ዜሩኑሳ አፔሱንኩ

አለሚቱ የኔት

አማኻሪ ክልልዳ ጌቴሙኽ ፄትቲው ችግር ፌዩንኩ ላጛ አሜታኻዳ ክንቲው ዜርፍዳ ዳንጉዊኔ ፌቴራማ እጄ::ክንታንትካ እንፃኺታስ እንጉስቱኑሳ ታምጝስ  ካላቲንታ ፅንጋኻ ያኻማ ፌያ::ክንቱኑሳ ክንቴ አሊዴ ታምብካማ ኽሳንቲ ክንቲውሳ አቾ ቱጝስ ካሊፃውሳ ፍታኔ ካፅጝስ ጌርክ ታምብምባ ማንዳኒስ እሺንኩ ሚንችካ ክንታንትካው ቲኹዋኪላ ሳኪትጛውላ ጊዝ ፌያታ ፄውስትካ::ልቓስኪላ ሰላም ዝኩክ ዙራሙርካዳ አግስታንኩ ክንታንትካ ኩፅኒ ዝኩኽ ሰላሙ ዳንጉዊኒ ፅንጋኽሳውላ ችግሮ ቲሪትጜካማ ኬሻንቴ ዋይሜ ሜዜጌብፅካማ ሽልማቲስ ቢኩንኩኪላ ዝኩና::

አማኻሪ ክልሉ ክንቲው ቢሩኪላ 2017 ም/አ ፌቴንስታንትካ እሺንኩዴስ 500ዴስ ጃላ ያጉንኩ ክንታንትካ ክቻዴስ እንጃቢሪ ኬቴምዴስ አገው ምድር ክንቲጝናሱ ክንታንታ ገሊላ ዘሙኑ እይስትኹ ሽልማቲ ልፋቱ ዋይሚስታ እንሳ አግፅጝስ ፄውስትኹ ፅሬትስ አግፂኹ አኽጝስ ዴስቴና አኽⶓ አውጚው ኦንላይንሊ ፄውትኹ እጂጚዳ ዲብስታ::

ክንታንታ ገሊላ እስጜ ክርፄ ዋይሜ ሜዜጌብፅጝስኪላ ጝናቕ ፄውኑ ፍሺ ኬፍቲኒ አኽⶓስታ ጝናቑ ሲፋሲፍጚ ጄርካስ ፋይፃንቲ አኽⶓ ካንትፃው አኽⶓ ዙሜ::ጝናቑ እርዳቲዴስ ድምክና ጛርቱ ፅሬት፣ ክንቲ ጝናሱስታ እንጃቢሪ ዩኒቨርሲቲው እርዳቲኪላ ጛሬ ካሉኽ ታምብ ዝኩኽ አኽⶓ ቶኬምታ::

ፍንሾስ ክንታንኩ ክንታንትካኪላ ጛጂስታ ክርፄ ዋይሜ ሜዜጌብፃንታ ፂኒስጙሳ ሴሎ ኪስጝስ ፂኒስጝ ፋይፃንቲ አኽⶓኪላ ክንታንታ ገሊላ ዙሜ::ውላጊ ፂኒስጙስ ሴሎ ጐሌላማ ትኩታ ፄውጝስ ፂኒስጝ ኬሻንቴ ዋይሜ አግፅጝስ ጉላሊ እላቲው ዳድ አኽⶓኪላ ቶኬምታ::

ዛጉዌ ኬፍቲኒ ላጛንቲ አች ክንቲጝናዴስ ሽልማቲው ቴርትዳ አግስትኹ ክንታንቲ ልደቱ ደረጀ ክልሉ አችስ ሽልማቲስ ቢኪጝስ ዴስቲኒ አኽⶓ ዲብሳ::ኬሻንቴ ዋይሜ ሜዜጌብፅጝስኪላ ኬፍቲኔ ፅሬቶ ፄውጝስ ቤዴራ ቴርቶ ፄውⶓ እንክርፃ::ቹዋ ታብልስታ ክንቲ ጝና ፄዋኒስ እሺኑ እርዳቲኪላ ኬፍቲኒ አኽⶓ ዲብሳ::ክንቲ ጝናዳ ክንቲ ሜሳርካውሳ ዳንጉዊኔስታ ሰላሙሳ ችግሮ ቲሪትጝጝስ ፅናትዳ ፄውኽ ልፋትስ ናካዳ ኬሻንቴ ዋይሜ ሜዜጌብፃማ ሼሌምስትጝስ ቢኪⶓ ዙማ::ክንቴ ክንታኒስኪላ ጛጛርትጛሳ ችንኬትዳ ሚፅጝ ቱስታቲውስታ ፍትኽ ንካማ ክንትጝ ቱስታው አኽⶓኪላ ክንታንቲ ልደቱ አሳቦ ቤንጝፃ::

እሊት ሼሌምስታንታ እሌኒ መሃሪኪላ ኬሻንቲ ዋይሜ አግጝስ ሼሌምስትጝስ ካሊትያኽ::ሰላሙ ዳንጉዋኒስኪ ያኻ ሊሊትጙንኩ ምክንያትካስ ሾፌንጝስ ካሊስትካያስኩ ክንቲው ጊዝካዋ ጝናኻዳኪ ያኻ ሜፃፍ ጝናዳ አግስታንኩ እርዳታንትካ ሜፃፍካዋ ፂኒስጝስ ክችስጝስ እንስ ዋይሚስ ታምብⶓ ዲብስታ::

ጚው ልፋትዴስ ድምክና እንጃቢሪ ዩኒቨርስቲኪላ ኬሻንትካ ክንታንትካዋ ጐሌልጝስ እርዳቴ ፄዋሺኹ አኽጝስ ናካዳ ሽልማቲስ ቢኪጝስ እሺኹ ታምብ ልቓ ጋቲው አኽⶓኪላ ክንታንታ እሌኒ ዙሜ::ክንታንትካ ምግባር ፅንታስ ጉዳ አኽጝ ፋይፃንቲ አኽⶓ ቶኬምጝስ ውላስጊ ጊዞ ቱስቲስ ቴኬምስትጝስታ እክድስ  ጉስስትጝኪላ ፋይፃንቲ አኽⶓ ቶኬምታ::

ክንታንትካው ዋይሚ ኬሻንታ ያኻታ ታምብ ዝኩክ ቤንካ ክቻዴስ ቹዋ ታብሉ ታምብኪላ ቲኪስታቲውሳ ፍሼ ፄዋውያኽ ክንታንትካው ሽልማቲው ቴርትዳ አግስቱንኩ ሼሌምስታንቲ ጄር ዝኩክ እንጃቢሪ ኬቴሙ ዝኩዋንቲ አቶ ነጋ ወባየ ኑኑውስታጊ ጄር ኬሻንቴ ዋይሜ ሜዜጌብፃታ ፄውጝስ ክንቲስ እርዳታውሳ ሜፃፎ ቴርስጝስ፣ ሳቶ ቤንጝፃማ ፂኒሳታ ፄውጝስስታ ኢንተርኔትስ ያኻውሳጊ ዋኽትጝፅጝስ እሺኹ እርዳቲ ኬፍቲኒያኽ::ጝናኻዳኪ ያኻ ክንቲ ጝናዳ ፋይፃንኩ ዲብካዋጊ ዋኽትጝፅጝስ ሼዎ ዋኻማ ክንታታ ፄውጝስኪላ ኬሻንቲ አኺኒ እሺⶓ ዲብስካ::ጝናኻዳ ፂኒሳማ ኬሻንቴ ሼውቴ እሜታ ፄውጝሾስኪላ ፂኒስፅጝስ ካሉኑሳጊ እርዳቴ ፄውንኩ አኽⶓ አቶ ነጋ ድኹዌካ::

ጄርካ ኬሻንቴ ዋይሜ ያጋንታ ምግባር ፅንታስ ሌጌፅጝ ቱስታው አኽⶓኪላ ቶኬምካ::ክንታንትካስ ጉዳጋውሳ ኩስጜ ፌያፌይጝፃንኩስታ ክንቲዴስ ፅንጋኽታንታ ፄዋንኩ አፄብካዴስኪላ ጄርካዋ ማንዲጝ ቱስታው አኽⶓስታ እንታኮውሳ አሳቦ ቤንጝፃንኩ ዴሜካ እን ኬርትኹ ታክስጚዴስ ጛጛርትጛሳ ክብሳንታ ታክስፅካ::

አማኻሪ ክልልዳ 2017 ክንቲው ዝቤንስ ዩኒቨርስቲሾ ቱጝስ ካሊፃውሳ ፍታኔ ፌቴንስቱንኩ 94 ሻይ 668 ክንታንትካዴስ 452 ክንታንትካ 500ዴስ ጃላ ዋይሜ ሜዜጌብፅጝስ ካሉንኩ አኽⶓ ክንቲ ቢሩው ንባር ቶኬሜ::እኒ ክንታንትካስኪላ ክልሉ አችስ ይስጝፂው ሽልማቲስታ አቕስቲው ቴርት ካስጛ::እን ቴርትዳ አግስቱንኩ ትክትሊ ቺፅጝፂ ጛራው ማሬግስ ማቤራዊ ዜርፉ ቴቬቬርጝፃንታስታ ክንቲ ቢሩው አላፋ ሙሉነሽ ደሴ (ዶ/ር) ንጙዊኒ ክንታንትካው ዋይሚ ፌይኹ አሜትሊ ካንትጛኒ ኬሻንቲ ፌፄምጚ ካንትስትⶓ ጌሌፅካ::እን ሳኪትጚው እንዝጚኪላ ይጉዋቲውስታ እንዝጚው አባላምቲጉ አሊዲ ጋቲው አኽⶓ ቶኬምካማ እንዴስ ኽስኹሳ አግጝስ እንፃኽስትጝስ ሲፋንኩ ክንታንትካስ ምሳላ አኽጝ ቱስታው አኽⶓኪላ ጉሽካ::

ፌዩንኩ ሹኻ ክንቲው ዝቤንካዳ ኪንዴስታ አንዴስ ጃላ ዋይሜ አግጝስ ዩኑቨርስቲሾ ቱጝስ ካሉንኩ ልቓ ቼፍ ዝኩክ አኽⶓ ቶኬሙንኩ ዶ/ር ሙሉነሽ 2017 ክንቲው ዝቤንስኪላ ክልሉ መንግስቱ ክንታንትካ ሊሊቴ ቴርቶ ፄዋንታ እንፃኽስስትጝስ ኬሽጝጚ ካንትስትⶓ ጌሌፅካ::ክልላኻዳ አግስታንኩ ላጜታ ክንቲ ጝንካ ዋኽስ ዋኾ ፌቴንስቱንኩ ክንታንትካዋ ፌይፅጝስ ካሊⶓኪላ ዶ/ር ሙሉነሽ እርዳትፅካ::ክንታንትካው ዋይሚ ኬሻንታ አኽጝስኪላ ቹዋ ታብልዴስ ጄሜራማ አች ቺፋ አግስታንኩ ቤንካስጊ ምስጋኔ ዲግስካ::

ፌቴሪ እሊው ዝቬኑ ክንታንትካዴስ ማንዲስታው አኽⶓ ጉሽካማ ችግርካዋ ኽይጝስታ ፌይጝስኪላ ቴርቱንኩ አኽጝ ፋይፃንቲ አኽⶓ ዶ/ር ሙሉነሽ ቶኬምካ::

አሌሙ አቩቑ አጌር አቕ አኽጝስ አኼንካዋ እርዳትስትጝስታ ይወትሊ ፃምርሳማ ቴኬምስትጝ ክንታንትካዴስ ማንዲስታው አኽⶓኪላ ኩስጝፅካ::ክንታንትካዋ አቕትስ፣ ካሊጝትስስታ ምግባርፅንታስ ክንትፃማ ሌጌፅጝስ አጌሮ አሬኬብስታንታ ፄውጝስ ቹዋ ታብሉ፣ ምንግስቱስታ ታምብዌንካ አካልካው አላፍት ኬፍቲኒ አኽⶓ ጉሽካማ ፍንሾስኪላ አላፍቶ ታኬታኑውላ ፊትጛንታ አዴሮ እይካ::