እስካዊ ደሞዚው ድምክኒ ዝኩዊኒውሳ ክብርናቴ ባስጝፃማጊያኽ

ታደለ አጋጄ

ምክንያታ ጋቲታ ሼኬትዳ ፄውስታው ዋይሚው ድምክኒ ዜሬቕቲኒ ሚፂስ ቺትጛንኩዳስታ ምንግስትኩ እንፃኽስታንትካዳ ኬፍቲኔ ቻኒስቶ ታምፃማጊ አኽⶓ እንጃቢሪ ኬቴሙ ቺፅጝፂው ምንግስቱ እንፃኽስታንትካ ዙሙና::

እንጃቢሪ ኬቴሙ ቺፅጝፂው ምንግስቱ እንፃኽስታንቲ አቶ በጐሰው ጌታሁን ቤዴራ እሺኹስታ ናካዳ ዝኩኽ ዝኩዊኒው ክብርናቲ ታምትጛቲው አኽⶓ ዙሜካ::

ጊዝ ቺፋ ሼኬትዳ፣ አሪዳስታ ጝን ክራያዳ ዋይሚ ዴሜካማጊ አግስታው አኽⶓ ቶኬምካ:: ቤዴራሱ ጊዝዳ ኩፅኒ ዝኩዊኒው ክብርናቲ ኬሴትስታው ጌቤልዳ ምርቱ እንፂጝ ጌቴማኒ ይቪቺ አኽⶓ ጉሽካ:: ምክንያታ ጋቲታ ሼኬትካዳ ፄውስታው ዋይሚው ድምክኒ እምፕልታቑ ዝኩዊኒዳ ቻኒስቶ ታምፅⶓ ዲብስካ::

ዝኩዊኒው ክብርናቲዳ ቻኒስቶ ታምፃማጊ ዝኩኽ ኢንዱስትሪስ አሜሬትስታው ሼኬትካዳ አኽⶓ ቶኬምካ:: ሼኬትዳ ዋይሚው ድምክኒ ዝኩዋኒ ግብርኒው ምርትካዳ ዋይሚ ዴሜካታ ቻኒስቶ ታምፃው አኽⶓ ዙሜካ:: ግብርኒው ምርትካዴስ ዴሜካ ቡንስታ ቤርቤርዳ ናካዳ ማልጛ ክብርናቲ ዝኩⶓ ጉሽካ::

ዝኩዊኒው ክብርናቲ ዴሜካማጊ ካስጝ እንግራ ሰላሙሳ አኺኒ ባስጝፃው አኽጝስ ጌፄንካ ሊሊትጙንኩ ምክንያትካስ ሼኬትዳ ዋይሜ ዴሜክጝዴስ ኪቻ እምፕልታቕዳ ጉዳቶ ታምፃቲው ዋይሚስ ዋይጝስ ጊፅስጝ ቱስታው አኽⶓ ታክስፅካ::

ምንግስቱ እንፃኽስታንትካስ ደሞዚ ዴሜክስትኾ ንካማ ደሞዚ ታፍዳ ታምባውላስ ጌፄንካ ዋይሜ ዴሜካንኩ አኽⶓ ዙሜካ ዝኩዊኒውሳ ክብርናቴ ካላካልጝጝስ ሾሜታንትካ ማቤርካስ ሊሊትጙንኩ ምርትካ ዲጋንታ ፄውጝ ቱስታው አኽⶓ ቶኬምካ::

ዝኩዊኒው ክብርናቲ ኬፍቲኒ አችስ ቻኒስቶ ፌቴርጝ ጝን አቑሳ ሰላሞ አቲስⶓኺስታ ታምፃማጊ አግስታው አኽⶓ ዲብስካ::

ዝኩዊኒው ክብርናቲ ዴሜካቲታ ሼኬትዳ ዋይሜ ዴሜካንኩ ጌፄንካዳ ምንግስትስ ትኮሜ እይጝስ እምፕልታቕ ጛውሳ ታምቦ ፊትጝጝ ቱስታው አኽⶓ ጉሽካ::

እሊው እንጃቢሪ ኬቴሙ ቺፅጝፂዳ ምንግስቱ እንፅኺዳ እንፃኽስታው አቶ ደምሰው ወርኩ ዝኩዊኒው ክብርናቲ ልቓ ሚፂ ዝኩክስታ ጝኖ ክራይቴካማ ዝኩንኩ እምፕልታቕዳ ቻኒስቶ ታምፅⶓ ዲብስካ::ኢንዱስትሪኩ ምርትካዳ ኬፍቲኒ ያኹኽ ዋይሚው ድምክኒ ዝኩⶓ ቶኬምካ::

ሚንቾ ጌንዜቦ እሚጝስ ጌቤላ ካሳኒውላ ልቓ ምርቶ ጄውፃው አኽጝስ እምፕልታቕ ዝኩዊኔ ጉስጝስ ቼጌርስትካማጊ አኽⶓ አቶ ደምሰው ዲብስካ:: ሰላሙስታ ፄትቲው ችግር ሚንችካ አቖ እንፃኽስትካማ ዝኩዋቲንታ ፄውጝ፣ ብሩስታ ዶላሩ ታምትጚ አቲጝ፣ ሚንችካ ምንግስትኩ እንፃኽስታንትካ ጝን እላቲኩ አኽጝ ዝኩዊኒው ክብርናቲ ጊዝ ቺፋ ዴሜክጝስ ምክንያታ አኽⶓ ቶኬምካ::

ምንግስት ጌቤሎ አሬኬዝፃንኩሳ ኮሜቴ ቲሪትጝፅጝስ ጌቤሎ ዴሜካንኩ ጌፄንካዳ እርምጂ ካፅስታታስታ ቤፍፁኑሳ ምርቶ ፍሽካማ ዋያንታ ፄውጝ ቱስታው አኽⶓኪላ ዙሜካ::

አዊ ብሄረሰቡ ቺፅጝፂው ጊፁስታ ጌቤል ልማት ሜምሪው አላፊ አቶ ያረጋል ያየህ ብሄረሰቡ ቺፅጝፂታ ሾሜታንትካ ማቤርካስ 90 ሚሊዮንዴስ ጃላ ባጄት ሜዴብስታማ ኢንዱስትሪውስታ ግብርኒው ምርት እምፕልታቕስ ታምባታ ፄውጝስ እንፃኽስስታማጊ አኽⶓ እርዳትፅካ::

ዜሬቕቲኒ ዝኩዊኒው አችዳ አግስታንኩስስታ ምንግስትኩ እንፃኽስታንትካስ ትኩት እይስታማ ሜቴቴንጙኽ ዋይሚስ ጌቤልትጚ ፌፄምስታታ ፄውስታማጊ አኽⶓ ጌሌፅካ::

ምክንያታ ጋቲታ ሼኬትካዳ ዋይሚውሳ ድምክኔ ፄዋንኩ ጌፄንካዳ ቼፍጝጛውሳ ግብር ሀይሎ ቲሪትጝፅጝስ እንፃኽስስታማጊ አኽⶓ ጉሽካ::

ብሄረሰቡ ቺፅጝፂታ 1ሻይ 2 ሊኻ ፅካዴስ ጃላ ጌፄንካ ቱስታ ጋቲው ዳድስ ዋይሜ ዴሜኩንኩዳ ዋይሜ ክችሳንታ ፄውስትⶓ ጌሌፅካ:: ምርቶ አሜሬታንትካስታ ሾሜታንትካ ኩቲስ ኩታ ታምትጛንታ ፄውጝስ እንፃኽስስታማጊ አኽⶓ ቶኬምካ:: ሊሊትጙንኩ ዩንየንካስ ሽኩዋሩስታ ፄጌርጙንኩ ምርትካ እምፕልታቕስ ዲግካማጊ አኽⶓ እርዳትፅካ:: ዝኩዊኒውሳ ክብርናቴ ባስጝፃንኩ 800 እጋፍካ ጌፄንካዳ ኩርማን አሜትዳ አሼግጙሳ እንፅኼ እንፃኽስትጝስ እጋዊ እንፃኽስትጝጚሾ ቱዋንታ ፄውስትⶓ ኽይትጝፄካ:: ብሄረሰቡ ቺፅጝፂታ ችግሮ ፌቴራንኩ ጌፄንካ እላ አኽⶓ ጉሽጝስ ችግሮ ፌቴራንኩ ዝኩዋኒ ኩፅኒ እርምጂ ካፅስታው አኽⶓ ቶኬምካ::