አሚኮስታ ስፖርት

ታደለ አጋጄ

አሚኮ እንፃኽስታው ስፖርቱ ዜጌቢስ ብሄረሰቡ ቺፅጝፂው ስፖርት ልማቱ ዜርፍ ኬፍናታ ፄውጝስ ኬፍቲኔ ታምቦ ፊትጛማጊ አኽⶓ ብሄረሰቡ ቺፅጝፂው ስፖርቱስታ ዎታትካው ሜምሪ አቕፅኾ።

አዊ ብሄረሰቡ ቺፅጝፂው ስፖርቱስታ ዎታትካው ሜምሪው አላፊ ካልአብ ካህሊ አሚኮ አውጚስስታ አማኻሪጚስ እንፃኽስታው ስፖርቱ ዜጌቢስ ስፖርት ልማቱ ዜርፍ ኬፍናታ ፄውጝስ ኬፍቲኔ ታምቦ ፊትጛማጊ አኽⶓ ጌሌፅካ። ስፖርቱ ዜርፍ ሚንችካ ዎታትካዋስታ እምፕልታቕኩሳ ቤንካዋ አሴቴፍጝፃው ዜርፍ አኽⶓ ቶኬሙንኩ ሜምሪው አላፊ እን ዜርፍ ኬፍናታ ፄውጝስ አሚኮ ስልኪስስታ አካልስ ሊሊትጙኽ ሚዲያስ ዜጌብሰታታ ፄውጝስ ስፖርቱ ዜርፍ ኽስኹስ ጁትጛታ ፄውⶓ እርዳትፅካ።

ቤዴራ ኬቴምካዳ ይቪቺ ዜጌቢው ሽፋን እይስታሺኹ አኽⶓ ጉሹንኩ አቶ ካልአብ ስማርት ስልኪስ ኬቤሌኺስታ እንፃኽስታንኩ ስፖርቱ ልቕልቕቲ ዜጌብስታማጊ እምፕልታቕ አሴቴፍጛንታስታ ቴኬምስታንታ ያኻንታ ፄዋማጊ አኽⶓ ጌሌፅካ። አሚኮ ማይቤራዊ ሚዲያስስታ ሜኒስትሪም ሚዲያስ ብሄረሰቡ ቺፅጝፂው ስፖርቱሳ ልቕልቕቴ ውላ ዙራሙርካስ ኽስኹስ ዜጌቢስ ታምብስታንታ ያኻታ እንፃኽስትጝ ቱስታው አኽⶓ ጉሽካ። ብሄረሰቡ ቺፅጝፂታ እንፃኽስትጝ ቱስታኩ ሚንችካ ስፖርትኩ ጉዳይካ ዝኩⶓ ቶኬሙንኩ አቶ ካልአብ ይንታውስ እንፃኽስትጝስ አኬድስቱንኩ ጉዳይካዳ አሚኮሊ እምፕልትስ እንፃኽስትጝስ ቴቬቬርጛንኩ አኽⶓ እርዳትፅካ።

አሚኮ እንፃኽስስታው ዜጌቢስ ሚንችካ ዎታትካ ስፖርቱ ዜርፍዳ ኽስኹስ አሴቴፍጛንታስታ ቴኬምስታንታ ያኻንታ ይስጝፃማ እንፃኽስትጝ ቱስታዉ አኽⶓ ጉሽካ።ስፖርትኩ ኾትካ ማይቤራዊ ሚዲያውሳ ፍኖ ብስጝስ እንፃኽስታንኩ ስፖርትኩ ልቕልቕትካዋ ሚዲያስ ሽፋኖ አግፃንታስታ ዜጌብስታንታ ንቫሮ እይጝስ እንፃኽስታንኩ አኽⶓ ጌሌፅካ።

ስፖርት አካልስስታ አንኩሊስ ዳሉኽሳ እምፕልታቖ ፌቴርጝስ ኽሳንቲ ዜርፍ አኽⶓ ዙሙንኩ ስፖርቱስታ ዎታትካው ሜምሪው አላፊ ሰላሙ ችግር ውላ ዙራሙርካዳ ስፖርቱሳ ልቕልቕቴ ጄሜርፅጝስ ዳንጉንካ ዝኩⶓቶኬምካ፡፡ ልኩ ኩታ ውታኺ ዝቤናዊ ዳድስ ግቢትስታታ፣ ስፖርቱ ስታዲየም ሊሊትጙንኩ ዙራሙራካዳ እንፃኸስታታ፣ ስፖርቱ ውታኺ እጋዊ ያኻታስታ ጜዋንቱ ካርቲ ዝኩዋታ ፄውጝስ አሚኮ ትኩትስ እንፃኽስትጝ ቱስታው አኽⶓ ጉሽካ።