ፌይኹ ካቢስታቲታ

ዘውዴ በካሉ

ክንቲውሳ ፃንኩቶ ቼሜትጝፅጝስስታ  ልኺትጛንቴ ክምንቶ አፌርጝስ 2015 ም/አሜትዳ ጄሜራማ ስካዊ ክንቲው ፍኖተ ካርቲ ቴርታማ ቴግባርሾ ቱስታ::

እን ስካዌ ክንቲው ፍኖተ ካርቲ ፍታኒው እይስትጝጚዳኪላ ኪሴ ያጋማጊያኽ:: ክንቲው ፍኖተ ካርቲ ዉላዳጊ ክንቲ አችዳ ቴግባራዋ አኽⶓ ሲፋማ ክልሉስታ አጌር አቡቑ ፍታኒ ዋልታንቲ፣ ሶኼታንቲስታ 12ንቲ ቤንኩ ክንታንትካስ ፍታኔ እይስትⶓ ጄሜሩኒዴስ ሴኔቤታ:: 12ንቲ ቤኑ አጌር አቡቑ ፍታኒ ዴሜካ እይስታው ዩኒቨርስቲው አችስ አኽጝ ፍታኒ  ችምቢትጚ ዝኩዋቲታስታ ሞኬራው ክንታንቲ ካላውሳጊ አቕቶ ቴኬምስታማ ዋይሜ ሜዜጌብፃታ እርዳቴ:: ክንቲው ሚኒስቴርኪላ እንሳ ትኩትስ እንፃኽስትጝስ አጌርስ ያኻውሳ ክምንቶ አፌርጝስ እንፃኽስታማጊያኽ:: አዊ ብሄረሰቡ ቺፅጝፂ ዚጋሚ ወረዳኪላ 12ንቲ ቤንኩሳ ክንታንትካዋ ፍታኒስ ቴርሳማ ቤዴራ ቴርቶ ፄዋማ አግስቴ:: ዚጋሚ ወረዳ ዊንጊ ላጛንቲ አች ክንቲ ጝና ዴሜካ 12ንቲ ቤንካ ክንታንትካዋ ፍታኒስ ቴርስኹ ክንቲ ጝናዴስ እምፕልያኽ:: ያኼስጉ ዊንጊ ትክላሊ ላጛንቲ አች ክንቲ ጝና ቲሪትጙኒዴስ ጄሜራማ 12ንቲ ቤንኩ ክንታንትካ ዩኒቨርስታ ሚፅፄ ዋይሜ ሜዜጌብፅካያሱ ክንቲጝናኽ:: እን ክንቲ ጝና 2017 ም/አሜትዳ ክርፄ ዋይሜ ሜዜጌብፅጝስ ዝኩኽሳ ኩርፄንቶስታ ቤዳራ ቴርቶ ካንትኹስ ስልኪስ እጂጜ ፄውና::

ክንታንቲ ሀብታሙ አበጂ ትክላሊ ላጛንቲ አች ክንቲ ጝናሱ 12ንቲ ቤኑ ክንታንቲያኽ:: ክንታንቲ ሀብታሙ አጌር አቡቑ ፍታኒስ ዳላውሳ ቤዴራ ቴርቶ ፄውⶓ እንክርፃ:: ዊንጊ ክንቲ ጝና እንዴስ ፍና 12ንቲ ቤንኩ ክንታንትካ ዩኒቨርስታ ሚፅፄ ዋይሜ ሜዜጌብስፅካያሱ ክንቲ ጝና  አኽⶓ ድኹኽ ክንታንቲ ሀብታሙ 2017 ም/አማትዳ ስሞ ኪስጝስስታ ክርፄ ዋይሜ ሜዜጌብፅጝሳ ኩርፂኒ አኽⶓ ዙማ:: ፍታኒስ ዳላውስ ቴርቶ ፄውⶓኪላ ጉሽማ ክንታንትካሊ ፊቲ ጊዝስ እርዳትጝጜ፣ ክንትፃንትካ ሚዲቢኒ ክንቲው ጊዝዴስ ድምክና ፉሪውሳ ጊዞ ክንታንትካስ አርዳቴ ፄውካማጊ አኽⶓኪላ ድኹዋ::

ክንታንቲ አለምነህ ትላሁንኪላ ዊንጊ ትክላሊ ላጛንቲ አች ክንቲ ጝናዳ 12ንቲ ቤኑ ክንታንቲያኽ:: 12ንቲ ቤኑሳ አጌር አቡቑሳ ፍታኔ ፌቴንስትጝስስታ ክርፄ ዋይሜ ሜዜጌብፅጝስ ዳላውስጊ ቴርቶ ፄውⶓ ዙማ::

ፍታኒስ ቱስቲስ ቴርታንታ 12ንቲ ቤኑ ክንቲዴስ ድምክና ሴስታዴስ ጄሜራማ 12ንቲ ቤኖኺስታ ዝኩኽሳ ክንቲውሳ ጛሬ ጋምቢጝስ ክንትፃንትካ እርዳትካማጊ አኽⶓ ክንታንቲ እንክርፃ:: ዊንጊ ክንቲ ጝና ዲጊስ ጄሜርኹስታ ሚንች ክንታንቲ እላቲው ክንቲ ጝና ያኹኒኪላ ዝኩንኩ ክንታንትካስ ፍታኒስ ዳላውሳ ቴርቶ ፄዋንታ ላይብራሪ ጌርክ ቺፋ ክንታንትካስ ብስታ ያኻማ አግልግሎቴ እያማጊ አኽⶓኪላ ዙማ:: ክንቲው ጊዝዴስ ድምክና አፄብካሊ፣ ክንትፃንትካሊ አኽጝስ እርዳታውሳ ሜፃፎ ቴኬምስትጝስ፣ አንቤባኒስ ግልፃ ያኻያሱሳ ካሲጝስስታ ሽቶ እንፃኽስትጝስ ፍታኒስ ቴርታማጊ አኽⶓ ክንታንቲ አለምነህ ድኹዋ:: 12ንቲ ቤኑ አጌር አቡቑ ፍታኒ እይስታው ዩኒቨርስቲዳ አኽጝስ እሺኑ ዙራሙሪዴስ እሊው ዙራሙሪሾ ካስካማ አንኩሌ ጉዲስታቲንታ ሼው ፅንታውሳ እርዳቴ ክንቲ ጝናስኩ ክንትፃንትካ፣ ክንቲ ጝናሱ ጛሪስታ ትኩታኩ አካል ሼውቴ ፌቴርካማጊ አኽⶓ ክንታንቲ ዙማ::

ዊንጊ ትክላሊ ላጛንቲ አች ክንቲ ጝናሱ ክንትፃንታ አዳነች የሽዋስ 12ንቲ ቤንኩ ክንታንትካ ፍታኒስ ቴርታንታ ውላጊ ክንትፃንትካ ክንታንትካዋ እርዳትካማጊ አኽⶓ ዙሜካ:: አጌር አቡቑ ፍታኒስ ክንታንትካ ቱስቲስ ቴርታንታ ሚዲቢኒ ክንቲው ጊዝ ቤናዴስ ድምክና ፊቴ ጊዞ ቴኬምስትጝስ ፌይኹ አሜትዳ ፌቴንስቱንኩሳ ሽትካዋ እንፃኽስትጝስ፣ ሴስታንቲ ቤንዴስ ጄሜራማ 12ንቲ ቤኖኺስታ ዝኩኽሳ ክንቲውሳ ጛሬ ጐሌልጝስ ፍታኒስ ያኻውሳ ጋምቢጝስስታ አንቤባኒስ ቱዋያሱሳ ካሴ እንፃኽስትጝስ እርዳትካማጊ አኽⶓ ጌሌፅካ:: 2017 ም/አሜትዳ 12ንቲ ቤንኩ ክንታንትካ ክርፄ ዋይሜ ሜዜጌብፅካማ እንዴስ ፍና ሜዜጌብስታ ያቔያሱሳ ዋይሜ አግጝስ ቴርታንታኪላ ክንትፃንታ ክንታንትካስ እንፅኼንቶ ፌያፌይጝፄካ::

ክንትፃንቲ አየነ የኔአለም ዊንጊ ክንቲ ጝናሱ ክንትፃንቲ ያኹስ 12ንቲ ቤንኩ ክንታንትካ ክርፄ ዋይሜ ሜዜጌብፅካማ ኽሳንቲ አችዳ ታምባንታ ታምቦጊ ፊትጜካማጊ አኽⶓ ጌሌፅካ:: 12ንቲ ቤንኩ ክንታንትካ ፍታኒስ ዳላውሳ ቤዴራ ቴርቶ ፄዋንታ ውላጊ ክንትፃንቲ ክንቲው ሚኒስትርዴስ እይስትኹ ዳብዚስ ፊቴ ጊዞጊ ቴኬምስትካማ እርዳትካማጊ አኽⶓ እንክርፄካ::

ዊንጊ ትክላሊ ላጛንቲ አች ክንቲ ጝናሱ ጛሪ የኔአለም መስፍን ዊንጊ ትክላሊ ላጛንቲ አች ክንቲ ጝና 12ንቲ ቤኑሳ አጌር አቡቑስ ፍታኔ ፌቴንፅጝስ ዳላውስጊ ቤዴራ ቴርቶ አሌድⶓ ጌሌፅካ:: ዊንጊ ትክላሊ ላጛንቲ አች ክንቲ ጝና ጄሜሩኒዴስ ጄሜራማ 12ንቱ ቤንኩ ክንታንትካ አጌር አቡቑሳ ፍታኔ ፌቴንስትካማ ዩኒቨርስታ ሚፅፄ ዋይሜ ሜዜጌብፅካያሱ ክንቲ ጝና  አኽⶓ ክንቲ ጝናሱ ጛሪ ጌሌፅካ:: 2017 ም/አሜትዳ ዴሜካ እንሳ ቴግባሮ አኹኪ አኺኔ ኪስጝስ ክንታንትካ ክርፄ ዋይሜ ሜዜጌብፃንታ ክንቲ ጝናስኩ አካልካ ውላጊ ካሊስታው አክምስጊ ክንታንትካ ፍታኒስ ቴርታንታ ፄውካማጊ አኽⶓኪላ ጌሌፅካ::

12ንቲ ቤንኩ ክንታንትካዋ ፍታኒስ ቴርስጝስ ክንትፃንትካስታ ክንቲ ጝናስኩ አካልካ ውላጊ እምፕልትስ አሜት ቺፋ ዊንጊ ክንቲ ጝናዳ ክንታንትካ ዋይሜ ሜዜጌብፃቲንታ ፄውኽ ችግር እንዳርማጚ? ንጝስ አባላምቲዳ ክንትፃንትካ ጛውሳ ታምቦ ፊትጛንታ ሚዲቢኒ ሳትዴስ ድምክና ክንቲዴስ ፋሌንጋ ዝኩኹሳ ጊዞ ሚዲቢኒ ክንቲታጊ እሜኑ ክንቲው አይኔትስ እርዳታንታ ያኽስታማ እንፅኺሾ ቱⶓ ክንቲ ጝናሱ ጛሪ እርዳትፅካ::

እንዴስ ድምክናኪላ ክንታንትካ ክንቲ ጝናዳ ቼካማጊ ክንታንታ አኽስትⶓኪላ ድኹዌካ:: ዊንጊ ትክላሊ ላጛንቲ አች ክንቲ ጝናዳ 37 12ንቲ ቤንኩ ክንታንትካ ዝኩⶓ ጉሹንኩ ክንቲ ጝናሱ ጛሪ ውላጊ ክንታንትካ ፍታኒስ ዳላውስ ቤዴራ ቴርቶ ፄውⶓ ጌሌፅካ::

ዊንጊ ክንቲ ጝናስ ክንታንትካ 2017 ም/አሜትዳ ክርፄ ዋይማ ሜዜጌብፃንታ፣ ፍታኔ ፌቴንስታኑ ጊዝዳ ዴሜካ ዙራሙሬ ኪሳኒ ጅፊስታቲንታ ሼው ፅንታው ውማይቲኒ ሜዳብሰታማ ወረዳዴስኪላ ውማይቴንካ ክንቲ ጝናሾ ካስጝስ ክንታንትካስ ሼውቴ ፌቴርካማጊ አኽⶓ ክንቲ ጝናሱ ጛሪ ጌሌፅካ::

ዚጋሚ ወረዳ ክንቲ ፅፌት ጝናሱ አላፊ አቶ ሙሉአለም የኔው 2017 ም/አሜትዳ ላጛ ክንቲ ጝንካዳ አጌር አቡቑ ፍታኒስ ቴርስⶓ ጌሌፅካ:: ዚጋሚ ወረዳታጊ ዚጋሚ ትክላሊ ላጛንቲ አች ክንቲ ጝናስታ ዊንጊ ትክላሊ ላጛንቲ አች ክንቲ ጝንካዳ 290ዴስ ጃላ ያኻንኩሳ ክንታንትካዋ  ፍታኒስ ቴርስⶓኪላ እርዳትፅካ:: ውላጊ ክንታንትካ 50ዴስ ጃላ ዋይሜ ሜዜጌብፃንታ አኬድካማ እንፃኽስቴካማጊ አኽⶓ ጌሌፁንኩ አቶ ሙሉአለም ዚጋሚ ወረዳታጊ ቼካማ ክንታንኩ  ክንታንትካ ዝኩⶓኪላ ጌሌፅካ:: ዊንጊ ትክላሊ ላጛንቲ አች ክንቲ ጝናዳ ክንታንትካ ክርፄ ዋይሜ ሜዜጌብፅⶓ አቱኑ እሊው ዳንጉኽ ዲብ ዝኩዋማ ያኻውላስ ዙራሙሪዳ ብሬ ዙርፅጚ እስታው ድኪ ባይል ዝኩኹ አኽጝስ አክም ዝኩኽስታ ሞኬራው ክንታንቲ እሊው ዙራሙሪሾ ካሳው አኽጝስ አኽⶓ ፅፌት ጝናሱ አላፊ ጌሌፅካ:: እንሳ ችግሮ ኽይጝስ 2017 ም/አሜትዳ ክርፄ ዋይሜ ሜዜጌብፅጝስ አባላምቲዳ ካንታንትካዋ ቢኪፅጝስ ክንትፃንትካ ፊቴ ጊዞጊ ቴኬምስትካማ ክንታንትካዋ እርዳታንታ ፄውስትኹ ያኹስ፣ ላጛንቲዳ ዴሜካ ዙራሙሪኩ ዝኩዋንትካ ዝኩኑ ዙራሙሪዳ ያኼካማ ጄርካዋ ክንትፃንታ እክድ እምስትⶓ እርዳትፅካ:: ክንታንትካ ክርፄ ዋይሜ ሜዜገብፃንታ፣ ፍታኒ ጊዛይ ክንታንትካ አንኩሌ አሬቤሽስታቲንታ ፅፌት ጝናሱ አላፊ እንፅኼንቶ ፌያፌይጝፅካ::