ኬኬራንቲ ዳንብ ግቢትስትጝስ ችግርዴስ ፌካማጊያኽ

ታደለ አጋጄ

እምፕልታቖ ቺጊርፃ እሺኹ ብንዳ ምንግስት ኬኬራንቴ ዳንቦ ግቢታይጝስ እሺኹ ችግርዴስ ፊⶓ ባንጂ ወረዳ ባሪ ኬቤሊው ዝኩዋንትካ ዙሙና::

አቶ አለበል ፈተነ ባሪ ኬቤሊው ዝኩዋንትካኽ:: ችኹ ዎክትዳ ባሪ እስታው ብን አኹ ዋኽጝስ ክንታንትካ ክንቲጝና ካስካማ ክንታቲንታ፣ ሼርካ ኹን እክምኒዳ ሼውታ ካሳቲንታስታ እምፕልታቕ ጌቤላ ካስካማ ዙራቲንታ ሚንቾ ቤዴሎ ታምፃሺኹ አኽⶓ ዙሜካ::

ባንጂ ወረዳው ዳዱስታ ትራንስፖርት ፅ/ጝናሱ አላፊ አበበ በሪሁን ዳንቡስታ ዳዱ እንፅኺ ሊሊትጙንኩ ኬቤልካዳ ግቢትስትካማ አግልግሎቴ እይⶓ እርዳትፅካ::

ሚንች ጊዙ እምፕልታቑ ካሲ እሺኹ ዳዱስታ ዳንቡ እንፅኺ እምፕልታቑ ማይቤራዊ ታምትጚስ ኬፍቲኒ ፍሺ ዝኩኽ አኽⶓ ጌሌፅካ::

ግቢትስትኹ ዳድ አቤሌሽስታቲታ እምፕልታቕ ጜዋና ያኻማ እሜታኪላ ሼውቴ ፌቴርⶓ ጉሽካ::

ብሄረሰቡ ቺፅጝፂዳ 2017 ባጄት አሜትዳ ሊሊትጙንኩ ወረድካዳስታ ኬቴሙ ቺፅጝፅካዳ 665 ሚሊዮን ጌንዜቡ ፍሺስ ግቢትስቱንኩ ስርኩ ልማትካ ዳቔርስትካማ አግልግሎቴ እይⶓ ጄሜርⶓ ብሄረሰቡ ቺፅጝፂው ትክትሊ ቺፅጝፃንቲስታ ኬቴሙስታ ስር ልማት ሜምሪው አላፊ አቶ አይተነው ታዴ ጌሌፅካ::

ፄትቲውሳ ችግሮ ኽይጝዴስ ኬምፕስ ኬምፖ ልማቱ እንፅኺስ ትኩቶ እይጝስ እንፃኽስትኹ እንፅኺስ ክርፂ ዋይሚ ሜዜጌብስትⶓ ቶኬሙንኩ አቶ አይተነው ፄትቲው ችግራኻዳ እሺንኩሳ ኬቤልካዋ ኔፃ ፄውጝስ ሚንችካ ልማትኩ እንፅኽካ እንፃኽስትⶓ እርዳትፅካ::

እንፃኽስቱንኩ ስርኩ ልማትካ ክቻዴስ ጌፄሩ ዳድ፣ ካናሉ እንፅኺ፣ ኬኬራንቲ ዳንብስታ እሊኩ ስርኩ ልማትካ እንፃኽስስትⶓ ጉሽካ:: እምፕልታቑ ሚንች ጊዙ ካሲስታ ክርፂ ቺፅጝፂው ችግር እሺኹ ስርኩ ልማትካው እንፅኺ እምቢታማ አሌድስትጝስ አግልግሎቴ እያንታ ፄውስትⶓ ቶኬምካ::

እምፕልታቖ ቼጌርፃሺንኩ ዳድካስታ ዳንብካ ግቢትስትጝ እምፕልታቑሳ ክርፂ ቺፅጝፂውሳ ችግሮ ኽይጝዴስ ድምክና ላጛስታ ሹኻ ኬቤልካዋ እንቲታኪ ወረዳዋ እሊው ወረዳሊ ታምትጝፃንኩ አኽⶓ ጌሌፅካ::

እምፕልታቕ ፋያኑ ሜቴንስ ልማቶ ሊሚፅጝስ ይጉዋው ዲብ ዝኩⶓ ጉሹንኩ አላፊ እንፃኽስቱንኩ ልማትኩ እንፅኽካ ፃንኩትስ እንፃኽስቱንኩ አኽⶓኪላ ቶኬምካ::

ይንታው ባጄት አሜትዳ ጄሜርስትካማ አሌድስትካያስኩሳ አሌድጝስስታ እሊኩ እስካውካ ፕሮጀክትካ እንፅኺሾ ቱዋንታ እንፃኽስታንኩ አኽⶓ ታክስፅካ::

እንፃኽስስቱንኩ ስርኩ ልማትካ ግቢትስቱኑ ምንግስቱ ባጄትስ ይቪቺስ ያኻውላስ እምፕልታቑ ቴሳትፉ ኬፍቲኒ እሺኹ አኽⶓ ጌሌፅካ::

ውላ ዙራሙርካው ልማትኩ እንፅኽካዋ ታምብስታንታ ፄውጝስ ሰላም ሴፌንጝ ቱስታው አኽⶓ ቶኬምካ::

እምፕልታቖ ማልጛ ቼጌርፃሺኹ ባሪ ብንዳ ምንግስት ኬኬራንቴ ዳንቦ ግቢትጝስ ማልጛ ዴስቴንክ አኽⶓ ቶኬምካማ እምፕልታቕ ቼግርስታሺኑሳ ችግሮ ይጉፃይኹ አኽⶓ ዲብስካ::

“ምንግስት አምፕልታቑሳ ችግሮ እንኮኻማ ኬኬራንቴ ዳንቦ ግቢታይጝስ እምፕልታቕ ዴስቴንካኽ” ኑንኩ አቶ አለበል ኬኬራንቲ ዳንብ አሜቻው ስፍሪዳ ግቢትስትኹ አኽⶓኪላ ቶኬምካ::

ኬኬራንቲ ዳንብ ግቢትስቱስ ኬቤሊው ዝኩዋንትካ 3 ሊኻ ሻይዴስ ጃላ ጌንዜቦ ፍሽጝስ ዳድ ግቢትስታታ ፄውⶓ ጉሽካ::

ሰላሞ ማንዲፅጝዴስ ኬምፕስ ኬምፖ ልማቱ እንፅኺስ እምፕልታቕ ምንግስቱ ኬምፕዳ አኽጝስ እርዳትካማጊ አኽⶓ ኪላ እርዳትፅካ::

ምንግስት ግቢታው ልማትዳ ፍንሾስኪላ እርዳቴ ፄውጝስ ጛውሳ ታምቦ ፊትጛንኩ አኽⶓ ታክስፅካ::