ንግስቴ ተስፋ
አቒ አሌም ታምባው አችሊ ጚጛርትጛሳ ካንትጝፃማጊ አኬድኹ አችሾ ታምባው ዳድ ዝኮ። አኽጝስኪ አሚኮኪላ አቒስ ቴኬማውሳ ዜጌቤ ዜጌብጝስ ፣ ሼውቴ ፌቴራውሳ ንቫሮ እይጝስ እዝቦስታ ምንግስቶ ዳምባ ያኻማ ታምትጝፅጝስ ፣ እግ ኬቤርስታታ አጌር አቕ ክችክቼ ፍቶ አግፃንታስታ ዋሺኒኪ ጉዳይዳ ንቫሮ አግፅጝስ ቢካንታ ካሊፁስ 30 አሜታሳ ቼፍፃ ።
አሚኮው አቫላምቲ ታሪክ 1987 ቴሳስ ላጜታኽ ። እንኚ ጊዛይኪላ ቲሪትጙስ ፅካ ያኻቲንኩ ጋዜቴንስስታ ውማይቴንስ ናኪኔ ልግስኔ ቤዴርካማ ታክሱንኩ ቻ ኬሽኹ ጌርክ ይንታዊያኽ ንካማ አሜችጛያሱ እንፃኽፂ ብቲዳስታ ጊዝዳ ያኼካማ ልግስኔ ቤዴርካማ ታክሱንኩ እዝቡ ድምፃ አኽጝስ አኬዱንኩ ጋዜቴንስስታ ውማይቴንስ ቲሪትጛ ።
አሚኮ ፌይንኩ 30 አሜትካዳ ክልሉ ኢኮኖሚው ፣ ፍቱ ስታ ጉድ ቺፅጝፂው እንቲታኪ ፍታዊ አብቱ ቴኬምስታንት ዝኩዋታ ፣ እዝብ ዲግሳውሳ ክሬቴስታ ፋዮ ትኩታው ቤንስ ዲግሳማ ኽይስታታ ድምፃ አኽጝስ አንፃኽስቱኽ አኽⶓ አዊ ብሄረሰብ ቺፅጝፂው እምፕልታቕ ስልኪስ ዲብስካ፡፡
ዎታት በላይ ወንዳየሁ እንጃቢሪ ኬቴምዳ አግስታው ወታቲያኽ። “አሚኮ ቲሪትጙኒዴስ 30 አሜታሳ ቼፍፅጝ ዋዚታ ካንትስታው ጋቲዊያኽ” ኑስ አሳቦ ቤንጝፃ ። 30 አሜታኻዳ እዝቡሳ ካሴስታ ክሬቴ ዙርፃንኩ ጉዳይካዳ ቱኩታማ እዝብስ ታምብስታንታ እኽጝዳ ጋሺስታውሳ ቴግባሮ አኮሜችኹ አኽⶓ ዎታት በላይ ዲብሳ።
ወክት ቺፋ ጌቴማው ቺጊርፂ ሰላሙኪ ያኻ እዝቡ ጋቻ ፌቴርስታው ወክትዳ ያኻማ እዝብስ ወጌናማ ስታ ፍት ቼሜትጛታስታ እግ ኬቤርስታታ አሚኮ ፌዩንኩ አሜትካዳ እንፃኽስትኹ አኽጝስ አሜሴጌንስታው አኽⶓኪላ ቶኬማ ። “ቺጊርፂ ታምብጝስስታ ስፍሪዳ ያኻማ ዜጌቤ ታምፅጝስ ካሊስታቲዊያኽ እስታው ብቲዳጊ አሚኮ ፍንፍና አግስታማ ንቫሮ ታምፅጝስ ፄውስ እጂኹ ቴግባር ዜኔግስታቲዊያኽ” ንኹ ዎታት በላይ እዝብ ካሴኩ ጉዳይካዴስ ፍታዊ አብቱ ቴኬምስታንት ዝኩዋታ እገ ምንግስት ኬቤርስታታ እምፕልታቕ ፍታዊ ዳድስ ምንግስትዴስ አግልግሎቴ አግፅጝስ ካላንታ ፣ እዝቡ ሰላም ኬቤርስታታ ምንግስትስታ እዝብ ዲግጛማ ችግር ፌቴርስታኒ ችግሮ ኽይጝስ ካላታ ድምፃ ያኻማ እጂⶓ ዙማ ።
ዲጊ ጊዝዴስ ናቴ አማኻሪ ክልልዳ ዝኩኽ ሰላሙ ችግርስ እዝብ ጉዲስታቲታ ታምቦ ፊትጛው አሚኮ ክልሉ እዝብ አሱ ንቫርስ ሼቤርስታማ ችግርዳ ቱዋቲታ ሚዛናዋ ያኻማ አንቤባንትካስ፣ ቹኒታንትካስስታ ካንታንትካስ ታምፃው ንቫር ልቓሱላ ያኹኒ ክልሉ እዝብ ሰላም ኬቤርስታታ ቢኪፅኹ አኽⶓ ዎታት በላይ ዲብሳ ።
እግ ኬቤርስታኒስታ ሰላም ዝኩዋኒ አጌር አቕ ካሴኑ ፍቱስታ ጉድ ቺፅጝፂው ችግር ኽይስቴ ናው አላሚስስታ እክድስ ዜጌቤ አሚኮ ታምፃማጊ አኽⶓኪላ ዎታት በላይ ድኹዋ ።
እንዴስ ድምክና አሚኮ ዲግሳው ዜጌቢ እዝቡ ፍቱ ካስካዳ ትኩቶ ፄውኽ ያኹኒኪላ ፌያፌያማ ካቢትጚስ ሚንቾ ጊዞ ዲጋው ፕሮግራምኪላ ጊዞ ቴኬምስትጝዳ ቻኒስቶ ፌቴርጝዴስ ፌይኹስ ሼሌቻዊያኽ፡፡ አኽጝስኪ ወክቶ ማንዱኽ እስካዊስታ ዲግስጚስ ዴሜካ ፍቱሳስታ ክርፂ ቺፅጝፂውሳ ካሴ ኽይጝስ ካላውሳ ንቫሮ ዲግሳታ ሚንችካ ፋያንኩ አኽጝስ ጊዝታስታ ዝቤንታ ጚጛርትጛሳ ክችሳማጊ ፍንሾስ ይንታታ አሚኮዋ ቴስፊስ ማንዳንኩ አኽⶓኪላ ዎትት በላይ ዙማ ።
አማኻሪ ክልልዳ ፌቴርስትኹ ሰላሙ ችግርስ ቢዲሪዳ ችግርስ ፂኪስታንታ ያኹንኩ ወረድካዴስ አዩ ጉዋጉሲ ወረዳ አቫላምቲዳ እንኩርስታዊያኽ ። እን ወረዳዳ 48 ሻይዴስ ጃላ አጌር አቕ ፌኔኬልጛኒስ ሚንችካው ይወት ድስጝ ፣ አብት ንብሬት ወዴምጝ ዲጊ ጊዙ ችግር አኽጝ ታክስስታዊያኽ ። ፌቴርስትኹ ችግር ኽይስታታ ኩፅኒ አሚኮ ጉዳዮ ባስጝፅኝጝዴስ ኪቻ ሚዛናዋ ያኻማ እግ ኬቤርስታታስታ አጌር አቕ ሰላምስ ጛው ባድሚዳ ዝኩጝስ ካላንታ ፌኔኬልጙንኩ ዴሜካ ጝንሾ ዙራንታ እሌቱሳ እርዳቴ አግፅጝስ ካላንታ ታምቦ ፊትጙኽ ሚዲያው ኾት አኽⶓ ዴሜካ አዩ ጉዋጉሲ ወረዳው ቹዋ ቺፅጝፃንቲ አቶ ገበየሁ በሪሁን ጌሌፅካ ።
አሚኮ ፌይኹ 30 አሜታኻዳ ክልሉ እዝብካው ፍቱስታ ክርፂ ቺፅጝፂው ካሲ ዙራታ እዝቡስታ ትኩታው ቤንካው ዳምባ ያኻማ ንቫሮ ታምፁስ እጂኹ ኾት አኽⶓ አምናንኩ አቶ ገበየሁ “ጋያኪ ሬዲዮንስ ዲጋው ዜጌቢ ክልሉ እዝብ ውላቱዌ ኪሴ ሜዜጌብፃታ እንፃኽስቱኽ ሚዲያ አኽⶓ ታክስጝስ ካሊኔ” ንካ። እንዴስ ድምክና ሰላምስ እዝብ እምፕልትስስታ ኪቪቪርጚስ ዝኩዋታ እንፃኽስታው ዜጌቢኪላ ጋሺስታው አኽⶓ አቶ ገበየሁ ቶኬምካ ።
ወክት ካሴውሳ ቴክኖሎጄስታ አቒውሳ አይሎ እሚጝስ እዝብ ፋያውሳ ሚዲያውሳ ታምብስታንቶ እሳንጝፅጝስ ጊዝዴስ ጊዞ ጚጛርትጛሳ ኪሳማጊ ይንቱኽ ሚዲያ አኽⶓ ጉሽካ፡፡ዲግስጚስኪ ያኻ ክችክቼ ንቫሮ አጌር አቕስ ታምፅጝስ እጉ ጉዳይዳ፣ ፍቱስታ ቺፅጝፂው ዜጌቢዳጊ አኮሜቻው ቴግባርስ ጎሌልስታንቲ ሚዲያ አኽⶓኪላ ጌሌፅካ ። አቶ ገበየሁ አሌም ታምቡኽሳ ቴክኖሎጄ እሳንጝፅጝስ ፣ እዝቦ ወጌንጝስ ፣ ዜጌቢውሳ ታምብስታንቶ እሳንጝፅጝስ ፣ ጋዜቴንካውሳ አክሞ ፣ ካሌቕቶ ቴክኖሎጂስኪ ያኻ ዴስስ ሌጌፅጝስ እዝቡሳ ፍቱሳስታ ጉድ ቺፅጝፂውሳ ካሴ ዙርፅጝስ ካላው ዜጌቢዳ ትኩታማ እንፃኽስታታ አሚኮስ እንፅኼንቶ ፌይጝፄካ ።