ምንድራሺውሳ ቑንዜ ካላካልጝጝስ እንፃኽስስታማጊያኽ

ዘውዴ በካሉ

ምንድራሺው ሚቓያ ሚንቺጝስ እምፕልታቕ ቑንዚስ ፂኪስትካማጊ አኽⶓ ዚጋሚ ወረዳው ዝኩዋንትካ ዙሙና:: ዚጋሚ ወረዳ ጉደር ጃዊ ኬቤሊው ዝኩዋንቲ አቶ እንዳለው ብርሃን ምንድራሺው ቑንዚ ፌይኹ አሜትዴስ ጄሜራማ እሳንጛማጊ አኽⶓ ድኹዌካ:: ስልኪስ ዙሚትጝፅንኹ ወክትዳ ቲኑ ጉትፕዳ አግስታንኩ አኽⶓ ድኹንኩ አቶ እንዳለው ቑንዳስትኹ አቒው ቼፍ ሚንች አኽጝስ እክምኔ ሳትስ አግፅጝስ ቼጌርስትⶓኪላ ቶኬምካ:: ቤዴራዴስ ኬቻ ናካዳ ባሳማኪ ካስⶓ ኪላ ጉሽካ::

ምንድራሺውሳ ቑንዜ ቤዴራማ ካላካልጝጝስኪላ ቲንኩ ውማይቴንካ ሼውቴ ፌቴርካማጊ አኽⶓ አቶ እንዳለው ድኹዌካ:: ቲንኩ ውማይቴንካ ሙሪ ቺፋ ዙሬካማ ዙራሙሬ ፃንኩፅⶓ፣ አኾ ቲሪፃውሳ ስፍሬ ድፅⶓስታ ኻጉሳ አጐበሮ ቲኪምስትጝጜ ካንትካማጊ ቑንዜ ቤዴራማ ካላካልጝጝዳ እንፃኽስቴካማጊ አኽⶓ እንክርፄካ:: ቑንዳስትካማ እክምኒው ኾትሾ ካሳኒ ዴሜካ ቑንዳስትኹ አቒ ሚንችጝስ ቴር እምቢት ናማ ታምባውላስ ይጉኒኪላ ውማይቴንካ አግልግሎቴ እይካማጊ አኽⶓ ድኹዌካ:: ቑንዜ ቤዴራማ ካላካልጝጚስ ዴሜካ ኻጉ አጐበር እምፕልታቕስ እይስቱኑዴስ ላጛ አሜታዴስ ጃላ አኽጝስ ኻጉ አጐበር ዲጋያታኪላ ካሲካ::

አማኻሪ ክልልዳ ፌዩንኩ ላጚቲ አሜታኻዳ ምንድራሺው ቑንዚ ዴሜካማጊ አንትⶓኪላ አማኻሪ ክልሉ ባ/ዳር ቲን ኢንስቲትዩቱ ንባር ካንትፄ:: ክልልዳ 2016 ባጀት አሜትዳ 1 ትኩሚ 5 ሚሊዮንዴስ ጃላ ምንድራሺው ቑንዳስታንትካ ሜዜጌብስቱኑ ያኹስ 2017 ባጀት አሜት ጂሚሪ ዋልቲ አርፋ ዋኻያሱ ጊዛኻዳኪላ 1 ትኩሚ 3 ሚሊዮንዴስ ጃላ ምንድራሺው ቑንዳስታንትካ ሜዘጌብስትካ::

ዊንጊ ቲን ጉትፑ ውማይቲኒ ቴዎድሮስ ፀጋ ምንድራሺው ቑንዚ ጊዝዴስ ጊዞ ዴሜካማጊ አንትጝስ ሶኼትስኪ ያኻ አርፊስ ሪፖርታ ያኻው ቑንዳስቲኒው ቼፍ ኬፍቲኒ አኽⶓ ጌሌፅካ:: ዊንጊ ቲኑ ኾትዳ እክምኔ አግፃንኩ ዋልታ ኬቤሊኩ ዝኩዋንትካ አኽጝታጊ አግልግሎቴ ፋያንቲ አቒው ቼፍ ሚንቺጝስ ቑንዳስታንትካስ ቴር ታምባላ ናኒ ቼካማጊ እክምኔ አግፃንኩ አኽⶓ ቶኬምካ:: ቑንዚው ሜቴን እሳንጝዴስ ጁኽስ 2017 ም/አሜትዳ 30 ሻይዴስ ጃላ ያኻንኩ እምፕልታቕ ምንድራሺ ቑንዚውሳ እክምኔ ካፅⶓኪላ ጌሌፅካ::

እምፕልታቕስ አግልግሎቴ እይጝስ ቑንዳስቲኒውስታ ውማይቲኒው ቼፍ ክችጛውላስ ይጉኒኪላ ካላኑ አክምስጊ እንፃኽስቴካማጊ አኽⶓኪላ ቶኬምካ:: እንዴስ ፍና ሰላሙ ችግርስ ወክትስ እጆ ዲግስጝስ ቼጌርስታሺንኩ አኽⶓ ጉሽካማ ዲጊ ጊዝዴስ ጄሜራማ ኩፂ እጁ ችግር እላቲው አኽⶓ ጌሌፅካ:: ቑንዜ ቤዴራማ ካላካልጚስኪላ ሙሪ ቺፋ ዙሬካማ ሼውቴ ፌቴርጝዴስ ድምክና ቑንዳስቴካማ ቲኑ ኾትሾ ይንቱኑ ወክትዳ ውማይቲኒ ሜዴብስታማ ዙራሙሬ ፃንኩፃንታ፣ ኻጉሳ አጐበሮ ቱስቲስ ቴኬምስታንታስታ ቑንዚስ እምስቱኒዴስ ፋሌንጋ እምቢት ንካማ እክምኔ አግፃንታ ሼውቴ ፌቴርካማጊ አኽⶓኪላ እርዳትፅካ::

ሙሬ ዙሬካማ ጐቤናኑ ወክትዳኪላ እምፕልታቕ ሚንቺትስ አጐበሮ ቴኬምስታቲንኩ አኽⶓ ቶኬምካ:: አጐበሩ ችግር ዝኩⶓ ማሊጝስ ወረዳኪ ያኻ እርዳታንትካ አችትካጊ አጐበሮ እምፕልታቕስ ዲግስካያንታ ካሴ ዲግስⶓስታ ወረዳው አክምስ ካሊስታቲው አኽⶓ ዙርሜ አግፅⶓ ጉሽካ:: ዲጊስ ኩፅኒ ዲጉኽ ካሲ ስሬታስ 2 ሊኻ ያኻንኩ ሼርካስታ ፃኹፃንኩ ቹትካስ ታምፅጙ አቶ ቴዎድሮስ አምኔካ::

ዚጋሚ ወረዳ ቲን ፅፌት ጝናሱ ትክትሊ አላፊ አቶ አብዬ ሽቱ ዚጋሚ ወረዳዳ ምንድራሺው ቑንዚ እሳንጛማጊ አኽጞ ጌሌፅካ።

ቑንዚ ሚንቻው ኩሉ ዙራሙሪዳ አኽⶓ ጉሹንኩ ትክትሊ አላፊ ምንድራሺውሳ ቑንዜ ቤዴራማ ካላካልጝስ ዙራሙሪውሳ ፃንኩቶ ማንዲጝ፣ አኾ እሜንኩ ኮርሻማርሽካዋኪ ያኻ አኾ ቲሪፃውሳ ስፍሬ ዴዴክጙሳ እንፅኼ እንፃኽስቴካማጊ አኽⶓ እርዳትፅካ።

ቑንዚ ሚንቻኩ ኩሉ ዙራሙርካዳ ዴሜካ 15 ኬቤልካዴስ 7 ኬቤልካዳ ኬሚካል አሬችስትⶓ ጉሽካማ 8ኬቤልካዳኪላ ላጛንቲ ዙሪስ አሬችስታው አኽⶓ ቶኬምካ። ቲንኩ ውማይቴን አችትጜካማ ጝን ቺፍ ዝኩኽሳ ኻጉሳ አጎባሮ ቲኪምስትጜ ካንትኹስስታ ሼውቴ ፌቴርጙሳ እንፅኼ እንፃኽስቴካማጊ አኽⶓ ድኹንኩ ትክትሊ አላፊ 82ሻይ 801ጝን ካንትስታማ 59ሻይ 693 ጝንዳ ኻጉሳ አጎባሮ ቴኬምስታንኩ ያኹስ ይጉንኩ ዴሜካ እላቲኩ አኽⶓ ቶኬምካ። ወረዳታ አግስታንኩ ሹኻ ቲኑ ጉትፕካዳስታ16 ቲኑ ኬላዳ 234ሻይዴስ ጃላ ምንድራሺው ምርማሪ ካስጛማ 75 ሻይዴስ ጃላ ያኻው አቒዳ ምንድራሺው ቑንዚ አግስትⶓኪላ ጌሌፅካ። እንሳ ካላካልጚስ ዲጋው ኻጉ አጎበር እላ ያኹኒኪላ ኬሚካሎ አሬችጝ ፋይፃው አኽጝስ አሬችጚ ጄሜርስትⶓ ቶኬምካ::።

ኬሚካሎ 118 ሻይ 21 ጝንዳ ኬሚካል አሬችጝስ እክድ እምስትⶓ ጉሹንኩ ትክትሊ አላፊ ልቓ ጝንካዳ ኬሚካል እን አርፊዳ አሬችስትⶓ ጄሜርⶓ  ቶኬምካ። ኬሚካሎ አሬችጝ ይቢቺ ኽይ አኻቲው አኽⶓ ቶኬሙንኩ አቶ አብየ ወረዳው እዝብ ምንድራሺው ሚቓያ ሩብታውሳ ዙራሙሬጊ ልቕልቕቲስ ፌካማ ፃንኩፅጝስታ ካላካልጝጝዳ ትኩትስ እንፃኽስታንታስታ እክምኒኩ ውማይቴን አያኑሳ ክንቴ ሼውዳ ሚፅጝስ ቴግባርዳ እሽፃንታኪላ ታክስፅካ።