ታደለ አጋጄ
1970 ዳስታ 1980ዳ ይቶፒያው ልኩ ኩታው ኬችዳ ስሞ ኬፍናማ እቑስታሺኹ፣ ክዱስ ጊዮርጊስ ልኩ ኩታው ኬችስስታ ይቶፒያው ብሄራዊ ኬች ጐቤዝ እንክራንቲ እሺኾ ሙሉጌታ ከበደ /ወሎየው/::ካሜንስታማ ሌጌስኹ ወሎዳኽ:: ልኩ ኩታሊ ቡንካ ጄሜርኹ ዴሜካ ሆቴ ስታዲየምዳኽ:: ወሎ ፔፕሲዉ ልኩ ኩታዉ ኬችስ እንክራ::
ጌና ደሴዳ ዝኮስኩስ ፔፕሲ ልኩ ኩታው ኬችስ እንክሩስ ጌሬምፃው ካሌቕት ዌና አኽⶓ ሚንችካ ሜሴኬራና::
ካላካልጛንትካስ ስጋት ያኹኽ ጐቤዝ ፂካንቲ ሙሉጌታ ከበደ ዊፅስትⶓ እንካናቲዉ ኩታዋ እሜማ አሬኽትስ ጊጛው ጎልካዋ ቼፍፅጝዴስ እንግርግራ ናቲዉ ትንታግ እንክራንቲ እሺኾ::
ሙሉጌታ ከበደ ጚጛርትጛሳ ሚንችካ አቕትጝፅኹ ወሎ ፔፕሲዉ ልኩ ኩታው ኬችዳስታ አናጉዝማሱ ወሎ ክፍለሀገር ወሎው ጉልሊ ፋሌንጋ ክዱስ ጊዮርጊስ ልኩ ኩታውሳ ኬቾ አሌቔትጛማ ፌይፁኩ 13 አሜትካዳ 7 ይቶፒያው ሻምፒዮናስታ እሊው ልኺትጚስ 7 ዋንቼ ጉሽጝስ ካላ:: ድምክኒስኪላ ክዱስ ጊዮርጊስዳ ምልኻትታ ካንትስታው ሙሉጌታ ከበደ ሹኺኒ ኮኬብ ጎሎ ቼፍፃንቲስታ ሹኺኒ ዳሜካ ኮኬብ /ጐቤዝ/ እንክራንቲ ያኻማ ጎሌልስታ::
ክዱስ ጊዮርጊስስ እንክርጝዴስ ቤዴራ ብሄራዊ ኬችስ እንክርኹ ሙሉጌታ ከበደ ጋያኪ ይቶፒያ 1980 ምስራክስታ ክቻክቺው አፍሪካው ዋንቼ ሴካፋዋ ዊፃኒስ ኬቹ ቹዋ እንክራንቲ እሺኾ::
ይቶፒያው ልኩ ኩታው ኬችዳ ጐቤዝ ፂካንቲ ስታዲየምዳ ማራዶናታስታ ፔሌታ ክቻ ስሞ አቑስታማ ዜሜርስታይኹ ሙሉጌታ ከበደ ጌቴምኹ ቑንዚው ምክኒያቲስ ክሪስ አጉሌልጛ:: ንባሮኪ ኢቢሲ ስፖርትዴስ አግፅና::