኖሎጄ ቴኬምስታማ ምርታምቶ ሌጌፅጝ ውላዴስ ማንዲስቴ