አለሚቱ የኔት
ጃቢዳ አኹኪ ኮርኮር አምፓዳ ትክልቴስታ ሩዝ አሜሬትስታኩ እንፅካ ቶኪዬዳ አግስታንኩ አኽጝ ጌሌፅስታ::
ዙራሙሪ ቺፋ እንዳራይ ዋግፅኔ ናው ኮው ካንቲስ ፁሞ ቻንኩስስታ አቒያሳ ግድማ ካንትካማጊ ታዜባንኩ ናኼስካ ብትካ ዝኩⶓ ውላጊ አቕናው ጉዳያኽ:: ምክንያቲኪላ ልቓ ብቲ ዋግፃቲውሳ ፄጌራማ ካንትጝስ ታክስጚው እንፂጝዴስ ጁኽስ:: አሌምዳ አግስታንኩ ሴሌቴኑንኩስታ ዝቤናውካ ኬቴምካዴስ እምፕላ ታኹት ቶኪዩ ኬቴማዳ ኩፅኒ ቤልጉስታ ችኹ እርሺው ወክትዳ እንፂው ጃቢዳ ሩዙሳ ማሴ ካንትጝ ዴስስትኹ ዲብያኽ::
እንኪላ ኬቴማስ ሌንጌድካ ያኹንኩ አቕ ጌሬምፃው ዲብ ያኹኒኪላ፣ ዝኩዋንትካስ ኩፅኒ እስካዊ ዲብ ጋቲዊያኽ:: ቶኪዬዋ ዴሜካማ ሊሊትጙንኩ ጃፓኑ ኬቴምካዳ አግስታንኩ እምፕልካ እምፕልካ እንፅካዳ ግብርኒውሳ እንፅኼ አኮሜችጝ ዴስስትኹ ዲብያኻ::
ሊሊትኑስኪ ክንቲ ጝንካዳ፣ ካምፕካዳስታ ዝኩፅካ ጝንካው እንፅካዳ እሪውሳ አኾ ቴኬምስትጝስ ትክልትካዋ ፌይጝኑስኪ ሩዙሳ ምርትካዋ ሊሚፅጝስ ካሊስታ::
እን ፍትሬቶ ዝቤናዊ ኬቴምሾ አግጝስ ፄውስታው ግብርኒው ልቕልቕቲው አላሚ ኬቴሙሳ እርሼ እንሳንጝፅጝስ እምፕል አካልያኽ:: እንዴስ ፌይኹስኪላ አቕ ዝኩዋኑ ዙራሙሪዳ እንኩዊኔ ትክልቴ አግፃንታ ካሊፃ:: ጃፓንዳ ድምክኒስኪ ቤይጂንግስታ እምፕልካ እምፕልካ አሌሙ ኬቴምካ እንፂውሳ ጃቬ /አምፓ/ ካናኻፅካስ ሾፌንጝ እንፂውሳ ግዶ ዴሜክጝዴስ ፌይኹስ አዋውሳ እንኩዊንቶ ኔኬትጝስ ክርፂ ዋይሚ አግስታ:: እንፂውሳ ጃቤ አምሉ ትክልትካስ ሾፌንጝ ኬቴምታ ካርቦኑሳ ሜቴኖ ኔኬትጝስ ፄውስታውሳ ፅሬቶ እርዳቴ::