አካል ዳሊጝቱ ልቕልቕቲ ቲንስ

ታደለ አጋጄ

አካሉ ዳሊጝቱ ልቕልቕቲ ጛርቱሳ ቲኖ ማንዲጝስስታ ዎታትካ ጉዳ ጋቲው ስፍሪዳ እሼቲታ ፄዋማጊ አኽⶓ ቻግኒ ኬቴምዳ ስፖርቱሳ ልቕልቕቴ እንፃኽስታንኩ ዎታትካ ዙሙና::

ሽኩር ውዱ ቻግኒ ኬቴምዳ ጂሙስታ ውሹ ስፖርት ጝናሳ ብስጝስ ዎታትካስ አካሉ ዳሊጝቱሳ ስልታኔ እያማጊ አግስቴ:: ሴሌቴንፃንቲ ሽኹር 2001 ም/አታዳ ጄሜርካማ ስፖርቱ እንፅኺሾ ቱⶓ ቶኬምካ::

2006 ም/አታዳ ዴሜካ ሴሌቴንፅጙ እንፅኺሾ ቱዌካ:: እንዴስ ቤዴራ ጝኖ ክራይቴካማ ሴሌቴናንትካ ዎታትካ ስፖርቱሳ ልቕልቕቴ እንፃኽስታንታ ፄውኒዉላ ቻግኒ ኬቴሙ ቺፅጝፂ እይኹ እንፃኽፂ ስፍሪዳ ጂሙ፣ ውሹ፣ ኤሮቢክሱስታ ይዝኩቶ ኔኬትጝስ እርዳታውሳ ስፖርቱሳ አይኔቶ ሴሌቴንፃማጊ አግስቴ::

አካል ዳሊጝቱ ልቕልቐቲ ዎታትካ ሱስዴሰ ፋንታ ፄውⶓስታ ጉድ ምግባር ፅንታሳ እሜንታ ፄውⶓ ዙሜካ::

አካሉ ዳሊጝቱሳ ልቕልቕቴ ፄውጝስ ፋየካማ ጌንዜቡ እንፂጝ ጌቴማኩ ዎታትካስ ኔፃስ ስልታኔ እይካማጊ አኽⶓ ዙሜካ::

ሴሌቴንፃንቲ ሽኩር አካሉ ዳሊጝቱሳ ልቕልቕቴ እንፃኽስታንትካ ዎታትካው ቼፍ ዴሜክጝስ እንፃኽፂ ስፍሪ ፄቤብⶓ  ቶኬምካ:: ላጛ ዎታትካስ ባርኾቼው ሴሌቴንጙሳ ድሎ አግፃንታ ፄውስትⶓ ዲብስካ::  ሴሌቴናንኩ ዎታትካ አካሉ ዳሊጝቱ ልቕልቕቲስ ቲኖ ማንዳንታ፣ ጛጛርትጛሳ ካላካልጛንታስታ ሊሊትጙንኩ ልኺትጝካዳ አሴቴፍጛንኩ ዎታትካዋ አፌሬጝስ ካሊፁክ  አኽⶓ ዙሜካ::

ቻግኒ ኬቴሙ ቺፅጝፂ ዎታትካውስታ ስፖርት ፅፌት ጝናሱ አላፊ ኩምላቸው አሰፋው ዎታትካ ስፖርቱሳ ልቕልቕቴ እንፃኽስትጝስ ዋይሚስታ አኽⶓ ጌሌፅካ::

አርቱ ስፖርትዳ እንፃኽስታንኩ ዎታትካስ እንፃኽፄ ስፍሬ እይጝስ ዎታትካ ሴሌቴናንታ ፄውስትⶓ ጉሽካ:: እንፃኽፂ ስፍሪ እሳናታ ካሲኑ ካሲስኪላ እንፃኽፂ ስፍሪ እሳናታ ሲፋውሳ ችግሮ ኽይጝስ ኬቴሙ ቺፅጝፂሊ ዙሚትጛንኩ አኽⶓ እርዳትፅካ::