አንኬባኬብጝ ምርታምትስ

አለሚቱ የኔት

ምርቶስታ ምርታምቶ ዴሜክጝስ ዜርስታንኩ ሴብልካስ ፋይፃውሳ  አንኪባኪብጜጊ ፄውጝ ቱስቴ:: ምርታምት ኔኬታታ ፄዋንኩ ዲብካ ክቻዴስኪላ አሪሚስታ ኹዋንቲ ቶኬምስታንትካኽ:: አሪሚ ሴብልዳ ታምፃው እምፕል ጉዳት ሴብልካ ይወትስ ፋይስታንታ ያኹንኩ ግባትካዋ  አግፃቲንታ ፄውጝያኽ:: ምርታምት ዴሜካታ ፄውጝስኪላ አንኪባ ኪብጚው ሴልካ ክቻዴስ አሪሜ ቱስቲስ አሬምጝ፣ ግባቶ ወክትስ ዴሜክጝስታ ኹዋንቲ ኬሴትስስታቲታ ሲፋሲፍጜ ፄውጝ ፋይፄ::

አዊ ብሄረሰቡ ቺፅጝፂ አንኪሺ ጉዋጉሲ ወረዳ ቤካፍቲ ኬቤሊው ዝኩዋንታ ዊዛሮ አስናከች ዘላለም ስልኪስ እንክርፁኑውስታጊ ፌይኹ አሜትዳ ኽብፂ ማዳባሪው ዲግስጚው እንፂጝ ጌቴምጝስ ፍትሬቱ ማዳባሪስ ይቪቻ ምርታምቶ ኬፍፅጝስ እሺኹ እንፃኽስትጚ ዋይሚስታ አኽጝዳ አሳላካ እሼ::

እምስትኹ አሜትስ ኩፅኒ ዋይሚው ክብርናቲ ዝኩዋችኹኒኪላ ኽብፂ ማዳባሪው ዲግስጚው ችግር እላቲው አኽጝስ ሹንቤ ዜሬካማ ካቦ አሬምጝስ ሌጌፅጝስ እይስታውሳ ዩሪያዋ ዴሜክካማጊ አኽⶓ ዙሜካ:: ቤዴራ ዲግስጚው እንፂጝስ  ማዳባሪ ዴሜክስቱስ ሳሲትጝስ ቱስታውሳ ላካሳ ማዳባሬ ፄዋቲንኩ እሺⶓስታ ንⶓ ኩፅኒ ፄውጝ ቱስታውሳ ማዳባሬ ዴሜክጝስ ካሊፁክ አኽⶓኪላ ድኹዌካ::

ማዳባሬ ዴሜክጝሊ ቴርቴራ አሪሚ አሬምስታውሳስታ ሻኪስታውሳ ጊዞኪላ ማንዴካማ ካስጝፅካማጊ አኽⶓ ዊዛሮ አስናከች ዲብስካ:: ኹዋንቲ ኬሴትስታቲታኪላ ስግላሰታ ክማኒ ኻፄ ዳሴስካማጊ ካንትጝስ ጐቤናንኩ አኽⶓ ቶኬምካ:: ኬቤሊዳ አግስታንኩ ግብርኒው ውማይቴንካኪላ ሼውቲ እላቲኩሳ ክንትፅጝስ ዋሺኒ ጊዝስ ዜርስታው፣ አሬምስታውስታ ማዳባሬ ቴኬምስትጝ ቱስታው አኽⶓጊ ሙሬኺስታ ዙራዙርጝስ እርዳቴስታ ሲፋሲፍጝ ፄዋንኩ አኽⶓኪላ ዲብስካ::

እሊው ቤካፍቲ ኬቤሊው ዝኩዋንቲ አሬሳቻንቲ ትላሁን ፈንታሁን ዴሜካ ፌይኹ አሜትዳ ሰላሙ ዳንጉዊኒዴስ ድምክና ኽብፂ ማዳባሪው ዲግስጚ ልማቶ ሼውታ እንፃኽስታማ ዋይሚስታ አኽጝስ ቼጌርፃሺኩ አኽⶓ ቶኬምካ:: ንጙዋ ኩፅኒ ኬሻንቲ ሰላሙ አኺኒ ዝኩⶓ ጉሽካ:: ዜሩኑሳ ሹንቤ ቱስቲ ዝኩኽሳ አንኪባኪብጜ ፄውጝስ ሴብሉ አኺኒ ኬሻንቲ አችዳ አኽⶓ ዲብስካ:: ጉልሌ ዜሮ ፋይታ ዲግስጝዴስ ጄሜራማ ንⶓ ጉድ አኺኒስ ዲጋይⶓ ቶኬምካ::

ቤዴራስታጊ ኽብፂ ማዳባሪው እንፂጝ ጌቴማቲታ ማንዲትጚስ ካሊፃታ ታክስጝስ ኬቤሊው ግብርኒው ውማይቴንካ ፍትሬቱሳ ማዳባሬ ኮምፖስቶ ቴርሳንታ ፄውኑ ክንቲስስታ እርዳቲስ ቤዴርካማ ቴርስጝስ አቓ ግብሪሊ ድምክና ቴኬምስትጝስ ካሊፁክ አኽⶓኪላ አሬሳቻንቲ ትላሁን እንክርፄካ::

ሴብሎ አንኬባኬብጝዳ ወሴኻንኩ ሙሪዳ አግስታንኩ አሬሳቻንትካዋኪላ ልማቱ ኬችስ ኩስጜ እይጝስ አንኪባኪብጚሾ ቱዋንታ ፄውጙሳ እንፅኼ እንፃኽስትካማጊ አኽⶓ ዲብስካ::

ቤካፍቲ ኬቤሊዳ ሴብል ልማቱ ውማይቴና ገነት መልሰው ኑኑውስታጊ ኬቤሊዳ ውላጊ አሬሳቻንትካ ዜርጝ ቱስታው ብቲዳጊ ሹንቤ ዜሬካማ ላጛንቴ ዙሬ አሬምጝስ ሌጌፃንቴ ዩሪያዋ ዴሜክካማጊያኽ::

ኽብፂ ማዳባሪውሳስታ ጉልሊ ዜሩሳ ዲግስጜ ካንትኹስ ዴሜካ ክብርናቲ ዴስ ይጐ ቤዴርካማ ፋይታጊ ዲግስጝስ ካሊⶓኪላ ውማይቴና እርዳትፅካ:: ዙራዙርካማጊ እርዳትⶓኪላ አሬሳቻንትካሊ ይጋሪስ እንፃኽስታንኩ አኽⶓስታ እያኑሳ ኩስጝጜ ዴሜካ ቻቤልካማ ቴግባራዋ ፄውጝዳ ችግር እላቲኩ አኽⶓስታ እያኑሳ ኩስጝጜ ዴሜካ ቻቤልካማ ቴግባራዋ ፄውጝዳ ችግር እላቲኩ አኽⶓ  ቶኬምካ:: ሹንቢው ሴብልዳ ኹዋንቲ ኬሴትስታቲታ ምርታምት ኔኬታቲታኪላ ዙራዙርካማጊ ጐቤናንኩስታ ጜዋን ሲፍጛንታ ፄዋንኩ አኽⶓ ጉሽካ::

አቶ አንዷለም ነጋ አንኪሺ ጉዋጉሲ ወረዳ ግብርኒ ፅ/ጝናዳ ውማይቲኒ ጌሌፁኑውስታጊ ወረዳታ ዜርስቱንኩ ሴብልካዋ አሬሳቻንትካ ቱስቲስ አንኬባኬብካማጊያኽ:: አሪሜ አሬምጝስ፣ ሻኪጝስ፣ ማዳባሬ ዴሜክጝስስታ ኹዋንቲ ኬሴትስታቲታ ፄውጝስ ውላጊ አሬሳቻንትካ እንፃኽስትካማጊ አኽⶓኪላ እርዳትፅካ::

ምርቶ ዴሜክጝስ ካሊፃታ አሪሚዴስ ጄሜራማ እንፃኽስትጝ ቱስታው አኽⶓ ቶኬሙንኩ አቶ አንዷለም አሪሜስታ ኹዋንቴ ቱስቲስ ካላካልጝጝስ ፋይፃንቲ አኽⶓኪላ ትኩትስ ጌሌፅካ:: ጊዝዴስ ጊዞ ካንትስታማጊ ዝኩኽ አሬሳቻንትካ ሴብልስ ፄዋኑ አንኪባኪብጚኪላ ኬሽጛማጊ አንትⶓ አቶ አንዷለም ቶኬምካ::

አሬሳቻንትካዋ ዲጊዳ ያኻማ ውማይስ እርዳትጝዳ ኬቤሊቺፋ ዝኩንኩ ውማይቴንካ ዋኾ ጊዞ ኬቤሊዳ ፌይፅጝሾዳ ኬሻንቲ እንፃኽስትጚ ዝኩⶓ እርዳትፅካ:: ውማይቴንካዋ ሲፍጝጙስታ እርዳትጙ አኺኒኪላ ኤከስቴንሽን ሲስተም እስታውስ ካስጛው አኽⶓ አቶ አንዷለም ጌሌፅካ::