ዳዴኹ ዎንጀል ባሳማጊ አንትጝስ ዝኩዊኒዳ ስጋቶ ፌቴራማጊያኽ

አለሚቱ የኔት

ዙራሙሪ ቺፋ ኬሴትስታማጊ ዝኩኽ ዳዴኹ ዎንጀል ባሳማጊ አንትጝ ይወትዳ ስጋቶ ታምፃማጊያኽ ናኒስ ዚጋሚ ወረዳዉ ዝኩዋንትካ ዙሙና::

ወረዳዳ ዳዴኹሳ ዎንጄሎ ካላካልጚስ እንፃኽስስታማጊ አኽⶓኪላ ወረዳዉ ሰላምስታ ዴክት ፅ/ጝና አቕፃ ::

ሰላሙ ዳንጉዊኒ ምክንያታስ እምፕልታቕዉላዳ ፌፄምስታዉ ዎንጀል ሚንችካ እምፕልታቑሳ ዝኩዊኔ ፌቴናማጊ አግስቴ::አማኻሪ ክልልታ ላጛ አሜታዴስ ጃላ እጂኹ ሰላሙ ዳንጉዊኒኪላ እጉ ሴግቴንት ሻራሻርስታማ እጋፊ ቴግባርስታ ዎንጄል አሳናማጊ ካሳታ ፄዉስ እጄ::እምፕልታቕዉላዳ ፌፄምስቱስ እጂኹስታ ላንቡሳኺስታኪላ ችግራ ያኻማ ዝኩኽ ዳዴኹ ዎንጄልስ ዝኩዊኒ ስጋታኻዳ አኽጞ አዉጚዉ ቴሌቪዥንስ ስልኪስ ዙሙንኩ ዚጋሚ ወረዳዉ ዝኩዋንትካ ዲብስካ::

አቶ ታረከኝ አለም ዚጋሚ ወረዳ ጉደር ጃዊ ኬቤሊዉ ዝኩዋንቲ ዙሙኑዉስታጊ ቤዴራ ስጋታ ጋቲታ ክምካዋ እሩብፃኒስ እሺካ:: ማንዳንታ ጋቲታ ጌርካኪ ያኻ ኻራ እሺካ ቼካማ አግፃኒስ እሺንኩ እኽⶓኪላ ቶኬምካ:: ላጛ አሜታዴስ ናቴ ኩፅኒ ኬሴትስትኹ ሰላሙ ዳንጉዊኒ ምክንያታስ ዳዴኽ እሳናማጊ አንትጝስ ችኻ ድባይዳ ቻኒስ እሺንኩ ክምካዋ ጝናኻዳ እንፄዌካማ ማንዳኒስ ቻንኩ አኽⶓ ዲብስካ::ጝንዴስኪላ ያኹኒ ፍሽካማ ካፅጝስ ሞኬራንኩ አኽⶓኪላ ዙሜካ:: እን ምክንያታስኪላ አራኹናጊ ቴርስ ሳቔናዋ አቲጝስ ማንዳኒስ ቻንኩ አኽⶓስታ ዳዴኻ ይንትኹ ዝኩኒኪላ ሳሴርስ ዙራቲዉ አኽጝስ ይወቶ አቲⶓኺስታ ታንባንኩ ዝኩⶓ ድኹዌካ::

አቶ አስፈራዉ የኔአባት ግምርና ዋግሳት ኬቤሊዉ ዝኩዋንቲ ዴሜካ ክምካዋ ይቪቻ ያኻዉላ ወሬሙሳ ሜሳሬ አግፅናኻ ንጝስ አቒዉሳ ይወቶ ድፅካማጊ አኽⶓ እንክርፄካ:: ዳዴኽስትካማጊ ካሳንኩ ክምካዋ ፋየካማ አግፁኒኪላ ድላሊ ዝኩኽ አኽጝስ እምፕል ክሚስ 40ሻያሳኺስታ ኬየካማ ካፃንታ ፄዉስታዉ አኽⶓ ቶኬምካ:: እስጜ ዎንጄሎ ካላካልጚስ ካሊስታታ ኩፅኒ ጝንዴስ ጄሜራማ ሙሬኺስታ አችትጚስ ማንዴካማጊ አኽⶓኪላ ጉሽካ::

ዚጋሚ ወረዳዉ ሰላምስታ ዴክት ፅፌት ጝናሱ አላፊ አቶ ዳግማየሁ ተሻለ ጌሌፁኑዉስታጊ ወረዳዳ ላጛ አይኔት ዳዴኽ ዝኮ:: ኬቤሊዴስ ኬቤሌስታ ዋሌን ክልልስታ ወረድካዴስ ወረዳሾ ካይጛዉ ዳዴኽ ዝኩⶓኪላ ቶኬምካማ ምሳሊታ ይማሊ ኬቤሊዴስ ዚጋሚሾስታ ዚጋሚዴስ ይማሊሾ ኽቴናቴ እንፃኽጛኑ ዳዴኹ ቴግባር ዝኩጝስ ወረዳዉ እዝብሊ ኩስጝጚስስታ ይንታዉሳ ንብሬቶ ኽቴ ናቴ ዙርፅጝስ ችግር ኔኬትⶓስታ ዋኽስ ዋኾ ድስጝስ ኩፅኒ ካሊስታያሱ አኽⶓ እርዳትፅካ::

ዳዴኹሳ ዎንጄሎ ካላካልጚስ ካሊስታታኪላ እምፕልታቖ ኩፔካማ አግፃኑ ስፍሪዳ አግስቴካማጊ ሼዉቴ ፌቴራዉሳ ክንቴ እይካማጊ አኽⶓ ቶኬምካ:: ዎንጄሎ ፌፄምጝዳ አግስታንኩሳ ፌይፃማ እግስ እይጝዳ ቴቤቤርጝጝ ቱስታዉ አኽⶓኪላ ቱትጚዳ ታምጞ ጌሌፅካ::

አዊ ብሄረሰቡ ቺፅጝፂዉ ሴላምስታ ዴክት ሜምሪዉ አላፊ አቶ ጌታቸዉ ቢሻዉ ጌሌፁነዉስታጊ ብሄረሰቡ ቺፅጝፂዳ ፌፄምስታንኩ ዎንጄልካዋ ካላካልጚስ ሚንች እንፅኺ እንፃኽስስታማጊያኽ:: እጋፊ ዳድስ ዶንጌትካማ ካዌና ቱጝስ እምፕልታቕዳ ዎንጄሎ ፌፄማንኩሳኪላ አምናናኩሳኪ ኩስጝፅጝስስታ ዙራንታ ፄዉጝስ ጉጁንኩሳ ዴሜካ እጉ ቺፍጝጚ ስራዳ እሽፅካማጊ አኽⶓ እርዳትፅካ::  ወረድካ ክቻዳ  ካስጙኽ ቲቪቪርጚስኪላ ዎንጀሎ ካላካልጚዉ እንፅኺ ይስጛማ ካስጛማጊ አኽⶓ ጉሽካ::እምፕልታቕ ዴሜካ ዎንጀሎ ካላካልጚዳ ይጋሪስ እንፃኽስትጝስታ ዎንጀሌንካዋ ፌይፃማ እግስ እይጝዳ ቴቬቬርጝጝ ፋይፃዉ አኽⶓ እንፅኼንቶ ፌያፌይፅካ::