ሻደይ

ታደለ አጋጄ

ሻደይ፣ አሸንድዬስታ ሶለል አሜት ቺፋ ናሲ 16ዴስ ጄሜራማ 21ኺስታ አማኻሪ ክልል ዋግምኽራ ሰኮታዳ፣ ላሊበላዳስታ ኮቦው ዙራሙሪዳ እንቲታኪ ትግራይ ክልሉ ዙራሙርካዳ ኬቤርስታው ባል ያኹሰ ኹን ዳድካዳስታ አደባባይካዳ ፌካማ ኔፃኔቶ አዌጁኑ ባል አኽጝ ዙሚስቴ::

ሻደይ ሰኮታዳ፣ ሶለል ኮቦው ዙራሙሪዳስታ ላስታዳ አሽንድዬ ዴሜካ እሊኩ ዙራሙርካዳ ሊሊትጙንኩ እቑፅካ ስምካስ እቑስታው ያኹኒውላ አንቓ አንቓ ኬቤርፃኑ ባልያኽ::

ሻደይ፣ አሸንድዬስታ ሶለሉ ባል ችኹ ዎክት አሌድስታማጊስታ እሪ ኔኬትⶓ ሲፋማ እሰካዊ ባል ይንታው አኽⶓ አምንጝስ ኬቤርፃኑ ዴስቲው ባል ያኻማኪላ ካንትስቴ::

ሻደይ ኹን ችኽ ቱጝሊ እምትጛማ ኬሴትስታንኩሳ ችግርካዋ ፌይካማ እሰካዊ ዝቤን ይንታማጊ አኽⶓ እንጉስትጝስ ዴስቴ ጌሌፄና:: አፄብካሊ እምፕልትስ ያኼካማ ሻኻና፣ ጛጂሱሳ ኔፃኔቶ አዌጃና::

ባልዳ እድሚዉ ሊሊት ጌጌዋውላስ ስራስሪዴስ ኽሳንትካዋኺስታ እምፕልትስ አሴቴፍጛና:: ባሎ እምፕልትስ ኬቤርፃኑ አኽጝዴስ ጁኽስ ታክስጚው፣ እንካንጚውስታ እምፕልቱ ባል አኽጝስ ባሉሳ እክዶ ክምንትዴስ ክምንትሾ ፌያፌይጝፃኑ ባል ያኻማ ሲፉታኽ::

ሻደይ እስታው ስም እይስትኹ ችኹ አርፊዳ ዋጋው አሸንዳው ቴክልዴስያኽ::

ባሎ ኬቤርፅጙ ካስት ጄሜራው አባላምቲዳ “አሸንዳ እስታውሳ ኻፄ ኬውካማ ጌሜድዳ ዳራዳርጝስ ይውዳ እንፄዋና:: አንቓ አንቓ አሸንዳውሳ ኻፄ ይውዳ እንፄውኒዴስ ፋሌንጋ ፃንጌኻዴስ ሌዋሾ ዳሌ ዋዛዋዝካማጊ ጅማና::

ናሲ እምፕልዴሰ ጄሜርካማ ባልስ ሊሊቲ ቤዴራ ቴርት ፄውስቴ:: ኹን እስካዌ ስዮ ጌቤልዴስ ጄዋና:: ጄውጙ አክም እላቲኩ ዴሜካ ዝኩኽሳ ቑፅካማ ሴያና:: ጛሪውሳ ግቢቴ ሹርቤ ግቢትስቴካማ ባልሰ ቴርታና::

አንቓ አንቓ ናሲ 15 ጌርካስ ባሉ ዋዚሚዳ ካዌና ካስካማ አሽንዴ እስታውሳ ኻፄ ኬውካማ ያጉኒዴሰ ፋሌንጋ ኻፄ ጚስጜዋ እምትጝፄካ ጎናጎንካማ ይውዳ እንፄዋኒ ኹንስ ሊሊቴ ግዶ ፌቴሬ::

ናሲ 16ስ ባል ሊሊቲ አኺኒስ ኬቤርስቴ:: አንቓ አንቓ ጉሪጛስ ጁዌካማ ብሽታንሾ ካስጝስ ሻኻና:: ብሽታንዴስ ዙሩኒዴስ ፋሌንጋ ኩፂ ኽሳንትካ አቕኾ ካስጝሰ ሊሊትጙኽ ዜሚስ ጝንጝና እንዜጜካማ ጅማና ልቓስ::

“አስገባኝ በረኛ ……. አስገባኝ ካልካይ

እመቤቴን ላይ

ጌታየ አሉ ወይ

አለ እንጂ ግቡ ይላሉ እንጅ

ተዘንብሏል ጠጅ

አሸንድዬ አሸንዳ

አሽንዳ ወይ….

እርግፍ አትይም ወይ “ንካማጊ አንቓ አንቓ ግትምስ ጋሺጝስ ጅማና:: ጅሜካማ አግፁኑሳ ቻቤልካማ፣ ሹማጌልካስ ዳቔርስትካማ እሊውሾ እንዜጛና:: ጝንጝና ዙሬካማ እይስታውሳ ጌንዜቦ፣ እቲኔስታ እሊኩሳ ዲብካዋ ኩፕፃና::

ጝርጃ ዴሜካ ኹኖ አጄብጝስስታ ትዳርስ ታኻትሳ አፄባዋ ጎሌልጝስ አሴቴፍጛና:: ኹኑ ኬምፕዳ አኽጝስ እንታ ንካማሂ ጅማና::

“ሻደይ አበባየ ሻደይ

አሽከር ይሙት ይሙት ይላሉ ጌታ

አሽከር አይደለም ወይ የሚኮነው ጌታ

ሻዳይ አበባየ ሻደይ” ንጝስ ጝርጃ ኹኖ አጄባና::

ባሉ አሴቴፍጛንትካ ኪሪዌ ታስጝስ፣ ታቡቱሳ ሰሞ እቑዊጝስሰታ ግዴው ድምፅስ ዜሜርጝስ ዴስፃውሳ እንፅኼንቶ እሚንኩ ግትምካስ አሜትዴሰ አሜቶ ታምፅኹ ድባንስ ምስጋኔ ዲግሳና::

ሻደይ፣ አሸንድዬስታ ሶለል ባል ኹኑ ባል ያኹኒውላ ጝርጃኪላ ባልስ ኬፍቲኔ ቴሳትፎ ፄዋና:: ጝርጃ ባል ታምብጝዴሰ ቤዴርካማ ጛሬ ሌጌፅካማ፣ ጎፈሬዋ ሹካትካማ፣ ሊሊቲ ኽሪ ዝኩኽ ፍትሬቱሳ ክባቶ ስንክትካማ እጄና:: ናሲ 15 ጌርካስ ባሉ ዋዚሚዳ ኹንስ ሻደዩሳ ኻፄ ኬውካማ እይጙሳ አላፍቶ ፊትጛና:: ኻፄ ኬውጛ ካሳኑኪላ እንዳራኪ አሬ ኬሜሳኑላኽ::

ኹንስ ጛው ይው ልክስ ጌሜትካማ ቕሺስ ቴርስካማ እያና:: ኹንኪላ ጝርጃ ቴርስካማ እዩኑሳ ሻደዩሳ ኻፄ ኻስካማ ጝና ቱዋላኽ:: ጝኑ ዙራሙሪዳ ክይስ ሾፌንስትኹ ብቲዳ እንኩርካማ ቺፃና:: ናሲ 16 ጌርካስ ጝርጃ ጉሪጛስ እቑትጜካማ “ጊቴ” እስታውሳ ቡዜ አኽዳ አኾ እሚጝስ ካላዉሳ ጉሚቴ ኬዋና:: ጊቴ ካኒዴስ ግቢትስታው ካኒስ ሴባኒ ሳሴርስ ቑችስታዊያኽ::

ባሉ እንክራንትካ ጊቴ ሴኬክጝስ ልኺትጛኑሳ ግንቦ ቴክልካዴስ ቴርሳና:: ኹን “ሻደይ” ንካማጊ እንክራኒስ ጝርጃ ዴሜካ ዎሬምስ ሜኬትካማጊ ይሴንቶ ካንትፃና:: ቡንክትጝጚስስታ ልኺትጚስ ኹንስ እንካንስቶ አግፅጝስ ፅሬቶ ፄዋና::

ባሉ እንክሪዳኪላ ጝርጂ እንጉስታንትሳ ጄራዋ ሲፋማ ይውዴስ ሻደዩሳ ኻፄ ኪማኒ እኾኽቲኒ ኩፂ ድላ ፄውኽ አኽⶓ ቼሜትጝፄ:: እንዳራኪ ዙርሜ አግፃያሱ ያኹኒ ኩፂ እሊኩዳ ሞኬርጝስ እምቢታማ ዙርጝኔ:: እንታኮው አኺኒስ ጝርጃ ኹንሊ ባሎ ብርኹሰ ኬቤርፃና::

ሻደይ ባል ባይላዊስታ አይማኖቱ ባል አኽጝኪላ ጌሌፅስቴ:: ባሉ ጄሜርስትጜ ካንታውሳ ዙራሙሪኩ ዝኩዋንትካስታ ኪሳ ኪሳ ዙማኑውስታ ክድስት ድንግል ማርያሙ ትንሳኢው ባልሊ ታምትጚ ዝኩኽያኽ::

ትክላሊስ ሻደዩ እንክሪ ሚንችካ ትክምካ ዝኩኑዊያኽ:: ባል እምፕልታቑሳ እሴቶ ክምንትዴስ ክምንትሾ ፌያፌይጝፅጝስ ካሊፃው፣ ጝናኻዳ ዎሴንስትካማ እሺንኩ ኹንስ ውታኺዳ ፌካማ ኔፃኔቶ አዌጃንታ ፄዋው፣ ኹን ዋኒዴስኪ ጃላ ግዲትካማ ፊጝስ ትዳርስ ያኻውሳ አፄቦ እሜኑ፣ ጝርጃስታ ኹን እምፕልትስ አሴቴፍጛኑ አኽጝስ ኽሳንቴ ዴስቴ ፌቴራውስታ ባሎ ካንታንትካ አንኩሊውሳ ዴስቴ አግፃኑ አኽጝስ አምፕልታቕስ እያው ትክም ኬፍንኹዊያኽ::