አባዊዳ ካንትስትኹሳ እምፕልቶ ልማትኩ እንፅኽካዳ ካቢጝ ቱስቴ

ንግስቴ ተስፋ

ይቶፒያዊያንካ ኽሳንቲ ይቶፒያው አባዊውሳ ዴዴኮ ግቢትጝስ ካንትፁኑሳ ኩርፄንቶስታ እምፕልቶ ፍንሾስ ግቢትስታንኩ ልማቱ እንፅኽካዳ ካቢጝ ቱስታው አኽⶓ እንጃቢሪ ኬቴሙ ዝኩዋንትካ ዙሙና::

እንጃቢሪ ኬቴሙ ዝኩዋንቲ አቶ ትላሁን ሞላ ዙሙኑውስታጊ ቤዴራ አባዊ ይቶፒያዊያንካስ ትክሞ እያውላ ትብ አጌራ ዙሬ እናና ታክስናሽኑኽጊ ይጉዋ:: ኹና ዱንጊዴስ፣ ጊፂኒ ጊፅሳውዴስ አሬሳቻንቲ አሜሬታውዴስ እንቲታኪ ምንግስቱ እንፃኽስታንቲ አግፃው ሚፂዴስ አክሙሳጊ ፍሽጝፃማ ቲኹዋዋ ቴግባርሾ ኪስጝስ ካሊስትኹ ዝቤንዳ አግስትናኻ አኽⶓ ዲብስካ::

እን ቲቪቪርጚስ ግቢትስትኹ ኽሳንቲ እዳሲው ዴዴክ ዎታትካ ሊሊትጙንኩ ዜርፍካዳ አሴሜርጜካማ ዋይሚስታ ያኻንታኪላ ካሊፃው ኽሳንቴ አጌራው አብት አኽⶓ ጉሽካ::

“እምፕልዳ አኽናና ላጛ ድሎ አሌምስ ሜሴኬርፅና” ንካ:: እምፕሎኪ አድዋውሳ ድሎ ቹዋ ታብል አሬኬብፅካ:: ላጛንቴኪ ካሊስታላኽ እስትኹሳ ካሊናና አባዌ ዴዴክና፣ ይንታውስኪላ ይቶፒያስስታ ይቶፒያዊያንካስ እንፃኽስትጝ ማንዲስታው አኽⶓ አቶ ጥላሁን ዙሜካ::

ዊዛሩ ሰዋሰው ወርክ ታዬ ጛሾስ አክምታጊ ዝኩኽሳ ፍሽጝፅናና ዴዴክንኹ ኽሳንቲ ይቶፒያው እዳሲው ዴዴክ እኖጂሱ ድሚዳ ጄሜርስታማ እንይሪስ ልግስ ዳዱ ጉሽፃ ያኻማ ታምባኒ ሼውዴስ ዴስቴና አኽⶓ ዙሜካ::

አባዊው ዴዴክ ግቢትስታማ አሌድስትጝ ኹንዳ ምግቦ አቤሴላኒስ ካፃው እሺኹስ ጊዞ ክብስጝዴስታ ግርቦኪላ ቱስታጋቲታ ፍሽጝዴስ ይጉፃው አኽⶓኪላ ዊ/ሩ ሰዋው ወርክ ዲብስካ::

አባዊዳ ካንትፅንኹሳ ጄግንቶስታ ቲቪቪርጜ ናካኪላ ይቶፒያ ፋታው ዜርፍዳጊ እምፕልታ ቲሪናና ሌጌሱንኩ አጌርካ ታምቡኑሳ አቾ ታምብጝስ ኩርፄንትስ እንፃኽስትጝ ፋይፃው አኽⶓ ዊዛሩ ሰዋሰው ስልኪስ ድኹዌካ::

አዊ ብሄ/ቺፅጝፂው ቹዋ ቺፅጝፃንቲ አቶ ቴዎድሮስ እንዳለው ኽሳንቲ ይቶፒያው እዳሲው ዴዴክ ውላ ይቶፒያዊያንካዋ እምፕልትስ ኩፕፁኽ፣ ምንግስቱ ዲፕሎማሲው ኽስት ካንትስትኹ፣ ልግስኒው ካይፂ ካብ አድዋ አኽⶓ ጌሌፅካ::

ዝቤንካስ ቻንስታሺኹሳ ድኽቶ ድፅጝስ ካሊናው ኽሳንቲስታ ውላዋጊ ኩፕፅኹ፣ ልኻዋ፣ ማቔቾ፣ እምፕልቶ እንቲታኪ ይጋሪ ባላንጋሪ ያኹኽ ድኽትዳ ይጋሪስ ዜሜችንኹ አኽⶓኪላ አቶ ቴዎድሮስ  እርዳትፅካ:: አባዊው ዴዴክ ካላላኪያኽ ናውሳ ታክስጜ ዱንፅንኹ፤ ጄሜራችኹኒውላ እንፃኽስቴካ ካላላኪያ ናውሳ ካይ ክማውሳ ካንቴ ኪስኹ ኽሳንቲ ፕሮጄክት አኽⶓኪላ ጉሽካ::

ኽሳንቲ ይቶፒያው እዳሲ ዴዴኩ ግንባቲው ወክትስ ካንትስትኹ ይቶፒያንካውሳ እምፕልቶስታ ጁትጝጜ እሊኩ ልማቱ እንፅኽካዳ ይሳማ ሲፍፅጝ ቱስቴ ናኒስኪላ ቹዋ ቺፅጝፃንቲ ሼውፅካ::