እምፕልታቑሳ ዝኩዊኒውሳ አቾ ኬሽጝፅጝስስታ ምግቡሳ ዋስትኔ ቼሜትጝፅጝስ አኹዋቲ ልማቱ እንፅኺ ልኺትጛንቲ እላቲው ዜርፍያኽ::አኹዋቲ ልማቱሳ ዜርፎ ኬሽጝፅጝስስታ ምርታምቶ ሌጌፅጝስ እንፃኽስትጝኪላ ቱስቴ::አኹዋቲ ልማቱ እንፅኺ ችኹ ልማትዴስ ክቻ ኬሻንቴ ምርቶ አግፅጝስ ካሊፃው አኽጝስኪላ ውላጊ ትኩቶ እያማ እንፃኽስትጝ ፋይፄ::አኹዋቲ ልማቱ እንፅኺ ግብርኒውሳ ዜርፎ እሪው ዳንቴንትዴስ ባይትጛታ ፄዋው አኽጝስ ይሳማ እንፃኽስትⶓ ካሴው ቴግባርያኽ::
አኹዋቲ ልማቱ እንፅኺዴስ አግስታውሳ ኬሻንቴ ምርቶ እርዳትስታውላስ ይጉጝስ አኹዋቲ ልማታዳ ትኩቶ እይካማ እንፃኽስታቲንኩ አሬሳቻንትካኪላ አግሰታውሳ ትክሞ ማሊጝስ እን ቴግባርሾ ቱዌካማ ሊሚፅጝ ፋይፄ::አኹዋቲ ልማቱ እንፅኼ ካስጝፅጝስኪላ ጌቴማው አኹውሳ እንፂⶓ ጌጌውጝስ ባይላዊስኪ ያኻ ዝቤናዊ ዳድስ አኹ ቴርስ ታንባታ ፄውጝስ ሊሚፅጝሾ ቱጝ ጉላሊ እላቲውያኽ::ምንግስት እይኹስ ትኩትስ ሚንችካ ዙራሙርካዳኪላ ዝቤናዊ አኹዋቲ ልማቱ ዴዴክ ግቢትስታማ ቴግባርሾ ቱዋንታ ፄውስታ::እስጜ ኩፅኒ ዋይሚስታ ያኹኽ ዳድስ ቴኬምስትጝዳ ፌያፌያማ ካንትስታውሳ ዳንጉዊኔ ክችስጝስ ግቢትስትኹሳ ዴዴኮ ቴኬምስታማ ዋይሚስታ ያኹኽ ዳድስ አሜሬትጝ ቱስቴ::ችኹሳ እሬ ይቪቻ ማንዳማ አሜሬትጝስ ጛርትዴስ ፌያማ እሊውስ ፊትጝስ ካሊስታቲው አኽⶓ እርዳትስትጝስኪላ እላፎ አኹዋቲ ልማቱ እንፅኺሾ ዙርፅጝስ ጛርትስ ቴኬምስታማ እሊኩስኪላ ቴኬምጝ ፋይፄ::እንሳ ፄውጝስኪላ አኹዋቲ ልማቱ እንፅኺስ ቤዴራማ ቴርትጝ ቱስታውሳጊ ቴግባሮ ኪላ ቤዴራማ ቴርስጝስያኽ::
አባላምቲ ዙሪ አኹዋቲ ልማቱ እንፅኺስ እያውሳ ብቴ ቤዴራ ቴርስጝዴስ ጉሽፃማ ፋይፃንኩ ጉልሊ ዜርካዋስታ ግባትካዋጊ ዋኽትጝፅጝስ ዋይሚስታ ያኹኽሳ ምርቶ አግፅጝስ ትኩቶ እያማ እንፃኽስትጝ ቱስታውያኽ::ግበርኒው ውማይቴንካስታ ዴስ ዝኩክ አሬሳቻንትካዴስ እይስታውሳ ኩስጜ ቻቤልጝስስታ ቴግባርሾ ቱጝስ ቴኬምስታንታ አኽጝ ፋይፄ::አሜትዴስ እምፕላኒ ይቪቻ አሜርትስታው ምርት ትብ ታፋሳ ካንትጝዴስ ፍሻቲው አኽጝስ አኹዋቴ ቴኬምስትጝስ ሼውታ ምርቶ አፔስጝስ እሌታ እርባቲ ዝኩዊኒዴስ ፍሻውሳ እንፅኼ ካስጝፅጝ ቱስቴ::አሜትዴስ አሜቶ አኹዋቲ ልማቱሳ እንፅኼ ካስጝፁኑሳ ጌቴማንኩ ችግርካዋኪላ ሼውናማ ቤዴራማ ኽዬ ቴርስጝስ ዋይሚስታ አኽጝስ እንፃኽስትጝዳ ትኩታ ፄውጝ ማንዲስቴ::