ታደለ አጋጄ
አማኻሪ ክልልዳ ፌዩንኩ አሜትካዳ ፄትቲው ችግርስ ሚንችካ ክንቲ ጝንካ ክንትጝ-ክንትፅጙ ካስትዴስ ሴጋ ያኼካማ እጂካ:: ላጛ አሜታዴስ ጃላ ስራስሪ ክንቴ ኬውጝፅጝስ ክንቲ ፃንቑናሳ ፃንቑትካ:: አቕቱ እይፂ ያኹኽ ክንቲጝና ክንትጝ ክንትፅጝዴስ ሴጋ ያኻማ ዶንጌቱንኩ አይልካው ዝኩፃ ያኻ:: ላጛ አሜታዴስ ጃላ ልምቱንኩ ክንቲ ጝንካ ብስስትካማጊ ያኹኒውላ ናካኪላ ያኹኒ ሚንችካ ክንቲ ጝንካ ልምትካ::
አዩ ጉዋጉሲ ወረዳ አምቢሊ ትክላሊ ላጛንቲ አች ክንቲ ጝና 2016 ም/አታዳ ክንትጝ ክንትፅጙ ካስትዴስ ሴጋ ያኻማ እጄ:: 2017 ም/አታስ ኩፅኒ ክንትጝ ክንትፅጙሳ ካስቶ ካስጝፅጝስ ክንታንትካ ክንታንታ ፄዋ:: አውጚው ራዲዮንሊ እጂጜ ፄውንኩ አምቢሊ ትክላሊ ላጛንቲ አች ክንቲ ጝናሱ 11ንቲ ቤንኩ ክንታንትካ ዙሙኑውስታጊ እምፕሎ አሜቶ ክንቴ ክንታኑላስ እጂካ:: 2017 ም/አታዳ ኩፅኒ ክንትጝ ክንትፅጙ ካስት ጄሜርስታማ ክንቴ ሲፍጛኒስ ችኹንኩ አኽⶓ ቶኬምካ:: “ንጙዊኒ አሜትዳኪላ ክንትጝ ክንትፅጙ ካስት ጄሜርጝስ ክንቴ ሲፍጝናናጊ አግስትኔ ንካ:: ፄትቲው ችግርስ ሚንች አብትስታ ንብሬት ዎዴምስትኹ አኽጝስ ጄርካስ ክንቲውሳ ሜሳሬ ዋኽትጝፅጝስ ቹዋ ታብል ቼጌርስታንኩ አኽⶓ ቶኬምካማ ኮምፒውተርኪላ ፄትቲው ችግርስ ዎዴምኹ አኽጝስኪላ እይሲቲውሳ ክንቴ ሲፍጛኑ ኮምፒውተሩ እርዳቲ ፄውስታያታ ካሲካ::
አምቢሊ ትክላሊ 2ንቲ አች ክንቲ ጝናሱ ጛሪ ይግዛው መኰነን ክንቲ ጝና ፄትቲው ችግርስ ኬፍቲኒ ጉዳት ታምብⶓ ቶኬምካ:: እምፕሎ አሜቶ ልምታማ እጂኒዴስ ፋሌንጋ 2017 ም/አታዳ ክንትጝ ክንትፅጙ ካስት ጄሜራታ ፄውⶓ ጉሽካ:: ክንቲ ጝና 390 ክንታንትካዋ ሜዜጌባማ ክንትፃማጊ አግስታው አኽⶓ ጌሌፅካ:: ዙራሙሪው ዝኩዋንትካውስታ ወረዳው እርዳቲስ ክንቲ እይስታታ ፄውስትኹ አምቢሊ ትክላሊ ላጛንቲ አች ክንቲ ጝና 2018 ም/አታሱ ክንቲው ዝቤንስ ክንታንትካዋ ሜዜጌባማ ክንትጝ ክንትፅጙ ካስት ካስጛታ ፄውⶓ ቶኬምካ::
ክንቲ ጝናሱሳ ካቤ ፃንኩፅጝስ፣ ክንትጝ ክንትፅጝስ ፋይፃውሳ ቤዴራ ቴርቶ አኮሜችጝስ ክንታንትካ ክንቴ ሲፍጛንታ ፄውⶓ እርዳትፅካ::
ክንታንትካ ዎክትዳ ክንቲ ጝና ይንታንታኪላ ብሽታንዳ ካስጝስ ቹዋ ታብልስ ድኹጝስ ክንቴ ሲፍጛንታ ፄውⶓ ቶኬምካ::
ክንቲ ጝና ፄትቲው ችግርስ ሚንች ዲብ ዜሬፍስትⶓ ጌሌፁንኩ ክንቲ ጝናሱ ጛሪ ኮምፒውተሩስታ እሊው ክንትጝ ክንትፅጙ ካስትስ ያኻው ሜሳሪ እርዳቲስ እይስታታ ካሲካ:: ናካዳ ክንቲ ጝና ሊሊቲ አኺኒስ ፄትቲው አይልካስ ማንዲስታማጊ ክንቲ ዋኽትጛያታ ፄውስታማጊ አኽⶓ ቶኬሙንኩ ክንቲ ጝናሱ ጛሪ ክንታንትካ ቻሱሳ አላሜ ሳኪትጝፅጝ ዎክትስ ክንቲዳ አግስትጝስ ክንታንታ ፄውጝ ፋይፃው አኽⶓ ጉሽካ:: ሚንችካ ክንታንትካ ክንቲውሳ ዋኽትጝፅካያስኩ አኽጝስ ዴብተርስታ ፋይፃውጊ እርዳቲ ፄውስታታኪላ ካሲካ::
አዮ ጉዋጉሲ ወረዳው ክንቲ ፅፌት ጝናሱ አላፊ አሳዬ ተረፈ ፌይኹ አሜትዳ ፄትቲው ችግር እሺኹ ጊዝዳ ሚንችካ ክንቲ ጝንካ ፌሬስካማ ክንትጝ ክንትፅጝዴስ ሴጋ ያኼካማ እጂⶓ ቶኬምካ:: 2017 ም/አታዳ ኩፅኒ አምቢሊስታ እሊው ክንቲ ጝናብስስታማ ክንትጝ ክንትፅጙ ካስት ጄሜራታ ፄውስትⶓ እርዳትፅካ::
2018 ም/አሱ ክንቲው ዝቤንዳ ክንታንትካ ክንቲዴስ ሴጋ አኻቲንታ ልምትካማ እጂንኩሳ ክንቲ ጝንካዋ ብስፅጝስ ክንቲ እይስታታ ፅሬት ፄውስትⶓ ቶኬምካ::
“ጄርካ ክንቴ ዎክትስ ሲፍጛንታ ቹዋ ታብል ጛውሳ አላፍቶ ካፅጝስ ክንቲ እይስታታ አላፍቶ ፊትጝጝ ቱስቴ” ንካ:: ክንታንትካስ ክንትጝ ክንትፅጝስ ያኻንኩ ሜሳርካ እርዳቲስ እይስታንታ ካሲኑ ካሲስኪላ ችግር ዝኩክ ክንታንትካስ ባኩ ፋይስ ኩፕንኹዴስ እርዳቴ ፄዋንኩ አኽⶓ ቶኬምካ::
ወረዳታጊ ትክላሊስ 52 ሻይዴስ ጃላ ክንታንትካ ሜዜጌብጝስ እክድ እምስታማ ሊኽዴስ 69 ታፋሳ ሜዜጌብⶓ ቶኬሙንኩ አላፊ ክንቲ እምፕል አካልስ እይስታው አላፍት ጋቲው አኽጝስ ክንታንትካ ዎክትስ ክንቴ ሲፍጛንታ ፄውጝስ ታምብዌን አካልካጊ ጛውሳ አላፍቶ ፊትጛንታ ካሲካ::
አዊ ብሄረሰቡ ቺፅጝፂው ክንቲ ማምሪው አላፊ ደስታው አለሙ 2018 ም/አታሱ ክንቲው ዝቤንዳ ሲዚ ሻይዴስ ጀላ ክንታንትካዋ ሜዜጌብጝስ አኬድካማ ላንቡሳኺስታ 167 ሻይዴስ ጃላ ክንታንትካ ሜዜጌብስትⶓ እርዳትፅካ:: ብሄረሰቡ ቺፅጝፂዳ አግስታንኩ 658 ከንቲ ጝንካዴስ 403 ክንቲ ጝንካ ብስስትካማ ክንትጝ ክንትፅጙ ካስት ካስጛማጊ አኽⶓ ቶኬምካ::
ፄትቲው ችግርስ ክንትፅጝዴስ ሴጋ ያኼካማ እጂንኩ 78 ክንቲ ጝንካ 2018 ም/አታሱ ክንቲው ዝቤንስ ብስስትካማ ክንቲ እይስታታ ፄውስትⶓ ጌሌፅካ::
ብሄረሰቡ ቺፅጝፂታ 206 ክንቲ ጝንካ ልምስትⶓ ጉሹንኩ ሜምሪው አላፊ ፄትቲው ችግርስ ልምትካማ እጂንኩ ክንቲ ጝንካዋ ብስፅጝ ፅሬት ፄውስታማጊ አኽⶓ እርዳትፅካ::
ክንቲ ጝናዳ ዎዴምኹ ኮምፒውተርስታ እሊኩ ክንቲው ሜሳርካዋ ግባቶ ዋኽትጝፅጝስ እክዶ እሚካማ እንፃኽስቴካማጊ አኽⶓ ጌሌፅካ::
ክንታንትካ ዎክትስ ክንቲ ጝናዳ አግስቴካማ ክንቴ ሲፍጛንታ ውላጊ ታምቦ ፊትጝጝ ቱስታው አኽⶓ ኪላ ጉሽካ::