ፌዩንኩ ላጛ አሜታኻዳ ክልልዳ ፌቴርስትኹ ፄትቲው ችግር ክንቲው ዜርፍዳ ፅንጋኻ ያኻማ ክንቴ ፋያንኩ ስራስሪ ክንቲ ጝናሱሳ አቭጂሌ ናፌኩንታ ሳኑስታንታ ፄዋማ እጄ:: ክንቲውሳ ኾቶ ፖለቲካው ካንቲስ ካንትጝስ ክንትጝ ክንትፅጙ ቴርት ካስጛቲታ ፄውስ እጂጝ ዴሜካ ክምንቶ ኩጝታ ካንትስቴ::
ፌቴርስትኹ ሰላም አዌክስትጝስ ዴሜካ ክልልታ ክንቲው ዜርፍዳ ኬፍንኹ ዳንጉዊኒ ፌቴርስታታ ፄዋ:: ሚንችካ እንፃኺታስ ቓሊቱኑሳ ኽሳንቴ ክንቲውሳ ኾቶ ቱጙሳ ፋዬ ኪላ አግፃቲንታ ፅንጋኻ ያኻማ ፋያ ጋቲታ እጋፌ ቴርቶ ሲፍጛ ካዌንሾ ቱዋንት ፄውስቱንኩ ሌጌሳታንብካው ቼፍኪላ ልቓ ጋቲዊያኽ::
እንሳ ፌይኹሳ ችግሮ ናካዳ ይጉፅጝስኪላ ውላጊ ዙራሙሪ ቺፋ ሰላሞ ማንዲፅጝስ ምንግስቱ ኬምፕዳ ቲሪጝስ ልቓስኪላ ያኹኒ ሰላም ዙራማ 2018 ም/አሜታሱ ክንቲው ዝቤንስ ክንትጝ ክንትፅጙ ቴርት ክቼማ ካስጛታ ናሲዴስ ጄሜራማ ቤዴራ ቴርት ካስጙስ እጄማ ክንቲ ቢሩው ንባር ቶኬማውስታጊ 7 ትኩሚ 4 ሚሊዬንዴስ ጃላ ክንታንትካዋ ሜዜጌብጝስ እክድ እምስታማ 2 ትኩሚ 9 ሚሊዬንዴስ ጃላ ክንታንትካ ሜዜጌብስትካ::
አዊ ብሄረሰቡ ቺፅጝፂዳኪላ 403 ክንቲ ጝንካ ናካዳ ክንቴ ጄሜርⶓስታ 255 ክንቲ ጝንካ ዴሜካ ክንቴ ጄሜርካያስኩ አኽⶓ ብሄረሰብ ቺፅጝፂው ክንቲ ሜምሪው ንባር ቶኬማ:: ክልልታ ክንትፅጝስ እምስትኹ እክድ ሳኪትጛታስታ ክንቲስ ታንቡንኩ ስራስሪ ውላጊ ክንቴ አግፃንታ ፄውጝስኪላ ውላውሳ አሪባሪብጜ ፄውጝ ቱስቴ::
ዙራሙሪው ሰላም ማንዲስታታ ኩስጝፅጝስስታ ቱስታ ጋቲታ ካዌናሾ ቱንኩኪላ ጝንሾ ዙራንታ ፄውጝስ ኽይ ታፍዳ አኽጝስ ሰላም ዙራማ ክንቴ ናፌኩንኩ ጄርካ ክንቲው ማንድዳ አግስታንታ ፄውጙሳ ቴግባሮ አኮሜችጝ ውላዴስጊ ማንዲስቴ:: ክልልዳ ላጛ አሜታሳ ኬውጛሺኹሳ ድሎ እምስትኹ አሜትስ ክችስጝስ ካሊስታታ ቹዋ ታብል፣ ክንትፃንትካስታ ውላጊ ትኩታኩ ቤንካ ታምቦጊ ፍሼ ፄውጝኪላ ፋይፄ::
ክንቲው ቴርት ዎክቶ ማንዳማ እይስታውስታ አግስታው ዋይሚስታ ዳንጉዊኒ ኪላ ዴዴጝ ጊዝስ ማሊስታቲው አኽጝስ ናካዳ እንዳራኪ ችግሮ ታምፃቲውስታ ካንትናኻ ቤንካ ዝኩኑኒኪላ እርክዝናማ ካንትጝስ ክንቲውሳ ቴርቶ ፅንጋኻ ጋቲታ ካስጛታ ፄውጝስ ኬምፕዳ ቲሪጝ ቱስቴ::
ክንታ ጋቲታ ይንታው ልማትኪ ያኻ ልግስኒ እላቲው አኽⶓ ሼውንጝስ ሰላሙ ችግር ምክንያታስ ጄርኪዋ ክንቴ ኬውጝፅጝስ እሊው ቴግባርሾ ቱዋንታ ፄውንኩ ጝናቖኪላ እላፎ ክንቲሾ ዙርፃንታ እርዳትጝ ፋይፄ::