ሹማጌልትጝ ፍትስ

ንግስቴ ተስፋ

እርክስታ ሹማጌልት ጛርት አቕዳኪ ያኻ እምፕልታቕ ክቻዳ ፌቴርስታውሳ ጊዌ ኽይጝስ፣ ናማኪ ሰላሞ ጌምፅጝስ ይቶፒያዊያንካው ሊጊሲሚ ዝቤንስ እጂኹ ማቤራዊ እሴታ ያኻማ ሴጛ::ሹማጌልት ጛርት አቕ ክቻዳ ፌቴርስታውሳ ችግሮ ኽይጝዴስ ጄሜራማ አጌራው አችስ ፌቴርስታውሳ ችግሮ ኽይጝስ ኬፍቲኔ ታምቦ ፊትጙስ እጄ::

ባይላዊ ሹማጌልትጙ ቴርት ዝቤናዊ ፍርድ ጝና ቲሪትጛያሱ ዝቤንዳ እምፕልታቕስ እርኩሳ ውሳኔ እዩስ እጂኹ ናካኪላ እምፕልታቕ አጌላጌልስትካማጊ አግስታኑ እዝብካው እሴቲያኽ::ሹማጌልካ ጌዌስጙንኩ ዎጌንካውሳ ውኖ ካንትካማ አስሜምጝፃና እስትካማ ቻቤልስታንቶኪላ አግፁንኩያኽ::

እምፕላኒ እምፕላኒ ላንጊሱጊ ወጌንካሾ ክችክቺ ቼፍ ዝኩክ አቕ ጎሌልስትካማ ኩፕፃንቴ ጎሌላኑ አኺኒ ዝኮ::ጋያኪ ጉዳይ ፍርድ ጝናዴስ ሹማጌልካስ አሌድስታታ ፄውስታው ያኹኒ ኩፕፃንቲ ፍርድ ጝና ዎኬልስቴ::ሹማጌልካ እርኮ ፌፄማኑ አዴላኑላስታ ውንስ ቴቤክቶ ቲሪጝስ ቤዴልስታንቲስታ ቤዴላንቲ ክችክቺስ ካንትስታኑ አኽጝስ ውላውጊ ዎጌንካስ እንቲታኪ ፍርድ ጝናስ ቻቤልስት ዝኩኽያኽ::

አዊ ብሄረሰቡ ቺፅጝፂው እዝብኪላ ቺፅጝፂው፣ እጉ፣ ፍቱስታ እምኔቱ ጉሽፂ ያኹኽ ቴርትዳ አስሚምጜ አቲጝስታ ጋቻ ፌቴርስታኒ ችግሮ ኽይጝስ ቴኬምስታኑ ማቢሪ፣ ክስታንቱ ጄር፣ እድር፣ እኩብ፣ ንፍስታብላ እንቲታኪ አኹ ታብላ ቶኬምስታንኩያኽ::እኒጛ ቴርትካኪላ ፍቶ ቼሜትጝፅጝዳ፣ ፍርድ ጝናሱሳ እንፅኼ ይስጝፅጝዳስታ እምፕልታቑሳ ጉድ ቺፅጝፂውሳ ቴግባሮ ይስጝፅጝዳ ቲኪስታንቲ እላቲኩ ሹማጌልቱ ቴርትካ ያኼካማ አጌላጌልካማጊ አግስታና::

ዋልቲ አሜታሱ ጋብቺው እንዝጚዳ ላጛ ጄርካው ካሜንካማ ዜቤንቱ እንፅኺስ ቺትጜካማጊ አግስታንኩ አቶ አደራ ሀይሉ ሹኻ አሜታዴስ ቤዴራ ጛቓሊ አቭርታ ካሜኑንኩ ጄርካዋ ሌጌፅጝስ ሊሊትጙኽ ዳድስ አስሚምጜ አታኒ ጉዳዮ ባንጂ ወረዳ ፍርድ ጝናሾ ካፅጝስ ጌዴድስቱንኩ አኽⶓ ስልኪስ እንክርፄካ::

ትዳርዳ አስሚምጚ ዝኩዋውላ ይጉጝ እንቲታኪ ካሜንስቱንኩ ጄርካ ቹዋ ትብሊሊ እምፕልዳ ያኻማ ሌጌፃውላ ይጉጝዴስ ድምክና ጉዳዮ ፍርድ ጝናሾ ካፅጝ ጊዞ፣ ጌንዜቦስታ ግርቦ ኬሴርናታ ፄዋ::ያኼስጉ ፍርድ ጝናኪ ያኻ አጌር ሹማጌላ ኩፅኒ ጉዳዮ እርክስ ዊድናታ ካሴ ዲግሳኒ ሌዋ ፃንጌኻ ሹማጊሌ ጎሌልጝስ አራኹናውሳ ጉዳዮ ኽቴ ናቴ ሹማጊሊ ውኖ ፂኒሳማ ፍታዊ ዳድስ አብት ንብሬቶ ቤንጝፅጝስ ሳሴርስ ጉዳዩ ኽይጝስ ካሊፅⶓ አቶ አደራ  ድኹዌካ::

ዎክትስ እሺኹሳ ጉዳዮ ታክሳኒስ አቶ አደራ “ሹማጊሊ ላጛ ጌርካ እንጅኩዋማ አሌዱኑሳ ጉዳዮ ክሶ ጄሜርኑታ ፍርድ ጝናዳ ሲፍናስኩኑኒጊ እምፕል አሜትዴስ ጃላ ዙራዙርጝስ አጌልኑኽሳ ንብሬቶጊ ክስዳ ዊድኔ እሽኑኻ፤ አጌር ሹማጌላ ኩፅኒ ጉዳዮ ዲጊዳ እርዳትስታንኩ አኽጝስስታ ጊዋ ጋቲት ችግር ኽይስታታ ታምቦ ፊትጛንኩ አኽጝስ ሰላማዊ ዳድስ ጊዞ፣ ግርቦ ጌንዜቦ ክብስናና ችግሮ ኽይጝስ ካሊናታ ቢኪፅካ” ናኒስ ሹማጌልካ ፍቶ ቼሜትጝፅጝዳ ፊትጛኑሳ ታምቦ ምስጋኒስ ጉሽካ::

ባንጂ ወረዳ ክዳማጃ ኬቤሊው ዝኩዋንቲ አቶ ቢረሰው አምሳሉ 12 አሜታስ ኬቤሊው አሬክጝፃንቲ ሹማጊሊ ያኼካማ እንፃኽስቴካማጊ አግስታንኩ አኽⶓ እንክርፄካ::

ክዳማጃ ኬቤሊዳ ጊዝ ቺፋ አራኹናው ጉዳይ፣ ድንቤሩ ክስ፣ ውርሱ ንብሬት ክስ፣ ጄርካው ኬሌብ፣ ዳዴኹ ወንጄሉ ክስ እንቲታኪ መኪና አዳጊስ ፌቴርስታው ክሱ አይኔትካጊ ባንጂ ወረዳው ፍርድ ጝናስ ክስስ ዲጋንኩ ጉዳይካ አኽⶓ አቶ ቢረሳው  ጉሽካ::እኒጛ ጉዳይካ ኩፅኒ እጂኹ ቹዋ ታብሉ ሹማጌልቱ ዳድስ ኽይስታንታ ፍርድ ጝና ክስ ዲጋኒኪ ያኻ ቤዴራ ክስ ዲጋውላ ሹማጊሊ ጎሌልስታማ አስሜምጝፄካማጊ አግስታንኩ አኽⶓ ድኹዌካ::

“ሚንቾ ጊዞ ፍርድ ጝና ዲካታ አሬክጝፃታ ፍርድ ጝና ትዛዞ እዬ” ኑንኩ አቶ ቢረሰው ኬቤሊው እዝብኪላ ሹማጌልካስ እያው ክብር ሊሊቲ አኽጝስ ቤዴልስታንቲውሳስታ ቤዴላንቲውሳ ውኖ ማራማርጝስ ፍታዌ ሹማጌልካውሳ ውሳኔ እይካማጊ አኽⶓ ቶኬምካ::

ሹማጌልካ አስሜምጝፁኑሳ ውሳኔኪላ እጋዊ ዳድስ ፍርድ ጝና ዲግስጝስ ፄዴክፅካማ እምፕልታቑ ችግር ሳሴርስ ኽይስታታ ታምቦጊ ፊትጜካማጊ አኽⶓ ዙሜካ::ፍርድ ጝናኪላ ያኹኒ ዲጋው ክስ ቤዴራማ ሹማጌልካስ ካንትስታታ እያው ትዛዝ ይስጛማ ሲፋኒ እምፕልታቖ እን ዙራኽ እስታቲው ክሳሪዴስ ፍሽጝስ ካሊስታው አኽⶓ ቶኬምካ::

አቶ ቢረሰው ጛው ይወቱ እንዝጚዳ ሹማጌልካ ያኼካማ እንፃኽስታኒስ ጌቴማው ሚንች ፍታኒ ዝኩⶓ ጉሽጝስ ሚንችካው ቤዴልስታ ሴንቲ አሴስስታማ ውኖ እሚካማ አሬክጝፃኒ እንቲታኪ ድኪ ፂዊስ ፋይጛሺንኩ አሬክጜካማ ሰላምስ ዝኩዋኒስ ካንታኒ ሼውዴስ ዴስናንኩ አኽⶓ ዲብስካ::

ባንጂ ወረዳ ፍርድ ጝናሱ ፕሬዝዳንት  ግርማው አጋሉ ላጛ አይኔታ ሹማጌልትጙ ቴርት ዝኩⶓ ጌሌፅካ::እንጚስኪላ ክስ ጄሜርስታውላ ጉዳዮ ሹማጌልካ ዎሴንካማ ፍርድ ጝናዳ ፄዴክፃኑስታ ፍርድ ጝናዳ ዲግኹ ክስ ሹማጌልካስ ካንትስታታ እይስታው ትዛዝስ ካንትስታው ሹማጌልትጙ ቴርት ዝኩⶓ ጉሽካ::

ፍርድ ጝናዳ ሽምግልኒስ እይስታው ጊዙ ጌዴብ እላቲው አኽⶓ ጉሹንኩ ፕሬዝዳንት ግርማው አጋሉ ፍታብሄሩ ክርክሪዴስ ጝን አቑ፣ ብቲው፣ ጌንዜቡ ጉዳይካው ዙሪዳ ዲጋው ክስ ሚንቾ ጊዞ ሹማጌልካስ ኽይስታው አኽⶓ ጉሽካ::ወንጄሉ ክስኪላ ወንጄሉ አይኔትታስታ ይዝኩትታ ሹማጌልካስ ካንትስታማ ኽይስታማጊ ፍርድ ጝናዳ ዝኩኽሳ ቻኒስቶ ኽያማጊ አግስታው አኽⶓ ጌሌፅካ::

ፍርድ ጝናዳ ዲጋው ዋሺኒኪ ክስ ሹማጌልካስ ካንትስታማ እርክስ አሌድስታኒ ፍርድ ጝናሱሳ ጊዞ፣ ጌንዜቦ፣ ክብስጝዴስ ጃላ ፍቱሳ አምንስታንቶ፣ እምፕልታቑሳ ሰላማዌ ታምትጜ እንቲታኪ አጌላጌልስታንትካ ፍርድ ጝናዳ ፍሻኑሳ ዋሺኔኪ ፍሼ ይጉፅጝስ ካሊፃው አኽⶓ ኽይትጝፄካ::

“ክስዳ ዊፃንቲስታ ዊፅስታንቲ ዝኩኽ አኽጝስ እምፕልታቑ ታምትጚዳ ችግር ዝኩጝስ ካሌ” ኑንኩ ፕሬዝዳንት እንግዳ ሹማጌልትጝዳ ኩፅኒ ላንጊጊ ዊፃንትካ አኽጝስ ካሊፃውሳ እርኩሳ ቴርቶ እምፕልታቕ ቴኬምስታንታ አስሜምጝፃንቲ ችሎት ቲሪትጛማ ፍቶ ቼሜትጝፅጙ ቴግባር አኮሜችስታማጊ አኽⶓ እርዳትፅካ::

ባንጂ ወረዳ ፍርድ ጝናዳ 2017 ም/አሜታዳ 5ሻይ 588 ሜዝጌብ ፍታብሄሩ ክስዳ ዲጋማ 6 ሊኻ 35 ሜዝጌብ ሹማጌልትስ  ቼሜትጝፄካ::

ፍንሾስኪላ ሹማጌልትጝስ ባይላዊ ፍርድ ጝና ቲሪትጝፂው አዋጅ ፄዴክⶓ ሲፋማ ሹማጌልካስ እጋዊ አቕስት እይስታማ ፍቱ አምንስታንትዳ ታምቦ ፊትጛንታ ፄውስታው አኽⶓ ቶኬምካ::