አምሉ አሻሪስታ ይኮኖሚ

ታደለ አጋጄ

ይቶፒያ አምሉ አሻሪው ሜርሃ ግብሮ ዝማቺስ ቴኬልⶓ ጄሜርትኹዴስ ላጚቲ አሜታሳ ቺፍፄ::እኒጛ አሜትካዳኪላ ውላ አጌራኩ ቤንካዳ ቢሊዮንስ ቼፍስታንኩ ችግኝካ ቴኬልስትካ::ፌዩንኩ አሜትካዳ አጌር አቡቑ አችስ አምሉ አሻሪው ሜርሃ ግብርስ እይስትኹ ሊሊቲ ትኩትስ ኬሽኹ ኪሲ ካንትስታማጊ  አግስታዉ ያኹስ 2011 ም.አሜታዳ ጄሜርስትኹ አምሉ አሻሪው ሜርሃ ግብር አየር እግልታውሳ ኪሴ ካላካልጝጝስ፣ ማናማንኹሳ ዴኑሳ አብቶ ዙርፅጝስ፣ ኩሪስ ሺሽርስትኹሳ ብቲውሳ አሉምቶ ዴሜክጝስ፣ ዎታትካው እንፅኺው ድል ፌቴርስታታ ፄውጝስስታ ይቶፒያ ኢኮኖሚው ልግስስ ኪሴ ካንትፄታ ፄውጝስ ኬፍንኹ ትክም ዝኩኽያኽ::

ይቶፒያ ቤዴራሱ ጊዝዳ ዴኑ አብትስ አፍሪካኩ አጌርካዴስ ቢዲሪዳ እሽቲት አኽⶓ ንባርካ ካንትፃና::አሜትቺፋ ዴሜካማጊ ይንትኹ እዝቡ ቼፍ ሚንቺጝ፣ እርሺውሳ ብቴ እሳንጝፅጝስ፣ ጝኖ ግቢትጝስስታ እሊኩ ምክንያትካስ ዴኑ አብት ቻፋቻፍስታማ ኔኬታታ ፄውስታ::ያኼስጉ ዲጊ ጊዝዴስ ናቴ ትክላይ ሚኒስትር አብይ አህመዱ ጁትጝፃንትስ አምሉ አሻሪስ ሊሊቲ ትኩት እይስታማ ክርፂ ቴግባር አኮሜችስታማጊያኽ::

አሜት ቺፋ ቴኬልስታንኩ ቴክልካዴስ ይኮኖሚውሳ ትክሞ እያንኩ ቴክልካ ቴኬልስትጝዳ ያኹስ ቴክልካዳስታ ኩፓኩፕካዳ ዴሜካ ሊሊቲ ትኩት እይስታማ እንፃኽስስታማጊያኽ::

አዊ ብሄረሰቡ ቺፅጝፂዳ አምሉ አሻሪውሳ እንፅኼ ዲጊ ጊዝስ ጄሜርስትኹ ያኺትየስ ቤዴርኑንኩ ጊዝካዳ ጄሜርካማ ኬሽኹሳ ይኮኖሚውሳ ሚፄ አግፄካማጊ ዝኩኑ ዜርፍያኽ::አሬሳቻንትካ ጛው ብቲዳ እሳንስ ዲከረንሱሳ ችግኞ ቴኬልጝስ ዝኩዊኒዳ ኪሴ ካንትፅካማጊያኽ::እን አሜትዳኪላ ሊሊትጙንኩ ቴክልካዋ ክላስተርስ ቴኬልጝሰ ቤዴራ ቴርቶ አሌድካማጊ አግስታና::

ኪስ ካሳሁን አዳነ ጉዋንጉዊ ወረዳ ሰሜን ዲጊሪ ኬቤሊው አሬሳቻንቲያኽ::ሊሊትጙንኩ ችግኙ ጉትፕካዳ ፌልስትኹ ችግኝ ጛው ኬቤሌኺስታ አንትጝስ ቴኬልስታው ፕሮግራም እምስትⶓ ዙሜካ::ጛው ኬቤሊዳ እንዴስ ቤዴራ ካዌን ዴንስ ሾፌንስታሺኹ አኽⶓ ዙሙንኩ ኪስ ካሳሁን እሺኹ ዴኑ አብት ቻፋቻፍስታማ ድኽጝስ ብቲ ጉዲስትⶓስታ እሺንኩ ካዌንኩ እንሴስካጊ ሴዴድስታንታ ፄውስትⶓ ዲብስካ::ናካዳ ካዌን ቻፋቻፍስትጙ ምክንያቲስ ጉዲስትኹዳ ብቲዳ ሊሊትጙንኩሳ ቴክልካዋ ቴኬልጝስ ብቲ ዙራታ ፄዌካማጊ አኽⶓ ዲብስካ::

እንዴስ ቤዴራ እሺኹስታ ጉዲስትኹሳ ብቴ ዴንስ ሾፌንጝስ ፅሬቶ ፄዌካማጊ አኽⶓ ቶኬምካ::ጛው ኬቤሊዳ ቡን እሳንስ ቴኬልስታማ እምፕልታቕ ቡንስ ኬሽኹሳ ይኮኖሜ አግፅⶓ ዙሙንኩ አሬሳቻንቲ ቡንዴስ ድምክና ይኮኖሚውሳ ትክሞ አግፃንኩ ሙዝ፣ አቦካዱስታ ፓፓያዋ ፄጌርጙንኩ ቴክልካዋ ሊሚፃንኩ አኽⶓ ጉሽካ::ሊሚፃኑ ቡንስኪላ ጄርካዋ ክንትፃና፣ እሌቱሳ ዝኩዊኔ ጉሳኑስታ ምንግስትስ ግብሮ ኬያኑ አኽⶓ ቶኬምካ::

ካልም ፕሮጄክቱ እርዳቲስ ሊሊትጙኽሳ ይኮኖሚውሳ ትክሞ እያንኩ ኩፓኩፕካዋ አሜሬታንታ እርዳቲ ፄውስታማጊ አኽⶓ አሬሳቻንቲ ኪስ ካሳሁን ዙሜካ::

እሊት ሰሜን ዲጊሪ ኬቤሊዉ ዝኩዋንታ አቡኔ ዳኛው ንጙዊኒ አሜትዳ ቴኬልስታው ቴክል ጛው ኬቤሊሾ ታምብⶓ ዲብስካ::እንዴስ ቤዴራ ጉዲስትኹ ብቲዳ ችግኞ ቴኬልጝስ ብቲ ሊማታ ፄውⶓ ዙሙንኩ ዊዛሩ አቡኔ ግብርኒው ውማይቴንካውሳ ኩስጜ ቻቤልካማ ጛው ዙራሙሪዳ ሊሊትጙንኩሳ ኩፓኩፕካዋ ቴኬልጝስ ቴኬምስታንትካ አኽⶓ ዲብስካ::ሊሊትጙንኩሳ ቴክልካዋ ቴኬልጝስ ኬሽኹሳ ዝኩዊኔ ጉሳንታ ፄውⶓ ዙሜካ::

ሰሜን ዲጊሪ ኬቤሊው ግብርኒ ፅፌት ጝናሱ አላፊ ተካልኝ አሰፋው ንጙዊኒ አምሉ አሻሪው ሜርሃ ግብርዳ ሊሊትጙንኩ ቴክልካዋ ቴኬልጝስ ቴርትⶓ እንክርፄካ::እንኮጛ ቴኬልስትኹ ቴክል ጉድጛ ያኻማ ፄዴክⶓ ቶኬሙንኩ ግብርኒው ውማይቲኒ ሙዝ፣ አቦካዱ፣ ፓፓያ፣ ቡንስታ ፄጌርጙንኩ ቴክልካ ኬቤሊታ ቴኬልስትጝስ ቤዴራ ቴርት አሌድስትⶓ ዙሜካ::

አዊ ብሄረሰቡ ቺፅጝፂ ጉዋንጉዊ ወረዳው ግብርኒ ፅፌት ጝናሱ አላፊ አበባው አምሳል 2017 ም/አታሱ አምሉ አሻሪው ሜርሃ ግብርስ ወረዳታጊ ቡኖስታ ኩፓኩፒውሳ እንቲታኪ ዴኑሳ ችግኞ ቴኬልጝስ ቴኬልስታው ዙራሙሪሾ ቴክልካዋ እንዜጝትጝፅካማጊ አኽⶓ ጌሌፅካ::

ሊሊትጙንኩ ስፍርካዳ ቡኖስታ አቡካዶ ፌልስጝስ ቴክልስ ቴርትኹ ዙራሙሪሾ ካፅካማጊ አኽⶓ ጉሽካ::ቡንስታ አቡካዱ ቴኬልስቱስ ክላስተርስ ቴኬልስታታ ፄውጝስ እምፕልታቕ ቴኬምስታንታ ያኻንታ ፄውስታማጊ አኽⶓ ቶኬምካማ ሊሊትጙንኩ ኬቤልካዳ ፍር ግሽስታማ ቴርትⶓስታ ቴኬልስታንኩ ቴኬልካዋ እንዜጝትጝፄካማጊ አኽⶓ እርዳትፅካ::አሬሳቻንትካ ዎክትስ ቴኬልጝስ ፄዴክጙ ሜቴን ኬፍናታ ፄውጝስ እንፃኽስትካማጊ አኽⶓ ቶኬምካ::

70 ሻይዴስ ጃላ ቡኑ ፌል አሬሳቻንትካውላስ እንዜጝትጛማጊ አኽⶓ ጉሽካ::

ዴኑሳ ቴክሎ 9 ሊኻ ሄክታርዴስ ጃላ ብቲዳ ቴኬልጝስ ቴርትⶓ እርዳትፅካ::ቡኑሳስታ አባካዱሳ ፌሎ ዴሜካ 50 ሄክታር ብቲዳ ቴኬልጝስ እንፃኽስትካማጊ አኽⶓ ጌሌፅካ::

28 ሻይ 6 ሊኻ አቡካዱ ፌልስታ 2 ሊኻ ሻይ ቡኑ ፌል ቴክልስ ቴርትⶓ ቶኬምካማ ዴኑሳ ችግኞ ዴሜካ 6 ሚሊዮንዴሰ ጃላ ቴኬልጝስ ቤዴራ ቴርቱ እንፅኺ አሌድስትⶓ እርዳትፅካ::

ዞንስታ ክልል እንኩሩኽ አምሉ አሻሪው ሜርሃ ግብሩ ዝማቺስ ውላ ኬቤልካዳጊ እምፕላቺስ ቴኬልጝስ ቴርትⶓ ጌሌፅካ::

አሜት ቺፋ ችግኞ ቴኬልጝ ይቪቺ ያኺትየስ ሊሊትጙንኩ ዙራሙርካዳ ቴኬልስታንኩ ቴክልካ አየሩሳ አኺኔ ኪሳንታስታ ይኮኖሚውሳ ትክሞ አግፃንታ ፄውጝስ ኬፍንኹ ፍሺ ዝኩኽ አኽⶓ ቶኬምካ::

አሬሳቻንትካ ቡኖ ቴኬልጝስ ዝኩዊኒዳ ኪሲ ካንትፅካማጊ አኽⶓስታ ፃንኩቶ ማንዱኹሳ ቡኖ ባርኾቼሾ እንፃኽጝስ ይስካማ እንፃኽስታንኩ አኽⶓ ጉሽካ::

አሬሳቻንትካ ቡኑ ልማትስ ትክሞ አግፅጝስ አሜት ቺፋ ሚንቾ ቡኑሳ ቴክሎ ካፅጝስ ቴኬልካማጊ አኽⶓኪላ ጌሌፅካ::