ቺፊንቲ

ዘውዴ በካሉ

ባይልስታ ወግ ላንጊጊ ክምንትዴስ ክምንቶ ካያማጊ ይንቱኽ ዴክስያኽ:: ወግስታ ባይልኪላ አሌምዳ እምፕልታቕስስታ ማቤር አቕስ አኮሜችስቴ::እምፕል ማቤር አቕ ጚጛራሱ ያኹኽ አይት፣ እምኔት፣ ባይል፣ ይጋሪው ታከስጚ ቴርት፣ ወግ፣ ዴስ፣ ዴንብስታ ዴሱ እግ ዝኩኽያኽ::

ባይል ፅናቱ ማራማርጛንትካ ጌሌፃኑውስታጊ ባይል እምፕል አምፕልታቑሳ አይቶ ዋርቕሳው፣ ማቤር አቕ ይጋርታው እምኔቱ፣ ታክስጚውስታ ፅኹሩ ካስጚያኽ::አኽጝስኪ ባይል አምፕል አምፕልታቑሳ እሴት ያኹኽሳ ዝኩዊኒውሳ፣ ታክስጚውሳስታ እንፃኽስትጚውሳ አኺኔ ቶኬማው ትክላሊስ እምፕልትቑሳ ሜንፌሳዌ ዋይሜ ካንትፃው እምፕልታቑ አብቲያኽ ንጝስኪላ ካሊስቴ::

አዊ ብሄረሰቡ ቺፅጝፂው እዝብኪላ ጚው ያኹኽ ባይል ዝኩኽ ያኹስ ብሄረሰቡሳ ቺፅጝፄ ሊሊታ ፄዋማ ካንትፃው አይቱ ጌሌፃ ያኹኽ ባይል፣ እሴት፣ ታሪክ፣ ሴይጝጚስታ ኹጙስታ ዝቒው ቴርትኪላ ዝኩኽያኽእን ባይልካ ክቻዴስኪላ አምሊ አርፊዳ ውታኺዳ ስራስሪስስታ ክምካ አግስቱኑዳ ዴስቲስ ኬቤርስታያሱ ዴስቲስ ኬቤርስታው ቺፊንቲው ባል እንፕልያኽ::ቺፊንቲ እሊው ዝራሙሪዳ ዴስስታያሱ ያኹኒኪላ አዊው ብሄረሰቡ ቺፅጝፂዳ ዴሜካ ወጐሰታ ታሪኮ ማንዱኽ ዳድስ ቴርት እሳንስ ካስጝጜ::

ቺፊንቲው ባል እምፕልታቕውላዳ ዎታኮው አኺኒስ ኬቤርስቴ ናውሳ ካንትኹስኪላ ዝኩዋንትካሊ ስልኪሰ እጂጜ ፄውና::

እማሆይ ቦጋለች ቸኮል ግምጃቤት ኬቴሙ ዝኩዋንትካ ቺፊንቲ አዊዳ እሳንስ አኮሜችስታው እርዲ አሬድስታው ክምካስ አኽጝስ አሉም ብሬ ድባን ዴከስ ማንቲ ንካማ ምስጋኔ ዲግሳኑ አኽⶓ ድኹዌካ::ኹና ጝርጂ ፅሊ ኽሳንቲ ውታኺሾ ፋማ ጉዝጉዞ፣ አብዜ፣ ብኹሬስታ ዝቕካዋ ቴርስካማ ሞሬፅዳ ታይ አሬድስታማ ሹማጌል እንሳ ዳቔርካማ ዳቔርስትኹ ብሪ ክምካስ ቲንስ ያኼስ ንካማ አባሊውስ ሶኼንስ ኻፂስ ብሬ ክምካዳኪያኻ ታይካዳ አሬቻኑ ቴርት አኽⶓ እንክርፄካ::

አቶ ቦጋለ ተገኜ አንኪሺ ወረዳው ዝኩዋንቲ ያኻኒስ አምሊ አንኩዋዴስ ጄሜራማ አምሊ ሶኼታ ጌርኮ ኺሰታ አምሊዳ ቴርታው ቺፊንቲው ቴርት ክምካው ምስጋኒው ቴርት አኽⶓ እንክርፄካ::እምፕል ዙራሙሪኩ አቕ እምፕልዳ ሞሬፆ አሌቔትጛኑ እምፕልትስ ታዮ አሬድካማ  ሞሬፆ አሌቔትካማ አሌቔትጙኽ ሞሬፅ አስሜምጛታ፣ ክምካ አሜትዴስ አሜቶ ዴክስ ታምባንታ ታይ አሬድስታማ፣ ሹማጌል ዳቔርካማ ታይ አሬድስታኑ አቕ እንሳ ዳቔርስትኹሳ ብሬ አባሊውስ ሶኼን ኻፂስ ክምካዳ አሬችካማጊ ክምካስ ክርፄ እንጐ እንጉስታኑ ቴርት አኽⶓ ዙሜካ::አምሊዳ ውታኻ ፋንኩ ክምካ ሞሬፆ አሌቔትጛኑ አቕ ቴርስ ጌርኮ ቤንጜካማ ኪሌ ማንዳኑ፣ ችኹሬ ቺፃኑ ጛው ያኹኽ ቺፅጝፂው ቴርት ዝኩኽ አኽⶓኪላ ድኹዌካ::እንዴስ ፋሌንጋ ዴሜካ ችቒ ካጋኒ ሙሪዳ እፄ እፄካማ ክምካዋ ሙሪሾ ዙማኑሳ ዳር አርፊዳኪላ ዝኩኹኪ ቺፊንቴ ቺፋማ እላቲው ዴሜካ እፄ ትሺስ አቴናማ ቡኖ ጌፊርፃማ ውታኺዳ እሽንኩሳ ክምካዋ ቻቤላኑ ቴርት አኽⶓኪላ እንክርፄካ::

ቺፊንቲ አኹኪ እርዱ ቴርት አዊዳ ሚንቺትስ አኮሜችስታው ቴግባር አኽⶓ እንጃቢሪ ዩኒቨርስቲዳ አውጚ ኮንኪው ፁፍፅንታው ክንትፃንቲ እሱባለው ክንዴ ቺፊንቲ ሚንቾ ጊዞ አኮሜችስታው አምሊ አርፊው ጂሚሪ ሶኼትዳ ጄሜራማ አኽⶓ ጌሌፅካ::ክንትፃንቲ ኑኑውስታጊ ቺፊንቲ ቴርስታው ክምካስ ያኹኒኪላ አምሊ አንኩዋ ዴስ ጄሜራማ አምሊ ሶኼታ ጌርኮ ኺስታ አኮሜችስታው ቴርትያኽ::

ቺፊንቲ አምሊ አርፊዳ ካስጛው ምክንያቲ ሚንች ያኹኒኪላ አዊዳ ክምካ ጝንዳ እሺካማ ውታኺሾ አኹኪ ሞሬፅሾ አሌቔትጛኑ ጊዛይ ክምካስ ሰላሞ፣ ቲኖ ይምጝስ ውታኺዳ ፄውስታው ቴርት አኽⶓ ጌሌፅካ::እምፕልታቕ ጝንዳ ችኹንኩሳ ክምካዋ ውላዋጊ ውታኺሾ ካፅጝስ ድባይዳ ኩፕፅካማ ማንዳኑ ስፍሪሾ ካፅጝስ አምፕልዳ ማንዳንኩ አቕ ኩፕ ንካማ ታዮ አኹኪ ክሜ አሬድካማ ድባንስኪ ምስጋኔ ዲግሳኑ ክምካስ ዴሜካ ሰላሞ እንጉስታኑ ቴርት አኽⶓ ዙሜካ::

ክንትፃንቲ ኑኑውስታጊ አዊው እምፕልታቕ ፍትሬቶ አንኬባኬብጝዳ ኽሳንቲ ፍሺ ዝኩኽ አኽጝስ ጝንዳ ችኹንኩ ክምካ ሞሬፅሊ አሌቔትጛ ኬሴት ታምባቲታ ላምቡሳ ማንዳማ እጂፅኹ ድባን እፂ ክምካዋ ማንዳታ ንጝስ አምሊ ላኹ ኑታ ቺፊንቴ ቺፌካማ ክምካዋ ጝንዴስ ፍሽካማ ሞሬፅሊ አሌቔትጝፃና::እን ጊዛይ ፅሊ ኽሳንቲ፣ ኹን ጝርጃ ውላ ሞሬፅ አሌቔትጙስ ውታኺሾ ፊጝስ ቴርትኹ ቺፊንቴ ዲግስካማ ሹማጊሊ ዳቔራማ እርዱ ቴርት አኮሜችስታው አኽⶓ ክንትፃንቲ ዲብስካ::እንሳ አሬድስትኹሳ ቺፊንቲውሳ ብሬ ሹማጌል ዳቔራኒ ሌጌሳታምብካ አባሊውስ ኻፂስ እንዴስ ይጉዋክ ሶኼን ኻፂስ ብሬ ዳሴቕካማጊ ውላዳጊ ክምካዳ አሬቻና::እንጚኪላ  ሶኼን ኻፂስ ፄዋኑ ምክንያቲ ሶኼን ልምላሜ ካንትፃው አኽጝስ ክምካ አሩባንታ፣ ሰላምስ ሞሬፅሊ አሌቔትጜካማ ዝኩዋንታ ንጝስ ያኹስ እሊው ዴሜካ ድባንስ ምስጋኔ ዲግስካማ ክምካዋ ሰላምስ ማንዳታ እንጉስታኑ አኽⶓ ዲብስካ::

ቺፊንቲው ቴርትዳ ሞሬፅዳ ዝኩንኩ ኾሼ ጉዋሪስታንኩ ኖራዴስ ውላዴስጊ ኹዋሺ ጉዋሪስታማ ጝንቺፋ ዴሜካ እቲኔ ፍሽጝፅካማ አንጚዳ ቺፊንቲ ስፍራዳ ኹዋሺው ብኹሪ ብኹርስታው ቴርት ዝኩኽ አኽⶓኪላ ክንትፃንቲ ጉሽካ::እንጚኪላ ኹስታማ ድኽጝ ዝኩኽ ውታኺዳጉ ጝንሾ ካፅጝ ካሊስታቲው አኽⶓ ጉሹንኩ ክንትፃንቲ እን ቴርት ፄውስታው ምክንያቲኪላ  ድባንስ ምሰጋኔ ዲግስካማ ፍንሾስ እንዴስ ጃላ ክምካ ሰላምስ ዝኩዋንታ አሜትዴሰ አሜቶ ክምካ እሩባንታ እንጉስትጝስ ፄዋኑ ቴርት አኽⶓ ድኹዌካ::

ቺፊንቲው ቴርት ካስጛው አኹኪ አኮሜችስታው አምሊ አርፊዳ ይቢቻ ያኻውላስ ዳርዳኪላ ዝኩⶓ ጉሽንኩ አቶ እሱባለው አምሊ አርፊዳ ክምካ ጝንዴስ ውታኺሾ ፋኑ ምክንያቲ ዝኩⶓ ጌሌፅካ::

አባላምቲኪ አምሊው አርፊ ችቒ ሚንቻው፣ ክምካዋ ሚፅጝስስታ ፍሽጝስ ቼጌርፃው አኽጝስ ሙሪኩ አቕ እምፕልትስ ሞሬፆ ቲሪትጝፅካማ ውታኺሾ ፍሻኑ ያኹስ፣ ላጛንቲ ዴሜካ ሞሬፃ እምፕልዳ ቺፅጝስ ችኹሬ ቴኬምስታኑ ቴርትያኽ::ጋያኪ ናካ ናካ አቓ ግብሬ ማዳባሬ ቴኬምስትጝ ዴስስታማ ችኹሬ ቺፅጝ ይጉኒኪላ ጛርት አቕ ቴርስ ጛው ብቲዳ ችኹሬ ቺፅካማ ክይ ዎጋታ፣ ሴብሎ ዜራኑ ብቲ ሶኼንታታ ፄዋኑ ቴርት አኽⶓ እንክርፄካ::

አምሊ አርፊዳ ሞሬፅሊ አሌቔትጜካማ ውታኺሾ ፌካሺንኩ ክምካ ዴሜካ ዳር አርፊዳ ሙሪሾ ዙራኑ ጊዝ አኽጝስ ዳር አርፊዳኪላ ቺፊንቲው ቴርት አኮሜችስታው አኽⶓ ዙሜካ::ዳርዳ ቺፊንቲ ቺፊስታው ምክንያቲኪላ ውታኺዳ እሼንኩ ክምካ ሙሪሾ ዙራኒ እፂ ቴርታማ እፃኻ ትሺስ አቴንስታማ፣ ቡን ቴርታማ ቺፊንቲው ቴርት ፄውስታማ ክምካዋ ቻቤላኑ ቴርት አኽⶓኪላ ዲብስካ::እፄ አቴናኑውስታ ቡኖ ጌፌርፅካማ ቻቤላኑ ችቒ ካጋኒ ዊንቲኪው አርፊዳ እንዳርኪ ኹዋንቲ ክምካዳ ኬሴቶ ታምፃቲታ፣ ክምካ ውታኺዴስ ሙሪሾ ዙራኒ አስሜምጛላ ናቲንታ ድባኖ ይምጝስ ክምካስ ዴሜካ ክርፄ እንጐ እንጉስትጝስ ፄውስታው ቴግባር አኽⶓ ድኹዌካ::እኒጛ ላጛ አርፍካዳ ንጝኪ አምሊዳስታ ዳርዳ ቺፊንቲው ቴርት አኮሜችስታው ካይጝጚኩ አርፍካ አኽⶓኪላ ክንትፃንቲ ጉሽካ::አምሊዳ ችኹ ካይጝፂ አኽጝ ዳርዳ ዴሜካ ችኹ አርፊ አሌድስታማ ዊንቲኪው አርፊ አሌድስትጛ ያኹስ ሳኑሾ ካይጝፃው አኽጝስ አሜትዴስ አሜቶ እንጉስታኑሳ፣ ድባኖ ይማኑ ቴርት አኽⶓ ዲብስካ::

አዊዳ ክምካዋኪ ያኻ ፍትሬትኩሳ አብትካዋ አንኬባኬብጚውዴስ ኬፍንኹ አኽጝዴስ ጁኹሳ ክምካዋ አንኬባኬባኑ ቴርት፣ ክምካስ እንጐ እንጉስታኑ ቴርት ቺፊንቲ አኽⶓኪላ ድኹዌካ::