አኬድስትኹ እክድ ኽስኹስ ጁትጝፃዊያኽ

ታደለ አጋጄ

አማኻሪ ክልሉ ኩስጚ ጝና 6ንቲ ዙሪ 4ንቲ አሜቱ እንፅኺ ዝቤን 10ንቲ ሚዲቢኒ ጉባዬ ስንብቶ ካስጝፃ:: ጉባይዳ አማኻሪ ክልሉ ፕላንስታ ልማት ቢሩ አላፊ ደመከ ቦሩ (ዶ/ር) 2018 ባጀት አሜቱ ካይጝፂውስታ ዊዳፊ ልማቱሳ እክዶ ኩስጚ ጝናስኩ አባልካስ ዲግስካ::

አማኻሪ ክልሉ ካይጝፂስታ ዊዳፊ ልማቱ እክድ 2022 ኺስታ ቹዋ ቹዋ ዜርፍካስ ይኮኖሚውሳ ልማቶ ቼሜትጝፅጝስስታ ክቻክቺ ይኮኖሚ ዌና ፄውጝስ ራእይ ዝኩኽ አኽⶓ ጌሌፅካ::

ፌዩንኩ አሜትካዳ ጄሜርስትካማ ቴግባርሾ ቱዌካሺንኩ ልማትኩ እክድካ አጌራዊ ብልፅግኒሾ ካይጝፄካያስኩ ፌፄምጚውስታ ቴርቱ ችግር እሺኹ አኽⶓ ቶኬምካማ ፖለቲካው፣ ይኮኖሚውስታ እሊኩ ቴርትኩ ችግርካ እሺⶓ እርዳትፅካ::

እክዶ ሳኪትጝፅጝስ ስትራቴጂኩ ጉዳይካዋ ሺሽⶓ ጌሌፁንኩ አላፊ ክልሉ ሰላሙስታ ዴክቶ፣ እጉሳ ሴግቴንቶ ቼሜትጝፅጝስ፣ ኾትካውሳ አክሞ ሌጌፅጝስ፣ ክልሉሳ እሴቶ ሌጌፅጝስ፣ ሳይንሱሳ አቕቶ ሌጌፅጝስታ ምርታምቶ ዴሜክጝ ስትራቴጂክ ጉዳይካ አኽⶓ ጌሌፅካ::

አሬኽኹስታ ካይጝፂ ይኮኖሚው ልግስስ፣ ድኽቶ ኔኬትጝስ ፍታዌስታ ዊዳፌ ልማቶ ቼሜትጝፅጝ እክዱ ቹዋ አላሚ አኽⶓ አማኻሪ ክልሉ ፕላንስታ ልማት ቢሩ አላፊ ደመከ ቦር (ዶ/ር) እርዳትፅካ::

ፃንኩቶ ማንዱኽሳ ክንቴ ታምብስታንታ ፄውጝስ፣ ልኺትጛንቴ ክምንቶ ፌቴርጝ፣ ቲንዌና ማቤርአቖ ፌቴርጝ፣ ቱሪዝሙሳ ልግሶ አሬኽፅጝ እክዱ ቹዋ አካልካ አኽⶓ ቶኬምካ::

ጌፄሩ ልማት ዜርፍ ትኩቱ ዳብዚ እንኩርስትⶓ ዙሙንኩ አላፊ ባጀት አሜትዳ 50 ሻይ አቾ ማንዱንኩ ጌፄርኩ ጝንካዋ ግቢትጝስ እክድ እምስትⶓ ጉሽካ::

ክልሉ ምንግስት አኬድኹሳ እክዶ ሳኪትጝፅጝስ አክም ዝኩⶓ ቶኬሙንኩ አላፊ እክዶ ፌፄምጝስ ክልልዳ ዳላው አቒው አይል ዝኩⶓ ጌሌፅካ::

ቴክኖሎጂው ልማቱ ግንባቲዳ፣ ስር ልማቱ ፃንኩትዳስታ ታምብስታንትዳ ትኩት ፄውስታው አኽⶓኪላ እርዳትፅካ::

አማኻሪ ክልሉ ቺፅጝፂ ጛራ አረጋ ከበደ አችቺፋ አግስታንኩ ጉሳንትካ እክዶ ሳኪትጝፅጝስ ኩርፄንትስ እንፃኽስታንታ ታክስፅካ:: አኬድስትኹ እክድ ቴርቶ ማንዱኽ ዳድስ ጉስስትጝ ፋይፃው አኽⶓ ታክስፁንኩ ቺፅጝፂ ጛራ እክድ ቴርትስ ጉስስታውላስ ይጉኒ ኩፅኒ ዋይሜ አግጝስ ካሊፃቲው አኽⶓ ጉሽካ::

አቕትዳ ስርትኹሳ እንፅኼ እንፃኽስትጝ ቱስታው አኽⶓ ቶኬሙንኩ ቺፅጝፂ ጛራ እክድ ዴሰስትኹ እንፃኽስትጝጚ እንፅኺው ባይልስ ሳኪትጝፅጝስ ካሊስታቲው አኽⶓ ጌሌፅካ::

እክድ ሳኪትጛታስታ ዊዳፊ ልግስኒ ይንታታ ሜስዋቴ ኬይጝ ፋይፃው አኽⶓ ጌሌፅካ:: ችግሮ ቡንክትጛማ ኪሴ አግጝስ፣ ኾትካው ግንባቲዳስታ አቒ አይሉሳ አክሞ ሌጌፅጝ ቱስታው አኽⶓ ጉሽካ::

ኩስጚ ጝናስኩ አባልካ አኬድስትኹ እክድ ዋይሚስ ጉሽጝፃው አኽⶓ ቶኬምካማ እክድ እንዴስ ቤዴራ አኬድስትኹዴስ ሊሊቲ አኽⶓኪላ ኽይትጝፄካ::

ካይጝፂስታ ዊዳፊ ልማቱ እክድዳ፣ ብቲ ዌናሳስታ ብቲውሳ አብቶ ቱስቲስ ፌቴሽጝ ፋይፃው አኽⶓ ቶኬምካ:: ብቲ ቹዋ አብቱስታ ይኮኖሚው አግፂ አኽⶓ ጌሌፅካ::