አንኬባኬብጜ ጉዝማስ

ታደለ አጋጄ

አሬሳቻንትካ እሳንስ ግብርኒውሳ እንፅኼ አኮሜቻኑ ችኹ ዎክትዳኽ:: እን ጊዛይ አሬሳቻንቲ ዋኽስ ዋኾ ጊዞ ፌይፃው ሴብሎ ዜርጝዳስታ አንኬባኬብጚዳኽ:: አጌርታጊ ችኽዳ ኩልዴስ ዴሬኾ ኺስታ ሴብል እሳንስ አሜሬትስቴ:: ዜርስትኹ ሴብል ኬሽኹሳ ምርቶ እያታ አንኬባኬብጚ ፄውስቴ:: ሊሊትጙንኩ ዙራሙርካዳ አግስታንኩ አሬሳቻንትካኪላ ችኽዳ ዜሩኑሳ ሴብሎ አንኬባኬብጝስ ኬሽኹሳ ምርቶ አግፅጝስ ፅሬቶ ፄዋና::

ይቶፒያ እምፕልታቕስ ምግቡሳ ዋስትኔ ዊዳፊስ ቼሜትጝፅጝስ ግብርኒው እንፅኺዳ ሊሊቲ ትኩት እይስታማ እንፃኽስታታ ፄውጝስ፣ አጌራው ይኮኖሚ ሌጌሳታ፣ ችኹ እርሺስስታ ሳኖ ዴሜካ አኹዋቲስ ግብርኒውሳ እንፅኼ እሳንስ እንፃኽስቴታጊ አግስቲ:: ጉልሌ ዜሮ ቱስቲስ ቴኬምስትጝስ እርሼ ዴሜካ ሜካናይዜሽንስ አሬስጝስ፣ ክላስተርስ ዜሮ ዜራንታ ፄውጝስስታ ግባቶ ቱስታው ዳድስ ቴኬምስትጝስ ግብርኒው ዜርፍ ዋይሚስታ ያኻታ ፄውጝስ ክርፂ ዋይሚ ካንትስታማጊያኽ::

ችኽዳ እሳንስ ሴብል አሜሬትስታው ዙራሙሪዴስ እምፕል አዮ ጉዋጉሲ ወረዳኽ:: ኢንዱስትሪስ ግባታ ያኻንኩ ሴብልካዋ ዴሜካማ ሊሊትጙንኩ ሴብልካ አሜሬትስታና:: አዩ ጉዋጉሲ ወረዳ ሹኻ ጃቢሊ ኬቤሊው አሬሳቻንትካ ስልኪስ እዩኑ ካንቲስ እምስትኹ ምርቱ ዝቤንዳ ኬሽኹሳ ምርቶ አግፅጝስ ሴብሎ አንኬባኬብካማጊ አግስታንኩ አኽⶓ ዙሜካ::

አሬሳቻንቲ አምሳሉ ጋሺ አዮ ጉዋጉሲ ወረዳ ሹኻ ጃቢሊ ኬቤሊው አሬሳቻንትካኽ:: አሬሳቻንቲ አምሳሉ ዙሙኑውሰታጊ ጉድ ችኹ ዎክት አኽጝስ ግብርኒውሳ እንፅኼ ይስናና እንፃኽስትናናጊያኽ:: ዜርስትኹ ሴብል ጉድጛ ዋጋማ አግስታው አኽⶓ እንክርፄካ:: ሊሊትጙንኩ ሴብልካ ዜርስትⶓ ቶኬሙንኩ አሬሳቻንቲ ዜርስትኹ ሴብልዴስ አሪሜ አሬምጝስ፣ ኩሪ ኹዋቲታ ባዮ ኬውጝስስታ ግባቶ ቱስቲስ ፄውጝስ ሴብሎ አንኬባኬብካማጊ አግስታንኩ አኽⶓ ድኹዌካ::

አሬሳቻንቲ አምሳሉ ዙሙኑውስታጊ እምስትኹ ምርቱ ዝቤንዳ ሊሊትጙንኩ ሴብልካዋ ዜርካ:: ዜርስትኹሳ ሴብሎ አንኬባኬብጝዴስ ድምክና ሴብል ዜርስታያሱ ብቲዳ ዴሜካ እርሼ ላሳላስፅካማ አሬስጝስ ሴብሎ ዜርጝዳ ፅሬቶ ፄዌካማጊያኽ::

ፌይኹ ምርቱ ዝቤንዳ ሊሊትጙንኩሳ ሴብልካዋ ሊሚፅጝስ ኬሽኹሳ ምርቶ አግፅⶓ  ቶኬሙንኩ አሬሳቻንቲ እምሰትኹ ምርቱ ዝቤንዳኪላ ይስካማ እንፃኽስትጝስ ኬሽኹሳ አሜሬትጝስ እክዶ እሚⶓ ዙሜካ::

እን አሜትዳ 6 ሄክታር ብቲዳ ሊሊትጙንኩሳ ሴብልካዋ አሜሬትጝስ አኬድካ:: አኬዱኑ ስሬታስ ኬሽኹሳ ምርቶ አግፅጝስ ግብርኒኩ ውማይቴንካውሳ ኩስጜ ቻቤልካማ ግብርኒው እንፅኺዳ ይስካማ እንፃኽስቴካማጊ አኽⶓ ዲብስካ::

ኬሽኹሳ ምርቶ አግፅጝስኪላ ዜርስትኹሳ ሴብሎ ጌርክ ቺፋ ጐቤንጝስ፣ ቑንዚ ኬሴትስታቲ ሲፍጝጜካማጊ ካንትጝስ ግባቶ ፋያው ጊዝስ ግባቶ ዴሜክጝስ አሪሜ አሬምካማ ሻኪጝስ ሴብሎ አንኬባኬብጝስ ኬሽኹሳ ምርቶ እያው አኽⶓ ዙሜካ::

ሹኻ ሄክታር ስንዳዮ ዜርጝስ እርሼ አሬሴካማጊ አግስታንኩ ያኹኒውላ ጉልሊ ዜር ዎክትስ ዲጋውላ ይጉጝ ዴሜካ ኬሻንቴ ምርቶ አግፅጝስ ስጋትዳ ሚፅⶓ  ቶኬምካ::

ምርት ኔኬታው ግባት ዎክትስ ዴሜክስታውላ ይጉዋኒ አኽⶓ ዙሙንኩ አሬሳቻንቲ አምሳሉ ሹምቢዳ ዩሪያ ማዳባሬ ዴሜክጝስ ፋዩኒውላ ግባቱ እንፂጝ ጌቴምጝስ ዎክትስ ዲጋያታ ካሲካ::

እሊው ሹኻ ጃቢሊ ኬቤሊው አሬሳቻንቲ አስራት አሸናፊ ንጙዊኒ ችኹ ዎክትዳ ኬሽኹሳ ምርቶ አሜሬትጝስ ዜርስትኹሳ ሴብሎ ዎክትስ አንኬባኬብካማጊ አኽⶓ ድኹዌካ::

ፌይኹ አሜትዳ ቤርቤር እሳንስ አሜሬትጝስ ኬሽኹሳ ትክሞ አግፅⶓ ቶኬሙንኩ አሬሳቻንቲ ንጙዊኒ አሜትዳ ኩፅኒ ዜሩኑ ቤርቤሩ ፌል  አቤሌሽስታማ ቤርቤሮ እሳንስ ዜራቲንታ ፄውⶓ ጉሽካ::

ዜርስትኹ ሹምቢው ሴብል ኩፅኒ ጉድጛ ዋጋማ ቱስታው ዳድስ አንኬባኬብጜ ፄዌካማጊ አኽⶓ ዙሜካ::

አሬሳቻንቲ አስራት 2017/18 ምርቱ ዝቤንዳ ትክላሊሰ ዜርስትኹ ሴብልዴስ 150 ኩንታል ምርቶ አግፅጝስ እክዶ እሚⶓ ዲብስካ::

ዜርስትኹ ሹምቢ ጉድጛ ዋግⶓ ቶኬሙንኩ አሬሳቻንቲ ሹምቢዳ ግባቶ ዴሜክጝስ ፋዩኒውላ ዩሪያ ማዳባሪው ችግር ጌቴምⶓ ድኹዌካ::

ግብርኒኩ ውማይቴንካ አሬሳቻንትካውሳ ማሴኺስታ አንትጝስ እርዳታንኩ አኽⶓ ዲብስካ::

አዮ ጉዋጉሲ ወረዳው ግብርኒ ፅፌት ጝናዳ ሴብል ልማቱ ኬቹ ጉሳንቲ አበባ አንተነህ ወረዳታጊ 42 ሻይ 247 ሄክታር ብቲዳ ሊሊትጙንኩ ሴብልካስ ሾፌንጝስ አኬድስታማ 39 ሻይ 712 ሄክታር ብቲ አሬስስታማ ሊሊትጙንኩ ሴብልካስ ሾፌንስትⶓ ጌሌፅካ::

እን ዎክትዳ ሊሊትጙንኩ ዙራሙርካዳ ብቲ ሴብልስ ሾፌንስትⶓ ቶኬሙንኩ አቶ አበበ ታፊስታ ስንዳይ ይጉስ ውላ ብቲዳ ሴብል ዜርስትⶓ ጉሽካ::

ዜርሰትኹ ሴብልዳ አሬሳቻንትካ ቱስታውሳ አንክባኬብጜ ፄዌካማጊ አኽⶓ ዙሙንኩ አሬሳቻንትካ አሪሜ አሬምጝስ፣ ግባቶ ፄውጝስ፣ ኩሪ ቱዋቲታ ባዮ ኬውጝስ ሴብሎ አንኬባኬብካማጊ አኽⶓ ጌሌፅካ::

ወረዳታጊ ዜርስታው ስንዳዩ ዜርስ አሬሳቻንትካ ካሲኑ ጉልሊ ዜሩ ካሲስ ኩሉ ዙራሙሪስ ያኻው ጉልሊ ስንዳዩ ዜር እላቲው አኽⶓ እርዳትፅካ:: አሬሳቻንትካ ፌይኹዳ አሜሬቱኑሳ ስንዳዮ ኪስጝፄካማጊ ዜራንታ እንፅኼንቶ ፌያፌይጝፄካ::

ፌይኹዳ ሹምቤ ዜራኑ ዎክትዳ ዳላው ግባት እሺⶓ ቶኬምካማ ናካዳ ኩፅኒ ዩሪያ ማዳባሬ አሬሳቻንትካ ፋዩኒውላ ሜጋዚንዳ እላቲው አኽⶓ እርዳትፅካ::

እምስትኹ ችኹ ዎክትዳ 42 ሻይ 247 ሄክታር ብቴ ሊሊትጙንኩ ሴብልካስ ሊሚፅጝስ 2 ትኩሚ 2 ሚሊዬን ኩንታል ምርቶ አግፅጝስ አኬድስታማ እንፃኽስስታማጊ አኽⶓ ጌሌፅካ::