አዊውሳ ባይሎ ልቓስ

ታደለ አጋጄ

ባይል እምፕል ማቤር አቑ ዝኩዊኒውሳ አኺኔ ካንትፃዊያኽ::እምፕልታቑሳ ኮንኬ፣ ትቤቭ ፅንታሳ፣ ፅፍ ፅንታሳ፣ ጅሜ፣ ሻኼ፣ ሴይጝጜስታ ውላቱዊ እምፕልታቑሳ ልቕልቕቴ አቩቓማ እሚኹያኽ::አዊው እዝብኪላ ጚው ያኹኽ ባይል፣ ታሪክስታ እሴት ዝኩኽ እዝብያኽ::እንሳ እምፕልታቑሳ ታሪኮ፣ ባይሎ፣ እሴቶ፣ ኮንኬስታ ፄጌርጛንኩሳ ዲብካዋ ቴርስ ፁፍስስታ እሊኩ አኼንካስ ቴርታማ ዲጉስ ካንትስታላ::ዲጊ ጊዝዴስ ናቴ ኩፅኒ እምፕልካ እምፕልካ  ምሁራንካስ እዝቡ ባይል፣  ታሪክ፣ እሴት፣ ወግስታ እምፕልታቑ ዝኩዊኒው ካስት ፃፊስታማ ዲጉስ ካንትስቴ::

እንጃቢሪ ዩኒቨርሲቲው ፖለቲካል ሳይንሱስታ አጌር አቕቱስታ ምግባር ፅንታው ክንትፃንቲ አለምነህ አጋጄ አገው እዝቡ ታሪክ፣ እሴትካስታ ታምትጚ 500 አሜት አሌምዴስ ጄሜራማ 2016 ም/አታሳኺስታ ናውሳ አባላምቴ ሜፃፎ እትሜትስ ቢኪፅካ::

ዲጊስ ዴሜካ አገው እዝቡ ባይል ኽታዋዴስ ጄሜራማ ናካሳኺስታ ናው ጛሪስ ላጛንቴ ሜፃፎ ፃፌካማ  ዳቔርፁንኩ ክንትፃንቲ አለምነህ አጋጄ አውጚው ቴሌብጅንሊ ፄውኑሳ እጂጜ ፁፎ ቴርስና::

ሜፃፎ ፃፊጝስ ጉሽጝፅኹ እንዳርማይ?

ክንትፃንቲ አለምነህ አጋጄ ፡ ናካ ላጛርጛ ሱኺቲ አሜታዴስ ፍና ክንቴ አሌታታ ጌፄርዳ ቹዋ ታብልሊ  ፂኻዋ ፊሪሲስታ ብቕሊስ አጄብካማ ትሩንባዋ ኮይፅካማጊ፣ ባርኮቴ እሚካማ፣ ኪሪዌ ኬሬውካ ጅሜካማጊ ፌያኒስ ካንታኒ ይውሳ እንኮኽስቶ ማልጛ ጉሱኻ::1986 ም/አታዳ ጝሹላ ይዴስ እንፃንቲ ይፄ ኽይስቱስ አን ሚዛ አቓታ ካሳሽትኾ::ሚዛ አቓታ ካሱስ ቱትጚዳ ዝኩኹሳ ባይሎ አቓያላ::

ሚዛሚዛ ፄዋኑሳ ኑዛዜ፣ ፂኻዋ ዋታ ፄዌካማ አንኬባኬብካማ እሜንኩ አኽⶓስታ፣ ቹዋ ታብልስ ዋትጛ አሬኬብፃንኑ አኽⶓ ፂኻራኩ ቹዋ ታብሉሳ ግዴቴስታ አላፍቶ ሚዜ ናዜዝፃና::እንሳጊ ናዜዝስቱስ ትንካኪሲያኽ::

“ብሽታንቲ ሞሌቔሳ አይ እስቴው፣ እንቶጂ ካይቲኑ ብኑ ስም አይ እስታው፣ ኬቤሊው ቺፅጝፃንቲው ስም አይይ?” ንካማጊ ካሴኒ ፅናቶስታ ምርምሬ ዲግሳንቲታ ጁዋውሳ ካሴ ዙርፅጝስ ካላካልጛ::

ቤዴርታታ ኽሳንትካዴስ ንባሮ አግፄውላስጊ ካሴኑ ካሲ ማልጛ ይዝኩዊ::ጝናኻዳ ዋኻማ ዝኩኽ ፂኻው ጝን አቕ ካሴ ኬርቲኒጊ ማልጛ እኾኼና::እንሳጊ ፄውኑስ ዙርሜ ዙርፅኑስ ትንካኪሲያኽ::ሚዛ አቓታ ካስጝስ ኻስዳ ዝኩኽሳ ባይሎ ልቓ ሳትዳ 60 ፍንዴስ እንፃቲውሳ ፃፉኻ::

ሜፃፍ ትኩታ ፄውኽ እንዳርማ ጉዳይ?

ሜፃፍ ፅካ ፋንቴትካስ ቤንስታማ ፃፊስትኹያኽ::ባይልሊ እምትጙኽሳ፣ እምኔቶ፣ ጄርካዋ ሌጌፅጙስታ ክምንትሊ እምትጙኽሳ ጉዳዬ፣ ሊሊትጙንኩ አዊዉ ቱትጚው፣ ሲንቲው ባይሉስታ ባይሉሳ እንክሬ፣ ሴይጝጜስታ ዛኽ ዝሜዱሳ ቻቤልጝጚዳስታ ባይሉ እክምኒዳ ትኩታማ ቴርትኹ ፁፍያኽ::

ፃፊኒዴስ ፋሌንጋ አይስ ጋማጋምፂኹ?

ላጛንቲ አቹ ክንቲ ጝናዳ ክንትፃንታ አቑስ ደሴ ክንትፃንትካው ሲሊቲንፂዳ ቱኒዴስ ፋሌንጋ ፃፉኽሳ ፁፎ ኮሌጅኩ ፔዳኮጂክሱ ክንትፃንትካስ ካንትፄ::ላንጊጊ ክንትፃንትካ ክችሳውሳ ምስሌ ካንቴ እይና::ክንትፃንትካኪላ እይኑሳ ካንቴ ክችሳታ፣ ፋንቲቲስ ቤንጝፃታ፣ ክችክቺስ ንባሮ አችትጝፄታ ሜፃፎ ፃፊ ንካማ ኩስጝፁና::እን ሜፃፍ ያኻው ናታ ታክሳያ::ጛጂ እዩኑሳ ካንቴ እምታታ ዳቔርስታታ ፉኒዴስ ፋሌንጋ ጌፄርሾ ፋታ ፁፎ ክችስⶓ ጄሜርኾ::

አዲስ አበባዳ ዳቔርስቱኒዴስ ፋሌንጋ ዴሜካ ሜፃፍ ጝናሱ አንቤብፃንቲ አኽጝስ ኬፄርስትኾ::ሜፃፍ ጝናዳ አንቤብፃንታ አቓታ ኬፄርስትጝ ዴሜካ ሜፃፎ ጉድጛ አንቤብጝስ፣ ጉድጛ አችትጝፅጝስ እትሜትስ ቢኪፅጙሳ ድሎ አግፅኾ::

ይቶፒያዳ ዝኩኽሳ ታሪኮ፣ ባይሎ፣ ኮንኬ ጉድጛ ፄፓታ አንቤፕኾ::አንቤፑኒዴስ ፋሌንጋ ሜፃፎ ክችክቺስ አችትጝፃታ ፃፉኻ::አባላምቲዳ ታሪክ ፃፊስታታ ፄፑኻ::አንዴስ ፋሌንጋ ዴሜካ ባይል ፃፊስታ::

ሜፃፎ ፃፊስ ጌቴሙኽ ችግር ዝኮማ?

አባላምቲዳ ፃፊስትኹሳ ፁፎ አችትጝፃማ ሜፃፍ ያኻታ ፄውጝስ፣ ሜፃፍ ያኹኒዴስ ፋሌንጋ ዴሜካ አቴምፅጝስ ጌንዜቡ ችግር እሺኾ::

ፍንሾሱ እክድ እንዳርማይ?

ፃፊስቱንኩ ሜፃፍካ ሹኻ ሴናኽ::አባላምቲዳ ታሪኮ ፃፉኻ::ናካ ባይሎ ፃፋ::ይንታውዳ ዴሜካ ኮንኬ፣ ማይቤራዊው፣ ይኮኖሚውስታ ፖለቲካውሳ አችትጜ ይንታውዳ አቴምፅጝስ ቴርታ::ይንታውዳ አቴምፅጝስ ቴርትኹሳ ሜፃፎ አቴምፁኒዴስ ፋሌንጋ ላጛንቲ እክድስ አቴምፁክሳ ሜፃፍካዋ ቴርስ ቴሮ አውጚሾ ዙርፃታ አቴምፅጝስ እክዶ እምታ::ታሪኮ፣ ባይሎስታ ኮንኬ ፃፊስትካማ አቴምስቱንኩሳ አውጚሾ ዙርፁኒዴስ ፋሌንጋ ዴሜካ ሹኻጊሶጊ ሜፃፍካዋ እንግሊዝጚሾ ቶሬጌምጝስ አማዞን እስታው አሌማ አቡቑ ሜፃፍ ዋይፂ ጌቤልዳ አቕትጛታ ፄውጝስ አሌሙ እምፕልታቕ አንቤባታ ፄውጝስ እክዶ እምታ::

ሜፃፎ ፃፊስ እርዳቱኽ  ቤን ዝኮማ?

ሜፃፍ ፃፊስታማ እትሜትስ ቢካታ ሚንችካ እርዳቱንኩ ዝኩና::አባላምቲዳ እንጃቢሪ ዩንቨርስቲኩ ክንትፃንትካ ብርሃኑ ማተቤስታ እሱባለው ክንዴ እርዳትካ::ክችክቺስ ጋማጋምካማ ክቼታ ፄውንኩ አኽጝስ ምስጋኒ ታምባይስ::አዊ ባይሉስታ ቱሪዝሙ አላፊ ወለሊ ጌቴ ሜፃፍ አቴምስቱኒዴስ ፋሌንጋ ሊሊትጙንኩ ክንቲኩ ኾትካስ ታምባታ ፄዋማጊ አኽጝስ ምስጋኒ ዲጋይስ::እንጃቢሪ ዩንቨርስቲው ፕሬዝዳንት ዶ/ር ጋርዳቸው ወርኩስታ ዶ/ር ክንዴ ብርሃንስኪላ ኬፍንኹ ምስጋኒ ታምባይስ::