እንጃቢሪው ልግስስታ ካሲ

ታደለ አጋጄ

እንጃቢሪ ኬቴም ዲጊ ጊዝዴስ ናቴ ጉድ ልግስኒው አኺኒዳ አግስቴት ኬቴማኽ::እንጃቢሪ እምፕልታቕስ አስሜምጛው አይሩ አኺኒስታ ኢንዱስትሪስ አሜቻው ዙራሙሪ  አኽጝስ ሚንችካ እምፕልታቕኩ ቤንካ ሊሊትጙንኩ ዙራሙርካዴስ ይንቴካማ ዝኩዊኔ ጉሳና:: አውጚው ዲጂታል ሚዲያሊ እጂጜ ፄውንኩ እንጃቢሪ ኬቴምኩ ዝኩዋንትካ ዙሙኑውስታ ኬቴማ ጉድ ልግስኒው አኺኒዳ አግስቴት ታኹኒውላ እምፕልታቕ ካሴንኩ ሚንችካ ስርኩ ልማትካ ዋኽትጛኑላ ይጉጝ ኬቴማ ፋይስቴው ልክስ ልግስኔ ካንትፄውላ ይጉⶓ ጉሽካ:: አቾ ማንዱኹ ሪፈራል ሆስፒታል፣ ሩብሊው ፉሪፂ፣ አኹ፣ ኤሌክትሪክ ስብስቴሽን፣ ፃማ ክብፂ ስፍሪስታ፣ እሳን አስፓልቱ ዳድ ግቢስታውላ ይጉጝ ኬቴማ ልግስስ ፅንጋኻ አኽⶓ ዝኩዋንትካ ዙማና::

እንጃቢሪ ኬቴም 1971 ም/አታዳ ቲሪትጝቱት አኽⶓ ዙሙንኩ እንጃቢሪ ኬቴሙ ዝኩዋንቲ አቶ ደምሰዉ  አይናለም ቤዴራ አጉዊኒ እንጃቢሪዴስ ኒፂልስቴታ ዲጊ ጊዝስ ቲሪትጝቱትስታ አሬኽትስ ሌጌስታታጊ አግስቴት ኬቴማ አኽⶓ ዙሜካ:: ኬቴማው ልግስስ ኬፍቲኒ ታምቦ ፊትጙንኩ ሚንችካ ጌፄንካ ጛስጛዋ ቲቢቢርጚስ ኬቴማ ሌጌፅጝስ ጛውስ ታምቦ እንፃኽስቱንክ አኽⶓ ዙሜካ::

ኬቴማ ናካዳ ሌጌስጝ ቱስታውሳ ላካ ሌጌስታያስቲ አኽⶓ ቶኬሙንኩ አቶ ደምሰው አስሜምጛው አይሩ አኺኒስታ እሳን ስፍሪ ዝኩት አኽጝስ አብትዌንካ ኬቴማዳ ይንቴካማ ኢንቨስታ ፄዋንታ ካሲካ::

አቶ ተክሌ ቦጋለ እንጃቢሪ ኬቴምዳ ጊፁ እንፅኺዳ አሴሜርጜካማ እንፃኽስታንኩ ጛርትአቕያኽ:: ኬቴማ ቲሪትጝቱኹ ጊዝዴስ ጄሜርካማ ጊፅስጝስ እንፃኽስትካ:: እንጃቢሪ አጉዊኒ እንጃቢሪዴስ ኒፂልስቴታ ኩክሪዳ ቲሪትጝትኹ ቹዋ ምክኒያት ኬቴማ እሳንጝስ  አሜቻቲው ብቲው እንኩሪስ አኽⶓ ጉሽካ::

እንዴስ ቤዴራ እሺኹ ልግስኒስታ ናኪኒ ልግስ ካንትስታኒ ሚንች ኪሲ ዝኩⶓ ዙሙንኩ አቶ ተክሌ ጊዝዴስ ጊዞ ኪሴ ካንትፄታጊ አግስቴት ኬቴማ አኽⶓ ቶኬምካ:: እሳን ብቲ፣ ልማትስ አሜቻው ስፍሪ፣ ሚንች አቒው አይል ዝኩት አኽጝስ ሚንችካ አብት ዌንካ ኬቴማዳ ይንቴካማ ኢንቨስታ ፄዌካማጊ አኽⶓ ዙሜካ::

ኬቴማ ሌጌስታታጊ ታኹኒውላ ናካኪላ ያኹኒ ይጉዋው ዲብ ዝኩⶓ ቶኬምካ:: እንዴስ ቤዴራ ግቢትስቱንኩ እንጃቢሪ ዩንቨርስቲ፣ እንጃቢሪ ሆስፒታልስታ እሊኩ አግልግሎታ እይፅካ ኾትካ እምፕልታቕስ ኬፍንኹሳ ትክሞ እይካማጊ አኽⶓ ጉሽካማ ናካኪላ ቹዋስ እምፕልታቕስ ፋይፃንኩ ሩብሊው ፉሪፄ ግቢትስታታስታ ሆስፒታል ዴሜካ ሪፈራል ሆስፒታልሾ ሌጌሳታ ካሲካ::

ምንግስቱ ኬምፕዳ ያኻማ ልማቶ እንፃኽስታው እዝብ ዝኩት ኬቴማ አኽⶓ ጉሹንኩ አቶ ተክሌ እጎ ኬቤርፃውስታ ምንግስትሊ ቴቤቤርጛማ እንፃኽስታው እዝብ ዝኩት ኬቴማ አኽⶓኪላ ዙሜካ:: ሚንችካ ጌፄንካ ቴቤቤርጜካማ ኬቴማዉ ልግስስ ኬፍቲኔ ታምቦ ፊትጙንኩ አኽⶓ ቶኬምካማ ናካኪላ ኬቴማ ፋታው ሚንች ስሩ ልማት ዝኩⶓ ጉሽካ::

ሜብራቱስታ አኹው ችግር ኬቴማዋ ኬፍቲኒስ እንግርግራ ይጉፅኹ ስሩ ልማት አኽⶓ ቶኬምካ:: ምንግስት እምፕልታቕ ፋያውሳ ስሩሳ ልማቶ ዋኽትጝፅጝ ቱስቴኪላ ንካ::

አብት ዌን ኬቴማዳ ይንቴካማ ኢንቨስታ ፄዋንታ ካሲካ::

አቦዝን ምህረት እንጃቢሪ ኬቴሙ 02 ኬቤሊው ዝኩዋንትካኽ:: አዲስ አበባዳ እሺኹሳ ጝኖ ዋይጝስ እንጃቢሪ ኬቴምዳ ጝኖ ግቢቴካማ ሆቴሉ እንፅኺዳ እንፃኽስትጝስ ኬቴማው ልግስስ ኽሳንቴ ታምቦ ፊትጙንኩ አኽⶓ ዙሜካ:: ቤዴራ ልቓ አቕስ ቲሪትጝቱት እንጃቢሪ ኬቴም ናካዳ ሚንችካ አቖ አቡቕታታ እምቴ ንካ:: ሩብሊው ፉሪፂ ግቢስታያታኪላ ካሴ ጉሽካ::

እንጃቢሪዉ እዝብ ውላስ ቲቢቢርጜ ፄዋው፣ ግብሮ ዎክትስ ኬያው ፣እጎ ኬቤርፃው ኽሳንቲ እዝብ አኽⶓ ቶኬምጝስ ኬቴማስ ፋይፃንኩ እሊኩ ስርኩ ልማትካ ዋኽትጛንታ ካሲካ::

እንጃቢሪ ዩንቨርስቲዳ ብቲው ቺፅጝፂዉስታ ክዬሲው ክንትፃንቲ ንጋቱ አምሳሉ እንጃቢሪ  ኬቴማ ፅላ እሺቲኾ፤ ያኼስጉ ናካ  ሌጌስታታጊያኽ ንካ::  ከቴማዉ ልግስኒዉ  ልክስ  ኩፅኒ ብቲው ቴኬምስትጝጚ እላቲው አኽⶓ ዙሜካ::

ኬቴምዳ ግቢስትኹ ኢንዱስትሪው ስፍሪ ኬቴሙ ክችዳ ግቢስትⶓ ጉሽካ:: ቤዴራ ግቢትስትኹ ዳድ ማልጛ ፄቤብⶓ ዙሜካ:: ኬቴማዉ ልግስሊ አብራ ፋይፃው ስሩ ልማት ግቢትስትጝ ቱስታው አኽⶓኪላ ጉሽካ::

ዩንቨርስቲ ኬቴማው ፕላንስ ፋይፃውሳ ዲቦጊ ፅናትስ ስርታማ አብራ እንፃኽስስታማጊ አኽⶓ ኽይትጝፁንኪ ክንትፃንቲ:: ኢንቨስትመንትስ እይስታው ስፍሪ ፂኒስስታማ እይስትጝ ቱስታው አኽⶓ ዙሜካ:: ዳድ እሳናማ ግቢትስትጝ ቱስቴ፣ ኢንቨስትመንትስ እይስታው ስፍሪ ዴሜካ ዝኩዋንትካስ እንፅኺውሳ ድሎ ፌቴርጝስ ይኮኖሚውሳ ትክሞ ቼሜትጝፅጝ ቱስታው አኽⶓ እርዳትፅካ::

እንጃቢሪ ኬቴማ ቺፅጝፂው ቤዴራንቲ ከንቲባ የኔአለም ዋሴ እንጃቢሪ ኬቴም ልግስኒዳ ዝኪት ኬቴማ አኽⶓ ዙሜካ:: ሚንች እዝብ ዝኩዋትስታ  ኬሽኹ ሰላሙ አኺኒ ዝኩት  ኬቴማ አኽⶓ ዙሜካ::

ኬቴማ ሌጌስታታጊ አኽጝስ እምፕልታቑ ስርኩ ልማትካዳ እሳንስ ካሴ ጉሽካማጊ አኽⶓ ጌሌፅካ:: ሊሊትጙንኩ አብትዌንካ ሊሊትጙንኩ ዜርፍካዳ ኢንቨስታ ፄውጝስ ካሲካማጊ አኽⶓ እርዳትፅካ:: ኬቴማዳ ፃማ ክብፄ ስፍሬ ግቢትጝስ እንፃኽስትካማጊ አኽⶓ ጉሸካ::

ሩብሊው ፉሪፂ ግቢትስታታ እምፕልታቕ ካሲኑ ስሬትስኪላ ሩብሊው ፉሪፂ ግቢስታታ ፅናት ካስጝⶓ ጉሽካ::

እንጃቢሪ ዩንቨርስቲ እንጃቢሪ ኬቴሙ ቺፅጝፂሊ አኽጝስ  ሆስፒታል እሳናማ ግቢስታታ  ፅሬት ፄዉስታማጊ አኽⶓ ዙሜካ:: ኬቴሙሳ አኹ ችግራሳ ኽይጝስ ዴሜካ ቺውሲዳስታ ሃና ማርያምዳ ግቢትስታው አኹ ዲጊስ ዊድስታማ እምፕልታቑሳ ችግሮ ኽይጝስ ካላው አኽⶓ ቶኬምካ::

ኬቴማዳ አቾ ማንዱኽ ዳድ ግቢትስታታ ዴሜካ ፌዴራሉ ምንግስትስ ካሴ ጉሽⶓስታ ፌዴራሉ ምንግስቱ አንፅኺ አኽⶓ ዙሜካ::

ኬቴማዳ አቾ ማንዱኽ ግንባቲ ግቢስታታ ዴሜካ ኬቴሙ ቺፅጝፂ ትኩትስ እንፃኽስታማጊ አኽⶓ ጌሌፅካ::

ስብስቴሽን ግቢስታታ ፅናት ዊድስታማ እንፅኺሾ ቱጝስ እንፃኽስስታማጊ አኽⶓ ዙሜካ:: ክልሉ ምንግስት ስብስቴሽን እምቢታ ግቢስታማ አሌድስታታ ፅሬቶ ፄዉጝ ቱስታዉ  አኽⶓ ዙሜካ::