ቓሊፃ ኬቴማ

አለሚቱ የኔት

ዱባይዳ አግስታው ማልጜ አቕስታው ባሩ ዳሪዳ ኡም ኩኬም፣ አልማ ምዛር፣ ጂቢአር፣ ኪትቢች፣ ፃርኪ ምንግስት ጝናስታ ሮያል ኦንላንድያኽ:: ማስተር ካርድ ግሎባል እስትኹ ኾት አ.ዝ.ቼ 2019 ጐቤናንትካ ዱባይዳ ዋሺኒኪ አጌርዴስ ኽስኹስ ፍሼ ፍሽⶓ ቼሜትጝፃ::

አ.ዝ.ቼ ትክምቲ 2019 ዱባይ አልኮሉሳ ዝቔ ጌጌዋንኩ እግካዋ ጂሚሪ ጊዝስ ሴሬዝታ:: ጐቤናንትካ እንዴስ ቤዴራ አልኮል ታምባው ሊሊቲ ፍካድ አልኮሎ ጄዋንታ ፌኬድታ:: እንዴስ ቤዴራ አልኮል ታምባው ሊሊቲ ፍካድ ዝኩክ ዙራሙሪው ዝኩዋንትካ ይቪቻኽ:: ወሴናንቲ ፖሊሱ ኪሲ ይንቱኽ ቴቬቬርጙንኩ አረብ ኢምሬትካው ኬፍቲኒ ይኮኖሚው ኬውስ ጌቴምኹ ወክትስያኽ::

ዱባይ ሊሊትጙንኩ እንፂው ስታይልስታ ውኪርጚ ዝኩቲያኽ:: ኬቴምዳ አሬቡሳ አሌሞ ኽታዊኔ እስልምኒው እንፂውሳ ትቤቦ ካንትፃንኩ ግዲታምካ እንፅካ ዝኩና::

ዱባዩ ሚራክል ጋርደን አሌምዳ ኽሳንቲ አቢቢው /ትክልቲው/ ስፍሪያኽ:: ትክልቲው ስፍሪ 50 ሚሊዬንዴስ ጃላ አቢቢ 70ዴስ ጃላ አቢቢው ቴክልካውሳ ዜርካዋ ካንትፄ:: ትክልቲው ስፍሪ ኬቴሙ ማዘጋጂ ጝናዴስ ፉኽሳ ፃሜ  አኾ ቴኬምስታና:: ካናኻፅካዋ ዝቕፅጝስኪላ ቹቕት አኹዋቲውሳ ሴሎ ቴኬምስቴ:: ሳኑው ወክትስ ጉንቤት አሊዲዴስ ሜስኬሩሞኺስታ ዝኩኽ ጊዝዳ አይሩ አኺኒ ማልጜ እንኩዊኒ ያኹስ ክቻክቺስ 40ዲግሪ ሴንቲ ግሬዶ ታንቡስ ትክልቲው ስፍሪኪላ ልምታማ እጄ::

ዱባይ ማሪና ፋርስ ባሩ ዳሪዳ ሹኻ ኪሎ ሜትር 12 ማይሉ ብትሪዳ ግቢትስትኹ አቓ ግብሪ ባዩ ኬቴምያኽ:: ኬቴም ባሮ ዳላዳልጝስስታ ካጋ ፄውጝስ ግቢትስቱኺያኽ:: አ.ዝ.ቼ 2018ዴስ ጄሜራማ 55 ሻይ 52 እዝብ ዝኩዌ:: ትክላሊስ ልማት አሌድስቱስ 120 ሻይዴስ ጃላ አቖ ዝኩፅካዳስታ ቪላዳ ሌንጌድፄ::

ዱባዩ ማሪና 50 ሚሊዮን ስኩዌር ቻሙ እሳንት ሹኻ ትኩሚ አንኩዋ ኪሎ ሜትር ሌጌሴምት ዝኩኽ አኹ ባይ ልማቱ ያኹኽስታ ዱባይ ማሪናዋ ቤዴራንቲ ሜርኬቡ ታምብፂ ፄዋውሳ ባሩሳ ዳሬ እሚኹ ማይኬል ዝኩኽያኽ::

ጌትዩርጋይድ እስትኹ ድረገፅ ዱባይዴስ ካንትስትጝስታ ፄውስትጝ ዝኩክ ንጝስ 10 ብትካዋሰታ ፍትኽፅካዋ እንኩራ:: እኒኪላ ቤሬኺው አሻዊዳ ፄውስታው ሞተሩ፣ መኪናውስታ ግሜልካዋ ጋሌብⶓ እምፕላ ፄዋዋ እንኩራ:: እን ዴስፃው ኩምችኒ ሴዛዴስ ላጚቲ ሳታሳ ዊድጝስ ካሌ:: እሊው ዴሜካ ግዲታምካ ሞተሩ ጀልብካስ ባርዳ እንዝጚያኽ:: ሹኻ ሳታሳኺስታ ካፃ ንኩ ጄልቢው ሽርሽርካኪላ ምግብስታ ዝቒጊ ዝኩኽያኽ:: እንዴስ ፌይኹስ ዴሜካ ኽሳንትካ ሜዜክርካ፣ አኹ ፓርክካ፣ ግዲታምካ ሪዞርትካስታ እሊኩ ጐቤናንትካው ጉስፅካ ዝኩና::፡ ኑስ ዱባዬ ካንትኹስ በኩር ጋዚቲዴስ ፉኽ ፁፍዴስ ንባር አግፅና::