አሚኮስታ ማቤራዊዉ ዜርፍ

አለሚቱ የኔት

ቤዴራሱ አማኻሪ ሚንቺትካ ታምትጝፂ አችት ናኪኒ አማኻሪ ሚዲያ ኮርፖሬሽን ቴሳስ 1987 ም/አ በኩር ጋዚቲስ እንፅኼ ላኹ ናማ ጄሜርኹ ያኹስ ጋዚቲኪላ ክልሉ አችስ አቴምስትⶓ ጄሜርኹ አባላምቲ ጋዚቲያኽ::ጉንቤት 16/1989 ም/አ ዴሜካ ሬዲዮንስ አማኻሪ ብሄራዊ ክልሉ ድምፅ እስታማ ፌያፌይⶓ ጄሜራ::ማንዚ 19/1992 ም/አ አማኻሪዉ ቴሌቪዥን 30 ደኪኪስ  ሶኼቱሳ ፕሮግራሞ ጄሜራ::አዉጚዉ ሬዲዮንኪላ ሴኒ አርፊ 1997 ም/አ እንፅኺሾ ቱዋ::ቺር ቤዋዋ ዴሜካማ ሹኻ ኮንኪስ ጋዜታዉ እትሜት ጄሜርኹ ዴሜካ 2003 ም/አ ትክምቲ አርፊዳኽ ::አዉጚስ፣ህምትጚስስታ ዎሮምጚ ኮንኪስ ዴሜካ 2008 ም/አ 30 ደኪኪስ ቴሌቪዥኑ ፕሮግራም ጄሜርስትኹ ወክቲያኽ::

አሚኮ ናካዳኪላ 11 ኮንኪስ ፣ ላጛ ቴሌቪዥኑ ቻናልስስታ ላጛ ሬዲዮንስ አንቤባንትካስ፣ቹኒታንትካስስታ ካንታንትካስ ንባርካዋ ታምፃማጊ አግስታዉ ኾትያኽ::አሚኮ ሊሊትጙንኩ ኮንክካስ ፌያፌይጝፃኩ ቴርትካኪላ ክልሉ እዝብ ማቤራዊዉ ዜርፍስ ኬፍንኹሳ ኪሴ ያጋንታ ካሊፅኹ አኽⶓ አዊ ብሄረሰቡ ቺፅጝፂዳ አግስታንኩ ዝኩዋንትካ ስልኪስ አሳቦ ቤንጝፅካ::

ዊዛሩ ተጄ ወሌ እንጃቢሪ ኬቴሙ ዝኩዋንታ ዙሙኑዉስታጊ አሚኮ ክልሉ ዝኩዋባይኹ ኽሳንቲ አብቲያኽ:: “አሚኮ ኩክሬ ሙሬኺስታ ጌማማ እዝብ ያቓታ ፄዉጝስ ሚንቾ እንፅኼ እንፃኽስታኪላ”ንካ :: ብሄረሰቡ ቺፅጝፂስኪላ አሚኮ እልስታ እንኮኺ ንጝስ ካሊስታዉ አኽⶓ ዊዛሩ ተጄ ዲብስካ::አኽጝስኪላ አሚኮ ማቤራዊዉ ዜርፍዳ ሼርካ ቹትካ ቤዴራ ሲፋሲፍጚዴስ ጄሜራማ ቲኑ ኾትሾ ካስካማ ካሜንጝ ቲንስ ዝኩኽሳ ትክሞ ማሌካማ ቴግባራዋ ፄዋንታ ኬፍንኹሳ ፍሼ ፄዉⶓ ዲብስካ::እንስኪላ ሚንችካ ስራስሪዉሳስታ ቹትካዉሳ ክርⶓ ኔኬትጝስ ካሊⶓ ቶኬምካ :: ፃንኩቶ ማንዲናና ዝኩናታ ፄዋንኩ ቲንኩ ፓኬጅካዋ ቻቤልናና ቴግባራዋ ፄዉጝስ  እርዳታዉሳ ሼዉቴ ፌቴርጝስኪላ ኬፍንኹሳ ፍሼ ፄዉⶓ ዙሜካ::

ስራስሬ ካሜንስቱኒዴስ ጄሜርካማ ኬቴብፅጝ ፋይፃዉ አኽⶓ ፌያፌይጛዉ ፕሮግራምዴስ ክንቴ አግፅጝስ ቲንዌና ያኼካማ ሌጌሳንታ ቹትካስ ሼዉቴ ፌቴርጝስ ክቼዉ እላቲዉ ሚዲያ አኽⶓ ዊዛሩ ተጄ ጉሽካ::

ስራስሪዉሳ ፕሮግራሞ ግቢትጝስኪላ ስራስሪ ምግባር ፅንታስ አድርትካማ እምፕልታቑሳ እሴቶ እሚካማ ሌጌሳንታ ፄዋማጊ ዝኩኽ አኽⶓ ዊዛሩ ቦጋለች ዲብስካ::

አቒዉሳ ይወቶ አቲፃንኩ ቑንዝካዋ ቤዴርካማ ቲንኪክጜስታ ካላካልጜ ፄዉጝ ካሊፅኹ አኽⶓኪላ ቶኬምካ :: ዊዛሩ ተጄዉ ዙሚታጊ ፌያፌይጛቲንኩ ቑንዝካዋ ቤዴራማ ማራማርስትጝስስታ ካላካልጚዉ ሴልካዋ ቴኬምስትጝስ ጛጛርትጛሳ ኬሴትስታዉ ቲኑ ዳንጉዊኒዴስ ማንዲስታንታ ሼዉቴ አግፃንታ እርዳታ::ሊሊትጙንኩ ፌያፌይጛንኩስታ ታክሲልስ ኬሴትስታንኩ  ቑንዝካ ጌቴሙኒኪላ ትኩታኩ ቤንካዋ ጉሽጝፅጝስ አሬኽትስ ፋይስታዉ እርዳቲ ዲጋታ ፄዉጝስ ካስጝፁስ እጂኹ አኽⶓ ቶኬምካማ እስጜ ቴግባሮ ዴሜካ ይስጝፃማ ሲፍፅጝ ቱስታዉ አኽⶓ ዊዛሩ ተጄ ታክስፅካ ::

አሊዲዳኪላ አሚኮ ታንባያሱ ዙራሙሪ ዝኩዋዉ አኽጝስ ሲፋሲፍጚስኪ ያኻ ዜጌቢስ ታንብስታንታ አኽጝስ ሚንቾ እንፅኼ እንፃኽስትጝ ፋይፃዉ አኽⶓኪላ ካንቴ እይካ::

አቶ ቢረሰዉ በየነ ባንጂ ወረዳ አርሲ ጌምቤኽ ኬቤሊዉ ዝኩዋንቲ አሚኮ ፌያፌይጝፃዉ ክንቲዉ ቴርትዴስ እምፕልታቕ ሼዉቴ አግፄካማ ሰራስሬ ክንቲ ጝና እንፃኼካማ ክንታንታ ፄዉጝስስታ ክንቲስ አድርቱንኩ ያኻንታ ፄዉጝስ ኬፍንኹሳ ፍሼ ፄዉⶓ ዲብስካ:: ሊሊትጙንኩ ዙራሙርካዳ ዝኩኽሳ ፂኒስጙሳ ዴሶ ካፅካማ ቴግባራዋ ፄዉጝስ ብሄረሰቡ ቺፅጝፂዉ ካሜንስታንትካ ክንታንትካ ኬሻንቴ ዋይሜ ሜዜጌብፃንታ ፄዉኽ አኽⶓ አቶ ቢረሰዉ ቶኬምካ::”ቹዋ ታብል ክንቲዉሳ ትክሞ እርዳትስትካማ ክንቲጝናሳ እሳንጝፅጝዳ እርዳቴ ፄዋንታስታ ክንቲ ጝንካዋ ግቢትጝዳ አሴቴፍጛንታ ፄዋ“ ንካ::ስራስሪ ቤዴራ ሚዲቢኔ ክንቴ ክንትጝ አንኩሌ አድርቴካማ ሌጌሳንኩ አኽⶓ ቹዋ ታብል እርዳትስትካማ ድሚ ፌኬዳኩሳጊ ክንቲ ጝናሾ እንፃኻንታ ፄዉጝስ እርዳትኹ አኽⶓ ጉሽካ::

ክንትኹዴስ እምፕልታቕዴስ ይጎ ኦንላይኖ ቴኬምስታቲዉ አኽጝስ ጋዜታ አቲምስቴታ ኩክሬኺስታ ታንቤዉ ዳድ ፋይስቱኒ ናኒስኪላ አቶ ቢረሰዉ እንፅኼንቶ ፌያፌይጝፅካ::

ዳንግሊ ኬቴሙ ዝኩዋንታ ዊዛሩ ቦጋለች ፈንታሁን አሚኮ ዎክታዉካ ንባርካዋ ታምፅጝስ ክቼዉ እላቲዉ ሚዲያ አኽⶓ ዲብስካ::አሚኮዋ ዉላ እምፕልታቕ ቤዴራማ ብስጝስ ንባሮ አግፃዉ ጎሌልስታንቲ ሚዲያ አኽⶓኪላ አሳቦ እይካ::

አዊ ብሄረሰብ ቺፅጝፂዉ ካሜንስታንትካ ዎታትካኪላ ፕሮግራምስ ግቢትስታንኩ ኬሻንቲ ፊፂምጚ ዝኩክ ዎታትካዉ እንፅኼ ፌቴርጙ ዴስዴስ ንባሮ አግፄካማ እንፅኺሾ ቱዋንታ ፄዋማጊ አኽⶓ ቶኬምካ:: ዊዛሩ ቦጋለች“ ዙራሙሪዉ ዝኩዋንትካ ኹኑስታ ጝርጃዉ ክችክችትዳኪላ ሼዉቲ ዝኩዋማ እንፅኼ ክቻ ቤንጜካማስታ እርዳትጜካማ እንፃኽስታንታ ፄዉጝስ ካሊፃኪላ“ ንካ:: እስካዉካ እስካዉካ አብንካዴስስታ ፕሮግራምካዴስ ንባርካዋ አግፄካማ ቴኬምስታንታ ያኻንታ ካሊፅኹ አኽⶓ ዲብስካ::እምፕልታቖ ኽስኹስ ቴኬምስታንታ ፄዉጝስኪላ ዉላጊ ዙራሙሪዳ ታምብስታንታ ያኻማ አጌላጌልጝስ ዉላጊ ዜርፍስ ኬሽጝፃማ እንፃኽስትጝ ቱስታዉ አኽⶓ ዊዛሩ ቦጋለች ታክስፅካ::

ፍንሾስኪላ ቤዴራማ ንባሮ ታምፅጝስ አጌርዴስ ፌያማ አሌምስጊ ጎሌልስታንታ አኽጝስ ይሳማ እንፃኽስትጝ ቱስታዉ አኽⶓ ካንቴ እይካ::

አዊ ብሄረሰብ ቺፅጝፂዉ ትክትሊ ጉባይ ኽምባ አቶ በላይነህ ወንድም ጌሌፁኑዉስታጊ አሚኮ አቒስ ቺጊርፂ ያኹኽ ዙራሙሪዳጊ ታምብጝስ እምፕልታቕስ ዲግሱስ እጂኹ ንባርስ እምፕልታቑ ዝኩዊኒዳ ኪሴ አግⶓ ጌሌፅካ::ብሄረሰቡ ቺፅጝፂዳ አሚኮ ሚንቾ እንፅኼ እንፃኽስትኹ አኽጝስ ዉላጊ ዙራሙሪዉ ዝኩዋንትካኪላ አሚኮዋ ማልጛ እንናካናንኩ አኽⶓ ቶኬምካ::

ቲኑ፣ክንቲዉ ፣ ኹኑስታ ዎታትካዉ ዜርፍስ ምንግስት ፌያፌይጝፃዉሳ ቴግባሮ እምፕልታቕ ቻቤልካማ ፌፄማንታ ፄዉስ እጂኹ ፍሺ ኬፍ ንኹ አኽⶓኪላ አቶ በላይነህ ጉሽካ::ክንቲዉ ኾትካዉ ፍንት ጉሳንታስታ አቾ ማንዱኽ ያኻታኪላ አጌራኻዳኪ ያኻ ባርኾቼዳ አግስታንኩ አጌር አቕ ታምቦጊ ፊትጛንታ ኒኪፅጙሳ እንፅኼ እንፃኽስስትጝስ ሚንችካ ክንቲ ጝንካ ኪስስታንታ ካሊፅኹ አኽⶓኪላ ቶኬምካ::

ፍንሾስኪላ አሚኮ ብሄረሰቡ ቺፅጝፂዳ ቻፌ ብሳማ አግልግሎቴ እዩኒ እምፕልታቖ ማልጛ ቴኬምስታንታ ፄዋዉ አኽⶓኪላ ታክስፅካ::

አማኻሪ ሚዲያ ኮርፖሬሽኑ ስራአስኪያጅ ጋዚቲኒ ሙሉከን ሰትየ አሚኮዉ 30ንቴ አሜቶ ካንትኹስ እዩኑ ጋዚቲዉ ጊሊፂታጊ አሚኮ 5፣ 10ስታ25 አሜቱሳ እክዶ እሜማ እንፃኽስታማጊ አኽⶓስታ አዊ ብሄረሰቡ ቺፅጝፂዉ እዝብዴስ ቻፊ ብስስታያታ ጁንኩ ካስካስኪላ 10 አሜታኻዳ እክድ እምስትⶓስታ ክልሉ ኩስጚ ጝናስኪላ ካሴ ዲግስካ::ክልል ባጄቶ ፌኬዱታ ኩፅኒ ድምክኔ ሬዲዮኑሳ ቻፌ ብሄረሰቡ ቺፅጝፂዳ ብሳንኩ አኽⶓ እርዳትፅካ::

ብሄረሰቡ ቺፅጝፂ ኩፅኒ ካላዉ አክምስ እንፃኽፂስ ያኻዉሳጝኖ እዝብሊ ኩስጛማ ግቢታማ እያዉ ያኹኒጊ ሜሳሪስ ያኻዉሳ ጌንዜቦ ፋይጝፅካማ  ቤዴርካማ ጄሜርፅጝስ ካላንኩ አኽⶓ ጋዚቲኒ ሙሉከን ጌሌፅካ::