ኢ-ትኬቲንጉ አግልግሎቲ ትራንስፖርቱሳ ችግሮ ኽያማጊያኽ

ታደለ አጋጄ

ቻግኒ መናኻሪዳ ኢ- ትኬቲንጉ አግልግሎቲ ጄሜርጝ እምፕልታቕዳ ታምባሺኹሳ ችግሮ ይጉፅኹ አኽⶓ ትራንስፖርቱሳ አግልግሎቴ ቴኬምስታንትካ እምፕልታቕ ዙሙና::

ኢ-ትኬቲንግ አግልግሎቲ እምፕልታቕ ትራንስፖርቱሳ አግልግሎቴ አግፅጝስ ዝቤናዊ ቴክኖሎጄ ቴኬምስትካማ ትኬቶ ኬውጝስ ትራንስፖርቱሳ አግልግሎቴ አግፃኑ ዳድያኽ::

አማኻሪ ክልልዳ ሊሊትጙንኩ ትራንስፖርቱ አግልግሎቴ እይፅካ ስፍርካዳ ኢ-ተኬቲንጉሳ አግልግሎቴ ጄሜርጝስ እምፕልታቕስ አግልግሎቴ እያማጊያኽ::

አዊ ብሄረሰቡ ቺፅጝፂው ሚንችካ መናኻርካዳ ኢ-ትኬቲንጉሳ ቴክኖሎጄ ጄሜርጝ ትራንስፖርቱሳ ዜርፎ ዝቤንስጝ እንፃኽስስታማጊያኽ::

ቻግኒ መናኻራዳ ትራንስፖርቶ ቴኬምስታንትካ ሰለሞን ታምርስታ ግዛቸዉ በላይነህ ዙሙኑውስታ ኢ-ትኬቲነግ አግልገሎቲ ጄሜርጝ ዳድዳ አጌሌትስትⶓ፣  ታሪፍዴስ ጃላ ብሮ ኬይፅⶓስታ እሊኩሳ ችግርካዋ ይጉፅⶓስታ እሊኩሳ ችግርካዋ ይጉፅⶓ ዙሜካ::

እንዴስ ቤዴራ ትራንስፖርቱ ዜርፍዳ ሚንች ችግር እሺⶓ ቶኬምጝስ ኢ-ትኬቲንጉ አገልግሎቲ እሳንጝጝ  ቱስታው አኽⶓ ጉሽካ:: አክማ ጋንኩ ትራንስፖርቶ አግፅጝስ ቼጌርስትጝስታ መኪናዳ ፊቴ ቻኒጝስ ኬፍቲኒ ችግር ታምባሺኹ ዜርፍ አኽⶓ ዲብስካ::

ቻግኒ ኬቴሙ ትራንስፖርት ፅፈት ጝናሱ አላፊ ደሳለኝ ጌታቸው ኢ-ቲኬቲንጉ አግልግሎቲ መናኻሪዳ ጄሜርጝ ትራንስፖርቶ ቴኬምስታንትካዳ ታሪፍዴስ ጃላ ኬይፅⶓ፣ ፊቴ ቻኒⶓ ይጉፃዉስታ ትራንስፖርቱ ዜርፍዳ ክችክቺ ንቫር ዝኩዋታ ፄዋው አኽⶓ ጌሌፅካ::

እምፕልታቕ ትራንስፖርቶ አግፅጝስ ሺንኪትጜስታ እምቢታማ አግፅጙ  ችግር እሺኹሳ ይጉፅኹ ቴክኖሎጂ አኽⶓ ቶኬምካ::

ኢ-ትኬቲንጉ አግልግሎቲ ዎታትካስ እንፅኺዉሳ ድሎ ፌቴርኹ አኽⶓኪላ ጉሽካ::

ዋሊያ ቴክኖሎጂ ቻግኒ መናኻሪዳ ኢ-ትኬቲንጉ አግልግሎቲ ጄሜራታ ብሄረሰቡ ቺፅጝፂው ትራንስፖርት ሜምሪው እርዳቲስ ቴክኖሎጂ ጄሜርስታታ ፄውⶓ ቶኬምካ::

ቻግኒ መናኻሪ 28 ዳድካሾ ትራንስፖርቱሳ አግልግሎቴ እያው ኽሳንቲ መናኻሪ አኽⶓ ጌሌፅካ::

አዊ ብሄረስቡ ቺፅጝፂው ትራንስፖርትስታ ሎጅስቲክስ ፅፌት ጝናሱ አላፊ መኮንን ላዋይ አዊ ኮምኒኬሽንስ እዩኑ ጊሊፂዳ ብሄረሰቡ ቺፅጝፂው ፅካ መናኻርካዳ ኢ-ትኬቲንጉሳ አግልግሎቴ እያማጊ አኽⶓ እርዳትፅካ::

2017 ም/አታዳ እንጃቢሪ መናኻሪዳ ኢ-ትኬቲንግ ጄሜርⶓ ቶኬምካማ ናካዳ 10 መናኻርካዳ ዝቤናዊ ቴክኖሎጅስ ኢ-ትኪቲንጉ አግልግሎቲስ እንፃኽስስታማጊ አኽⶓ ኽይትጝፅካ::

ይንታውስኪላ ብሄረሰቡ ቺፅጝፂዳ ዋልታ ጌፄርኩ መናኻርካዳ ፄትቲው ችግር ክቼማጊ ካሳታ ኢ-ትኬቲንግ አግልግሎቲ ጄሜራው አኽⶓ አቕፄካ::

ዝቤናዊ ቴክኖሎጂስ ዳረሰኝስ ትኬቶ ኬዋንታ ዎንቤሩ ልክስ ቻናንታስታ ታምባኑሳ ስፍሬ ቱስቲስ ታምባንታ ፄዋው እንፃኽስትጝጚ አኽⶓኪላ ኽይትጝፅካ::