እምፕልቶ ካንትፅኹ

ኽሳንቲ ይቶፒያው እዳሲ ዴዴኩ ግብሪስ ሜጋቢት 24/2003 ም/አ ስሩ ካርጝ ቤዴራሱ ተክላይ ሚንስትር መለስ ዜናዊስ እንኩርስቱስ እሺኹሳ ውላጊ ይቶፒያውያንካውሳ ዴስቴ ጌሌፅጝስ ካልካ እንፃና::

ሊሊትጙንኩ ምክንያትካስ አሳቡ ሊሊት ዝኩኒውላ ዴዴኩ ግብሪዳ ኩፅኒ እምፕላ አኽⶓ ካንትንኹ ጊዝ እሺⶓኪላ እንግራ ዙርጝ ናማ ታክስኹስ ጊሪምፂስታ ፍንሾስኪላ እምፕልትኑኒዴስ ዋሺኔኪ አጌራውሳ ልማቶ ዳሬ ታምፅጝስ ታንባው እላቲንኻ አኽⶓ ካንትፃ ያኻ::

ይቶፒያውሳ ልግሶ ፋያቲንኩ ባርኾቼው አጌርካ ኩፅኒ ዴዴኩ ግብሪ ፅንጋኽታታ ጉሼ ጌጌውጝዴስ ጄሜራማ ሊሊትጙንኩ ምክንያትካዋ ዲግስጝስ ሚንቾ ፅሬቶ ፄዋሺንኩ ያኹኒውላ ይቶፒያውያንካው እምፕልትኹ ኒንዲፊስ ናካ አሊዲዳ ታምጝስ ካላ::

እን ኽሳንቲ ይቶፒያው እዳሲ ዴዴኩ ግብሪስ ይቶፒያውያንካ ዜሮ፣ ኮንኬ፣ እምኔቶ፣ ፖለቲካዋ፣ ይኮኖሚውሳ ሚፄ፣ አቕቶ፣ እንፅኺውሳ አላፍቶ፣ ድሚውስታ ፆቲው ሊሊት ጌጌዋውላ እምፕል አላሚስ እምፕልትስ ሴሌፍስትጝስ አሌሙ ታሪክዳ ኬፍናማ ፃፊስታው ታሪኩሳ አሻሬ እንኩርንኹ ፕሮጀክት አኽጝስ ካሉኺያኽ::

ኽሳንቲ እዳሲው ዴዴክ ውትኽትኼ ዲፕሎማሲውሳ ፍታንካዋ ብላፅትስስታ እምፕልትስ ፌያማ አሌድጝስ ይቶፒያኪላ ኽሳንቴ ድሎ ሜዜጌብፅጝስ ካሌታ ፄዋ:: አባዊዴስ ቹቕታ አኹዋዋ ኔክፅጝስ ካላላኪ ናው ስራ ጋው እንግርግሪ ሜና አኽⶓ ይቶፒያውያንካ ጛው አክምስ ግቢቴካማ ካንትፁኑ አኽጝስ ካሉኽ ፕሮጀክት ኪላኽ:: አባዊውሳ ብኖ ቴኬምስትጝ ግብፆ ቤዴልጝያኽ እንኪ አሬቡሳ ማቬርአቖ ንኹርጚያኽ ናው ፊሪስፂ ታክስጚ ኬውጝጝስ ካሊፅኹ ፕሮጀክት አኽⶓኪላ ካንትፅጝስ ካሊና::

ይቶፒያ አፍሪካውያንካው ኔፃኔቱ ቡንካዳ እሺኹሳ ኽሳንትቶ ይኮኖሚው ዜርፍስኪላ ካቬትያኽ ናው ስጋት ቱስታውሳ ካይክማውሳ ቤፍትኹሳ ታክስጜ ድላ ፄውንኹ አኽⶓኪላ ምሁራንካ ጌሌፅካ:: ግብፅ ኪፊስቴውዴስ ይቶፒያ ምርክቲስ ናው አሌም አቩቑ እምፕልታቑ ቱስታያሱ ቻኒስትዴሰ ይቶፒያ ጚጛራሱ አክምስ ዴዴኮ ግቢቴታ ታሪኮ እንፃኽስቴ፡

ኽሳንቲ እዳሲው ዴዴክ ይቶፒያውያንካው ይጋሪው እቑፂ፣ ይጋሪው ዊፃንቱ ምልኻት፣ ጄሜሩኑሳ ፂፄ ዱሚዳ ታምፅⶓ ካንትፁኒ እምፕልቱስታ ቲቪቪርጚው ዋይሚኪላኽ:: ይቶፒያውያንካ ኽሳንቲ እዳሲ ዴዴክ ሉዋላውትዳ ይንቱኽሳ ታጌሳቲንኩ ኔፃንቱ ምልኻትካ አኽⶓ አሌምስ ካቦ ካንትፁኑውስታ ክንትፁኑ ኽሳንቲ ፕሮጀክትኪላኽ:: እዳሲ ዴዴኩ ግብሪዳ ካንትፅንኹሳ እምፕልቶስታ ቲቪቪርጜኪላ አጌራውሳ ሰላሞ ዙርፅጝዳ ካቪጝስ አጌራ ቤዴራ እሺቲኹ ሰላምሾ ቲንታታ ፄውጝ ቱስቴ::