ኪሴ ካንትፃው ምርት

ንግስቴ ተስፋ

ይቶፒያዊያንካ አሬሳቻንትካ አሜሬቱኑ ቤርቤርዴስ 92 ትኩሚ 4 ታፋ ሊኽዴስ ያኻውሳ ጌቤልስ ዲግሳንኩ አኽⶓስታ እንጚኪላ አጌራኻዳ ዝኩንኩ ኬፍቴንካ ጌቤልኩ ሴብልካሊ ሜዴብስታው አኽⶓ ላጛ አሜታዴስ ፍና ቤርቤሮ ካንትኹስ  ፂኒስስትኹ ፅናት ቶኬሜ::

አሜሬታንትካ አሬሳቻንትካ 60 ታፋ ሊኽዴስ ምርቶ ዙራሙሪዳ አግስታንኩ ጅምላ ጌፄንካስ ዋያንኩ /አሬኬብፃንኩ/ አኽⶓኪላ ፅናትስ ቼሜትጛ::ጉሽፂ ላቲን አሜሪካት አጌራ ታኹት ደቡብ አሜሪካዴስ አኽጝ ድኹስታው ቤርቤር ይቶፒያዳኪላ አማኻሪ፣ ኦሮሚያስታ ደቡብ ክልልካዳ ኬፍቲኒ ሜቴንስ አሜሬትስቴ::ቤርቤር ኬፍቲኔ ሚፄ አግፅፃው ሴብልዴስ እምፕልያኽ እን ሴብል አጌራ ኻሱኪ ያኻ ባርኾቼው ጌቤልስ ፋይስታንት ዝኩክ ሴብልካዳ ሜዳብስታው ያኹስ ይቶፒያዳ እሳንስ አሜርትስታው ቤርቤሩ ዜርዴስ ላባላባው፣ ሚትሚታ፣ ፓፕሪካኩስታ ፌሬንጁ ፄዌንታንቲ ቤርቤር አግስታና::እን አጌራዳ ላባላባው ቤርቤሩ አይኔት እሳንስ አሜርትስታው ያኹስ ባይላዊ ምግቡ ቴርትስ አጌላጌሌ::እንዴስ ድምክና ቤርቤር ባርኾቼው ጌቤልስ አሜርትስታንኩ ፋብሪኪኩ ዋይምካዋ አሜሬትጝስ ቹዋ አክኺ ያኻማ አጌላጌሌ::

ፅናት ካንፅፃውስታጊ ምርት እያው አግልግሎቲ ኬፍቲኒ ፋይስታንት ዝኩኽስታጊ ምርትዳ ኩፅኒ ኔኬታታ ፄዋንኩ ሊሊትጙንኩ ፅንጋኽካ ዝኩና::እኒጛዴስ ወክት ቺፋ ኬሴትስታው ቑንዚስታ ቤርቤር ቴኬልስቱስ፣ አሬምስቱስስታ ሴብል ታምባኒ ኩፕኑስ ኬፍቲኔ አቒውሳ አይሎ ካሴው አኽጝስ እንቲታኪ ወክቶ ማንዳማ እምፕላኒስ አሜሬትስታው አኽጝ እንጚስኪላ ሜጋዚንዳ አቤሌሽታውላ ፋይስታውሳ ጊዞ እጄታ ፄዋው እንፃኽስትጚ እላቲው አኽጝ ቤርቤሩ ምርቱ ፍታኒ አኽⶓ አዴት ግብርኒው ምርምሪ ፍሽኹ ፅናት ቶኬሜ::

አሬሳቻንትካ እሳንስ ቤርቤሮ አሜሬታኑ ዙራሙሪዴስ ዚጋሚ ወረዳ አግስቴ::

2ሻይ ምሬት አሜታዳ ክምካው ክይስ ይቪቺስ ቴኬምስታሺኑ ብቲዳ ቤርቤሮ ቴኬልⶓ ጄሜሩንኩ ዚጋሚ ወረዳ አኺቲ ኬቤሊው አሬሳቻንቲ ያረጋል ብርሃኑ “ቤርቤር ንጚ እኖጂስ ወርኪያኽ ምክንያትኪ ቤራዋ ጄውናው፣ እዶ ኬናውስታ ጄርካዋ ክንትፅናው ፃናባንኹ አብቲያኽ ንካ::

እምንኹ ምርቱ ዝቤንዳኪላ እምፕል ሄክታር ብቲዳ ቤርቤሮ ዜሬካማ አንኬባኬብካማጊያኽ::5 ኩንታል ኽብፂውሳ ማዳባሬ ቴኬምስትካማ ዎክትስ አሪሜስታ ቑንዜ ጎቤንካ አንኬባኬብካማ ቤርቤሮ ግዲትፅካማ ዋግፅካ::ንጙኒ እሪ፣ ንፋስስታ አዊኪላ ቤርቤርስ አስሜምጛማ  ቤርቤር ግዲታማ ዋግⶓ ዲብስካ::ዜርስትኹ ቤርቤሩ ምርትዴስ ዴሜካ 100 ኩንታል ምርቶ አግፅጝስ ማንዴካማጊያኽ::ቤርቤሮ ፅልንጉንቲ አኹኪ ስሮ ቤሴቕፃው ፈንገስ ምርቶ አቤሌሽስታቲታ ውማይቴንካውሳ ኩስጜ ቴግባርዳ እሽፅጝስ ካላካልጜካማጊ ችግራ ጋቲታ ቤርቤር ሊማማጊ አኽⶓ ዙሜካ::

አሬሳቻንቲ ያረጋል ናኑውስታጊ ናኪኒ ወክትዳ ካንትስታው ቤርቤሩ ዛሊስታ አቢቢዴስ ካንታኑውስታጊ ኬፍቲኔ ምርቶ አግፃንኩ አኽⶓ ምልኻታው ያኹኒውላ ሜስኬሩምዴስ ትክምቴ ኪንዴኺስታ ቤርቤሩ ቑንዚ ኬሴትስታማጊ እንዴስ  ቤዴራ ችግር ታምባሺኹ አኽⶓ ታክስፅካ::ቑንዚስ እጁ አግስታው ያኹኒ ውማይቴንካ እርዳቴ ፄዋንታኪላ ካሴ ዲግስካ::

ዚጋሚ ወረዳ አኺቲ ኬቤሊው አሬሳቻንታ ዋ/ሩ አሳየች አለሙ ዙሙኑውስታጊ ንጙዊኒ ምርቱ ወክትዳ ላጛ ሄክታር ብቲዳ ማዳባሬ ቴኬምስትካማ ሊሚፅካማጊ አግስታኑ ቤርቤር ኻፂስኪ ያኻ አቢቢስ ናካዳ እልስ ካንትጝስ ሳስፃዊያኽ::ውማይቴንካው ኩስጚስ እርሼ አሬስጝዴስ ጉሽፃማ ኽብፂውሳ ማዳባሬ ፄውⶓ ኺስታ ክችክቼ እንፃኽስትጜ ሲፍካማ ቤርቤሮ ሊሚፅጝስ 40 ኩንታልዴስ ጃላ ምርቶ አግፅጝስ አኬድⶓ ዲብስካ::ፌይኹ አሜትዳ እምፕሎ ሄክታሮ ዋኻያሱ ብቲዳ ቤርቤሮ ሊሚፅካማ ዋይጝስ 80ሻይ ብርዴስ ጃላ ሚፄ አግፅⶓ ቶኬምካ::ቤርቤር ጌቤልስ ፋይስታንቲ ሴብል አኽጝስ ኬሻንቴ ሚፄ አግፄካማጊ አኽⶓ ዙሜካ::

ቤርቤሮ ዜራኒስኪላ ኬሽጙኽሳ ጉልሌ ዜሮስታ ኬፍቲኔ ምርቶ እያውሳ ቴኬምስትጝስ ናካዳ ዝኩኽ ቤርቤሩ ልማት ቴስፌ እያውስታ አኬዱኑዴስ ጃላ ምርቶ አግፅጝስ ቱስቲስ ማሴ አንኬባኬብካማጊ አኽⶓ ዊዛሩ አሳዬች  ዲብስካ::ኽብፂውሳ ማዳባሪ ወክትስስታ ክችክቺ ሴልስ ቴኬምስትጝኪላ ምርት ኬፍናታ ፄውጝስ እንዴስ ቤዴራ አግፃሺኑ ሚፂዴስ ኽሳውስታ ኬሽኹ ዝኩዋኒዳ አኽጝስ ጄርካስ ፋይፃውላሳ ዋኽትጝፄካማ አችስ ታምፅጝስ ዴስቴንካ አኽⶓ ድኹዌካ::

ፌዩንኩ ላጜታ አሜትካዴስ ጄሜራማ ቤርቤሩ ዋይሚ ኬሽጛማጊ አንትጝስ ቤርቤሮ ኽስኹስ አሜሬታንኩ አኽⶓ ኪላ እንክርፄ::ናኪኒ ወክትዳኪላ ምሜ ኬሜስካማ ኬሻንቴ ምርቶ አግፅጝስ እምፕላኒሱ አሪሜ አሬምጝስታ ኩሪ ቱዋማ አቤሌሽስታቲታ ቑንዚስ ፂኪስታቲታ አንኬባኬብካማጊ አኽⶓ ዲብስካ::

ዚጋሚ ወረዳ አኺቲ ኬቤሊው ግብርኒ ፅ/ጝናሱ አላፊ ባይከፋኝ ሽቱ ናኑውስታጊ 7ሊኻ ሄክታር ብቲዴስ ጃላ ቤርቤሩ ቴክልስ ሾፌንካ::አሬሳቻንትካ ቤርቤሩ ፃንኩትስ አሜሬትካማ ኽስኹስ ቴኬምስታንታ ውማይቴንካ ጊዝ ቺፋ ሲፍጜካማጊ አኽⶓ ቶኬምካ::ችኹ ቱፂ ወክትዴስ ጄሜራማ ናካሳ ኺስታ ዝኩኽ እሪውስታ አይር እግልታው አኺኒ ቤርቤርስ ማንዲስታው አኽⶓ ጉሽካ::ይጉዋንቲ አርፊዳኪላ ኩሪ ኹራማ ቤርቤሩ ቑንዚ ጁዋቲታስታ ወክቶ ማንዳማ ኩፕናታ እንፃኽስታንኩ አኽⶓ አቶ ባይከፋኝ ጌለፅካ::

ዚጋሚ ወረዳው ግብርኒ ፅ/ጝናሱ አላፊ ዳንኤል ሞላ 2017/2018 ምርቱ ዝቤንዳ 17 ሻይ ሄክታር ብቲዴስ ጃላ ቤርቤሩ ሴብል ክላስተርስ ሊማማጊ አኽⶓ እርዳትፅካ::ዚጋሚ ወረዳው ቤርቤር ፋይስታንቲ አኽጝሊ እምትጛማ ምርት ክችክቺስስታ ዎክትስ ሊማማ አሬሳቻንትካኪ ያኻ ቴኬምስታንትካ ፅንኩቶስታ ቲንስ አስሜምጛውሳ ቤርቤሮ አሜሬትጝስ እንፃኽስስትኹ እንፅኺስ ናኪኒ ወከትዳ ቤርቤር ኩፔ አፌሪማጊ አኽⶓ ቼሜትጝፄካ::“ዝቤናዊ ዳድስስታ ኬሻንቴ ምርቶ አግፃኑ ሴልስ ቤርቤር ሊማማ አሬሳቻንትካ ቴኬምስታንታ ውማይቴንካ ቱስቲስ ሲፍጛንታ ፄውስታማጊ አኽⶓኪላ  ቶኬምካ::ቤርቤሮ ፂካውሳ ቑንዜ ካላካልጝጝስ እምፕሎ ማሴ ካቢትጝፃማ አሬስጝ፣ ቤርቤር እሺኹዳ ቤርቤሮ ዙርፃማ ብቴ ፉሪሳውላ ዜርⶓ ባይጝ፣ ጉልሌ ዜሮ ዜርጝ፣ ኩሪውሳ ባዩ ክችክቺስ ኬውጝስታ ሊሊትጙኽ ባይላዊ ካላካልጜውሳ ሴሎ አሬሳቻንትካ ቴኬምስታንታ ፄውⶓ ጌሌፅካ::እንጚስኪላ 320 ሻይ ኩንታልዴስ ጃላ ምርት አግስታው እስታማ እክድ እምስትⶓኪላ ቶኬምካ::ፍንሾስ ሴብል ታምባኒኪላ ቱስቲስ ሴብል ኩፕናውሳ ዳዶ ዝቤናዋ ፄውጝዳስታ አሬሳቻንትካ ኬሽኹሳ ሚፄ አግፃንታ እንፃኽስስታው አኽⶓ አላፊ ቼሜትጝፄካ::