ሾሬንጉ ንጉስ

ንግስቴ ተስፋ

ሾሬንግ ሚንችካ አሌምኩ አጌርካው ባይሉ ሙዚኪው /ጅሚው/ ልግስዳ ኬፍንኹሳ ታምቦ ፊትጙኽ ፊኹዊው ሜሳሪያኽ::እሊኩ ጅሚው ሜሳርካታጊ ሾሬንግኪላ ጛሬ ካሉኽ አይኔት ዝኩኽ ያኹስ ማሊፊስስታ ድምፅስ ሊሊትጛዊያኽ::

አሌምኩ አጌርካዳ ሾሬንግ ህንዱ ባይላዊ ጅሜው ታሪክዳ ኽሳንቲ ስፍሪ እይስታው አኽⶓ ንቫርካ ካንትፃና::ናኪኒ ፁፍዳኪላ ታምፅናው ሾሬንጉ ንጉስ እስታማጊ እቑስታው ኽሳንቲ ትቤቡ አቒውሳ እንፅኽካዋኽ::

ይቶፒያው ጅሚው ታሪካኻዳ ኽሳንቴ ታምቦ ፊትጙንኩ ጅሚ ሜሳሪው እንክራንትካዴስ ሾሬንጉ ንጉስ እሰታማ እቑስትጝስ ቢኩኽ ዮሀንስ አፈወርክ እምፕልያኽ::ቤዴራሱ ጎጃም አገው ምድር ፋግቲዳ 1939 ምሬት አሜታዳ እማሆይ ወለላ ተገኘስታ ኪስ አፈወርክ ጀምበሬዴስ ካሜንስትⶓ ደ/ማርኮስ ዩንቨርስቲ አርቲስቱሳ ይወት ታሪኮ ካንትኹስ ቴርስኹ ፅናትዳ ፃፊስታ::

ቤዴራሱ ማዘጋጂ ጝናዴስ ኦኬስትራ ይቶፒያዋ እንቲታኪ እዝብስ እዝቡ ጅሚው ኬችዳ ኬፍንኹ ታሪክዌና ትቬቪኒዴስ እምፕልያኽ::ሀዲስ አለማየሁስ ፃፊስታማ ወጋየሁ ንጋቱስ አንቤብስታማ ሬዲዮንስ ዲግኹ ፍክር እስከ መካብር ሜፃፍ ንፍሶ ዜራማ ሚንችካው ሼውዴስ ዜኔግስታቲታ ካሊፁንኩ ክቻዴስ ዮሀንስ አፈወርኩ ሾሬንጉ ዜሚያኽ::

ሾሬንግዌና ዮሀንስ አፈወርክ ካሜንስታማ ሌጌሱኽ ፋግቲስታ ዙራሙሪዳ ጉደርዳ ባምባማ፤ ዚንጊኒስታ ሻንቲዴስ ክምካስ አኾ ዝቕፃማ፤ ባሳኒ ዛቭዳ ክምካዋ ማንዳማ፤ ዙራሙሪኩ ስራስሪሊ ቡንካዋስታ ግምባይኪሎ፣ አንክሻዋስታ ዳባዋ ሼውታ እንክራማ ሌጌሱኽ ያኹስ ኬፍናማጊ ካሳኒ ኩፅኒ ክምካው እፍፅዳስታ አሊቬ ማንዱስ ሾሬንጐ ኮይፅⶓ ክንታ::

ዮሀንስስ ጚታላ ኪሲ እሺንኩ አኽጝስ ታብሊው ፋይስታ እክድ ዮሀንስ ብሽታኑ አጌላጌላንቲ ያኻታጉ ሸምቤኮ ኬሜማማ ሾሬንጐ ኮይፃንቲ ያኻታ ጋቲው እሺኾ::ዮሀንሱ ቴግባር ዴስፃያስኩ ኪስ አፈወርክ ሾሬንጐ ዱንፄካማጊ ሌግዳ ሚፃሺንኩ አኽⶓ ዮሀንስ ኢቲቪስ እዩኑ ካሉ ዙርሚዳ ዲብስካ::

አርቲስት ዮሀንስ ዋዚታ ክምካዋ ማንዱስ ጄሜርኹ ሾሬንጐ ኮይፅጙ ዴስ ሌጌሳማጊ አንትጝስ እስጜዋ ካሌቕቶ ካንቱንኩ ዙራሙሪኩ እምፕልታቕ አዲስ አበባዋ ካሳታ ጉሽጝፃና::ዮሀንስኪላ ቻስ ናማ ኬፄሮ እያያላኪ::እምቢትናማ ቹዋ ታብልዴስ ድሳማ ጌና 17 አሚቲ ዝኮስኩስ እሺኾ ካሜንስታማ ሌጌሱኽሳ ዙራሙሬ ባይፃማ አዲስ አበባሾ እንዝጜ ፄውኻ::

ሾሬንግ ዌና ዮሃንስ ሼምቤኮ ኮቻ ኬሜማ ቑቻማ፣ ሼምቤኩዴስ ጅሚስ አስሜምጛውሳ ዜሜ ፌኹዊሊ አስሜምጝፃማ፣ ጅሚስ ዝኩⶓ እንክራማ ሾሬንግሊ እንካንጛማ፣ ሾሬንጉ ዜሚስ አጌራውሳ ፄጌሮ፣ እዝቡሳ ዝኩዊኔ ሾሬንጉ ዙሚስ ቹኒትናና ካንትናታስታ እንግርግራ እንፅኼንቶ ታክስናታ ፍንሾ አቕናያሱ ቴስፊሾ እንዜጛንታ ፄውኽ ሾሬንግዌናኽ::

እንካንስታ ጅማንታ እጅጋየሁ ሽባባው “የሀገሬ ልጅ አልኩ እሱን ባለዋሽንቱን የወንዜ ልጅ አልኩኝ እሱን ባለ ዋሽንቱን ድምፁን ስምቼ መልኩን” ኔታጊ ጅምታው ጅሚ ሾሬንግ ዌና ዮሃንስ አፈርክስ ጅምቱኹሳጊ ፄጌሬ::

ሀዲስ አለማየውስ ፃፊስትኹ “ፍክር እስክ መካብሩ” ሜፃፍ ሬዲዮንስ ዲግሳንቲ ወጋየሁ ንጋቱስ ዲጉስ ሜፃፍስታ ዲግስጚ ግዴማ ሚንችካው ሼውዴስ ዜኔግስታቲታ ፄውኽ ሾሬንግ ዌና ዮሃንስ አፈወርኩ ሾሬንጉ ዜሚስያኽ::እንሳ ሾሬንጉሳ ዜሜ 1965 ም/አሜታ እሊኩ ዜምካሊ ይቶፒያው ሬዲዮንስ እያሺኹ ያኹስ ፍክር እስክ መካብር ሜፃፍ ሬዲዮንስ ዲጉስ ኩፂ እን ዜሚ ጐሌልስታማ እዝቡ ሼውዳ አቴምስታታ ያኻ::

ሼሬንግ ዌና ዮሀንስ አፈወርክ 60 አሜታዴስ ጃላ ሾሬንግስ ባሶ ዚንዝማማ፣ ቴስፊስ ፍንሾ እንዜጝናታ ፄዋማ፤ እንፃኺቶ ታክስናና ሽኽሽኽ እናታስታ ዙራሙሪ ቺፋ ዝኩኽሳ ውታኼ፣ አኾ፣ ካናጋሜ፣ ሌንቴ ቖስታ ወልኾ እንግርግራ ዙርጝ እናና ታክስናታ ካሊፃው ዜሚስ ሾሬንጎ እንክራ::አዲስ አበባዋ ቱታኪላ “ጅግስ ባዳስ” እስታው አፄብሊ ጎቤናንትካዋስታ ምሽጝናዳ ክምፃንኩ ፍትኽናንታ ፄውⶓ ጄሜራ::አንዴስ ፋሌንጋኪላ አፄ ሃይለስላሲ ዩኒቨርስቲዳ፣ ኦኬስትራ ይቶፒያዳ 35 ብሩ ደሞዚስ ኬፄርስታማ እንፃኽስቱኽ ዮሃንስ አፈወርክ ኬችሊ ሚንችካ አሜትካዋ እንፃኽስቱኒዴስ ፋሌንጋ ፕናችኹኒላ “ሺህ ሰማንያ” እስታማ እቑስታው ዙራሙሪዳ አግስታንኩ ክሌብካዳ እንፃኽስትⶓ ይወቱ ታሪክ እርዳትፄ::

100ዴስ ጃላ ሾሬንጉሳ ዜሜ ኬሬፅስትⶓ ቼሜትጙኽ እን ይሴን ሾሬንግዌና 1962ስታ 1963 ም/አሜታ ሊሊትጙንኩ ባርኾቼው አጌርካዳ ሾሬንጉሳ ዜሜ ዲግሳ::እንዴስ ድምክና 1970 ም/አሜታ አሌሞ ዙራዙርኹ እዝብስ እዝቡ ባይሉ ኬችዳ ውላጊ ሙዚኪው /ጅሚው ሜሳሪ ዌናስ ኪሳንቲ አኹኪ አጌዛንቲ እሺኹ ያኹስ ዮሀንስ አፈወርክ ኩፂ ጚ ይቢቺ እምፕል ሳትዴስ ጃላ ዲጋው ጅሚው ሜንድሬኽዳ ፉራ ጋቲታ ዴሬትኾ፣ ፊኹዊ እንፁኻ ናውላ ሾሬንጐ ኮይፅጝስ ካሊⶓ ወክትዳ ኬቹ ቴቬቬርጝፃንቲ ፃፊ ተውኔትስታ ደራሲ አያልነህ ሙላቱ ጌሌፅካ::

ሾሬንግዌና ዮሃንስ አፈወርክ ትላሁን ገሰሰው “እዩዋት ስትናፍቀኝ” ናውሳዴሜካማ ታምራት ሞላስ፣ አለማየሁ እሽቴስ፣ ተፈራ ካሳስ፣ ታደሰ አለሙስ ሂሩት በከለስ፣ ለማ ገብረ ህይወትስ፣ ፀጋዬ ዮሀንስስታ እሉኩስጊ አርቲስትካውሳ ጅሜ ሾሬንግስ አጄባ::እንዴስ ድምክና ኢትዮ ጃዙ ፌቴራንቲ ሙላቱ አስታትኬው ስምስ ሜዜጌብስትኹ ይቶፒያው አይር ዳዱ ሺሽፂ ያኹኽ ዜሚዳ ዮሃንስ አፈወርኩ እንፅኺ ዝኩⶓ ሜንችካ አምናና::

ሾሬንግዌና ዮሃንስ ጌርክዴስ እምፕላቺ አዲስ አበባዳ   ምሺ ጝናዳ ሾሬንግስ ሚንችካዋ ፍትኽፁስ ካንትኹ ፖሊሱ መኮንን ዮሀንስ አፈወርኮ ኮልፌ ፖሊሱ ሲሊቲንፂ ጝናዳ ካፃማ አብራ ኬፄርስታማ እንፃኽስታታ ፄዋሺኾ::ወታድሪኾ አሜቻያሱ ዮሃንስ ባያማ ፉኻ::እንዴስ ፋሌንጋ 1959 ም/አሜታ ኦኬስትራ ይቶፒያው ጅሚውሳ ኬቾ አሌቔትጛ::ኦኬስትራ ይቶፒያሊ አብርታ ዝኮስኩስ አሜሪካን ኒዮርክዳ ጅሜ ዲግሳ::

ዮሃንስ አገር ፍክር ትያትር ጝናሊ ልቓ ጊዞ እንፃኽስታ::አዲስ አበባው ማዘጋጂ ጝናሱ ትያትርስታ ጅሚው ኬችሊ እንቲታኪ ኦኬስትራ ይቶፒያሊ እንፃኽስቱስ ሊኽዴስ ጃላ ሾሬንጉስ ጅሜ ቴርሳ::

ዮሃንስ አፈወርኩ ሾሬንጉ ዜሚ 1977 ም/አሜት ዎሉዳ ኬሴትስታሺኹ ባግትስታ ምርኪው ወክትዳ እዝኑሳ አብኖ ቴርሳኒስ አቑ ሼውዳስታ አንኩሊዳ ታምባታ ጚውሳ ዜሜ ቴኬምስታሺና::

60 አሜታዴስ ጃላ ሾሬንግስ አጌራውሳ ፄጌሮ እዝቡሳ እንኮኽስቶ ዜኔግስታቲው ሾሬንጉ ዜሚስ ቴርሱስ ዲግሱስ እጂኹ ሾሬንጉ ንጉስ እስታውሳ ስሞ አግፅኹ ዮሀንስ አፈወርክ ይካቲት 18 ጌርክ 2011 ም/አሜታ ካሜንስትኹ 72 አሜትስ እንዴስ አሌምዴስ ክሪስ አግሌልስታ::ይካቲት 19 ጌርክ 2011 ም/አሜታ ዴውፁ ቴርት ክድስት ስላሴ ካቴድራል ብሽታንዳ ፌፄምስታ::ዮሃንስ አፈወርክ አንኩዋ ጃርካዋ ካሜናማ ዋልታ ጄርጄርካዋ ካንትጙሳ እድሎኪላ አግፃሺኾ::

ንባሮ አግፅንኹኪ ኢቲቪስታ ኢትዮ ፕረስዴስያኽ::