ኬውጝፁንኩ ክንቲ ጝንካ እንፅኺሾ ቱዋንታ ፄውስታውያኽ

አለሚቱ የኔት

አዩ ጉዋጉሲ ወረዳዳ አግስታንኩ ክንቲ ጝንካዴስ 14 ክንቲ ጝንካ ክንትጝ ክንትፅጙሳ እንፅኼ ጄሜርካያስኩ አኽⶓ ወረዳው ክንቲ ፅ/ጝና አቕፁኻ::

ክንቲው አላሚ አቒ ጄራ አንቤብⶓ፣ ፃፊⶓስታ አሴልⶓ ክንትጝስ ካላታ ፄውጝዴስ ፌይኹስ ኬሻንቴ እምፕልታቕ አፌርጝ ናማኪ አጌራዋ አድርፅጝያኽ:: ፅንጋኽካ ጌቴማኒ ዴሜካ እን አላሚ ሳኪትጛቲታ ፄውጝ ይጉዋላኪ::

አማኻሪ ክልልዳ ላጛ አሜታዴስ ጃላ እሺኹ ሰላም አቲጛ ዴሜካ ብሄረሰቡ ቺፅጝፂዳ ክንትጝ ክንትፅጙሳ ካስቶ ካስጝፅጝስ ፅንጋኻ ያኻ:: አዩ ጉዋጉሲ ወረዳዳ ክንትፅጝስ ካሊስታው ሰላም ዙርጝስ ካሊስታውላ ይጉጝስ ወረዳዳ አግስታንኩ 64 ክንቲ ጝንካ ክቻዴስ 14 ክንቲ ጝንካ ክንትጝፅጝሾ ቱዌካያስኩ አኽⶓ ወረዳው ክንቲ ፅ/ጝናሱ አላፊ ወረደ በየነ አውጚው ሬዲዮንስ ስልኪስ ጌሌፅካ::

ክንትጝ ክንትፅⶓ ጄሜርካያስኩ ክንቲ ጝንካዋ ቴግባርሾ ቱዋንታ ፄውጝስ ክልልኪ ያኻ ብሄረሰቡ ቺፅጝፂ እይኹ ዳብዚ ስሬታስ ክንቲ ጝንካው ጛርካ፣ ኬቤሊው አመራርካዋስታ አጌርሹማጌልካዋ እምፕልዳ ኩስጜ ካስጝፅⶓ ጉሽካማ ክንቲ ጝንካ ብስስታንታ ኩፅኒ እምፕልታቑ ፋይኪላ ኬፍቲኒ አኽⶓ አቶ ወረደ ቶኬምካ::

2017 ም/አ ክንቲው ዝቤንዳ ወረዳታጊ 33 ክንቲ ጝንካ ክንትጝ ክንትፅⶓ ካስጝፃኒስ እሺንኩ አኽⶓ ጉሽካማ 2018 ም/አ ክንቲው ዝቤንስ ዴሜካ 11 ልምትካማ እጂንኩ ክንቲ ጝንካዋ ክንትጝ ክንትፅጝሾ ቱዋንታ ፄውጝስ ካሊⶓኪላ አቶ ወረደ ጌሌፅካ::

ሰላሙ ችግር ምክንያታስ ወረዳዳ ጉዳት ታምቡክ ክንቲ ጝንካዋኪላ ክንትጝ ክንትፅጝስ ካሊፃንኩ ሜሳርካዋ ዋኽትጝፅጙ እንፅኺ እንፃኽስስታማጊ አኽⶓ አቶ ወረደ ቶኬምካ::

ሰላም አዌክስትጝሊ እምትጛማ ብሄረሰቡ ቺፅጝፂታጊ ሚንችካ ክንቲ ጝንካ ክንትጝ ክንትፅጙ ቴግባርዴስ ፅንጋኽታንታ ፄውስታ:: ክንቲ ሜምሪው ትክትሊ አላፊ ወንድማገኝ ማኔ ጌሌፁኑውስታጊ ብሄረሰቡ ቺፅጝፂዳ አግስታንኩ 663 ክንቲ ጝንካዴስ 425 ክንቲ ጝንካ ክንቲውሳ ቴግባሮ ካስጝፅካማጊያኽ::

2018 ም/አ ክንቲው ዝቤንስኪላ 2017 ም/አ ብስስትካያስኩ ሌኻ ያኻንኩ ክንቲ ጝንካዋ ብስፅጝስ ካሊስትⶓ አቶ ወንድማገኝ እርዳትፅካ::

ልምቱንኩ ክንቲ ጝንካዋ ብስፅጝሰኪላ ክልሉ አችስ ካስጙኽ ኩስጚዳ ውላጊ ትኩታኩ ቤንካ አሴቴፍጝⶓስታ ብሄረሰቡ ቺፅጝፂዴስ ጉሽፃማ ኬቤሌኺታ ምስሊ ኩስጚ ካስጛማ ብስስትጝስ ካሉኽ አኽⶓ አቶ ወንድማገኝ ጉሽካ::

ውላጊ ክንቲ ጝንካ ካሊስታው አክምስጊ ብስስታንታ ፄውጙሳ እንፅኼ እንፃኽስትካማጊ አኽⶓ ቶኬምካማ አክምዴስ ጃላ ያኹኒ ኩፅኒ ሰላም ዝኩኽስታ ዲጊ ያኹኽሾ ክንታንትካ ካስካማ ክንታንታ አሜችጝፅካማጊ አኽⶓ ጌሌፅካ:: እንሳ ፄውጝስኪላ ቡይዳ ሹኻ አሜታስ ክንቴ አቴካማ እጂንኩ 2 ሊኻ ክንታንትካዋ ቹዋ ታብሊስታ ክንትፃንትካሊ ኩስጝጝስ አገው ግ/ቤት ኬቴምሾ ይንቴካማ ክንታንታ ፄውጝስ ካሉንኩ አኽⶓ አቶ ወንድማገኝ እርዳትፅካ::