ደለ አጋጄ
ፈረንሳይ ሻምፒዮና ታኹኽ 2018 አሌሙ ዋንቺዳ ንጎሎ ኮንቴሊ እምፕልትስ ፃምርትጚሳ ጐቤዝ እንክራንቲ እሺኹ ፖል ፖግባ እምፕል አሜቱስታ 8 አርፋሱ ልኩ ኩታው ክፃትዴስ ፋሌንጋ ልኩ ኩታው ልኺትጚሾ ዙራ::
ፈረንሳዩ ቹዋ ኬቴማ ፓሪስዴስ ፊጝኔታ አግስቴት ሙራዳ 6 አሜታስ ራውሲ አን ብሪ ሌጌሳታምብካው ኬችዳ ጄሜርኹ ልኩ ኩታው ይዎት ዩኤስ ቶሪሲስታ ሊሃቭሬ ኬችካስ እንክራማ አሊዲዳ አልድ ትራፎርድዳ ፄዋ:: ዎክትዳ ፖል ፖግባ ማንቸስተር ዩናይትድስ 18 አሜትዴስ ኩክራ ኬችዳ አሌቔትጛማ ካንትፅኹ ካሌቕትስ 2011 ቹዋ ኬችስ አባላምቴ እንክሬ ፄውጝስ ካላ:: ያኼስጉ ኬችዳ እንክርጙሳ ድሎ አግፃውላስ ይጉጝስ 2012 ዳ ዩናይትድስ እሺኹ ውል አሌድስታኒ ታሊያንሾ ካስጝስ ጁቤንቱስሾ አሌቔትጛ::
ጁቤንቱስዳ ውላ ልኺትጚው ዝቤንዳ 179 እንክርካዳ ሴሌፍስታማ እንክርጝስ ጐቤዝ እንክራንቲ አኽጝስ ካላ:: 34 ጎልካዋ ይኺሊ ታምትጝፃ:: ሲዚ አሜታሱ ታሊያኑ እጂጚዴስ ፋሌንጋ ክብረ ዎሴን ያኹኽ እንክራንትካዉ ዚዊዊርጚስ ካቭስ ማንቸስተር ዮናይትድሾ ዙራ::
2016/17 ልኺትጚው ዝቤንዳ አልድ ትራፎርዱ እጂጚዳ 47 እንክርካዳ ሴሌፍስታማ እንክርጝስ ኬች ዩሮፓ ሊግ ሻምፒዮን ያኹስ ኬፍንኹ ፍሺ እሺኾ::
ላጛንቲ አሜቱ እጂጚዳ ጉዳቱ ምክንያቲስ 32 እንክርካዳ ይቪቻ ዩናይትድስ ሴሌፍስታማ እንክራ::
2018 ሩስያው አሌሙ ዋንቺዳ ፖግባዋ ታራታርጛንኩስ ጚውሳ አክሞ ቴግባርስ ካንትፅኹስታ ፈረንሳይ አጌራዋ ሻምፒዮና ታኻታ ኬፍንኹሳ ፍሼ ፊትጙኽ እንክራንቲ ያኻ::
አሊዲዳኪላ 2022 ማንቸስተር ዩናይትድዳ እሺኹ ውል አሌድስታኒ ካብስ ጁቤንቱስሾ አሌቔትጙኒዴስ ፋሌንጋ ቤዴራስታ ውላ ዲብ ኽችጛያ እሺኾ:: ጌቴምኹ ጉዳትዴስ ድምክና ይስጝፃንቴ ፂኪሴ ዲቦ ቴኬምስታ እስትጝስ ሲዚ አሜታሳ ልኩ ኩታዴስ አጌድስታማ እጂጝስ ክፃት 1 አሜትስታ 8 አርፋሳ ኔኬትሰታያማ ልኩ ኩታዴስ እቼማ እጄ::
ናካዳ ሞናኮ ክሌብሊ ላጛ አሜታሱሳ ዉሎ ፌሬሬምጛ:: እስካዊ ልኩ ኩታውሳ ይዎቶ ሞናኮሊ ጄሜራ::