አሱሪቴ

ንግስቴ ተስፋ

አቑ ፍትሬት ምስሊ ያኹኒኪላ ካሌቕትስ፣ ቴግባርስ፣ ዝኩዊኒስ ዙራሙሪስስታ ማቤር አቑ ዝኪዊኒው ዴስስ ሊሊትጛና:: ዋሺኒኪ እዝብ ጚው ያኹኽ አቭርታ እጂኹ ዴኔክፃው፣ እምፕላኒ እምፕላኒ ውኒያኽ እስታማ አምንስትኹ ባይልስታ ዝኩዊኒው ሴል ዝኩኽያኽ ናኒስ ባይሉ ዜረፍዳ ፅናቶ ፂኒሳንኩ ምሁራንካ አስሜምጛና::

ባይሉ እምፕል እዝብ እሊው እዝብዴስ ሊሊታ ያኻማ አቕስታው ባይላዊ አብቶ እሚኹ አሳብ ያኹስ ትክላሊስ ዝኩዊኒውሳ ሴሎ፣ ቱፊቶሰታ እምኔቶጊ እሚኹያኽ:: እን አጌራ ይቶፒያኪላ አሌምዴስ ሊሊታ አኽጝስ አቕስቴው 13 አርፍካዌና፤ አይር እግልታስኪ ያኻ ዝኩዊኒስ አሚቼት አጌራ ታኹስ 13 አርፍካኻዳጊ ኪቢርፄው ባልስታ ባይል ዝኩትያኽ::

አቫላምቲዳ ኪቢርፄው ባልስታ ባይል አግስታው አሜቱ አቫላምቲ አርፊኪላ ሜስኬሩምያኽ:: እን አጌራው ቢዲሪ አርፊ ሜስኬሩምኪላ ሊሊትጙንኩ እቑፅካዋ ፃያ:: እንኩታታሽ፣ ዝቤኑ ኪስፂ፣ አሱሪቴ፣ ኮግሚስታ ክዱስ ዮሀንስ እስታማ እቑስቴ:: እስካዊ አሜት ሊሊቲ ስምስ እቑስትጝ ታሪካዊ ጉሽፂኪላ ሊሊትጙንኩ ኽይካዋ እሚኹያኽ::

ሜስኬሩም እምፕል አጌር ሚንችካ ይቶፒያንካውላዳ “እንኩታታሽ” እስትጝስ እቑስቱስ “እንኩታታሽ” ናው ካልኪላ “እንካንስታውሳ አቪቬ ታጉኻ” ናውሳ ኽዮ ፃያ:: ሜስኬሩም አርፊዳ አቪቪ አቬቭⶓ ካንትፄ::

ኮግሚ ናው ካል ግሪኩ ኮንኪስ “ድምክኒ” ናውሳ ኽዮ እሚ:: እምፕል አሜቱ 365 ጌርክካዋ 30 ጌርክካስ ቤንጝፅናኒ 12 አርፍካዴስ ፊታ ያኹንኩ እምፕልዳ ዴሜክስታኒ 13ንቲ /ድምክኒ/ አርፊታ ቼፍስቴ:: እኒጛ ፊትካ ጌርክካኪላ ኮግሚ እስትጝስ እቑስታና::  አዊ ብሄረሰቡ ቺፅጝፂዳኪላ ሚንቾ ጊዞ እስካዊ አሜት ኮግሚ እስታማ እቑስቱስ እንኮኽስቴ:: እንዴስ ድምክና ኮግሚ ዝቤኑ ኪስፂ “እንኩታታሽ” እስታማ እቑስታው ምክንያቲ “ኖሁ ዝቤንሊ እምትጙኽ” አኽጝኪላ አምንስቴ:: ኖህ ኽታዊኒ ዝቤንዳ ጚኩ ጄርካስ አጉርካዋ አፂስ ቤንጝፁስ “ካም” እስታው ጄር አፍሪካት አጉራሾ አንትጝስ ፉሩኽ ይቶፒያዳ እሺኾ:: እንጚ ወክትዳኪላ ይቶፒያዋ አቪቪስ ግዲቴታ አግፃ:: አርፊኪላ ሜስኬሩም እሺኾ:: ዴስቲስ “ክብራ አፃ ታምቤይትኾ” ኑስ ሜስኬሩሙሳ አርፌ “እንኩታታሽ ናማ እቑዊኹ አኽጝ ድኹስቴ::

ባልሰታ ባይል ሚንቾ ጊዞ ወሬስጛኑ ታሪክ ዝኩክ አኽጝታጊ አዊ ብሄረሰቡ ቺፅጝፂዳ ኮግሚውሳ አንትⶓ ሲፋማ እምፕልታቑላዳ ሊሊትጙንኩ ባይላዊስታ አይማኖታዊ ኩምችኒ ቴርቴ:: ክዱስ ዩሀንሱ /ኮግሚው ወክትስ አኮሜችስታንኩ አኼንካዴስ እምፕል አሱሪቴው እንክሪስታ  ኬቤርፅጙ ቴርትያኽ::

ቻግኒ ኬቴሙ ስታ ዚጋሚ ወረዳው ዝኩዋንታሊ አሱሪቴውሳ ባሎ ካንትኹስኪላ ስልኪስ እጂጜ ፄውና::

ሌጌሳታምባ ሰላም ጌታሰው አራሹ ሴጛ ባይል ኬቹ አባላኽ:: አሱሪቴ እስካዌ አሜቶስታ ውሊጄ አሜቶ ኪስጝፃው ዳምብ አኽጝስ ታምብምባ እንጉስ ማንዳንኩ አኽⶓ ድኹታ:: “አሱሪቴ” ናውሳ ካሎ ኽሳንትካ አቕ ኽይትጝፃኒስ “አሲ- ሪቴ” ናው ላጛ ካልዴስ ፌቴርስትኹ ያኹስ ኽይኪላ “ውሊጂ አሜቱ አስሪ፣ ችጋር፣ ድኽት ጊዊኪ ፊስ፤ እስካዊ አሜትዳ እሬዛ ትይስ፣ ሰላም ያኼስ፣ ቲኑስታ አብቱ ዝቤን ያኼስ ንጝያኽ” ንካማ ቹዋ ታብል እርዳትፃና ኔ::

እንዴስ ድምክና ችኾ ዋኾ አሬሳቻንትካ እንፃኽስታኒስ ችኽካማ ፉሬ አግፃኑ ዜሩኒዴስ ምሜ ኬሜሳኑ፣ ክንታንትካ ፉሪዳ እጂካማ ክንቲስ ዙራኑ፣ ዋኻሺኹ ብን ዳንጉዋኒ፣ እሪ ኬሌልናኒ ዛኽ ዝሜድ ካሲትጛኑ ወክት አኽጝታጊ ሌጌሳታምብካስ ሊሊቲ እንኩዋኽስት ዝኩኽ አኽⶓ ሰላማዊት እንክርፄ:: ሰላም ዙሚኹስታጊ አሱሪቴው ወክትዳ ሌጌሳታምብካ ሴይካ ግዲትካማ፣ ሳዱሌ፣ /ጋሜ/ ፣ ኩንቾ፣ ምሽታር ዴሜካ ተራሬ ልንፅስትካ ፋሽስትካማ እስካዌ አሜቶ ቻቤላኑ፣ እንግቺስ፣ ግርምቲ፣ ሲዊስታ አዲሊ አቤባሳ ግዲትካማ፣ ጎነጉኑኑሳ እንግቼ ጝን ጝናዳ እንፄዋኑ ጊዝ አኽⶓ ድኹታ:: እንጚ ጉዝማይኪላ ዋሺኒኪ አቒስ እስካዊ አሜት ቲኑ፣ ሰላሙሰታ ልግስኒው ያኻያታ ሙሬ ዙሬካማጊ አሱሪቴ ንጝስ እንጎ ጌሌፃኑ፣ ዳቔርስታኑ ዴስቲስስታ ምቲስ ፌይፃኑ ወክት አኽⶓ ዲብስታ::

ሌጌሳታምባ ሰላም ዲብስትኹስታጊ አሱሪቴ ኬቤርስታው ኮግሚ 1 ጄሜራማ ያኹኒውላ እስካዌ አሜቶ ቻቤልናው ዋዚሚታዋ ኩፅኒ ሊሊቲስ ኬቤርስቴ:: ሌጌሳታምብካ ኩችናና ሙሬ ዙርናናጊ

“አሱሪቴ ናካማ፣

አሱሪት ላምባ፣

ዋሼ ዋሽናው ናካማ፣

አሱሪት ላምባ::

ሹምቤ አሙምናው ናካማ

አሱሪት ላምባ”

ንጝስ “ካንኹ ጝንዳጊ ሙሲስኒዳ እንግቼ ኮፄርኔ፣ አሱሪቴ እናና ካንኹ ጝንዴስ ዴሜካ ጉዝጉዞ፣ አዋዚስ አንኬ፣ ሹምቤ ምሜ፣ እኻኼ እንቲታኪ አሜትባልስ ቴርትኹሳጊ ዴስቲስ ሙሪኩ አቕ እያኒ እምፕሎ ጝኖ ጎሌልናና እንክርኑስ ችኔ” ኒስ ዙሜ:: ቻኻ ኮይቴውላስ ዴሜካ አካላቶ ቑሲጛ ኩችናና ብንሾ ካስጝስ አካላቶ ቑስናና ምንክቲስ ዙርኔ:: አኽጝሰኪ አሱሪቴ ሌጌሳታምብካው ኔፃኔቱ አብርቱስታ እንካንጚው ባሊያኽ” ኒስ ዲብስታ::

አቶ ዳምተው እንየውኪላ ዚጋሚ ወረዳ አኺቲ ኬቤሊው ዝኩዋንቲያኽ:: ጛኪላ አሱሪቴዋ ታክሳኒስ ዴርጉ ዝቤንዳ ሌጌሳታምቢ ያኼካማ ምሽታር ጛው ኬችስ ኹን ጛው ኬችስ ቤንጜካማ ዋዚሚስ ጄሜርካማ እንግቼ፣ ግራምቴ፣ አዲሊ አቬቪሳስታ ሲዌ ቴርስካማ እሰካዊ አሜቱ ዋዚሚታዋ ክማኒ ጄሜርካማ ኻሮ ዋኾ፦

እንግቻዬ

እንግች እንግች

ናው ዜሚስ ጝን ጝናዳ እንግቼ ኮፄርካማጊ ጝን ዌንካ ዴሜካ እስካዊ አሜትስ እስታማ ቴርትኹዴስጊ እይጝስ ባሎ ኬቤርፅናታ ፄዋሺንኩ አኽⶓ እንክርፄካ:: “ናካኪላ ያኹኒ ዝቤናውት ቻኒስታማጊ ያኹኪላ ባይል ፌያፌያማጊ ኬቤርስቴ” ንካ:: አኽጝስኪ እኖጂ ቹዋ ታብል ፌይፅንኹሳ ክርፄ ባይሎ ጄርጄርካስ ክንትፅጙ ግዴቲ ዝኩንኻ አኽጝስ አሱሪቴው ክርፂ ባይል ኬፍናማ ኬቤርስታታ ሌጌሳታምብካስ ፋይፃውሳ ዲቦጊ ዋኽትጝፅጝስ፣ ኔፃኔቶ እይጝስ እንግቻዬ ንካማ ይንታኒ ዴሜካ ዴስቲስ ቻቤላማ ጝን አፌሩኽሳ እይጝ ማንዲስታው አኽⶓ ዲብስካ::

አሱሪቴው ባል አዊው እዝብ ሊሊትስ ኬቤርፃኩ ባልካዴስ አቫላምቲ አኽጝታጊ አሱሪቴ ዋኒ፣ ዋትጛ፣ ዋዳ እይስስታ ባይሉ ትክም እንዳማይጚ ናውሳ ፅናቶ ዲግስጝስ ባይል ኬፍ ናታ እንፃኽስስታማጊ አኽⶓ እንጃቢሪ ዩኒቨርሲቲ አገው ፅናት ኢንስቲትዩቱ ዳይሬክተር እርዳታንቲ ፕሮፌሰር ብርሃኑ አየዬ ጌሌፅካ::

እምፕል እዝቡ ልግስኒው ታሪኩ ጉሽካዴስ ባይልስታ ባል አቫላምቲዳ እንኩርስታንኩያኽ ናንኩ እርዳታንቲ ፕሮፌሰር ብርሃኑ እንጃቢሪ ዩኒቨርስቲ  “አሱሪቴው ባይል ሌጌሳታምብካው እንክሪ አዊው እዝቡ ባይላዊ ስልታኒው እንዝጚዳ ዝኩኽሳ ልቕልቕቴ ካንትፃዊያኽ” ንካ::

አዊው እዝብ ጚስ ጜዋ እስካዌ አሜቶ ቻቤሉስ ፌይኹ አሜትዳ እሺኹ ዋሺኒኪ ችግር ኽይስታማ እስካዊ አሜት እንካንጚው፣ ሰላሙ፣ እርኩ፣ ልግስኒውስታ ቲኑ ያኻያታ እንጎ ጌሌፃንኩ ዳድካዴስ አባላምቲዳ እንኩርስታው አሱሪቴው ባል አኽⶓ  እርዳታንቲ ፕሮፌሰር ብርሃኑ ኽይትጝፄካ:: እንጚ ባይልኪላ ቱስቲስ ታሪካዌ እሜ ባይፃውላ ኬቤርስታታ እምፕልታቑ አግልግሎቲው ዜርፍዳ ምርምሪስ እንጃቢሪ ዩኒቨርስቲ ትኩትስ እንፃኽስታማጊ አኽⶓ ቶኬምካ::

ባይል ፅናትስ ዴጌፍስቱኒዴስ እንቲታኪ ትኩታኩ ቤንካ አላፍቶ ፊትጙኒዴስ አሌምስ አቕትጛማ እምፕልታቑ ልግስኒው ዳዳ አኽጝስ ካላው እድል ኬፍቲኒ አኽጝታጊ 2017 ም/አሜታዳ ሊሊቲስ ኬቤርስታማጊ አኽⶓ እርዳታንቲ ፕሮፎሰር ብርሃኑ እርዳትፅካ::