ቤዴራማ ካላካልጜ ፋያው

ዘውዴ በካሉ

ምንድራሺው ቑንዚ ፕላዝሞዲዬም እስታንኩ እንኪቴንካ ዲብካስ ይንታው ቑንዚያኽ:: እን ቑንዚ ምንድራሺውሳ ቑንዜ ቡይት /እምቲት/ ምንደራሺት ሚቓያስ አቒዴስ አቒሾ ፌያፌይጛውያኽ:: እንኪቴንካ አቒው ዶሌትሾ ቱጝስስታ እሩብጝስ አቕ ቑንዳስታንታ ፄዌ::

ፋልሲ ፓረም፣ ቫይቫክስ፣ ኦቫልስታ ማላሪያ እስታንኩ ሴዛ አይኔት ምንድራሺ ቑንዚ  ዝኮ:: ቑንዚኪላ አኖፌለስ እስቴት ኹና ሚቓያስ አቒሾ ፌያፌይጜ:: ድሚ አንኩዋ አሜታዴስ ኩክራ ያኹንኩ ስራስሪ፣ ሼርካ ኹንሰታ ኤች አይቪ ኤድስ ብራኻዳ ዝኩክ አቕ ምንድራሺው ቑንዚስ ፂኪስትጙ አክም ኬፍንኹያኽ:: ጋያኪ ሌጌስጝዳ ዝኩንኩ አጌርካዋ ምንድራሺው ቑንዚ ሚንቺትስ ፂኬ:: ሰሃራዴስ ኩክራ ዝኩንኩ አፍሪካኩ አጌርካዳ ሚንቻው ያኹኒኪላ አኒጛ አጌርካዴስ ይቶፒያዳ ችኽ ቱጝሊስታ እሪው ሜቴን ዴሜክጝሊ እምትጛማ ምንድራሺው ቑንዚ ጊዝዴስ ጊዞ እሳንጛማጊ ይንታ::

ምንድራሺ ቑንዚኩ ምልኻትካኪላ እንኩዊንት፣ እኹማ እኹማ ፄውጝ፣ ትራኹፅጝ፣ ስስቕፅጝ፣ ታፎ ልኮ ኮሬቴምጝ፣ ጛሬ ቑንዳፅጝ፣ ጃላ ፅጝስታ እሊኩኪላ ምንድራሺ ቑንዚው ምልኻቲያኽኽ::

እን ቑንዚስ ቑንዳስትጝዴስ ቤዴራማ ዴሜካ ኻጉሳ አጐበሮ ቴኬምስትጝስ፣ ዙራሙሪውሳ ፃንኩቶ ማንዲጝስ፣ አኾ እሜንኩ ምንድራሺት ሚቓያ እሩብታታ ፄዋንኩ ዲብካዋ ዱንፅጝስ  ካላካልጚስ ካሊስቴ:: ቑንዚው ምልኻት ካንትስታኒ ዎክትስ እክምኒው ኾትሾ ካስስታውላስ ይጉኒጊ ብራኻዳ ዝኩኽ ምንድራሺ ሚቓያው  እንኪቲኒ ሚንቻማስታ እሩባማ ኹፕኹፕፂሾ፣ ዱሌትሾ፣ እንኩላሊቲሾስታ አንኩሊሾ ካስጝስ ጉዲጝስ ካሌ:: እን ምንድራሺው  ቑንዚ አዊ ብሄረሰቡ ቺፅጝፂ አዩ ጉዋጉሲ ወረዳዳኪላ እሳንጛው ዙራሙሪ አኽጝስ ቑንዚውሳ ካላካልጜስታ እክምኔ ካንትኹስ ዙራሙሪኩ ዝኩዋንትካሊስታ ትኩታኩ አካልካ ስልኪስ አሳቦ እይካ::

አዮ ጉዋጉሲ ወረዳ ሹኻ ጃቢሊ ከቤሊው ዝኩዋንቲ  አቶ ፈረደ በሬ ችኽ  ቱⶓ ሲፋማ ማንዚ አርፊዴስ ጄሜራማ እምፕልታቕ ምንድራሺው ቑንዚስ ፂኪስትካማጊ አኽⶓ ዙሜካ:: እምፕል እምፕል ጝንዳ ላጛስታ አንዴስ ጃላ አቕ ምንድራሺው ቑንዚስ ቑንዳስቴካማጊ አኽⶓ ቶኬሙንኩ አቶ ፈረደ ጛዋ ዴሜካማ ሴዛዴስ ጃላ ጝን አቕ ቑንዳስትⶓ ድኹዌካ:: ምንድራሺውሳ ቑንዜ ካላካልጝጝስ ዙራሙሬ ፃንኩፅጝ፣ ኻጉሳ አጐበሮ ቱስቲስ ቴኬምስትጝ፣ ቲሪኹሳ አኾ ክብፅጝ፣ ቑንዚ ሚንቻው ዙራሙሪዳ ኬሚካሎ አሬችጝስስታ ቑንዚው ምልኻት ካንትስታኒ እክምኒሾ ካስጝ ፋይፃው አኽⶓ ዙሜካ::

ምንድራሺው ቑንዚ ፌይኹ አሜትዴስ ጄሜራማ ሚንቻማጊ አኽⶓ ጉሽንኩ አቶ ፈረደ ኬሚካል አሬችሰትኹ ዙራሙሪዳ ቑንዚ ኔኬቱኒኪላ ወረዳታስታ ዙራሙሪታ ኩፂ ቑንዚስ ፂኪስታንኩ አቑ ቼፍ ኔኬታያሱ  አኽⶓ ዲብስካ::

አዚኒ ኬቴሙ ዝኩዋንታ ቤዛዊት ወርክነህ ዋልኽ ሚንቻው ዙራሙሪ አኽጝስ ምንድራሺት ሚቓያ እሳንስ እሩብጝስ እምፕልታቕዳ ጉዳቶ ታምፃማጊ አኽⶓ ድኹዌካ:: አኹ ቲሬውሳ ስፍሬ አኹ ክቤታ ፄውጝስ ዙራሙሪዳ ምንድራሺት ሚቓያ እሩብታውሳ አኾ ቲሪፃውሳ ኮርሻማርሼ ዱንፅጝስስታ ድጙፅጝስ ዙራሙሪኩ አቕ ቤዴርካማ  ካላካልጚውሳ እንፅኼ እንፃኽስትካማጊ አኽⶓኪላ እንክርፄካ:: ቑንዚው ምልኻት ካንትስታኒ ዙራሙሪዳ አግስታው ቲኑ ጉትፕሾ ካሳኒ ዳላው እጁስታ ውማይቲኒው እንፂጝ ችግር አኽⶓ ጉሹንኩ ኬቴሙ ዝኩዋንታ ቑንዳስታኒ እጆ ጛርቱ እክምኒው ኾትዴስ ጄዋውዴስ፣ ይኮኖሚስ ጉዲስታውዴስስታ ይዎቶ አታውዴስ እጁ ዋኽትጛታስታ ኻጉ አጐበር ዲጋያታኪላ ካሲካ::

እሊው አዮ ጉዋጉሲ ወረዳ ሹኻ ሹማቲ ኬቤሊው ዝኩዋንቲ አቶ አለነ በላይ ምንድራሺው ቑንዚ ችኽ ቱⶓ ሲፋማ እሳንጛማጊ አንትⶓ ድኹዌካ:: ቑንዚስ እምስትጝዴስ ቤዴርካማ ካላካልጜ ፋይፃው አኽጝስ ኻጉሳ አጐበሮ ቱስቲስ ቴኬምስትካማጊ አኽⶓ ድኹዌካ:: አጐበሮ እሊው ትክምስ እሽፃንኩ አቕስኪላ ሼውቴ ፌቴርካማ ቱስቲስ ቴኬምስታንታ ፄዌካማጊ አኽⶓ እንክርፄካ:: አጐበር እይስትⶓ ባይኹ ሚንች አሜት አኽⶓ ጉሹንኩ አቶ አለነ አጐበር ዲጋያታ፣ ኬሚካልኪላ ጛው ኬቤሊዳ እይስታያሱ አኽጝስ አሬችስታያታኪላ ካሲካ::

አዮ ጉዋጉሲ ወረዳ ቲን ፅፌት ጝናሱ አላፊ አቶ ተመስገን ፈንታሁን ናኪኒ ወክት ችኽ ቱዋማጊ አኽጝስ ምንድራሺው ቑንዚ እሳንጛውስታ እምፕልታቕ ቑንዚስ ፂኪስታኑ አኽጝስ ቑንዳስታንትካው ቼፍ ዴሜካማጊ አኽⶓ ጌሌፅካ:: ምንድራሺው ቑንዚስ ምንጊዴስ ጃላ ትኩት እይስታማጊ አኽⶓ ዙሙንኩ ፅፌት ጝናሱ አላፊ እምፕልታቕ ቤዴርካማ ቑንዜ ካላካልጛንታ ቲንኩ ውማይቴንካ ጝንቺፋ ዙሬካማ አጐበሩሳ ቲኪምስትጝጜ፣ ዙራሙሪውሳ ፃንኩቶ፣ ምንድራሺት ሚቓያ ሩብታውሳ ስፍሬ አኹኪ ኮርሻማርሼ ዱንፅⶓስታ ፃሜ አኾ ክብፅⶓ እንፃኽስቴካማጊ እምፕልታቕስ ሼውቴ ፌቴርካማጊ አኽⶓ እርዳትፅካ::

ኻጉ አጐበር ወረዳታጊ እምፕልታቕስ እይስትኹ 2014 ም/አሜትዳ ጌሌፁንኩ  ፅፌት ጝናሱ አላፊ እምፕላኒ እይስትኹ አጐበር ሹኻዴስ አንኩዋ አሜቶኺስታ ቴኬማው ያኹኒኪላ እምፕልታቕ እሊውስ ትክምስ እሽፅካማጊ አጐበር እላቲው አኽጝስ ቑንዚውሳ አኺኔስታ ቑንዳስታንትካውሳ ቼፎ ቶኬምጝስ አጐበር ዲጋያታ ትኩታኩሳ አካልካዋ ካሲካማጊ አኽⶓ ጌሌፅካ:: ፌኔኬልጜካማ እሺንኩ እምፕልታቕስ ኻጉ አጐበር ዲጋያታ ካሲካማጊ አኽⶓ ጉሽካማ ሼርካ ቹትካስስታ ፃኹፃንኩስ እይስታታ ኤች ዳማ እስታው አችት እምፕል ሻይ ኻጉሳ አጐበሮ ዲግስⶓ ጌሌፅካ:: ምንድራሺው ቑንዚ አዮ ጉዋጉሲ ወረዳታጊ ፌይኹ አሜትዴስ ኪቻ ንⶓ ሚንቻማጊ አኽጝስ ቑንዚ ሚንቻው ዙራሙሪዳ ኬሚካሎ አሬችጝስ እክድ እምስትⶓ ፅፌት ጝናሱ አላፊ እርዳትፅካ:: ክልል 11 ሻይ 382 ኪርፂቴ ኬሚካሎ እይጝስ አኬድስትኹ አኽⶓ ጉሽንኩ አላፊ 2017 ም/አሜትዳ 30 ሻይ 60 ጝኖ ኬሚካልስ አሬችጝስ አኬድስትኹ አኽⶓ ቶኬምካ:: ወረዳታጊ አሬችጝስ ፋይፃንኩሳ አክኽካዋ ቴርስፃማ ዲግⶓኪላ ድኹዌካ:: እን ኬሚካል አሬችስታው ቢዲሪዳ ቑንዚ ሚንቻው ዙራሙርካስ አኽⶓ ቶኬሙንኩ አላፊ እምፕልታቕ ቤዴርካማ ቑንዚዴስ ካላካልጝጝስ ሚቓያ እሩብታውሳ ስፍሬ አኾ  እሚኹሳ ዲቦ ዱንፅጝ አኹኪ ብብርፅጝ፣ ፍሮ ዴፌንጝ፣ ዙራሙሬ ፃንኩትስ ማንዲጝስታ ዝኩኽሳ ኻጉሳ አጐበሮ ቱስቲስ ቴኬምስትጝ ፋይፃው አኽⶓ ጌሌፅካ:: ወረዳዳ ፌኔኬልጜካማ እሺንኩ እምፕልታቕስ ዳሜካ ቑንዚስ እክምኔ አግፃንታ ጌሌፅካ:: ወረዳዳ ፌኔኬልጜካማ እሺንኩ እምፕልታቕስ ዴሜካ ቑንዚስ እክምኔ አግፃንታ ውማይቴን ሜዴብስትካማ እክምኒ ኔፃስ እይስታማጊ አኽⶓ ቶኬምካ::