አሚኮ ልማቱ ዜርፍስ

ንግስቴ ተስፋ

አጌር አቕ ቹኒቱኑዴስ፣ ካንታኑዴስስታ አንቤባኑዴስ አግፃኑ ክንቲስ ዝኩዊኔ ኪስጝስ ካላንኩ አኽⶓ ንቫርካ ካንትፃና:: አሳቦ ፌያፌይጝፃኑ፣ ምንግስትስታ እዝብ ፖለቲካውሳ ኢኮኖሚውሳስታ ማቤራዊውሳ ልቕልቕቴ ካንትኹስ ኩስጛኑ አሳቦ ጌሌፃኑ፣አ    ቕፃኑስታ ክሬቴ ዲግስጝስ ካላንኩ ዳድዴስ ሚዲያ አቫላምቲዳ እንኩርስታዊያኽ:: አኽጝስኪ እዝቡስታ ምንግስቱ ድምፃ ያኼ እስታማ ቲሪትጙኽ አሚኮ 1987 ምሬት አሜታዴስ  ጉሽፃማ ፅባብስታ አሜቻቲው ቢሩዳ ልቓ አቕስስታ ልቓ አይሩ ሳትስ ጄሜርኹሳ ንቫሩሳ ታምብስታንቶ እሳንጝፅጝስ ናካዳ ላጛ ቴሌቭጂኑ ፌያፌይጝፂስስታ 12 ኮንኪስ ንቫሮ ታምፃማጊ አግስታ እዝቡ አብቲያኽ::

አሚኮ አሬሳቻንትካኪ ያኻ ኬቴምኩ ዝኩዋንትካ ኢኮኖሚውስታ ልማቱ ዜርፍዳ ቴኬምስታንትካ ያኻንታ፣ፍታዊ አብቱ ቴኬምስታንት ዝኩዋታ እንቲታኪ ክልልዳ ዝኩኽ ስር ልማቱ ፋይ ዋኽትጛታ እዝቡ ድምፃ አኽጝስ እንፃኽስቱስ እጄ::ናካኪላ “እምፕልታቑ ኪሲስ ይስናና እንፃኽስትኔ”ናው ቹዋ አላሚስ እምፕልታቑ ዝኩዊኒዳስታ ልማቱ ኪሲዳ ትኩታንኩ ቴርትካዋ ታምፃማጊ አግስቴ::አኽጝስኪ አሚኮ 30 አሜትስ ታምቡስ እምፕልታቕ ኢኮኖሚውስታ ልማቱ ልግስኒስ ፊትጙኽ ታምብ ዋሳላካይ ፍንሾስ ዳማዳ ትኩታማ እንፃኽሰታኒይ ጉሌልስታንቲስታ ታምብስታንቲ ሚዲያኽ::

14አሜታዴስ ቤዴራ አማኻሪ ራዲዮኖ ቹኒትⶓ ጀሜሩንኩ ባንጂ ወረዳ ዙፋሪ ኬቤሊው ዝኩዋንቲ አቶ ገነት ደምሰው ጅሚ ጉላላስስታ አብኖ ቹኒትጝስ ንካማ ጄሜሩኑ ራዲዮኖ እንኩዋኽጙ ዴስ ናካ ጛ ሜዜጌብፁኑ ዝኩዊኒውስታ ልማቱ ልግስኒው ጉሽፃ ያኻ::”ፕሊፕሳ”ራዲዮናዋ አይኪ ኔክፃቲታ ክብርስ ችጉዌትዳ እንኩርጝስ እንቲታኪ አሪሜ አሬማኒስ፣ክምካዋ ማንዳኒስስታ እፍፅዳ ያኻኒስ ራዲዮኖ ቹኒታሺንኩ አኽⶓ  አቶ ገነት  አሚኮሊ ዝኩኽሳ ታምትጜ ዙሜካ::

ዋሺኔኪ ጉዳዮ ቹኒታማ ይወትስስታ ዝኪዊኒስ ቴኬማውሳ አሳቦ ጎሌልካማ ቴግባርሾ ኪስጝስ ናኪኒ አችዳ ታምብጝስ ቢኪፃ:: ፅባባ ጉጃዴስ ሊኻ 20 ዚንጉ ኮርኮሩ ጝንሾ ኪሳንታ ካሊፃ:: ጋያኪ ክምካዋ እሩብፃኒስ ዋታኮውሳ ትንካኬ ፄውጝ ቱስታኩ አኽⶓ ልቓ ብቲዴስ ሚንቾ ምርቶ ዋትጛ አግፅጝስ ካሊስታዉ  አኽⶓ እንቲታኪ ዋዚታ ካንታኑሳ ትክልቴስታ ኩፓኩፔ ዋትጛ ኬፍቲኒ ትክምሾ ኪስጝስ ካሊስታዉ አኽⶓጊ አማኻሪ ራዲዮንስ ቹኒትጝስ ዝኩዊኒውሳ ሴሎ ኬሽጝፅካማ ዝኩጝስ ካሉንኩ አኽⶓኪላ አቶ ገነት ድኹዌካ::

“ይውሳ ብቴላ አሬሳውላ ፁሞ ቺፃሽቱኻ” ንጝስ ቴኬምስታኑላ ፌይፁኑ ጊዝዳ ኮራኮርስታንኩ አቶ ገነት ራዲዮንስ ዲጋው ቴርትዴሰ ቹኒትናና አግፅኑኽ ዴስስ ግብርኒው እንፅኺዳ ኪሴ ሜዜጌብፅጝስ ጛው ብቲዴስ ድምክና አክሞ ሌጌፅካማ ክራይትጝስ ሴብሎ፣ ትክልቴስታ ኩፓኩፔ ዜርጝስ አግፁኑ ሚፂስ እሌቱ ኬሌብዴስ ፊትስካማ ጌቤልስ ዲግስጝስ አብትሾ ኪስካማጊ አኽⶓኪላ ናኒስ ዲብስካ::

አቶ ገነት ደምሰው ኑኑስታጊ ኽብፂውሳ ማዳባሬ ቴኬምስትጝዴስ ጉሽፃማ አቓ ግብሬ ማዳባሬስታ ጉልሌ ዜሮ ዋትጜ ቱስቲስ ቴኬምስትጝ ፋይፃው አኽⶓ አግፁኑ ክንቲዴስ ጁዌካማ ቴግባርዳ እሽፅጝስ አግፃሺኑ ምርት እፅፍስ ዴሜካታ ፄውጝስ ቢኪፅⶓ ዱኹዌካ::ሊሊትጙኽ ዙራሙሪዴስ ልማቱ እንፅኺ እንዳራይ ፄጌሬ፤ ግብርኒ እንፅኺስ አሬሳቻንትካ ኬሻንቴ ዝኩዊኔ ዝኩጝስ ዲጋው ቴርትዴስ ንቫሮ አግፅጝስ ኪሴ ሜዜጌብፅናጊያኽኪላ ንካ አቶ ገነት::   አሚኮ ኹን ይኮኖሚው ቴኬምስታንትካ፣ ዋሺኒኪ እንፅኺው ዜርፍዳ አሴሜርጙኒ አብትስ ሌጌስጝስ ካላንኩ አኽⶓ ሜሴኬራውሳ ቴርቶኪ ያኻ ፁፎ ታምፃው ሚዲያ አኽⶓ ሚንችካ አምናና:: እኒጛዴስ እምፕላ ባንጂ ወረዳ አስቑኒ አቡ ኬቤሊው ዝኩዋንታ ዊ/ሮ ደብሬ ካሳውንያኽ:: ጛኪላ ናኑውስታጊ “ኹን ጄርካዋ እንኬባኬብⶓስታ ጝኑሳ እንፅኼ አኮሜችⶓጃጊ ልማቱ ቴግባርዳ አሴቴፍጛኑላ እሺኹሳ ዜርቕቲኔ ካንቴ ባናና ጝርጃሊ ክቻ ይኮኖሚስ ሌጌስጝስ ካሊናኻ አኽⶓ አሚኮ ራዲዮንስ ታምፃው ንባርዴስ ቹኒትናና ዝኩዊኒዳ ኪሴ አግና “ንካ::

ጋያኪ ክምካዋ ዝሩብፅጀ,ኑስ ሞሬፅ ክምካዋ አጌልናሽኑሻ፤ ያኼስጉ እያኑ ትክም ኩፅኒ እሌቱ ኬሌነ,ብዴስ ፌያቲው እሺኾ፤ እንፅኺኪላ ኹንዳ ቻኒስቶ ፌቴራው እሺኾ፤ ናካ ኩፅኒ ቺኒትናና አግፅኹ ንባርስ ኬሽጙንኩ ክምካውሳ ዜሮ ቲኪናና ኾሺኩስታ አሺኩ ክምካዋ እሩብፅናና ኬሳንጼ ሚፄ አግፅጝስ ካሊናታ ቢኪፅኹ አሚኮው ቴርቴኽ ናኒስ አሚኮ 30ንቲ አሜቱ እንዝጚስ አግፂኹሳ ትክሞ  ዊ/ሮ ዳብሬ ድኹዌካ::

ኹን ልማቱ ኬችስ አቺትጜካማ ክብስጙሳ ባይሎ ሌጌፃንታ ካሊፃው ቴርትዴስኪላ ዴሶ አግፄካማ አብቶ ቱስቲስ ቴኬምስትጝስ ካሊⶓዊዛሩ ደብሬ ዙሜካ::ዊዛሩ ደብሬ ጛ ዙራሙሪዳ ወጋቲዊያኽ እስትኹሳ ትክልቴስታ ኩፓኩፔኪላ ራዲዮንስ ቹኒቱኑሳ አሳቦ ጉሽፃ ፄዌካማ እንፅኺሾ ቱጝስ ናካ ጛው ቴጋን እልስ ሳሲፂአኽⶓ እንክርፄካ::

አግፃው ሚፂስኪላ ዴስቴና አኽጝስ ቼጌርስታውላ ሳሴርስ ግርቦ፣ጊዞ ጌንዜቦ ክብሳው ዳድስ ግብርኒው እንፅኺዳ አሴሜርጝታታ አሚኮዳ ዲጋውሳ ንቫሮ ቹኒቴታጊ  ይትስ ቴኬማውሳ ዴሶ ካፅጝዴስ እንግርግራ ናቲንኩ አኽⶓ ዊዛሩ ደብሬ ድኹዌካ::

አሚኮው 30 አሜታሱ እንዝጚዳ ዙሚትጝኔስ፣”የአርሶ አደሮች ወግ ፣ከተሞቻችን” ስታ ዲጋው ዶክሜንታሪ ክልሉ እዝቡ ልማቱ እንፅኺዳ ታምቦ ፊትጙንኩ ቴርትካዴስ ቢዲሪዳ እንኩርስታንኩ ቴርትካ አኽⶓ ባንጂ ወረዳው ቹዋ ቺፅጝፃንቲ አቶ ሞላ ወሌ አሚኮ ክልልታ ናማኪ አዊታ እዝቡ ልማቱ ፈይ ኪስስታታ ድምፃ ያኻማ እጂⶓ  ጌሌፅካ::

ምንግስት እዝቡሳ ስር ልማቱሳ ፋዮ ዋኽትጝፅጝስ ፍሻው እክድስታ ባጄትኪላ ዋሳይ ታምብኹ ዳንጉኒስታ ይሴንት ዳማይ ዝኮ ኑስ አሚኮ ታምፃው ንቫርኪላ ፌይንኩ 30 አሜታው ጊዛኻዳ ኪሴ ሜዜጌብፅⶓ ጉሽካ::እንዴስ ድምክና ግብርኒ ልማቱ ዜርፍዳ ዴሜካ ሊሊትጙኽ  ዙራሙሬ ዳ ዝኩኽ ልማቱ ኬሻንቲ ዴስ እሳንጛታ ታምፃው ንቫርዴስ ፌይኹስ አሬሳቻንትካስ ኽብፂው ማዳባሪስታ ጉልሊ ዜር ወከትስስታ ፍታዊ ዳድስ ታምባታ እዝቡሳ ፋዮ ዋኽትጝፅጝዳ አሚኮ ድምፃ አኽⶓ አቶ ሞላ ኽይትጝፄካ::

ባንጂ ወረዳዳ አግስታው ዳዱ ችግር ስታ ክዳማጃ ኬቴምዳ እሺኹ ፅንኩት ዝቒው አኹ ችግር ኽይስታታ አሚኮ እንፃኽስቱኽ ዜጌቢ ዲጊ ጊዙ ምስክሪያኽኪላ ንካ አቶ ሞላ :: ክልል ናማኪ ባንጂ ወረዳታ አጌር  አቕ ልማቱ ኪሲው ቴኬምስታንትካ ያኻንታ አሚኮ እንፃኽስታው ቴግባርስ ምስጋኒ ቱስታው እልታ ካንትናውስታ ዝኮባይኹ ክልሉ ሚዲያ አኽⶓኪላ ቶኬምካ::

አሚኮ ፍንሾስኪላ ያኹኒ እሚኹሳ አላሜ ይስጝፃማ ወክቶስታ ዝቤኖ ማንዱኽሳ ንቫሮ ታምፅጝስ አቒው አይልስስታ ቴክኖሎጂስ ከፍናታ እንጉስታንኩ አኽⶓኪላ ጉሽካ::