ክብረ ወሴኖ ዱንፂት

ዘውዴ በካሉ

24 ሳታኻዳ 7 ሻይዴስ ጃላ ፑልአፓ እንፃኽስትጝስ ክብረ ወሰኖ ዱንፂት ኹና

34 አሜታ ኦሊቪያ ቪንሰን 24 ሳታኻዳ ላጚቲ ሻይ 79 ፑል አፓ እንፃኽስትጝስ ኹኑ ዜርፍስ እምስታማ እሺኹሳ ክብሩሳ ወሴኖ ላጛታፍ እስታው አችስ ኬሽጝፅጝስ አሌሙሳ ክብሩሳ ወሰኖ ዱንፅጝስ ካሌ::

እንዴስ ፍና ፓላንዳዋት ፓውላ ጐርሎስስ እምስታማ እጂኹ ክብሩ ወስን ሲዚሻይ 81 ፑልአፕ እሺኾ:: ኦሊቪያው አሌሙሳ ክብሩሳ ወሴኖ ዱንፅጝስ አኬድትኹ ጜራዴስስታ ሴሌቴንፃንቲዴስ ይንቱኹ አሳብስያኽ:: አባላምቲዳ አሳብስ አምንታውላስስታ ሳኪትጛው ኔታ ታክስታውላስ ቲጉኒኪላ አሊዲዳ ኩፂ ዋይሜ ሳኪትጝፅጝስ ካሌ:: ኦሊቪያ እንስ ቢኪኹ እምፕላኒስ ጋቲውያኽ:: እና ይሴና ኹና 12 አርፋሳ ስልታኔ ካፂት ታኹስ፣ ቤዴር ኑስ ሪከርዶ ዱንፅጝስ ፄውትኹ ሙኪሪስኪላ ስፖርቱ ሜንድሬኽሾ ዙርታታ ፄዋሺኹሳ ይዝኩዌ ጉዳቶ ሌንጌድስታሺቲኾ:: ያኻማኪላ ሳኪትጙኽ እክምኒስስታ ዳላው ፉሪዴስ ፋሌንጋ ስፖርትሾ ዙርጝስ አሌሙሳ ክብሩሳ ወሴኖ እሳን ሊሊትትስ ሜዜጌብፅጝስ ካሌ::

ክብረ ወሴን ዌና ኦሊቪያ ሚዚንብፂኹሳ ስኬቶ ዙሚስ “እንሳ ሳኪትጝፃኻ ናታ ታክስያሱሳ ዲቦኽ ሳኪትጝፅኹ፣ ፍንሾስ ሺንካታጊ ክስጝ ኩፂ ጊዝዴስ እምፕላቺ አክምዴስ ጃላኽ ናታ አሴፑክሳ ዲብካዋ ዙርፃታ ፂኒሳታ ፄዋ” ኔ::

ጝርጃስ አኹኪ ኹንስ 24ሳታኻዳ ክቻክቺስ ሲዚ ሻይዳስ ጃላ ፑል አፓ እንፃኽስትጝ ሳሴርስ ካሊስታው ዲብ ጋቲውያኽ:: እን ዴሜካ ኦሊቪያ ቪንስኑሳ ስኬቶ ዲኒክፂ ፄዌ::

ንባሮ አግፅንኹ ኢቢሲ ዴስያኽ”