ታምሪኒ ዶክተር

አለሚቱ የኔት

ዳድ ቺፋ ምፅዋቴ ካሲጝዴስ ፋማ 16 አሜቱ አንቤብጝስ ክንቱኽ ዶክተር ሊ ቹአንጌይ 37 አሜቱ አኪም ያኹስ ሜኬሬ ቡንክትጛማ ዊፅኹ ታሪክስታ ካኖ ፋው አኽጝ ቻይናዳ ዙሚትጝፃንታ ያኻ::

ፖሊዮው ቑንዚ ምክንያታስ እንፃኺታስ ይምስ ዳድሾ ፊጝስ ጌደድስትኹ ሊ 16 አሜትስ እሺኾ አንቤብⶓ ክንቱኺ::

ሊ 9 አሚቲ ስር ዝኮስኩስ ቹዋ ታብል ልኩዳ ቔድፃማ አኬምጝ ፄውስታይኒኪላ እንዜጝⶓ ካሌ እስታማ ድኹስታኒ እክምኒስ ጌንዜቦ ጉሽቱና:: ሊ እን ቔድፃማ አኬምጝስ ኬፍንኹ ቴስፊ እሼ:: “ኬሻታጊ ዝኮስኩስ እሊኩ ስራስሪ እሴና፤ አን ኩፅኒ ምስቑናሽቱኻ ና:: ምክንያቲኪላ ዋሺኒኪ አቒታ ዲጊስ እንዜጝጝስ ካሌ ናው እንኾኽስት እሺኹ እላ” ና:: ዲብ ኩፅኒ እክምኒ ሳኪትጛያላ:: ሚንቾውላ እጄውላ ሜክዴስ ጝናስ ያኻውሳ ትሼ ዋያውሳ አካል ጉዳቲኔ ፋይጛ ሙሪሾ ይንቱኺ ሊንጊዲ አቒ ይወቶ ታክሳያሱ አኺኒስ ኪሳይኾ::

ሊ ሙሪሾ ይንቱኺ አቒ ይሙ ቴግባርዳ እሳንስ አሴሜርጙኽ እሺⶓ ዙማ:: አኽጝስኪላ ሲፋንትስ ላጜታ አሜትካስ አካል ጉዳቴንካ ስራስሪስታ ኽሳንትካ አቕሊ ዳድዳ ይማታ ጌዴድስታ::

ሊ ስያ ጋቲታ ሳንቲም ዝኩኽሳ ጐድጓዴ ሰሃኔ እሜማ አዜንፃው አኺኒስ ልኩስታ ጉዝግ ታምትጛማ ዳዱ ዳሪዳ እንጅኩዋማ ይማንታ ያኹኻ:: ሊ ጌርክስ ልቓ ሌኽ ይዋን  ጌንዜቦ ይምዴስ አግፃው እሺኹ ያኹስ፤ እንኪላ 1990ስ ድንጉሊ ጌንዜብ እሺኾ:: ያኼስጉ ውላዋ ጌንዜቦ “ አሊኪስ” እሺኾ እያው:: “እሊኩ እንፃኻሪዴስ እንፃውሳ ጌንዜቦ አግፃኒ፣ ጚው ስንፍኒስ አኽⶓ ድኹዋውስታ እምፕላኒ እምፕላኒ ዳባዳባው አኽⶓ አኒጛ አሜትካኪላ “ሊ”ስ ይዝኩካ እሺⶓ ዲብሳ:: ላጚቲ አሜትካስኪላ “ሊ” ችኻኪያኻ ሳኑዋውላጊ አጌርካው ቤንሾ ዙራ ዙርጝስ ይማ::

ሊ ቹዋ ታብሉ እርዳቲስ 10 አሜታዴስ እንፃንኩ ክንታንትካሊ አባላምቲ አቹሳ ክንቴ ጄሜርኾ::

ሊ አካሉ ጉዳቴና አኽጝስ ፅንጋኽካ ሚንቹኒውላ ክንቲዳ ትኩትጝስ ይሳማ ጁጝስ ሴስታ አሜትዴስ ፋሌንጋ አባላምቲስታ ላጛንቲ አቹሳ ክንቴ አሌዳ:: አኪማ አኽጙ ፋይ ዝኩኽ አኽጝስኪላ ሊ 25 አሜትስ እክምኒው ክንቲ ጝናሾ ቱጝስ ካሉኽ ያኹኒኪላ ኾቱ ታምብስታንት ኩፅኒ ፍታና ያኻማ እጄ:: እን ኩፅኒ ይሴና ያኻታ ካሊፃ:: ሊ ኪላ ካኖ ፊⶓ ጄሜራታ ውሳኒዳ ታንባታ ካሊፃ:: ታይ እስታውሳ ካኖ ፊጝስ አንኩዋ ጌርኮስታ ኻሮ ዊዳ:: ታፍስታ ልኩ ዱንቱስስታ ብራ ያኹስኪላ እንግርግራ ናያላኪያኽ:: አሊዲዳኪላ ታክስኹሳ አኪማ አኽጙሳ እንጉ ሳኪትጝፅጝስ ካላማ ዢንጂያንግ እስታው ጌፄራኻዳ ክሊኒኮ ብስኹ ያኹስ አኬምስታንትካዋ ኻራስታ ጌርካ አጌላጌልጝስ “ታምሪኒ ዶክተር” ናውሳ ስሞ አግፅፃታ ካሊፃ::

ንባሮ አግፅንኹኪ ቢቢሲዴስያኽ