ዝኩዋኽናንቴ ፋያው

ታደለ አጋጄ

ፌዩንኩ ላጛ አሜትካዳ አማኻሪ ክልልዳ ኬሴትስትኹ ጋቻው ምክንያቲስ ሚንችካ እምፕልታቕዳ ዙሚስታማ ድኻቲው ችግር ታምባ:: ሚንችካ አቑ ይዎት ድሳ:: አብትስታ ንብሬት ዎዴማ፣ ሚንችካ ጛርት አቕ ዴሜካ ዝኩፂ ጝንዴስ ፌኔኬልጜካማ ባስኹ ችግራኻዳ እጂካ:: አዊ ብሄረሰቡ ቺፅጝፂ አዮ ጉዋጉሲ፣ ዚጋሚስታ ጃዊ ወረዳዴስ ሚንችካ እምፕልታቕ ፌኔኬልጜካማ እጂጝ ታክስስታዊያኽ:: ብሄሮ ስራ ፄውኽ ጋቻው ምክንያቲስ እምፕልትስ እሺንኩሳ እምፕልታቖ ቤንጝፃማ እጄ:: ፖለቲካው ፊቲስስታ ፅንፌንካ አይልካ ፌቴሩኑ ችግርስ ሚንችካ ጉዲስትካማ እጂካ::  ጛው ዝኩፂ ጝንዴስ ፌኔኬልጜካማ እሊው ዙራሙሪዳ ካስጝስ  ዝኩዊኔ ፄዋሺንኩ ፌኔኬልጛንትካ ናካዳ ዙርካማ ጛው ዙራሙሪዳ ዝኩዊኔ ፄዌካማጊ አግስታና:: ብሄረሰቡ ቺፅጝፂ ዚጋሚ ወረዳዴስ ፌኔኬልጛሺንኩ ጛርት አቕ ስልኪስ ታምፁኑ ካንቲስ እሺኑ ዙራሙሪሾ ዙርካማ ግብርኒው እንፅኺዳ አሴሜርጙኒውላ ምግቡ እርዳቲ ቲሪጝስ ምርኪስ ጉዲስትካማጊ አኽⶓ ዙሜካ::

ሁሴን ኑርዬ ዚጋሚ ወዳ አኺቲ ኬቤሊዴስ ፌኔኬልጜካማ ምራብ ጐጃም ዞን ሽንዲ ኬቴምዳ እጄካ:: ላጛ አሜታስ ባይፅካማ እጂኑ ባድሚዳ ዙርካማ ዝኩዊኔ ፄዌካ:: ሁሴን ኑርዬ ዙሙኑውስታ ኬቤሊዳ ፌቴርስትኹ ጋቻስ ሚንችካ እምፕልታቑ አብትስታ ንብሬት ዜሬፍስታ:: ሚንችካ አቑ ይዎት ድስⶓስታ ዝኩፂ ጝን ሌግስ ድጙስትⶓ ቶኬምካ:: ናካዳ ኩፅኒ ጉድ ሰላሙ አኺኒ ፌቴርስታኒ እሺኑ ዙራሙሪዴስ ዙርካማ ግብርኒው እንፅኺዳ አሴሜርጜካማ እንፃኽስታንኩ አኽⶓ ዲብስካ:: ዝኩፂ ጝን ፌሬስጙ ምክንያቲስ ሚንችካ ጝኖ ክራይትካማስታ ሸራዋ ቤቴርካማ ዝኩንኩ አኽⶓ ጉሽካ:: እሌትስ ኬሌብስታኑ ምግብ እላቲው አኽጝስ ምንድራሺ ሚቓያው ቑንዚስ ፂኪስትካማጊ አኽⶓ ዙሜካ:: ዙራሙሪዳ ሰላሞ ኬቤርፃንኩ አይልካ ዝኩⶓ ቶኬሙንኩ ሁሴን ፌይካ ፌይካማ ችግሮ ፌቴራንኩ ዶንጌቱንኩ አይልካ እምፕልታቖ አጌትጝስ ጌንዜቦ ኬይፃንኩ አኽⶓ ዲብስካ:: ምንግስት ዎክትስ ግባቶ ፌኔኬልጛንትካስ ኔፃስ እይጝስ ግብርኒውሳ እንፅኼ አኮሜቻንታ ፄዋማጊ አኽⶓ ጉሽካ::

ሁሴን ኑሮዬ ምንግስት እይኹሳ ግባቶ ቴኬምስትጝስ ሊሊትጙንኩሳ ሴብልካዋ ሊሚፅካማጊ አኽⶓ ድኹዌካ:: ዜሩኑ ሴብል ታምብምባኺስታ ፌኔኬልጛሺንኩ ጛርት አቕስ ምንግስት እርዳቴ ፄዋያታ     ካሲካ:: እንዴስ ቤዴራ ምንግስት እያሺኹ እርዳቲ ቲሪⶓ ጉሹንኩ ሁሴን እሌትስ ሴያኑሳ ስዮስታ እሊኩሳ እርዳትካዋ ፄዋያንታ ጉሽካ::

እሊው አኺቲ ኬቤሊዴስ ፌኔኬልጜካማ እሺንኩ አቶ ስሜነህ እሺኑ ዙራሙሪሾ ዙርካማ ግብርኒውሳ እንፅኼ እንፃኽስትካማጊ አኽⶓ ጉሽካ:: ምንግስት ግባቶ ኔፃስ ታምፃኻኽ ናውጃማ ዎክትስ ግባት ታምባያሱ አኽⶓ ዙሜካ::

አቶ ስሜነህ ዙሙኑውስታጊ እሺኑ ዙራሙሪ ሌግስ ድጙስታማ ናካዳ ክራይቴካማ ዝኩዋንኩ አኽⶓ እንክርፄካ:: ናካዳ ጉድ ሰላሙ አኺኒ ዝኩጝስ ግብርኒው እንፅኺዳ አሴሜርጜካማ እንፃኽስትካማጊ አኽⶓ ዲብስካ:: ሚንችካ ጛርት አቕ ጝኖ ክራይቴካማስታ ሸራዋ ቤቴርካማ ዝኩዋንኩ አኽⶓ ዙሙንኩ ስሜነህ ጝኖ ግቢቴካማ ዝኩጝስ ዴሜካ አክም እላቲኩ አኽⶓ ቶኬምካ:: ምንግስት ልቓ እርዳቴ ፄውኒውላ ጝኖ ግቢትጝስ ካሊፃቲው አኽⶓ ጉሽካ:: ሰላሞ ማንዲፃንኩ አይልካ ዝኩጝስ ጉድ ሰላሙ አኺኒ ዝኩⶓ ቶኬሙንኩ አቶ ስሜነህ ፌኔኬልጛሺንኩ እምፕልታቕ ዋኽስ ዋኾ ቲሪትጚኒምባኺስታ እርዳቴ ሲፍፃታ ካሲካ::

ዚጋሚ ወረዳው ፌኔኬልጛንትካ ዙርፃንቲ ኮሚቴ አቶ አንዳርጌ ፈተነ ኑኑውስታጊ ወረዳዳ ሊሊትጙንኩ ኬቤልካዴስ ጋቻው ምክንያቲስ ፌኔኬልጛሺንኩ እምፕልታቕ እሺኑ ሙሪሾ ዙርካ::

ሊሊትጙንኩ እርዳትካ ፄውስትካማ ጝኖ ግቢቴካማ ዝኩዋና:: ምንድራሺው ሚቓያ ማልጛ ቼጌርፅⶓ ዲብስካ:: ሊሊትጙንኩ ኾትካስ ምድራሺውሳ ቑንዜ ካላካልጛኑ እጁ እይስታማጊ አኽⶓ ዙሜካ:: ቑንዳስቱንኩ ጛርት አቕ ኔፃስ አኬምስትካማጊ አኽⶓ ጉሽካ::

ፌይኹዳ ግባቶ ጉሺስ ካፅካማ ዙርፅካያስኩ ዙርፁኒዴስ ፋሌንጋ እይስታው አኽⶓ ዲብስካ::

ፌኔኬልጛሺንኩ ዎጌንካስ ምንግስት ፋይስታውሳ እርዳቴ እያታ ካሲካ:: ልቓ ጌርክካስ ቼጌርስታኩ  አኽጝስ እርዳቲ እይስታታ እዝብዴስ እርዳቴ ፍሽጝፅጝስ እርዳቴ ፄዌካማጊ አግስታንኩ አኽⶓ ዲብስካ::

እምፕልታቕ ብሄሩ ጋቻዴስ ፌካማ እምፕልትስ እንፃኽስቴካማጊ አኽⶓ  ዶንጌቱንኩ አይልካ አምቢሊስታ ሶሪቱ ዙራሙሪዳ ኬምፕስ ይንቴካማ እምፕልታቖ አጌትጝስስታ እሊኩሳ ችግርካዋ ፌቴርካማጊ ቼጌርፅⶓ ቶኬምካ::

ፄትቲው ሜዋክሩ ችግር ዝኩክ ዙራሙርካዳ አሴሜርጛማ ሰላሞ ማንዲፅካማጊ አኽⶓ ቶኬምካ:: እምፕልታቕኪላ ፄትቲው ሜዋክርሊ እምፕልትስ እንፃኽስትጝ ቱስታው አኽⶓ ጉሽካ::

አዊ ብሄረሰቡ ቺፅጝፂው አዲጌ ካላካልጚውስታ ምግቡ ዋስትኒ ሜምሪው አላፋ ዊዛሩ ሰርካለም አያሌው ዚጋሚ ወረዳው ፌኔኬልጛንትካዋ አባላምቴ ይካቲት አርፊዳ ጄሜርካማ እምፕልዳ ሸራዋ ቤቴርካማ ዝኩዋንታ ፄውጝስ ሚፅፅⶓ ቶኬምካ:: ችኽ ሚቻውላስ ዴሜካ ጛውሳ ጝኖ ፄጌንካማ አክም ዝኩክ ዴሜካ ግቢቴካማ ጛው ጝንሾ ቱዌካማጊ አኽⶓ ዲብስካ:: ሌግስ ድጙስትኹ ጝን ዋኽስ ዋኾ ግቢትስታማ አሌድስታውላስ ይጉኒውላ እምፕልታቕዴስ ኩፑኽ ጌንዜብስ ኮርኮሩ ጄውስታማ ጝኖ ግቢቴካማስታ ፄጌንካማ ቱዌካማጊያኽ ንካ::

ክልሉ አዲጌ ካላካልጚውስታ ምግቡ ዋስትኒ እይኹ 928 ኩንታል አሬ እርዳትጝስ ፌኔኬልጛንትካስ ታምባንታ ፄውስትⶓ ቶኬምካ::

ብሄረሰቡ ቺፅጝፂዳ አግስታንኩ ውላ ወረድካ ሊሊትጙንኩ ዲብካስ እርዳቴ ፄዌካማጊ አኽⶓ ጌሌፅካ::

ፌይኹ ይካቲት አርፊዳ እርዳቲ ፄውስቱኒዴስ ፋሌንጋ ፌኔኬልጛንትካስ ታምባውላስ እጂⶓ ቶኬምካ:: ናካዳ ኩፅኒ ውላ ወረድካዳ ዝኩንኩ ፌኔኬልጛንትካስ ምግቡ እርዳቲ ፌኬድስታማ ወረድካሾ እንዜጝትጝፄካማጊ አኽⶓ ጌሌፅካ:: ሲፍጝጚስ እርዳቲ ታምባቲው ክልሉ ሰላሙ ችግርስስታ ሚንችካ ፌኔኬልጛንትካ ዝኩኑ አኽⶓ ቶኬምካ:: ምግቡሳ እርዳቴ ፌኔኬልጛንትካውላ ታምፅጝስ ግቢትስትጝዳ ዝኩኽ ዳድ ችቒታማ ቼጌርፅⶓ ጉሽካ:: ዲጊ ጊዝስ ውላ ፌኔኬልጛንትካስ ምግቡ እርዳቲ ታምባው አኽⶓ እርዳትፅካ::