ትኩቶ ፋያው ክንቲ ዲቫ

ክልልዳ ፌዩንኩ ላጛ አሜትካዳ ሜዜጌብስትካማ ክንትጝ እሺኩ 13 ሚሊዮንዴስ ጃላ ክንታንትካዴስ ላጜታ ሚሊዮንዴስ ጃላ ክንታንትካ ክንቲው ማድዴስ ሴጋ ያኼካማ ችኽⶓ ክልሉ ክንቲ ቢሩ ንባር ካንትፄ፡፡ እን ያኹኽኪላ ክልል ጌቴምኹ ዱንጊቲስ እርዳትስትኹ ጋቻው ምክንያቲስያኽ፡፡

2018 ክንቲው ዝቤንዳኪላ ላንቡሳኺስታ ፄውስትኹ ጉዳት ዙራታ ታክስስታማ እንፅኺሾ ቱስቱኒኪላ ላጜታ ትኩሚ ሴዛ ሚሊዮን ክንታንትካዋ ሜዜጌብጝስ እክድ እምስታማ ሹኻ ትኩሚ ሶኼታ ሚሊዮን ክንታንትካ ይቪቻ ሜዜጌብስትⶓ ክንቲ ቢሩው አላፋ ሙሉነሽ ደሴ ዶ/ር እንማቻ እዩኑ ዙሚዳ ጌሌፅካ፡፡ እን ካንትፃው ዴሜካ ናካኪላ ክንታንትካዳ ሰላም እንኮኽስታማ ፋያኑሳ ክንቴ ሼውታ ክንትጝስ ካላቲንታ ፄዋውያኽ፡፡ እንሳ ሰላም አቲጛሳ ይጉፃማ ክንቲው ቴግባር ክችጛማ ካስጛታ ፄውጝስ ውላውሳጊ አሪባሪብጜ ፋያውያኽ፡፡ ሜዜጌብስቱንኩ ቱስቲስ ክንቴ ሲፍጛንታ ፄውጝስ ዴሜካ ጋቻ ምክንያታስ ፌሬሱንኩ ክንቲ ጝንካዋስታ ዳንጉንኩ ክንቲ ጝናሱ አክኽካዋጊ ምንግስትኪ ያኻ እምፕልታቖ ካሊስታው አክምስጊ እርዳትጝስ ክችስጝስታ ዋኽትጝፅጝ ቱስቴ፡፡ ፌሬሱንኩ ቤንካ ዝኩኒ ዴሜካ እምፕልታቕኪላ ቤዴራ ካስጝፃኑሳ ቲቪቪርጜ ፄውጝስ ፄጌንጝስ ክንታንትካ ክንቲ ጝናሳ እንካኔካማ ክንታንታ ፄውጝ ፋይፄ፡፡ ቹዋ ታብል ዴሜካ ፅሌ ምክንያቴ እሚጝስ ስራስሪ ክንቲው ማድዴስ ኬውጝፃንታ ፄውⶓ ባይጝስ ጄርካዋ ኩስጝፅጝስስታ ይስጝፅጝስ ኬውጝፃንኩሳ ክንቲ ጝና ካሳንታ ፄውጝሾኪላ እንፃኽስትጝስ ቹዋ ታብሉሳ አላፍቶ ፊትጝጝ ቱስቴ፡፡

2017 ም/አ  ይቪቻ ክንቲው ማድዴስ ሴጋ ያኼካማ እጂንኩ ስራስሪው ቼፍኪላ አፍሪካው 15 አጌርካው እዝቡ ቼፍዴስ ኽሳው አኽጝኪላ ችግሩሳ ታክስፃንታ አኽⶓ ካንትፂያኽ እስታ፡፡ እስጜ ይጉፅጝስ ኩፅኒ እምፕልታቕኪላ ልቓስኪላ ያኹኒ ሰላም ዙሩክ ዙራሙርካዳጊ ክንቲ ቱስቲስ እይስታታ ክንቲ ጝናሱ ኬምፕዳ አኽጝስ እንፃኽስትጝ ፋይፄ፡፡ እሳንስ ካንትስታው ጋቻ ምክንያታስ ክንቲው ኾትካዳ ታንቡኽ ጉዳትስ ዳንጉትጙንኩ አክኽካዋ እርዳታንትካ ቤንካዴስ ፋይጝፅጝስስታ አክም ዝኩኽኪ ካሊስታውሳጊ እርዳትጝስ  ቴግባር ዋኽትጛማ ካስጛታ ፄውጝ ውላውጊ አላፍቲያኽ፡፡ ሰላም ዙሩክ ዙራሙርካሾ ካስጝስ ክንትጝስ ፋያንኩ ስራስሪውሳ ፋዩ ዋኽትጝፅጝስኪላ ጌቴማውሳ ቤኑሳ ፄቤብጙሳ ችግሮ ኽይጝስ ድምክኔ ቤኖስታ ወንቤሮ ዋኽትጝፅጝ ውላውሳጊ አሪባሪብጜ ፋያውያኽ፡፡ ክንቲስ ፋይፃውሳ ሜፃፎ ዲግስጝስስታ ዋኽትጝፅጝሾስ ዴሜካ ምንግስት ትኩትስ እንፃኽስትጝ ቱስቴ፡፡ ክንቲ ጝና ቺፋ ታንባንኩ ሜፃፍካዋ ዴሜካ ክንታንትካው ታፍዳ ታምባታ ፄውጝስ ቴኬምስታንታ ፄውጝ ቱስቴ፡፡