አሚኮ ብሄራዊ ትክም ማንዲስታታ እንፃኽስታው ሚዲያኽ

አለሚቱ የኔት

አሚኮ አጌራዌ እንፅኼስታ ብሄራዌ ትክሞ ቼሜትጝፅጝስ እንፃኽስታው ኾት አኽⶓ ተክላይ ሚኒስትር ፅ/ጝናሱ ዲሞከራሲ ቴርቱ ግንባቲ ማይኬሉ ቴቬቬርጝፃንቲ ሚኒስትር ቢኪላ ሁሪሳ (ዶ/ር) ጌሌፁና::

አሚኮ 30 ኬቤርስቱስ ብሄራዊ ትክም ስታ ሚዲያው ፍሺ ፅናቱሳ ፁፎ ዲግሱንኩ ቢኪላ ሁሪሳ (ዶ/ር) አሚኮ ክልልዴስ ፌያማ አጌራዊ አጀንድካዳ ትኩቶ እያማ እንፃኽስታው ብሄራዊ ትክም ማንዲስታታ ፍሼ ፄዋማጊ አግስታው ሚዲያ አኽⶓ እርዳትፅካ::

አጌሩ ልዋላውቱ ዴክት ክሙ እምፕልት፣ ሉዋላውትስታ ኔፃኔት ቼሜትጝጝ፣ ምታኒ አብቱሳ ብልፅግኔ ቼሜትጝፅጝ፣ ጛሬ ካሊጝ፣ ድኽትዴስ ፊጝ፣ አድርትጝ፣ ፖለቲካዊ አክምስታ ተፅኖ ፌቴራንቲ፣ ባይሉ ኔፃኔትስታ እዝብካው ማቤራዊ ልማት ቼሜትጝጝ ብሄራዊ ትክሙ ስርኩ ግብካ አኽⶓኪላ ቢኪላ ሁሪሳ (ዶ/ር) ጉሽካ:: ስም ክልሉ ያኼስጉ ብሄራዊስታ ትኩት ፋይፃኩ አጀንድካዳ ሚንቾ ትኩቶ እይካማ እንፃኽስታንኩዴስ አሚኮ እምፕል አኽⶓ ጉሽካማ እስጜ ይስጝፅጝ ቱስታውስታ ምስጋኒ ቱስታው አኽⶓ እርዳትፅካ::

ብሄራዊ ትክሙ ጉዳይ እምፕል ጛርት አቒው፣ እምፕል ምንግስቱ አኹኪ ፖለቲካው ጉዳይ ጋቲዊያኽ ኑንኩ ሚኒስትር ብሄራዊ ትክም እምፕል አጌሩስታ እዝቡ አጀንዲስታ ጉዳይ አኽⶓ ቶኬምካ::

ናካዳ ክንቲ ጝንካዋ ልምታታ ፄዋው ዋሺኒኪ አይል ይቶፒያው ብሄራዊ ትክምዳ ይንቱኽ አኽⶓኪላ ጌሌፅካ:: ያቓያሱ ክምንት ዴሜካ ቻ አጌሮ ፌይፃማ እያው አኽⶓ እርዳትፅካ::

ብሄራዊ ትክማጋቲታ አጌራ ኬፄልጝስ ካላቲት አኽⶓስታ አጌራ ኬፄልጝስ ካሌው ብሄራዊ ትክምካዋ ታቓታ፣ ቼፍታታ፣ ኪቢርፄታስታ ኪቢርስቴታ ዝኪስ አኽⶓኪላ ቢኪላ ሁሪሳ (ዶ/ር) ጌሌፅካ:: አኽጝስኪላ ሚዲያ ብሄራዊ ትክም ኬቤርስታታ እምፕል ሜሳሪ አኽⶓ ጉሽካ:: ሚዲያ እምፕላ አጌራው ብሄራዊ ትክም ኬቤርስታታ ዝኩኽ ፍሺ ኬፍቲኒ አኽⶓ ታክስፅካ::

እምፕል ሚዲያስ ይቪቻ እንፃኽስታማ ብሄራዊ ትክሞ ማንዲፅጝስ ካሊስታቲው አኽጝስ ውላዋጊ ጉላልካዋ ቴኬምስትጝ ቱስታው አኽⶓኪላ ቶኬምካማ ዲጂታል ሚዲያስስታ ዲጂታል ዲፕሎማሲስ ኩፅኒ ሊሊቴ ትኩቶ እይጝ ቱስታው አኽⶓ ቶኬምካ::

ፅናት ፁፉ ኩስጚዳ አግስቱንኩ አቶ አንዳርጋቸው ጐፋ እዩኑ ካንቲዳ “አሚኮ ካንትናናጊ ሌጌሱኽ ኾትያኽ” ንካ:: አሚኮ ብሄራዊ ትክም ማንዲስታታ ኽሳንቲ እዳሲው ዴዴክዳ፣ ድሚ ባርዳስታ እሊኩዳጊ ፕሮግራምካዋ ቴርሳማ እንፃኽስታማጊ አግስታው ሚዲያ አኽⶓ ዙሜካ:: ብሄራዌ ትክሞ ማንዲፅጝስ ሚዲያው እሺ ናውስ ዲጉኽ ፅናቱ ፁፍኪላ ዳንጉዊኔ ዋኽፅጝስ ካሊፃውሳ ሼውቴ አግፅጝስ ካሊፅኹ አኽⶓ ዲብስካ::

አጌራውሳ ብሄራዌ ትክሞ ማንዲፅጝዳ አሚኮ እንፃኽስታው እንፅኺ ይሳን እፃው ያኹኒኪላ እንዴስ ኽስኹስ እንፃኽስትጝስ ካላንኩ እንፃኽስታንኩ ውማይቴንካዋ እሚኹ ሚዲያ አኽⶓ ዲብሱንኩ ዴሜካ ኩስጚው አሴቴፍጛንቲ አቶ ጋሻው ገብሬያኽ:: ዲጉኽ ፅናቱ ፁፍኪላ አጌራውሳ ብሄራዌ ትክሞ ማንዲፅጝዳ ዝኩኽ ፍሺ ኬፍቲኒ አኽⶓ እርዳትስትጝስ ካሉንኩ አኽⶓ ቶኬምካ::