ቻይናውያንካው ብሄራዊ ጌርኩ ኪቢርጚ

አለሚቱ የኔት

ቻይናውያንካ ፌሬንጅካውሳ ትክምቲ እምፕል ጌርኩ ብሄራዊ ጌርክ ፄዌካማ ኬቤርፃና::አ.ዝ.ቼ 1949 ቻይናው እዝባዊ ሪፐብሊክ ቲሪትጝጙስ ሊከመንበር ማኦ ዜዱንግ ቤጂንግ ቲያመኑ አደባባይዳ ብሄራዊ ጌርክ ናካኽ ኑኑ ስሬታስ ናካሳኺስታ ብራማ ኬቤርስታማጊ አኽⶓ ሲጂቲኤን ዜጌባ::

ባል ሌኽ ሚሊዮን ቻይናውያንካሾስ እንጉስ ማንዲስታው ባልያኽ እጂጚኪላ እምፕል ሶኼቶ ላካሳ ያኹስ ጊፁ፣ ትራንስፖርቱስታ ቱሪዝሙ ዜርፍካ ዋሽኒኪ ጊዝዴስ ጃላ  ኒኪትጛኑ ወክትያኽ::

እን ኪቢርጚው ሶኼትዳኪላ እንፅኺ ልምቲ ያኹስ፤ እን ጌርክስ ቤዴርካማ ቻይናውያንካ እንፃኽስታንትካ እስጜ ጊዞ ስጙትጝፅጝስ ቤዴርንካማ ሚዲቢኒ እንፅኺው ሳትዴስ ሴጋ ድምክንካ ጊዝካዋ እንፅኺዳ ፌይፃና::

ቻይናውያንካ እንጚ ወክትስ አሌምዳ ኽሳንቲ እስታውሳ አጌራኻሱሳ እንዝጜ ፄዋንኩ ያኹስ፤ ግዲታው ፍትሬት ዝኩክ ውታኽካ፣ ካንካስታ አኹ ቤንካዳ ካስጝስ ፍትኽናና::

እንጚሱ ጊዝስ ትራንስፖርቱ ልቕልቕቲ ባቡርስ ይቪቻ 7 ጌርካኻዳ 219 ሚሊዮን እንዜጛንትካ እንዜጛንኩ አኽጝጌሌፅስታ::

እንጚ ሶኼትዳ ጌፄሩ ዝኩዋንትካ ኬቴምሾ እንዝጜ ፄዋንኩ ያኹስ ብሄራዊ ጌርክካዳ ርችቱ ቴርት፣ ውታድራዊ ሴልፍስታ ታሪካዊ ብትካ ጐቤንስታና እንጚ ወክት ቻይናዳ ቱሪዝሙ ማይቤል እስታማኪላ አቕስቴ::

ሚንችካ ጐቤናንትካኪላ እንጚሳ ትርኢቶ ጐቤንጝስ ሊሊትጙንኩ አሌምኩ ቤንካዴስ ቻይናሾ ይንታና::ብሄራዌ ጌርኮ ቱሪዝምስስታ እሊኩ አገልግሎቴ እያንኩ ኾትካስ ኒኪትጝፂው ጊዝታ ቼፍስቴት ቻይና ሚንችካዋ ጌሬምፅጝዳኪላ አግስቲ::

ንባሮ አግፅንኹኪ በኩር ጋዚቲዴስያኽ::