ክንቲ እምፕል አጌሩ ልግስኒስ ሙሲሲኒ አኽጝ አምንስቴ:: እንሳ ልግሱሳ ሙሲሲኔ ኩፅኒ ልቕልቕፅጝስ ድርብጝስ ሚንቾ ፅሬቶ ፄዋኒስ እጂጝ ታክስስቴ::
ላጛ አሜታሳ ቼፍፅኹ አማኻሪ ክልልታ ኬሴትስትኹ ሰላሙ ዳንጉዊኒ ዴሜካ ክልሉ እዝቡ ኢኮኖሚውስታ ማቤራዊው ዜርፍካዳ ታምፅኹ ጉዳት ኬፍቲኒ ያኹኒኪላ ቲኪስታንትካው ቻቢልጚ ኬፄላታ ፄዋውሳ ክንቲውሳ ዜርፎ ማልጜ ፌቴና፡፡ ሚንችካ ስራስሪኪላ ፋያኑ ክንቲውሳ ሙሬ ታንባቲንታ ፄዋማ እጄ:: ሰላሙ ዳንጉዊኒስኪላ አማኻሪ ክልልታ 4 ትኩሚ 1 ሚሊዮንዴስ ጃላ ክንታንትካ ክንቲ ጝናሾ ካስጝስ ካሌካያኪ:: ክንትፃንትካ እንካናኑሳ ውማዬ ኔፃኔትስ ክንትፃቲንታ፣ ሼውታ ልቕልቓቲንቲ ፄውስትካማ ሳኑስትካ:: 17 ወረድካዳ አግስታንኩ ክንቲ ጝንካኪላ ክንታንትካዋ ክንትፃቲንታ ፄውስትካማ እጂካ::
አማኻሪ ክልሉ ክንቲ ቢሩው ንባር ቶኬማውስታጊ 2017 ም/አ 7 ትኩሚ 1 ሚሊዮን ክንታንትካዋ ሜዜጌብጝስ አኬድስታማ 40 ታፋ ይቢቻ ሜዜጌብስትⶓ ቶኬምካ:: 4 ትኩሚ 1 ሚሊዮን ያኻንኩኪላ ሜዜጌብስቱኒዴስ ፋሌንጋ ክንቲው ማድዳ አግስትካያስኩዊያኽ እስታ:: ክንቲው ማድዳ አግስቴካማ ክንትጝስ ካሉንኩኪላ 58 ታፋ ይቢችካ አኽⶓ ንባር ካንትፄ:: እን ችግር 2018 ም/አሜታስኪላ ኬፄላቲታ ሰላሞ ማንዲፅጝዴስ ጄሜራማ ቤዴራ ቴርትጙ እንፅኺ ካስጝⶓ ጄሜራ:: ጛርቱ ክንቲ ጝንካዴስ ጄሜራማ ምዝጋቢው ቴርት ካስጛማጊያኽ:: 2017 ም/አ ልምትካማ ክንትጝ ክንትፅጙሳ ቴርቶ ካስጝፃኑላስ እጂንኩስታ ዙራሙሪ ሰላም ያኹንኩ ክንቲ ጝንካኪላ 2018 ም/አሜቱ ክንቲው ዝቤንስ ግባኻሳ ግዲትፃማ ክንታንትካስ አሜቻታ ፄውጝዴስ ጄሜራማ ዳንጉንኩሳ ዋኽትጝፅጝዳ ትኩትስ እንፃኽስስታማጊያኽ::
እስጜ ቴግባሮኪላ ውላጊ ዴጌፍጝስ ስራስሪ ቓሊትስ ማንዳኑሳ ክንቴ አግፃንታ ፄውጝ ቱስቴ:: ክንቴ ልማማ ስራስሪ ክንቴ አግፃቲንታ ፄውጙሳ ፅንጋኽሳውሳ ቴግባሮ እንፃኽስትጝዳ አሴሜርጙንኩሳኪላ ውላጊ ኩፅጝፅጝስ እን ጉዳጋው ቴግባርዴስ ፋንታ ፄውጝስ ቱስቲ ዝኩኽ ዳድስ ስራስሪ ቓሊታኑሳ ክንቴ አግፃንታ ፄውጝኪላ ውላውጊ ታምብያኽ:: ምዝጋቢውሳ ቴርቶኪላ ፋይስታውሳጊ እርዳቴ ፄውጝስ ቤዴራ ቴርቱ እንፅኺ ክርፂ ዳድስ አሌድስታታ ፄውጝ ፋይፄ:: ስራስሪ ፋያኑሳ ክንቴ አግፄካማ ክንትጝስ ክንቲው ዜርፍኪላ ዋይሚስታ ያኻታ ፄውጝስ ውላጊ ሺንኪትጛውላ ታምቦጊ ካፅጝስ አሬባሪብጜ ፄውጝ ቱስቴ::