ባኩ ፋያው አግልግሎቲስ እምፕልታቖ ቴኬምስታንታ ፄውጝስ እንፃኽስስታማጊያኽ

ዘውዴ በካሉ

ችኹ ባኩ ፋያ አግልግሎቲው እንፅኺስ ቤዴራ ቴርት ፄውስትⶓ ጉዋንጉዊ ወረዳው አሴቴፍጛንትካ ዙሜካ::

ጉዋንጉዊ ወረዳ አንጉዋይ ኬቤሊው ዝኩዋንቲ ዎታት አስማረ ይግዛው እን ችኹ ወክትዳ ምንጊዴስ ጃላ ባኩ እንፅኺዳ እሳንስ አሴቴፍጛንኩ አኽⶓ ስልኪስ ዙማ::

ባኩ እንፅኺዳኪላ አምሉ አሻሪውሳ እንፅኼ፣ ምንድራሺውሳ ወረርሽኞ ካላካልጚውሳ እንፅኼ፣ ዴዴኮ  አኹኪ ዳንቦ እስካዊስ ግቢትⶓስታ ፄጌንጙሳ እንፅኼ፣ አክማ ጋቲንኩ አቕስ ጝኖ ጊቢትⶓስታ ፄጌንⶓ፣ ብሬ እይⶓ፣ ካሜናንትካ ቹትካ አምቡላንስ ታምብምባ ጉዲስታቲንታ  ግርብስ ቡጝስ እርዳትጝዳስታ እሊኩዳጊ ባኩኩ እንፅኽካዳ ትኩትካማ እንፃኽስታንኩ አኽⶓኪላ ዎታት አስማረ እንክርፃ::

ጉዋንጉዊ ወረዳ ዎታትካውስታ ስፖርት ፅፌት ጝናሱ አላፊ አቶ በላይ ገድፍ 2017 ችኹ ባኩ ፋያው አግልግሎቲስ 60 ሻይዴስ ጃላ ባኩ ፋያው እንፃኽስታንትካ አሴቴፍጛንኩ አኽⶓ ጌሌፅካ:: ጉዋንጉዊ ወረዳታጊ ፌይኹ አሜትዳ ሚንችካ ባኩ እንፅኽካ አኮሜችስትⶓ ጉሹንኩ ፅፌት ጝናሱ አላፊ እን አሜትስኪላ 14 እንፅኺኩ አይኔትካስ ባኩሳ አግልግሎቴ እንፃኽስታንኩ አኽⶓ ቶኬምካ:: /2017 ም/አ ችኹ ዎክትዳ አምሉ አሻሪው እንፅኺዳ   20 ኬቤሊዳጊ እምፕሎ እምፕሎ ጝኖ እስካዊስ ጊቢትጝስታ ፄጌንጝ፣ አክማ ጋቲንኩስ ግርቡሳ እንፅኼ እንፃኽስትጝ፣ ክንቲዳስታ ስልታኒዳ ትኩትስ እንፃኽስትጝ፣ ቲኑ ዜርፍዳ ዴሜካ  ምንድራሺ ቑንዚውሳ ወረርሽኞ ኔኬትጝስ እንፃኽስትጝ፣ ስርኩ ልማትካዳስታ ልማቶ ይስጝፅጝዳ፣ ሰላሙስታ ዴክቱ ዙሪዳ፣ ትራፊኩ አግልግሎቲዳ፣ ዙራሙሪው ማንዲጝዳስታ አንኬባኬብጚዳ፣ ቻ አጌሮ አሬኬብስታውሳ ክምንቶ አፌርጝዳ፣ ውማዩ አግልግሎቲዳ፣ እጋፊ አቑ ዚዊዊርጚዳ፣ ብሬ እይጝዳስታ አክማ ጋቲንኩስ ማዕዶ ቤንጝፅጝዳ እንፃኽስትጝስ እክድ እምስትⶓ ፅፌት ጝናሱ አላፊ ጌሌፅካ::

ባኩስ እንፃኽስስታው እንፅኺ ዙራሙሬ ማንዲጝዴስስታ እምፕልታቖ አጌላጌልጝዴስ ድምክና ምንግስትዴስ ፋውሳ ፍሼ ሳሴርስ ኔኬትጝስ ካሊስታው አኽጝስ ውላጊ ባኩሳ እንፅኼ እንፃኽስትጝስ አላፍቶ ፊትጝጝ ቱስታው አኽⶓ ጌሌፅካ::

አዊ ብሄረሰቡ ቺፅጝፂዳኪላ ችኩ ባኩ ፋያው አግልግሎቲዳ 500 ሻይዴስ ጃላ ዎታትካ  አሴቴፍጛንኩ አኽⶓ ዎትትካውስታ ስፖርት ሜምሪው አላፊ አቶ ካላአብ ካሃሊ እርዳትፅካ:: ስንብቶ እንጃቢሪዳ ካሰጙኽ ሜንድሬኽዳኪላ ችኹ አርፍካው ዎታትካው ባኩ ፋያው አግልግሎቲው ዙሪዳ አቕትጚው ቴርት ካስጛ:: ቴርትዳኪላ “ባኩንትስታ እምፕልት ይቶፒያው ኬፍቲስ” ናው ጉሳንቲ እንፅኼንትስ 2017 ችኹ ባኩ ፋያው አግልግሎቲ ካስጛው አኽጝ ጌሌፅስታ::

ዎታትካውስታ ስፖርት ሜምሪው አላፊ አቶ ካለአብ ንጙዊኒ ባኩ ፋያው አግልግሎቲዳ ሚንችካ ዎታትካዋ አሴቴፍጝፅጝስ እምፕልታቖ ሊሊትጙንኩ ዜርፍካስ ቴኬምስታንታ ፄውጝስ ቤዴራ ቴርት አሌድስትⶓ ጉሽካ:: ባኩ ፋያው እንፅኺስኪላ ክንቲው ዜርፍዳ፣ ቲኑ ዜርፍዳ ምንድራሺ ቑንዚውሳ ወረርሽኞ ካላካልጝጝዳ ፣ አምሉ አሻሪዳሰታ እሊኩዳጊ ዎታትካዋ አሴቴፍጝፅጝስ እምፕልታቖ ቴኬምስታንታ ፄውጝስ አኬድⶓኪላ አቶ ካለአብ ጌሌፅካ:: እንጚስኪላ 700ዴስ ጃላ እምፕልታቖ ቴኬምስታንታ ፄውጝስ አኬድስትⶓ ቶኬሙንኩ አቶ ካለአብ 400 ሚሊዮን ብርስ ጌሜትስታው አግልግሎቲ ዎታትካስ እይስታው አኽⶓ ጉሽካ::