አሚኮ ብሄረሰቡ ቺፅጝፂዉ እዝቡሳ ኮንኬስታ ባይሎ ሌጌፅጝስ ኬፍቲኔ ፍሼ ፄዋማጊያኽ

አለሚቱ የኔት

አሚኮ ብሄረሰቡ ቺፅጝፂዉሳ ኮንኬ ባይሎስታ ወጎ አቕትጝፅጝስስታ ሌጌፅጝስ ፄዉኽ ፍሺ ኬፍቲኒ አኽⶓ ብሄረሰቡ ቺፅጝፂዉ ዝኩዋንትካ ዙሙና::

እምፕል እዝቡሳ ኮንኬ ፣ባይሎስታ ወጎ አቕትጝፅጝስስታ ሌጌፅጝስ ሚዲያ ፄዋዉ ፍሺ ከፍ ንኹዊያኽ::አሚኮኪላ አዊ ብሄረሰብ ቺፅጝፂዉ እዝቡሳ ኮንኬ ሌጌፅጝስ ፣ባይሎስታ ወጎኪላ አቕትጝፅጝሰ ከፍቲኔ እንፅኼ እንፃኽስትጝ አቕስታዊያኽ ::እንጃቢሪ ኬቴሙ ቺፅጝፂዉ ዝኩዋንታ ዊዛሩ ሰዋሰዉወርክ ታየ ዙሙኑዉስታጊ አሚኮዋ ጌሌፅጝስ ካሎ አግፃላኪ ንካ::“አን ማላያሱሳ ይጛርትጛሱሳ ባይሎስታ ወጎ ማላንታ ፄዉኽ ሚዲያ አኽጝስ አሚኮ እየስ ዉላ ዲብያኽ ”ኒስኪላ ዲብስታ::ጚ ዝኬዉ ዙራሙሪዳ አሚኮዋ ዉላጊ እምፕልታቕ ሲፍጛንኩ አኸⶓኪላ ዊዛሩ ሰዋሰዉወርክ ዙሜካ::ቤዴራ ባይላዌ ስዮ ሴያኑ አሜትባልታዋ ይቪቻ እሺⶓስታ አሚኮስ ቴርትካዋ ካንትⶓ ጄሜሩኒዴስ ናቴ ኩፅኒ ቓሊትታ ሴይጝስ ባይሎ አቕትጝፅጝስኪላ ዳዶ ብሳይኹ አኽⶓ ዊዛሩ ሰዋሰዉወርክ እንክርፄካ::አዉጚዉ ፕሮግራም ፌያፌይጛዉ ሳት ኩፅኒ እንፃዉ አኽጝስ ዴሜክስታያታኪላ ካንቴ እይካ::

አቶ በላይነህ ወንድም አዊ ብሄረሰቡ ቺፅጝፂዉ ትክትሊ ጉባይ ኽምባ ጌሌፁኑዉስታጊ ብሄረሰቡ ቺፅጝፂዉሳ ባይሎስታ ወጎ  አቕትጝፅጝስ እንፃኽስስታዉ እንፅኺ እዝቦ ዴስ እፃዉያኽ::ኮንኪዉ ልግስስ ፄዉኽ ፍሺስ ምስጋኒ ቱስታዉ ኾት አኽⶓ ቶኬምጝስ ጌርክ ቺፋ ኮንኪስ ፌያፌይጛዉ ዋሺኒኪ ፕሮግራምዳ ቴከምስታንኩዴስ እስካዉካ እስካዉካ ካልካዋ ክንቴካማጊ አኽⶓ እርዳትፅካ::አዉጚዉ ኮንኪስ እምፕልታቑ አሳብ ፌያፌይጛታ ፄዉጝ እምፕልታቕኪላ ኽምቤ ኽዩኑ ኮንኪስ ቹኒትጝስ ጛዉ አይትስ ኩራንታ ፄዋዉ ይቪቺ ክልሉ ሚዲያ አኽⶓኪላ ጉሽካ::አቶ በላይነህ“ብሄረሰቡ ቺፅጝፂዉ ጌሌፅፃ ያኹኽሳ ሴይጝጜ፣ግዶስታ ሚጊብጜጊ እምፕልታቕስ አቕትጝፃማጊ አግስታዉ ኾትያኽኪላ”ንካ::

አቶ ወለሊ ጌቴ አዊ ብሄረሰቡ ቺፅጝፂዳ ባይልስታ ቱሪዝም ሜምሪዉ አላፊ ኑኑዉስታጊ አሚኮ እንፃኽስትናዉሳ እንፅኼ ካንትስታታ ፄዋዉ ፍሺ ኬፍቲኒያኽ::30 አሜታዴስ ቤዴራ አዊ እዝቡ ባይልስታ ወግ ሚንቾዉላ ማሊስታቲዉ እሺኹ አሌምዳ ኬፍ ናማ አቕስታታ ፄዉጝስ ጋሺፃዉሳ እንፅኼ እንፃኽስትⶓ ጌሌፅካማ አሚኮ “ኮንኪዉ ልግስሾስ ብቲዴስ ግሻማ ፍሹኽሳ ላካኽኪላ” ንካ አቶ ወለሊ::እዝብኩ ባልካዋ ፕሮግራሙ ጌርክ ታንባዉላ ጄሜራማ አብንስኪ ያኻ ሊሊትጙንኩ ቴርትካስ ቤዴራማ አቕትጝፅጝስስታ ኩቲስ ኩታኪ ያኻ ኬሬፂስ ግቢትጝስ ፌያፌይጝፅጝስ ፌሬስቴኑሳ ፣አሱሪቴዉሳስታ ሜስኬሉሳ ባሎ አጌርዴስ ፌያማ አሌሙ እዝብ ያቓታ ፄዉጝስ አሚኮ እሳኖ እንፅኼ እንፃኽስⶓ አቶ ወለሊ እርዳትፅካ::አሚኮ ዙራሙሪዳ ግቢትስታንኩ አጌራ ዋግካ ኩዋርሻማርሽካ አቕስቴስታ ጌቤሉሳ ታምትጜ አግፃንታኪላ ኬፍቲኔ እንፅኼ እንፃኽስትⶓ ቶኬምካ::አዊ እዝቡሳ ሴይጜስታ ግዳግዴ ዉላ ማላንታስታ ካሜንስታንትካ ማንዴካማ እሜንታ ፄዉጝስ እንፃኽስትኹ ሚዲያ አኽⶓኪላ ጌሌፅካ::ፍንሾስኪላ ዲጊስ ይንቱንኩ አችቱ ዝቤናዉካ ሜሳርካዋ ቴኬምስትጝስ እዝቡ ባልካዋ ፃንኩቶ ማንዴካማ ታንባታ ፄዉጝዳ እንፃኽስታታኪላ ካንቴ እይካ::

አሚኮዉ ስራአስኪያጅ ጋዚቲኒ ሙሉከን ሰትዩ አሚኮዉሳ 30ንቴ አሜቶ ካንትኹስ እዩኑ ጊሊፂዳ ኾት ኽሳንትካ ኽሳንትካ ቴክኖሎጅካዋ ጄዋማ ሚፅፃስኩኽ አኽጝስ ቴክኖሎጄ ቴኬምስትጝሾስ ይሴኖስታ አቕትስ አድርትኹሳ ሜሳሬ ቱስቱስ ቴኬምስታዉሳ አቒዉሳ አይሎ አፌራማ እምፕልታቖ ኽስኹስ አጌላጌልጝስ እክዶ እሜማ እንፃኽስታማጊ አኸⶓኪላ ቶኬምካ::